Panangtarus iti Biblia—Ania ti Tumulong Kenka?
“SIAANNAD nga inlimedmo kadagiti mamasirib ken nasasaririt, ket impalgakmo ida kadagiti maladaga.” (Lucas 10:21) Dagitoy a sasao nga inyebkas ni Jesus iti nailangitan nga Amana ipakitana a masapul a maaddaantayo iti umiso a kababalin tapno maawatantayo ti Biblia. Agminar ti kinasirib ti Dios iti panangipaayna iti maysa a libro a dagiti laeng napakumbaba, nalaka nga agpaisuro a tattao ti pudpudno a makatarus.
Marigatan nga agpakumbaba ti kaaduan kadatayo. Addaantayo amin iti natawid a pagannayasan nga agtangsit. Kanayonanna, agbibiagtayo “kadagiti maudi nga aldaw,” iti tengnga dagiti tattao a ‘managayat iti bagbagida, natangken ti uloda, natangsit gapu iti panagpannakkel.’ (2 Timoteo 3:1-4) Dagitoy ti sumagmamano a kababalin a manglapped iti panangtarustayo iti Sao ti Dios. Ti rigatna no dadduma, maimpluensiaandatayo dagiti tattao iti aglawlawtayo. Kasano ngarud a maaddaanka iti kababalin a kasapulan tapno matarusam ti Biblia?
Panangisagana iti Puso ken Panunot
Ni Esdras a nagkauna a lider ti ili ti Dios “insaganana ti pusona nga umuman iti linteg ni Jehova.” (Esdras 7:10) Adda kadi dagiti pamay-an a maisaganatayo ti pusotayo? Adda. Mairugitayo dayta babaen ti panangpatanortayo iti umiso a panangmatmat iti Kasuratan. Insurat ni apostol Pablo kadagiti pada a Kristiano: “Idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios.” (1 Tesalonica 2:13) Nupay nausar dagiti tattao a mangisurat iti Kasuratan, naggapu ken ni Jehova ti insuratda. No bigbigentayo dayta a napateg a kinapudno, agbalintayo nga ad-adda a manangipangag iti mabasatayo.—2 Timoteo 3:16.
Ti sabali pay a pamay-an a maisaganatayo ti pusotayo ket babaen ti kararag. Yantangay ti Biblia ket impaltiing ti nasantuan nga espiritu, ad-adda a matarusantayo ti mensahena babaen ti tulong dayta nga espiritu. Tapno magun-odtayo dayta a tulong, masapul nga ikararagtayo dayta. Imutektekanyo ta dayta ti pakaseknan ti salmista idi insuratna: “Ikkannak iti pannakaawat, tapno matungpalko ti lintegmo ken tapno masalimetmetak dayta buyogen ti isuamin a puso.” (Salmo 119:34) Nasken nga ikararagtayo saan laeng a ti mental nga abilidad a mangtarus iti naisurat no di ket uray ti kababalin ti puso a tumulong kadatayo a mangawat iti dayta. Tapno matarusantayo ti Biblia, kasapulan nga ipangagtayo no ania ti pudno.
Bayat nga agmennamennaka tapno maaddaanka iti umiso a panangmatmat, panunotem no ania ti maaramidan kenka ti panangadal iti Biblia. Adu ti agkakaimbag a rason no apay a basaentayo ti Sao ti Dios, ngem ti kapatgan a rason isu ti panangtulongna kadatayo nga umadani iti Dios. (Santiago 4:8) Bayat a mabasatayo no ania ti reaksion ni Jehova iti nagduduma a kasasaad, no kasano nga inapresiarna dagidiay mangay-ayat kenkuana, ken no kasano a nakilangen kadagidiay nangtallikud kenkuana, matarusantayo no ania ti personalidadna. Ti kanayon koma a kangrunaan a panggeptayo no apay a basaentayo ti Biblia ket tapno ad-adda a maam-ammotayo ti Dios, iti kasta, mapabileg ti relasiontayo kenkuana.
