Dagiti Saludsod Manipud Kadagiti Managbasa
◼ Ti Juan 18:15 dakamatenna ti maysa nga adalan nga am-ammo ti kangatuan a padi. Daytoy kadi ti isu met laeng nga adalan nga iti nasapsapa nagtaray a “silalamolamo,” kas nailanad idiay Marcos 14:51, 52?
Saan, mabalin a ti tao nga am-ammo ti kangatuan a padi ket isu ni apostol Juan, idinto a ti adalan a timmaray a “silalamolamo” isu ni adalan a Marcos.
No alaentay dagitoy a salaysay iti panagsasaganadda iti tiempo, mangrugitayo idiay minuyongan ti Getsemani. Dagiti apostol nagbutengda idi a matiliw ni Jesus. “Ket isu binaybay-anda ket nagtalawda amin.” Ti mismo a sumaganad a bersikulo iti salaysay ni Marcos iturongna ti maysa a panamagdilig: “Ket adda maysa a baro a simmurot kenkuana a sikakagay iti maysa nga ules a naibalkot iti bagina a lamolamo; ket tiliwenda koma, ngem isu inibbatanna daydi ulesna ket timmaray a lamolamo.”—Marcos 14:50-52.
Gapuna, ti damdamo a tignay ti 11 nga apostol ket naidilig iti dayta di nainaganan nga adalan, ngarud nainkalintegan a maikuna nga isut’ saan a maysa kadagiti apostol. Daytoy a pasamak ket nailanad laeng iti Ebanghelio nga insurat ti nasapsapa nga adalan a Juan Marcos, ti kasinsin ni Bernabe. No kasta, adda rasontayo a mangibaga a ni Marcos isu ti “maysa a baro” a simmurot iti naareston a Jesus ngem timmaray nga awan ti ulesna a pangbalkot idi nga isut’ padpadasen dagiti adu a tattao a tiliwen met.—Aramid 4:36; 12:12, 25; Colosas 4:10.
Iti sabali a kanito iti dayta a rabii, simmurot met ni apostol Pedro ken Jesus, iti natalged a distansia. Iti daytoy a kaipapanan adda panagpada; ti agtutubo nga adalan (ni Marcos) nangrugi a sumurot ken Jesus ngem nagsardeng, idinto nga iti naladladaw dua kadagiti apostol a timmalaw nagsublida a simmurot iti naareston nga Apoda. Idiay Ebanghelio ni apostol Juan, mabasatayo: “Ket ni Simon Pedro ken ti sabali nga adalan simmursurotda ken Jesus. Ket daydi nga adalan am-ammo ti kangatuan a padi, ket simrek a kimmuyog ken Jesus iti paraangan ti kangatuan a padi.”—Juan 18:15.
Ni apostol Juan inusarna ti nagan a “Juan” iti panangtukoyna ken Juan a Mammautisar ngem dina pulos dinakamat ti bagina babaen ti nagan. Kas pangarigan, insuratna ti “ti adalan a mangpaneknek kadagitoy a bambanag ken nangisurat kadagitoy a bambanag.” Umas-asping: “Daytoy isu daydi adalan a mangpaneknek kadagitoy, ket insuratna dagitoy, ket ammomi a ti pangpaneknekna pudno.” (Juan 19:35; 21:24) Imutektekanyo met ti Juan 13:23: “Ket maysa kadagiti adalanna, daydi dinungdungngo ni Jesus, adda a nagsadag iti barukong ni Jesus.” Daytat’ kasakbayan la unay ti panakatiliw ni Jesus. Iti naladladaw iti dayta nga aldaw ti nailansa a Jesus inawaganna ti maysa nga adalan, a dinakamat ni Juan kadagiti umas-asping a sasao: “Idi nakitana ni inana ken ti adalan a dinungdungngona nga adda idi dinna, [ni Jesus] kinunana ken inana: ‘Babai, addayta! Ti anakmo!’”—Juan 19:26, 27; idiligyo ti Juan 21:7, 20.
Daytoy isu met laeng a kababalin ti di panangnagan ti bagbagina nalawag idiay Juan 18:15. Mainayon pay, da Juan ken Pedro nainaigda iti kalpasan-panagungar a salaysay idiay Juan 20:2-8. Dagitoy a pammaneknek isingasingda a ni apostol Juan isu “dayta adalan [nga] am-ammo ti kangatuan a padi.” Ti Biblia di nangipaay ti nalikudan nga impormasion no kasano nga am-ammo ti Galileano nga apostol (Juan), ken no kasano nga isut’ am-ammo, ti kangatuan a padi. Ngem ti pannakaam-ammo kenkuana ti sangakabbalayan ti kangatuan a padi ti namagbalin ken Juan a limmabas iti agbantay ti ruangan a simrek iti paraangan ken nangpastrek met ken Pedro.