Ti kangrunaan a mensahe ti Biblia ket maipapan iti Pagarian ti Dios. Usarento ni Jehova dayta a Pagarian a mangitungpal iti pagayatanna para iti daga. Ania dayta a Pagarian? Kasanotayo nga ammo nga agturturay dayta itan? Ania dagiti naaramidannan? Ken anianto dagiti aramidenna iti masanguanan? Masungbatan dagitoy a saludsod iti daytoy a leksion ken iti sumaruno a dua a leksion.

1. Ania ti Pagarian ti Dios, ken asino ti Ari dayta a Pagarian?

Ti Pagarian ket maysa a gobierno a ni Jehova a Dios ti nangipasdek, wenno nangbukel. Ti Ari dayta a Pagarian a ni Jesu-Kristo ket agturay manipud langit. (Mateo 4:17; Juan 18:36) Kuna ti Biblia maipapan ken Jesus: “Agnanayonto nga agturay kas Ari.” (Lucas 1:32, 33) Kas Ari ti Pagarian ti Dios, iturayanto ni Jesus ti amin ditoy daga.

2. Siasino dagiti kadua ni Jesus nga agturay?

Saan nga agmaymaysa ni Jesus nga agturay. Dagiti tattao manipud iti ‘tunggal tribu, lengguahe, ili, ken nasion [ket] agturayto kas ar-ari iti daga.’ (Apocalipsis 5:9, 10) Mano ti kakaduanto ni Kristo nga agturay? Manipud idi immay ni Jesus ditoy daga, minilionen a Kristiano ti nagbalin a pasurotna. Ngem 144,000 laeng ti kadua ni Jesus nga agturay idiay langit. (Basaen ti Apocalipsis 14:1-4.) Amin a dadduma pay a Kristiano ditoy daga ket iturayanto ti Pagarian.​—Salmo 37:29.

3. Kasano a ti Pagarian ti Dios ket adayo a nasaysayaat ngem iti gobierno ti tao?

Padpadasen dagiti agtuturay nga agaramid iti naimbag, ngem saanda a kaya nga aramiden ti amin a kayatda. Inton agangay, suktan ida dagiti agtuturay a mabalin a saan nga interesado iti pagimbagan dagiti iturturayanda. Ngem ti Ari ti Pagarian ti Dios, ni Jesus, ket saanto a pulos masuktan. “Mangipasdekto ti Dios ti langit iti maysa a pagarian a saanto pulos a madadael.” (Daniel 2:44) Iturayanto ni Jesus ti intero a daga, ken saanto a mangipakita iti paboritismo. Isu ket naayat, naasi, ken patas, ken isurona dagiti tattao a tuladenda ti kinaayat, kinaasi, ken patas a panangtratona iti sabsabali.​—Basaen ti Isaias 11:9.

4. Ti maysa a nabileg a gobierno iturayannanto ti intero a daga

Dakdakkel ti autoridad ni Jesu-Kristo a mangituray ngem iti asinoman iti pakasaritaan ti tao. Basaen ti Mateo 28:18, sa pagsaritaan daytoy a saludsod:

• Kasano a dakdakkel ti autoridad ni Jesus ngem iti asinoman nga agturay?

Kanayon a masuktan dagiti agtuturay iti gobierno ti tao ken adda laeng espesipiko a lugar nga iturturayanda. Ti ngay Pagarian ti Dios? Basaen ti Daniel 7:14, sa pagsaritaan dagitoy a saludsod:

• Apay a nagsayaat a “saanto a madadael” ti Pagarian ti Dios?

• Apay a nagsayaat nga iturayanto dayta ti intero a daga?

5. Masapul a masuktan ti gobierno ti tao

Apay a masapul a suktan ti Pagarian ti Dios dagiti gobierno ti tao? I-play ti VIDEO, sa pagsaritaan ti sumaruno a saludsod.

VIDEO: Ania ti Pagarian ti Dios?​—Ababa a Paset (1:41)

• Ania ti nagbalin a resulta ti panagturay ti tao?

