Agpatingganto Pay Ngata ti Kinapanglaw?

“ADTOY! ti lulua dagidiay mairurrurumen, ngem awananda ti manangliwliwa; ket iti dasig dagiti manangirurumenda adda idi pannakabalin, iti kasta awananda ti manangliwliwa,” kinuna ni masirib nga Ari Solomon ti nagkauna nga Israel. (Eclesiastes 4:1) Awan duadua a napanglaw ti adu kadagiti tuktukoyenna a mairurrurumen.

Saan laeng nga iti pinansial a kasasaad a matukod ti kinapanglaw. Sigun iti impormasion nga impaay ti World Bank idi Hunio 2002, “napattapatta nga idi 1998, 1.2 bilion a tao iti sangalubongan ti addaan iti pagbiag a nababbaba ngem $1 kada aldaw . . . ken 2.8 bilion a tao ti addaan iti pagbiag a nababbaba ngem $2 kada aldaw.” Napaliiw a nupay nababbaba daytoy a bilang ngem iti dati, “nangato latta daytoy a bilang no mainaig iti kinapanglaw.”

Agpatingganto ngata ti kinapanglaw? Kinuna ni Jesu-Kristo kadagiti adalanna: “Kankanayon nga adda kadakayo dagiti napanglaw.” (Juan 12:8) Ngem kaipapananna kadi dayta a dinto agpatingga ti kinapanglaw ken dagiti pakarigatan nga ibungana? Saan, ta nupay di inkari ni Jesus kadagiti pasurotna a bumaknangdanto amin, saantay koma a panunoten nga awanen ti namnama dagiti nakurapay maibatay kadagiti sasaona.

Iti laksid ti panagregget ti tao ken ti kinapudno a masansan a mapaay dagiti kari a mapagpatingga ti kinapanglaw, ti Sao ti Dios, ti Biblia, ipanamnamana kadatayo nga iti din agbayag awanton ti agsagaba iti kinakurapay. Kinapudnona, impakaammo ni Jesus ti “naimbag a damag kadagiti napanglaw.” (Lucas 4:18) Daytoy naimbag a damag iramanna ti kari nga agpatingganto ti kinapanglaw. Mapasamak daytoy inton iyeg ti Pagarian ti Dios ti nalinteg a kasasaad ditoy daga.

Anian a nagpaidumanto dayta a lubong! Ti nailangitan nga Ari a ni Jesu-Kristo “maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto.” Kinapudnona, “iti pannakairurumen ken iti kinaranggas subbotennanto ti kararuada.”​—Salmo 72:13, 14.

Mainaig iti dayta a tiempo, kuna ti Mikias 4:4: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta.” Ti Pagarian ti Dios risutennanto dagiti amin a parikut a mangparparigat iti sangatauan, nga uray la ikkatenna ti sakit ken ipapatay. Ti Dios “alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”​—Isaias 25:8.

Makapagtalekkayo kadagitoy a kari agsipud ta impaltiing a mismo ti Dios. Apay a diyo usigen ti ebidensia a mangpaneknek a mapagtalkan dagiti padto ti Biblia?

[Picture Credit Line iti panid 32]

FAO photo/M. Marzot