“Naragsak Dagidiay Sipapanunot iti Naespirituan a Kasapulanda”
NO AGRIING dagiti tumatayab iti agsapa, masansan nga aganibaarda biit sada tumayab tapno agsapul iti taraon. Iti karabianna, agaponda, aganibaarda manen, sada maturog. Adda dagiti tiempo nga agpaadu, agitlog, ken aywananda dagiti sibongda. Kasta met ti siklo ti biag ti dadduma nga animal.
Naidumatayo a tattao. Pudno a mangan, maturog, ken agpaadutayo, ngem kaaduan kadatayo ti saan a mapnek kadagita laeng a bambanag. Kayattayo nga ammuen no apay nga addatayo ditoy. Sapulentayo ti kaipapanan ti biagtayo. Tarigagayantayo met nga adda namnamatayo iti masanguanan. Dagitoy a marikriknatayo a panagkasapulan ipatuldoda ti maysa a galad a masarakan laeng kadagiti tattao—espiritualidad, wenno ti panagkasapulan ken abilidad a mangtarus kadagiti naespirituan a banag.
Naparsua iti Ladawan ti Dios
Ilawlawag ti Biblia ti rason no apay nga adda naespirituan a kasapulan dagiti tattao, a kunkunana: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.” (Genesis 1:27) Ti pannakaparsuatayo “iti ladawan ti Dios” kaipapananna a nupay namulitantayo iti basol ken kinaimperpekto, addaantayo iti abilidad a mangyanninaw kadagiti galad ti Dios. (Roma 5:12) Kas pagarigan, adda abilidadtayo a mangparnuay. Addaantayo met iti kinasirib, kinahustisia, ken ti abilidad nga agsakripisio para iti maysa ken maysa gapu iti ayat. Kasta met, kabaelantayo a lagipen ti napalabas ken agplano para iti masanguanan.—Proverbio 4:7; Eclesiastes 3:1, 11; Mikias 6:8; Juan 13:34; 1 Juan 4:8.
Ti kangrunaan a mangibatad nga addaantayo iti espiritualidad isu ti nakaisigudan a tarigagaytayo nga agdayaw iti Dios. Agingga a ditay mapennek ti kasapulantayo a nasayaat a relasion iti Namarsua kadatayo, pulos a ditay masarakan ti pudpudno a talna ken manayon a ragsak. “Naragsak dagidiay sipapanunot iti naespirituan a kasapulanda,” kinuna ni Jesus. (Mateo 5:3) Ngem masapul nga agannadtayo no iti panangpennek iti dayta a panagkasapulan babaen iti naespirituan a kinapudno—dagiti umiso a pannakaammo maipapan iti Dios, dagiti pagalagadan, ken panggepna iti sangatauan. Pakasarakantayo iti naespirituan a kinapudno? Iti Biblia.
“Ti Saom ket Kinapudno”
Insurat ni apostol Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag.” (2 Timoteo 3:16) Dagiti sasao ni Pablo ket maitunos iti inkararag ni Jesus iti Dios: “Ti saom ket kinapudno.” Ita, ammotayo dayta a Sao kas ti Nasantuan a Biblia, ket nainsiriban a siguraduentayo no maitunos met laeng iti dayta dagiti patpatien ken pagalagadantayo.—Juan 17:17.
Babaen ti panangidiligtayo kadagiti patpatientayo iti Sao ti Dios, matuladtayo dagiti umili ti nagkauna a Berea, a nangsigurado no maitunos iti Kasuratan dagiti pannursuro ni Pablo. Imbes a babalawenna dagiti taga-Berea, kinomendaran ida ni Lucas gapu iti inaramidda. “Inawatda ti sao buyogen ti napalalo unay a kinagagar ti panunot,” insuratna, “a siaannad a suksukimatenda ti Kasuratan iti inaldaw no agpayso dagitoy a banag.” (Aramid 17:11) Gapu iti panagsusupadi dagiti narelihiosuan ken moral a pannursuro nga agraraira ita, napateg a tuladentayo ti ulidan dagiti nagsayaat ti panagpampanunotda a taga-Berea.
Ti sabali pay a pamay-an tapno mabigbig ti naespirituan a kinapudno isu ti panangpaliiw no kasano ti panangimpluensiana iti biag dagiti tattao. (Mateo 7:17) Kas pagarigan, ti panagbiag maitunos iti kinapudno iti Biblia pagbalinenna ti maysa a nasaysayaat nga asawa, nasaysayaat nga ama wenno ina, a mangparayray iti kinaragsak ti pamilia ken iti pannakapnek ti maysa. “Naragsak dagidiay dumdumngeg iti sao ti Dios ken mangsalsalimetmet iti dayta,” kinuna ni Jesus.—Lucas 11:28.
