Biag ken Ministerio ni Jesus

Panagaramid kadagiti Naimbag iti Panaginana

PRIMAVERA ti 31 K.P. Sumagmamano a bulan ti naglabasen nanipud nakisao ni Jesus ti maysa a babai idiay bubon sadi Samaria idi agdaldaliasat manipud Judea nga agturong idiay Galilea.

Itan, kalpasan ti nasaknap a panangisursurona iti intero a Galilea, nagrubuat manen ni Jesus nga agturong Judea, a sadiay ti nangaskasabaanna kadagiti sinagogada. No maidilig iti atension a naipaay iti ministeriona idiay Galilea, bassit ti salaysayen ti Biblia kadagiti ar-aramid ni Jesus idiay Judea bayat daytoy a panagsarungkarna ken bayat dagiti bulan a binusbosna ditoy kalpasan ti napalabas a paskua. Kaawatan a ti ministeriona ti saan a paborable a naawat idiay Judea a kas idiay Galilea.

Di nagbayag nagturongen ni Jesus idiay kangrunaan a siudad ti Judea, ti Jerusalem, a maipaay ti Paskua iti 31 K.P. Ditoy, iti asideg ti ruangan dagiti karnero ti siudad, isu ti tangke a managan Betesda, nga isut’ immayan dagiti adu a masaksakit, bulsek, ken pilay. Patienda a maagasan dagiti tattao babaen ti ibababada kadagiti dandanum ti tangke inton dagitoy makiborda.

Dayta ti aldaw ti Panaginana, ket nakakita ni Jesus ti maysa a lalaki idiay tangke a masaksakiten iti 38 a tawtawen. Gapu ta ammonan ti kabayag ti panagsaksakit ti lalaki, insaludsod ni Jesus: “Kayatmo ti mapaimbag?”

“Apo, awan ti tao a mangipisok kaniak idiay tangke no makibor ti danum,” insungbatna, “a no mapmapanak pay laeng nakababan ti sabali nga umun-una ngem siak.”

Kuna ni Jesus kenkuana: “Tumakderka, bagkatem ta iddam ket magnaka.” Ket naigiddato a daydi tao napaimbag ket binagkatna ti iddana ket nagna!

Ngem idi makita dagiti Judio ti lalaki, kunada: “Aldaw ti Panaginana, ket di Maipalubos kenka a bagkatem ti iddam.”

Ngem ti lalaki simmungbat kadakuada: “Ti nangpaimbag kaniak kinunana kaniak, ‘Bagkatem ti iddam ket magnaka.’”

“Asino a tao ti nagkuna kenka, ‘Bagkatem ti iddam ket magnaka’?” insaludsodda. Ngem ni Jesus immadayo ta adu unay dagiti tattao iti daytoy a disso, gapuna daydiay napaimbag dina ammo ti nagan ni Jesus. Iti kamaudiananna, nupay kasta, nagsarak daydiay lalaki ken ni Jesus idiay templo, ket naammuanna no siasino daydiay nangpaimbag kenkuana.

Gapuna daydiay tao a napaimbag sinapulna dagiti Judio tapno ibagana kadakuada a ni Jesus ti nangpaimbag kenkuana. Idi maammuanda daytoy, napan dagiti Judio ken Jesus. Gapu iti ania a rason? Tapno maammuanda no babaen iti ania a maaramidanna dagitoy nakaskasdaaw a bambanag? Saan no di ket tapno agsapulda ti pammabasolanda kenkuana agsipud ta ar-aramidenna dagitoy naimbag a bambanag iti Panaginana. Ket isuda pay ti nangrugi a mangidadanes kenkuana! Lucas 4:44; Juan 5:1-16.

◆ Kasano kabayagen nanipud iti maudi nga isasarungkar ni Jesus idiay Judea?

◆ Apay a ti tangke a naawagan ti Betesda nalatak unay?

◆ Ania a milagro ti inaramid ni Jesus idiay tangke, ket ania ti tignay dagiti Judio?