Ti Biag ken Ministerio ni Jesus

Maysa a Leksion iti Kinamanangngaasi

MABALIN nga adda pay ni Jesus idiay Nain, nga iti nabiit pay pinagungarna ti anak a lalaki ti maysa a balo, wenno nalabit isu ti sumarsarungkar iti maysa a kaparanget a siudad. Maysa a Pariseo nga agnagan Simon kayatna a makita nga as-asideg daydiay agar-aramid kadagita a nakaskasdaaw a bambanag. Gapuna inawisna ni Jesus a makipangan a kaduana.

Babaen ti panangmatmatna iti okasion kas gundaway a makatulong kadagidiay adda, inawat ni Jesus dayta nga awis, kas panangawatna met iti awis a makipangan kadagiti agsingsingir ti buis ken managbasol. Kaskasdi, idi sumrek iti balay ni Simon, saan nga inawat ni Jesus ti naayat nga atension a masansan maipapaay kadagiti sangaili.

Ti nakapalluka ti agbalin a nakapudpudot ken narugit gapu iti panagpagpagna kadagiti natapuk a daldalan ti Galilea, ket nakaiyugalian nga aramid ti kinamanagpadagos a bugguan ti saksaka dagiti sangaili babaen ti nalamiis a danum. Ngem dagiti saksaka ni Jesus saanda a nabugguan idi dimteng sadiay. Ken isut’ saan met nga immawat iti mangabrasa nga agep, a dayta ti gagangayen nga ugali. Ken ti nakaiyugalian a lana ti kinamanagpadagos ti saan a naipaay para iti buokna.

Kabayatan ti pannangan, bayat a simmango dagiti sangailin iti lamisaan, siuulimek a simrek ti maysa a babai idiay siled a di naawis. Isut’ pagaammo ti siudad nga addaan imoral a panagbiag. Nalabit nangnangngegannan ti pannursuro ni Jesus, agraman ti panangawisna nga ‘amin dagidiay agrigrigat ken madagdagsenan umayda kenkuana ta paginanaenna ida.’ Gapu ta isu ti natignay unay iti inna nakita ken nangngegan, sinapsapulna ita ni Jesus.

Ti babai ti napan idiay likudan ni Jesus idiay lamisaan ket nagparintumeng iti sakaananna. Idi dagiti luana agtinnagda iti saksakana, pinunasanna ida babaen iti buokna. Isu ti nangala met iti bangbanglo manipud iti praskitana, ket bayat a silalailo nga ag-agepanna dagiti saksakana, impakbona ti lana kadakuada. Matmatmatan ni Simon daytoy a sipupungtot. “Daytoy a tao, no koma no mammadto,” kunkunana iti panunotna, “ammona koma no asino ken no ania a kita ti babai daytoy a mangsagid kenkuana, ta isu managbasol.”

Idi maawatanna ti pampanunotenna, kuna ni Jesus: “Simon, adda ibagak kenka.”

“Ibagam, mannursuro!” insungbatna.

“Maysa a nagpautang adda dua a nakautang kenkuana,” inrugi ni Jesus. “Ti maysa a nakautang kenkuana iti lima gasut a denario, ket ti maysa limapulo. Ket gapu ta awan ti pagbayadda pinakawanna ida nga agpadpada. Asino kadagitoy, ngarud, ti agayatto kenkuana iti ad-adu?”

“Pagarupek,” kuna ni Simon, a nalabit kasla awan ti panangipatpategna iti kasla awan pakaimudmudinganna a saludsod, “daydiay nangpakawananna ti adu.”

“Nalinteg ti panangipatom,” insungbat ni Jesus. Ket simmango iti daydiay babai, kinunana ken Simon: “Makitam daytoy a babai? Simrekak iti balaymo; saanka a nangted ti danum a maipaay kadagitoy saksakak. Ngem daytoy a babai sinibuganna dagitoy saksakak kadagiti luluana ket pinunasanna ida kadagiti buokna. Saannak nga inagepan; ngem daytoy, nanipud itay simrekak, saan a nagsardeng nga immungngo kadagiti saksakak. Saanmo a sinapsapuan toy ulok iti lana; ngem daytoy sinapsapuanna iti bangbanglo dagiti saksakak.”

Ket nangipakita ti babai ti pammaneknek ti naimpusuan a panagbabawina iti napalabas nga imoral a panagbiagna. Gapuna nagpatingga ni Jesus: “Gapuna kunak kenka, dagiti basbasolna, nga adu napakawanda, ta nagayat iti adu; ngem ti mapakawan iti bassit, bassit ti panagayatna.”

Nikaanoman saan a palpalabsen wenno konkonsentiran ni Jesus ti imoralidad. Imbes ketdi, iparangarang daytoy a pasamak ti naayat a pannakaawatna kadagiti tattao a nakaaramid biddut iti panagbiagda ngem kalpasanna iparangarangda ti panagladingitda kadagitoy gapuna umayda ken Kristo a mabang-aran. Ti panangtedna ti pudpudno nga inana iti babai, kuna ni Jesus: “Dagiti basbasolmo mapakawanda. . . . Ti pammatim insalakannaka; inka a sitatalna.” Lucas 7:36-50; Mateo 11:28-30.

◆ Kasano a ni Jesus inawat ni Simon a manangsangailina?

◆ Asino ti nangsapsapul ken Jesus, ken apay?

◆ Ania a pangngarig ti impaay ni Jesus, ket kasanot’ panangyaplikarna iti dayta?