Biag ken Ministerio ni Jesus

Napagsaludsodan Maipapan ti Panagayunar

NGANGNGANI makatawen ti naglabasen nanipud itatabuno ni Jesus iti Paskua idi 30 K.P. Itattan, naibaluden ni Juan Bautista iti sumagmamanon a bulan. Numan pay tinarigagayanna nga agbalin a paspasurot ni Kristo dagiti adalanna, saan nga amin ti nagbalin a kasta.

Itan dadduma kadagitoy nga ad-adalan ti naibalud a Juan ti napan ken Jesus ket nagsaludsodda: “Apay-apay a dakami ken dagiti Pariseo agayunarkami a masansan ngem dagiti adalam dida agayunar?” Agay-ayunar dagiti Pariseo a mamindua iti maysa a lawas kas maysa a seremonia iti relihionda. Ket dagiti adalan ni Juan nalabit tultuladenda met laeng dayta a kustombre. Mabalin nga agay-ayunarda met tapno pagladingitanda ti pannakaibalud ni Juan ket pagsidsiddaawanda no apay a dagiti adalan ni Jesus dida tumipon kadakuada iti daytoy a panangiyebkas iti panagladingitda.

Kas sungbat inlawlawag ni Jesus: “Mabalin aya a dagiti makiboda agladingitda no adda pay laeng kadakuada ti nobio? Ngem umayto ti aldaw a ti nobio maikkatto kadakuada, ket iti kasta agayunardanto.”

Rebbeng a malagip itan dagiti adalan ni Juan a nagsao ni Juan mismo maipapan ken Jesus kas ti Nobio. Gapuna, bayat nga adda ni Jesus, imbilang ni Juan a di maiyanatop ti panagayunar, ket kasta met dagiti adalan ni Jesus. Kamaudiananna, idi natay ni Jesus, nagladingit ken nagayunaren dagiti adalanna. Ngem idi isu ti napagungaren ken immulin sadi langit, awanen ti pakaigapuan pay ti naladingit a panagayunarda.

Sumaganad, imbaga ni Jesus dagitoy a pangngarig: “Awan ti tao a mangitakup ti lupot a di pay kimsen iti pagan-anay a daan; ta iti kasta inton kumsenen ti naitakup, rumsua a lumawlawa ti pigisna. Ket dida met ikabil ti baro nga arak kadagiti supot a lalat a daan; ta no kasta dagiti lalat bumtakda ket ti arak maibelleng ket madadael dagiti lalat. Ngem ikabilda ti arak a baro kadagiti lalat a baro.” Ania ti pakainaigan dagitoy a pangngarig iti panagayunar?

Tultulongan ni Jesus dagiti adalan ni Juan a mangapresiar nga awan asinoman a rebbeng a manginanama kadagiti paspasurotna a makitunos kadagiti daan nga ar-aramid ti Judaismo kas ti seremonial a panagayunar. Isu di immay a mangtakup ken mangpaatiddog ti biag ti marunrunoten a sistema ti panagdayaw a sisasaganan a maikkat. Ti Kinakristiano di koma maallukoy a makikompormi iti Judaismo iti dayta nga aldaw agraman ti tradision ti tattao. Saan, dayta ti saan a maysa a baro a takup iti maysa a daan a pagan-anay wenno kas baro nga arak iti maysa a daanen a lalat. Mateo 9:14-17; Marcos 2:18-22; Lucas 5:33-39; Juan 3:27-29.

◆ Asino dagiti agay-ayunar, ken agpaay iti ania a panggep?

◆ Apay a di agayunar dagiti adalan ni Jesus bayat ti kaaddana kadakuada, ken kalpasanna kasano a di nagbayag nagpukaw met laeng ti pakaigappuan ti panagayunar?

◆ Ania a pangngarig dagiti imbaga ni Jesus, ket ania ti kaipapananda?

[Ladawan iti panid 8]