• Ay-ayaten ni Jehova Dagidiay ‘Agbunga Buyogen ti Panagibtur’
    Ti Pagwanawanan (Pagadalan)—2018 | Mayo

    • 7. (a) Asino ti irepresentar ti “agtaltalon,” “puon ti ubas,” ken ‘sangsanga’? (b) Ania a saludsod ti sungbatantayo?

      7 Basaen ti Juan 15:1-5, 8. Siputanyo ta kinuna ni Jesus kadagiti apostolna: “Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.” Iti ilustrasion, nailadawan a ni Jehova ti “agtaltalon,” ni Jesus ti “pudno a puon ti ubas,” ken dagiti adalanna ti ‘sangsanga.’b Ania ngarud a bunga ti masapul a patauden dagiti pasurot ni Kristo? Iti daytoy nga ilustrasion, dinakamat ni Jesus ti napateg a detalye a makatulong tapno maammuantayo ti sungbat.

      8. (a) Iti ilustrasion, apay a saan a dagiti baro nga adalan ti tuktukoyen ti bunga? (b) Ania ti makunatayo kadagiti ipapaaramid ni Jehova?

      8 Kinuna ni Jesus maipapan ken Amana: “Tunggal sanga nga adda kaniak a saan a mangpatpataud iti bunga ikkatenna.” Kayatna a sawen, ibilangnatayo laeng ni Jehova nga adipenna no agbungatayo. (Mat. 13:23; 21:43) Gapuna, iti daytoy nga ilustrasion, ti bunga a masapul a patauden ti tunggal Kristiano ket saan a dagiti mapagbalintayo a baro nga adalan. (Mat. 28:19) Ta no kasta, dagiti matalek a Saksi nga awan ti mapagbalinda nga adalan gapu ta awan ti mangipangpangag iti teritoriada ket kasladan kadagiti sanga a di agbungbunga iti ilustrasion ni Jesus. Ngem saan a mabalin a kasta! Apay? Saantayo ngamin a mapilit dagiti tattao nga agbalin nga adalan. Maikontra iti kinamanagayat ni Jehova no ikkatenna dagiti adipenna a saan a makaaramid iti banag a dida kabaelan. Kabaelantayo ti aniaman nga ipaaramid ni Jehova.​—Deut. 30:11-14.

      9. (a) Ania a trabaho ti aramidentayo tapno agbungatayo? (b) Ania nga ilustrasion ti usigentayo, ken apay?

      9 Ania ngarud ti bunga a masapul a pataudentayo? Nalawag a dayta ket trabaho a kabaelan nga aramiden ti tunggal maysa kadatayo. Ania dayta a trabaho? Ti panangikasaba iti naimbag a damag ti Pagarian ti Dios.c (Mat. 24:14) Patalgedan dayta ti ilustrasion ni Jesus maipapan iti maysa a managmula. Usigentayo daytoy maikadua nga ilustrasion.