Ti Biag ken Ministerio ni Jesus

Iti Sinagoga Idiay Ilida

IDI nagawid ni Jesus idiay ilida, mabalin a mailadawantay iti pampanunottayo ti pinataudna a ragsak idiay Nasaret. Sakbay a napan nagpabautisar ken Juan nasursurok la bassit a makatawen sakbayna, ni Jesus naawagan kas maysa nga alluwagi. Ngem itan nasaknapen ti pakadamdamaganna kas maysa a managaramid ti datdatlag. Dagiti agtataeng iti ili ti magagaran a makakita kenkuana a mangaramid ti dadduma kadagitoy nakaskasdaaw a bambanag iti tengngada.

Ti panagseggada ti dumakkel bayat a ni Jesus, sigun iti ugalida, ket mapan iti lokal a sinagoga. Bayat dagiti serbisio, isut’ agtakder tapno agbasa, ket ti lukot ti libro ni mammadto nga Isaias ti naiyawat kenkuana. Nasarakanna ti paset a sadiay ibagbagana maipapan iti Daydiay pinulotan ti espiritu ni Jehova, a dayta a paset iti Bibliatayo ita isu ti kapitulo 61.

Kalpasan ti panangbasana no kasano a daytoy ket ikaskasabana ti pannakawayawaya dagiti nakayawan, ti pannakakita dagiti bulsek, ken maipapan iti tawen a pakaay-aywan ni Jehova, inyawat ni Jesus ti linukot iti daydiay tumultulong ket sa nagtugaw. Amin a matmata ti nakaturong kenkuana. Kalpasanna isu ti nagpalawag kadakuada, a nalabit nabaybayag nga inlawlawagna: “Ita nga aldaw daytoy a kasuratan a kangkangngegyo ket natungpalen.”

Nagsiddaaw dagiti tattao kadagiti “sao a natalunggadingan” ket kunada iti maysa ken maysa: “Saan aya nga isu datoy ti anak ni Jose?” Ngem gapu ta pagaammoda a kayatda a makita ti panangaramidna ti datdatlag, intuloy ni Jesus: “Awan duadua a kunaenyonto ngata kaniak daytoy a pangarigan, ‘Mangngagas, agasam man ta bagim met laeng; dagiti adu a nangngegmi a naaramid idiay Capernaum aramidem met ditoy ilim.’” Kaawatan, patien dagiti dati a kaarruba ni Jesus a ti panangagas rebbeng a mangrugi iti pagtaenganda, nga agpaay a pagimbagan dagiti kailianna nga umuna. Gapuna kas impagarupda kasla tinagtagilag-an ni Jesus ida.

Gaput’ pannakailasinna ti panagpampanunotda, insalaysay ni Jesus ti maysa a maiyaplikar a historia. Nagadu dagiti balo idiay Israel idi kaaldawan ni Elias, kinunana, ngem saan a naibaon ni Elias iti asinoman kadagitoy. Imbes ketdi, isut’ napan iti maysa a balo a saan nga Israelita idiay Sidon, a sadiay ti nangaramidanna iti makaispal-biag a milagro. Ket idi kaaldawan ni Eliseo, adu met dagiti agkukutel, ngem ni Eliseo dinalusanna laeng ni Naaman manipud Siria.

Gapu ta nakapungtotda kadagitoy di makaay-ayo a panangyasping iti historia a nangibutaktak iti kinaagum ken kinakurang ti pammatida, dagidiay adda iti sinagoga timmakderda ket pinagtalawda ni Jesus iti ruar ti siudad. Sadiay, iti tapaw ti bantay a nakabangonan ti Nasaret, pinadpadasda nga itappuak koma. Ngem nakapanaw ni Jesus iti panangiggemda ket nakatalaw a sitatalged. Lucas 4:16-30; 1 Ar-ari 17:8-16; 2 Ar-ari 5:8-14.

◆ Apay nga adda ti napalalo a panagragsak idiay Nasaret?

◆ Aniat’ pagarup dagiti tattao iti palawag ni Jesus, ngem aniat’ nakapagura kadakuada?

◆ Aniat’ pinadpadas nga aramiden dagiti tattao ken Jesus?