Ti Biag ken Ministerio ni Jesus

Pammakada a Pammagbaga

TI PANGLAGLAGIP a pannangan nalpasen, ngem ni Jesus ken dagiti apostolna addada pay laeng iti makingngato a siled. Nupay ni Jesus dandani a pumanawen, adu pay ti kayatna nga ibaga. “Saan koma nga agpulkok ti pusoyo,” liniwliwana ida. “Mangalagadkayo ti pammati iti Dios.” Ngem adu pay ti kasapulan. “Mangalagadkayo met ti pammati kaniak,” innayonna.

“Idiay balay ni Amak adda adu a pagianan,” intuloy ni Jesus. “Innak mangisagana ti pagiananyo . . . tapno no adino ti yanko, addakay met koma. Ket no adino ti papanak, ammoyo ti dalan.” Saan a naawatan dagiti apostol a ni Jesus agsasao maipapan iti ipapan idiay langit, gapuna insaludsod ni Tomas: “Apo, dikam ammo no adino ti papanam. Kasano ti pannakaammomi ti dalan?”

“Siak ti dalan ken ti kinapudno ken ti biag,” insungbat ni Jesus. Wen, babaen laeng ti panangawat kenkuana ken panangtulad ti panagbiagna a makastrek ti asinoman iti nailangitan a balay ti Ama agsipud ta, kas kinuna ni Jesus: “Awan ti umay ken Ama no di magna kaniak.”

“Apo, ipakitam kadakami ti Ama,” inkalikagum ni Felipe, “ket umanayen kadakami.” Kaawatan a kayat ni Felipe a mangted ni Jesus ti makita a pagilasinan ti Dios, kas kadagidiay naited idi ugma kadagiti sirmata kada Moises, Elias, ken Isaias. Ngem, kinapudnona, dagiti apostol addaandat’ banag a nasaysayaat ngem iti dayta a kita dagiti sirmata, kas kinuna ni Jesus: “Nabayag nga aldaw nga addaak kadakayo, ket dinak nailasin, Felipe? Ti nakakita kaniak, nakitana ni Ama.”

Apagpag-isu ti panangisarming ni Jesus iti personalidad ni Amana a ti panagbiag a kaduana ken panangpaliiw kenkuana, iti epektona, kasla aktualen a nakitana ti Ama. Kaskasdi, ti Ama natantan-ok ngem ti Anak, kas bigbigen ni Jesus: “Dagiti sao a sawek kadakayo saanko a sawen a sisiak.” Siuumiso nga inted ni Jesus ti dayaw ti sursurona iti nailangitan nga Amana.

Ania ngatan a makaparegta kadagiti apostolna a denggen ni Jesus a mangibaga kadakuada ita: “Ti mangalagad pammati kaniak, dagiti aramid nga aramidek, aramidennanto met; ket dakdakkelto pay ngem dagitoy ti aramidenna”! Di kayat a sawen ni Jesus a dagiti paspasurotna agaramiddanto kadagiti daddadakkel a namilagruan a pannakabalin ngem ti naaramidanna. Saan, no di ket kayatna a sawen itultuloydanto ti ministeriona iti nabaybayag a tiempo, iti adayo a dakdakkel a disso, ken iti adayo nga ad-adu a tattao.

Saanto a baybay-an ni Jesus dagiti adalanna kalpasan ti ipapanawna. “Ket ti aniaman a dawatenyonto iti naganko,” inkarina, “dayta ti aramidekto.” Mainayon pay, kinunana: “Ket agdawdawatakto ken Ama ket ikkannakayto ti sabali a katulongan tapno adda kadakayo nga agnanayon, nga isu ti espiritu ti kinapudno.” Iti kamaudiananna, kalpasan ti iyuulina sadi langit, imbukbok ni Jesus kadagiti adalanna ti nasantuan nga espiritu, daytoy sabali a katulongan.

Ti ipapanaw ni Jesus asidegen, ta kinunana: “Adda pay apagbassit ket ti lubong dinakto makitan.” Ni Jesus agbalinton nga espiritu a parsua nga awanton tao a mabalin a makakita. Ngem inkari manen ni Jesus kadagiti matalek nga apostolna: “Ngem dakayo makitadakto, gapu ta agbiagak ken agbiagkayto met.” Wen, saanto laeng nga agparang ni Jesus kadakuada iti natauan a porma kalpasan panagungarna no di ket inton tiempona pagungarennanto ida iti biag a kaduana idiay langit kas espiritu a parparsua.

Ita iyebkas ni Jesus ti simple a pagalagadan: “Ti addaan kadagiti bilbilinko ket tungpalenna ida, isu dayta ti agayat kaniak. Ket ti agayat kaniak ayatento ni Amak, ket isu ayatekto ket agparangakto kenkuana.”

Iti daytoy ni apostol Judas, daydiay managan met ti Tadeo, simminga: “Apo, ania ti mapasamak ta agparangkanto kadakami ket saan nga iti sangalubongan?”

“No adda agayat kaniak,” insungbat ni Jesus, “salimetmetannanto ti saok ket ni Amak ayatennanto . . . Ti di agayat kaniak saanna a tungpalen dagiti saok.” Saan a kas dagiti natulnog a paspasurotna, ti lubong inwaksina ti pannursuro ni Kristo. Gapuna saanna nga ipanayag ti bagina kadakuada.

Kabayatan ti naindagaan a ministeriona, insuro ni Jesus ti adu a bambanag kadagiti apostolna. Kasanoda a lagipen amin ida, nangnangruna ta, uray agingga itoy a kanito, nagadu ti saanda pay a naawatan? Makaparagsak ta, inkari ni Jesus: “Ti katulongan, ti nasantuan nga espiritu, nga ibaonto ni Ama iti naganko, isu isuronanto kadakayo dagiti amin a banag ket ipalagipnanto kadakayo dagiti isuamin nga imbagak kadakayo.”

Kas panangliwliwa manen kadakuada, kuna ni Jesus: “Ti talna ibatik kadakayo, ti talnak itdek kadakayo. . . . Saan koma nga agpulkok ti pusoyo ken di agbuteng.” Pudno, ni Jesus pumanawen, ngem inlawlawagna: “No inayatdak koma, nagrag-okay koma a pudno, ta innak ken Ama, ta ni Ama dakdakkel ngem siak.”

Ti natda a tiempo ni Jesus kadakuada bassiten. “Diak makipagsaonton ti adu kadakayo,” kunana, “ta ti agturay ti lubong umayen. Ket awan ti pannakatengngelna kaniak.” Ni Satanas a Diablo, a nabalinannat’ simrek ken Judas ket isut’ natengngelna, ti agturay iti lubong. Ngem awan pagkapuyan a basol ken Jesus a mabalin nga usaren ni Satanas tapno isut’ ibaw-ingna manipud panagserbina iti Dios. Juan 14:1-31; 13:27; Lucas 22:3, 4; Exodo 24:10; 1 Ar-ari 19:9-13; Isaias 6:1-5.

▪ Sadino ti papanan ni Jesus, ket ania a sungbat ti inawat ni Tomas maipapan iti dalan nga agturong idiay?

▪ Babaen iti panagdawatna, kaawatan nga aniat’ kayat ni Felipe nga ipaay ni Jesus?

▪ Apay a daydiay nakakita ken Jesus nakitana metten ti Ama?

▪Kasano a dagiti pasurot ni Jesus makaaramiddanto ti dakdakkel nga ar-aramid ngem ti naaramidanna?

▪ Iti ania a kaipapanan a ni Satanas awan ti pakatengngelanna ken Jesus?