DENARIO

Pirak a sinsilio dagiti Romano nga agdagsen iti agarup 3.85 g (0.124 oz t) ket ngarud addaan iti agdama a pateg a 74 a sentimo ti U.S. Nakitikitan iti kaasping ti ulo ni Cesar ket dayta idi ti “panguluen a buis a sinsilio” a kinalikaguman dagiti Romano manipud kadagiti Judio. (Mt 22:19-21) Kadagidi al-aldaw ti naindagaan a ministerio ni Jesus, dagiti trabahador iti panagtalon gagangay nga immawatda iti maysa a denario maipaay iti 12-oras a panagtrabaho iti maysa nga aldaw. (Mt 20:2) Gapuna, iladawan ti Apocalipsis 6:6 ti maysa a nakaro a kasasaad iti panangibagana a ti maysa a litro ti trigo wenno tallo a litro ti sebada aggatad iti maysa a denario (tangdan iti agmalmalem).

No ti nangina a nardo nga inusar ni Maria, kabsat ni Lazaro, iti panangsapsapona ken Jesu-Kristo nailako iti 300 a denario (tangdan iti gistay makatawen), mabalin a kayat a sawen daytoy a dakkel a gatad ti kuarta ti naikabil koma iti kahon ti kuarta nga ay-aywanan idi ni Judas Iscariote. Di pakasdaawan a ti nakusit a ni Judas Iscariote simmupiat iti kasta unay, yantangay saanna a matakaw ti uray sangkabassit iti daytoy dakkel a gatad.​—Jn 12:3-6; 13:29; Mr 14:3-11.

Ti manangsaranay a Samaritano iti pangngarig ni Jesus nakagasto iti dua a denario (tangdan iti dua nga aldaw) tapno tulonganna ti maysa a di am-ammo a ganggannaet, ket indeklarana a situtulok a mangibaklay kadagiti kanayonan a gastos maigapu kenkuana. (Lu 10:33-35) Iti kasupadina, iti maysa kadagiti pangngarig ni Jesus a mangipagpaganetget a kasapulan ti panagbalin a manangpakawan, ti maysa nga adipen a nawaswas ti utangna nga 60,000,000 a denario ket saan a situtulok a mangpakawan iti 100-denario nga utang ti padana nga adipen.​—Mt 18:24-33.