Dagiti Lapped iti Panangpatanor iti Umiso a Kababalin
Ania ti mabalin a manglapped kadatayo a mangtarus iti Sao ti Dios? Ti maysa a lapped ket ti di umiso a panangipakita iti kinasungdo. Kas pagarigan, mabalin nga adda dagiti tattao a raraemem unay ti patpatien ken kapanunotanda. Ngem kasanon no dagitoy a tattao saanda a talaga nga itantandudo wenno ipatpateg ti kinapudno ti Sao ti Dios? Iti sidong dagiti kasta a kasasaad, mabalin a narigrigat ti panangtarustayo iti isursuro ti Biblia. Gapuna, iparparegta ti Biblia nga usigentayo a naimbag dagiti naisuro kadatayo.—1 Tesalonica 5:21.
Naipasango iti kasta a karit ni Maria nga ina ni Jesus. Dimmakkel iti tradision dagiti Judio. Sinurotna a naimbag ti Mosaiko a Linteg ken awan duadua a napan iti sinagoga. Ngem nabigbigna kamaudiananna a saanen nga awaten ti Dios ti panagdayaw nga insuro kenkuana dagiti dadakkelna. Gapu iti dayta, inawat ni Maria ti pannursuro ni Jesus ket isu ti maysa kadagiti nagbalin a damo a kameng ti kongregasion Kristiano. (Aramid 1:13, 14) Dayta ket saan a kinaawan panagraem kadagiti dadakkelna wenno kadagiti tradisionda; imbes ketdi, maysa dayta nga ebkas ti panagayatna iti Dios. Tapno makagunggona kadatayo ti Biblia, masapul a tuladentayo ni Maria a nangipangpangruna iti kinasungdona iti Dios ngem iti asinoman.
Makapaladingit, adu a tattao ti saan unay a mangipatpateg iti kinapudno a linaon ti Biblia. Adda dagidiay sumursurot lattan kadagiti narelihiosuan a tradision a naibatay iti kinaulbod. Iyaleng-aleng ti dadduma ti kinapudno kas ipakita ti panagsasao ken panagbiagda. Wen, adda isakripisiom no awatem ti kinapudno iti Biblia: Mabalin a bumusor kenka dagiti gagayyem, kaarruba, katrabahuan, ken uray dagiti kapamiliam. (Juan 17:14) Nupay kasta, insurat ti maysa a masirib a tao: “Gatangem ti mismo a kinapudno ket saanmo nga ilako dayta.” (Proverbio 23:23) No tagipatgem unay ti kinapudno, tulongannaka ni Jehova a mangtarus iti Biblia.
Kaskasdi, ti sabali pay a lapped iti panangtarus iti mensahe ti Biblia isu ti panagkedked a mangyaplikar iti ibagbagana. Kinuna ni Jesus kadagiti adalanna: “Naipaay kadakayo ti pannakaawat kadagiti sagrado a palimed ti pagarian ti langlangit, ngem saan a naipaay kadagidiay a tattao. Ta ti puso daytoy nga ili nagbalin a di makaawat, ket kadagiti lapayagda dimngegda nga awanan panagtignay.” (Mateo 13:11, 15) Saan a manangipangag, saan a situtulok nga agbalbaliw ti kaaduan kadagidiay kinasabaan ni Jesus. Anian a naiduma daydiay agdaldaliasat a komersiante a dinakamat ni Jesus iti maysa nga ilustrasionna! Idi nakita ti komersiante ti maysa a perlas a nangato ti gatadna, inlakona ti amin nga ik-ikutanna tapno magatangna dayta. Kasta met koma ti kapategna kadatayo ti panangtarus iti kinapudno a linaon ti Biblia.—Mateo 13:45, 46.