Ti sasao ni Jesus ipalagipna kadatayo ti kinuna ti nailangitan nga Amana kadagiti nagkauna nga Israelita: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.” (Isaias 48:17, 18) Amin a mangay-ayat iti kinaimbag ken kinalinteg sigurado a matignayda kadagita a naayat a pakaasi!
Kaykayat ti Dadduma a ‘Gagatelen Dagiti Lapayagda’
Naimpusuan nga impakaasi dayta ti Dios kadagiti Israelita agsipud ta nayaw-awanda kadagiti narelihiosuan a kinaulbod. (Salmo 106:35-40) Masapul met nga agannadtayo maibusor kadagiti kinaulbod. Mainaig kadagiti agkunkuna a Kristiano, insurat ni Pablo: “Addanto las-ud ti tiempo a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda; ket iyadayodanto dagiti lapayagda iti kinapudno.”—2 Timoteo 4:3, 4.
Dagiti lider ti relihion gagatelenda dagiti lapayag dagiti tattao babaen ti panangpanuynoyda kadagiti aramid a mangpennek kadagiti dakes a tarigagay, kas iti panagdenna a di nagkasar, homoseksualidad, ken panagbartek. Ibatad ti Biblia a dagidiay manganamong kadagiti kasta a bambanag ken dagidiay mangar-aramid kadagita “didanto tawiden ti pagarian ti Dios.”—1 Corinto 6:9, 10; Roma 1:24-32.
Awan duadua a kasapulan ti kinatured tapno makapagbiag maitunos kadagiti pagalagadan ti Biblia, nangruna no adda ti panangumsi, ngem kabaelantayo dayta. Adu kadagiti Saksi ni Jehova ti dati nga adikto iti droga, managbarbartek, mannakikamalala, butangero, mannanakaw, ken naulbod. Ngem impapusoda ti Sao ti Dios ket iti tulong ti nasantuan nga espiritu binalbaliwanda ti biagda tapno ‘makapagnada a maikari ken ni Jehova.’ (Colosas 1:9, 10; 1 Corinto 6:11) Gapu ta nakikappiada iti Dios, natalna met ti panunotda ken, kas makitatayo, naaddaanda iti pudno a namnama.
Ti Namnama nga Itden ti Pagarian
Ti ipampanamnama ti Biblia a manayon a talna para kadagiti natulnog a tattao ket maitungpal babaen ti Pagarian ti Dios. “Umay koma ti pagariam. Maaramid koma ti pagayatam, kas sadi langit, kasta met iti daga,” kinuna ni Jesus iti modelo a kararagna. (Mateo 6:10) Wen, ti laeng Pagarian ti Dios ti makapasingked a maaramid ti pagayatan ti Dios ditoy daga. Apay? Agsipud ta dayta a nailangitan a Pagarian—maysa a gobierno nga iturayan ni Jesu-Kristo—ti usaren ti Dios a mangipakat iti kalinteganna a mangituray iti daga kas Soberano.—Salmo 2:7-12; Daniel 7:13, 14.
Kas Ari iti dayta a nailangitan a Pagarian, wayawayaan ni Jesus dagiti natulnog a tattao manipud iti tunggal kita ti pannakakautibo, agraman ti nabileg a panangadipen ti Adamiko a basol ken ti impatawidna a sakit ken ipapatay. Kuna ti Apocalipsis 21:3, 4: “Adtoy! Ti tolda ti Dios adda iti sangatauan . . . Ket [ni Jehova] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”
Agarinto ti manayon a talna iti intero a daga. Apay a masiguradotayo dayta? Ti rason ket naipalgak iti Isaias 11:9, nga agkuna: “[Dagiti iturayan ti Pagarian] saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” Wen, tunggal tao ditoy daga maaddaanto iti umiso a pannakaammo maipapan iti Dios ket agbalinda a natulnog kenkuana. Maragsakanka kadi iti dayta a namnama? No kasta, itan ti tiempo tapno rugiam a gun-oden ti nakapatpateg a “pannakaammo ken Jehova.”
Ipangagmo Kadi ti Mensahe ti Pagarian?