Ti Karit ti Panagpaisuro
Ti maysa a dakkel a karit iti panangtarus iti Biblia isu ti panagbalin a nalaka a masuruan. Mabalin a marigatan ti maysa a tao a mangawat kadagiti baro a kapanunotan manipud iti maysa nga agparang a nanumo. Kaskasdi, ‘awanan adal ken gagangay’ a tattao dagiti apostol ni Jesu-Kristo. (Aramid 4:13) Kastoy ti insurat ni Pablo no apay nga isuda ti pinili ni Jesus: “Makitayo ti panangayabna kadakayo, kakabsat, a saan nga adu a mamasirib iti nainlasagan a pamay-an ti naayaban, saan nga adu a mannakabalin, saan nga adu a natan-ok pannakayanakna; no di ket ti Dios pinilina ti minamaag a bambanag ti lubong, tapno maibabainna dagiti masirib a tattao.” (1 Corinto 1:26, 27) No marigatanka nga agpakumbaba iti panangisuro ti maysa a nanumo a tao, laglagipem nga isu ket us-usaren laeng ti Dios a mangisuro kenka. Ania pay koma ti pribilehio a natantan-ok ngem iti agpaisuro ken ni Jehova, ti ‘Naindaklan a Manangisuro’?—Isaias 30:20; 54:13.
Ni Naaman, a Siriano a panguluen ti armada, ti maysa a saan a kaskarina a nangawat iti panangisuro ti maysa a nanumo a tao. Tapno umimbag ti kukutelna, napan ni Naaman ken ni Eliseo a propeta ni Jehova. Ngem maysa laeng nga adipen ti nausar a mangidanon iti instruksion a suroten ni Naaman. Ti mensahe ken ti wagas a pannakaidanonna ti nangkarit iti kinapakumbaba ni Naaman, isu a nagkedked idi damo nga agtulnog iti imbaga ti propeta ti Dios. Idi agangay, binaliwan ni Naaman ti kababalinna ket immimbag. (2 Ar-ari 5:9-14) Mabalin a makakarit met kadatayo ti panangsurot iti ibagbaga ti Biblia. Mabalin a maadaltayo a tapno umimbagtayo iti naespirituan ken moral, masapul a surotentayo ti baro a wagas ti biag. Sipapakumbaba kadi nga agpaisurotayo iti maysa no ania ti nasken nga aramidentayo? Dagidiay laeng situtulok nga agpaisuro ti makatarus iti mensahe ti Biblia.
Ti maysa a nasayaat a kababalin ket imparangarang ti maysa nga opisial iti sidong ni Candace a reyna dagiti Etiope. Madama a nakakaruahe iti panagsublina idiay Africa idi isu ket kinamakam ni Felipe. Inyimtuod ni Felipe no maawatan ti lalaki ti basbasaenna. Sipapakumbaba nga insungbat ti opisial: “Kasano koma a maawatak, malaksid no adda nangidalan kaniak?” Apaman a nakagun-od iti pannakaawat iti Sao ti Dios, nabautisaran dayta a tao. Kalpasan dayta, “sirarag-o a nagtultuloy iti dalanna.”—Aramid 8:27-39.
Ordinario a tattao ti kaaduan kadagiti Saksi ni Jehova. Kada lawas, mangikonduktada iti panagadal iti Biblia iti nasurok nga innem a milion a tattao. Isursuro ti Biblia ti kasayaatan a wagas ti panagbiag, ilawlawagna ti kakaisuna a namnama ti sangatauan, ken isurona no kasanotayo a maam-ammo ti Dios. Gapuna, minilion a tattao ti nakapaneknek a makaparagsak unay ti panangadal iti Biblia ken panangtarus iti mensahena. Mabalinmo a tagiragsaken dayta.
[Ladawan iti panid 7]
Saan a nalaka ken ni Naaman ti agpaisuro iti maysa a nanumo nga adipen
[Ladawan iti panid 7]
Ti panangtarus iti linaon ti Biblia paragsakenna ti pusotayo