Babaen ti Pagarian, pukawento ti Dios ti amin nga aramid ni Satanas ken isurona dagiti tattao kadagiti nalinteg a daldalanna. Gapuna, saan a pagsiddaawan a ti Pagarian ti sentro ti pannursuro ni Jesus. “Masapul nga ideklarak ti naimbag a damag ti pagarian ti Dios,” kinunana, “agsipud ta naibaonak maigapu iti daytoy.” (Lucas 4:43) Ni Kristo binilinna dagiti adalanna nga iranudda ti isu met laeng a mensahe kadagiti sabsabali. (Mateo 28:19, 20) “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Umas-asidegen dayta a panungpalan. Nagpateg ngarud a dagiti napasnek a tattao ipangagda ti mangispal biag a naimbag a damag!
Ni Albert, a nadakamat iti immuna nga artikulo, nangngegna ti mensahe ti Pagarian idi a ni baketna ken ti anakna nangrugida a makipagadal iti Biblia kadagiti Saksi ni Jehova. Idi damo, agduadua ni Albert. Kiniddawna pay iti maysa a klero iti lugarda a sumarungkar iti asawa ken anakna tapno maibutaktak ti kinaulbod dagiti Saksi. Ngem saan a kayat ti klero ti makibiang. Gapuna, inkeddeng ni Albert ti umimdeng iti panagadal iti Biblia tapno mangbirok iti aniaman a biddut. Kalpasan ti maysa laeng a sesion, nakiraman iti panagadal, a sigagagar a mangammo iti ad-adu pay. Idi agangay, inlawlawagna no apay a nagbaliw ti kababalinna. “Isu daytoy ti nabayagen a sapsapulek,” kinunana.
Kamaudiananna, nangrugi a mapennek ni Albert ti naespirituan a kasapulanna, ket awan a pulos ti pagbabawyanna. Impaay ti kinapudno ti Biblia ti nabayagen a sapsapulenna iti biag—ti solusion iti kinaawan hustisia ken kinarinuker iti kagimongan ken ti namnama iti masanguanan. Naaddaan iti talna ti panunot gapu iti kinapudno iti Biblia. Mapempennek kadi ti naespirituan a kasapulam? Apay a dimo iwayaan biit a basaen dagiti saludsod a nailista iti kahon iti panid 6? No tarigagayam ti kanayonan nga impormasion, maragsakan dagiti Saksi ni Jehova a tumulong kenka.
[Kahon/Dagiti Ladawan iti panid 6]
MAPEMPENNEK KADI TI NAESPIRITUAN A KASAPULAM?
Mapnekka kadi iti naespirituan a taraon a maaw-awatmo? Awisendaka a mangbasa kadagiti sumaganad a saludsod ken kur-itam dagiti masungbatam a siuumiso.
□ Siasino ti Dios, ken ania ti naganna?
□ Siasino ni Jesu-Kristo? Apay a masapul idi a matay? Kasano a makagunggona kenka ti ipapatayna?
□ Adda kadi Diablo? No adda, nagtaudanna?
□ Ania ti mapasamak kadatayo no mataytayo?
□ Ania ti panggep ti Dios para iti daga ken iti sangatauan?
□ Ania ti Pagarian ti Dios?
□ Ania dagiti moral a pagalagadan ti Dios?
□ Iti pamilia, ania dagiti annongen nga inted ti Dios iti asawa a lalaki ken babai? Ania ti sumagmamano a prinsipio iti Biblia a mangitandudo iti kinaragsak ti pamilia?
No saanmo a masigurado ti sungbat iti aniaman kadagitoy a saludsod, mabalinmo ti agkiddaw iti kopia ti broshur nga Ania ti Kalikaguman ti Dios Kadatayo? Daytoy a broshur, nga impablaak dagiti Saksi ni Jehova iti dandani 300 a lenguahe, ilawlawagna ti 16 a napateg a topiko iti Biblia ken mangipaay iti Nainkasuratan a sungbat iti amin a saludsod a nailista iti ngato.
[Dagiti Ladawan iti panid 4]
Saan a kas kadagiti animal, addaan dagiti tattao iti naespirituan a kasapulan
[Ladawan iti panid 5]
“Mangurnongdanto kadagiti mannursuro a maipaay iti bagbagida tapno gagatelenda dagiti lapayagda.”—2 Timoteo 4:3
[Ladawan iti panid 7]
Agarinto ti manayon a talna babaen ti Mesianiko a Pagarian ti Dios