Basaen ti Eclesiastes 8:9, sa pagsaritaan dagitoy a saludsod:

• Panagkunam, masapul kadi a suktan ti Pagarian ti Dios dagiti gobierno ti tao? Apay?

6. Mannakaawat dagiti agturay iti Pagarian ti Dios

Gapu ta nagbiag kas tao ti Aritayo a ni Jesus, ‘maawatanna dagiti pagkapuyantayo.’ (Hebreo 4:15) Ti 144,000 a matalek a lallaki ken babbai a kaduanto ni Jesus nga agturay ket pinili ni Jehova manipud iti “tunggal tribu, lengguahe, ili, ken nasion.”​—Apocalipsis 5:9.

• Maragsakanka kadi a makaammo a maawatan ni Jesus ken dagiti kaduana nga agturay ti rikna ken situasion dagiti tattao? Apay?

7. Adayo a nasaysayaat dagiti linteg ti Pagarian ti Dios

Mangar-aramid dagiti gobierno kadagiti linteg a pampanunotenda a pagimbagan ken mangprotektar kadagiti residenteda. Ti Pagarian ti Dios ket addaan met kadagiti linteg a masapul a suroten dagiti iturayanna. Basaen ti 1 Corinto 6:9-11, sa pagsaritaan dagitoy a saludsod:

• Panagkunam, anianto ngata ti kasasaad ti lubong no suroten ti amin dagiti linteg ti Dios?a

• Panagkunam, husto laeng kadi nga ekspektaren ni Jehova a suroten dagiti iturayan ti Pagarian dagita a linteg? Apay?

• Ania ti mangipakita a makapagbalbaliw dagiti saan a mangsursurot kadagita a linteg?​—Kitaen ti bersikulo 11.

SUMARIO

Ti Pagarian ti Dios ket agpaypayso a gobierno idiay langit a mangiturayto iti intero a daga.

Rebiu

• Siasino dagiti agturay iti Pagarian ti Dios?

• Kasano a ti Pagarian ti Dios ket adayo a nasaysayaat ngem iti gobierno ti tao?

• Ania dagiti ekspektaren ni Jehova kadagiti iturayan ti Pagarian?

AGDISKOBREKA PAY

Ammuem ti imbaga ni Jesus nga ayan ti Pagarian.

“Adda Kadi iti Pusom ti Pagarian ti Dios?” (Artikulo iti website)

Apay a mas pilien dagiti Saksi ni Jehova ti agtulnog iti Pagarian ti Dios ngem iti gobierno ti tao?

Matalek iti Pagarian ti Dios (1:43)

Adalem no ania ti ibaga ti Biblia maipapan iti 144,000 a pinili ni Jehova a makipagturayto ken Jesus.

“Siasino Dagiti Mapan Idiay Langit?” (Artikulo iti website)

Ania ti nakakombinsir iti maysa a balud a babai a ti Dios laeng ti makaipaay iti pudpudno a kinahustisia?

“Nasarakak ti Solusion ti Kinaawan Hustisia” (Agriingkayo!, Nobiembre 2011)

Imbaga ni Jesus kadagiti pasurotna a ‘saanda [koma] a paset ti lubong.’ (Juan 15:19) Karaman iti dayta ti panagbalin a neutral. Kayatna a sawen, awan dasiganda iti politika ken gubat. Ti agpayso, saan a kanayon a nalaka ti agbalin a neutral. Mabalin nga uyawendatayo gapu iti dayta. Kasanotayo nga agtalinaed a neutral ken agtultuloy a matalek ken Jehova a Dios?

1. Ania ti pangibilangan dagiti pudno a Kristiano iti gobierno ti tao?

Resrespetuen dagiti Kristiano ti gobierno. Sursurotentayo ti imbaga ni Jesus nga “ited[tayo] ken Cesar dagiti kukua ni Cesar.” Kayatna a sawen, agtulnogtayo kadagiti linteg ti pagilian, kas iti panagbayad iti buis. (Marcos 12:17) Isursuro ti Biblia nga agturturay laeng dagiti gobierno ti tao ta ipalpalubos ni Jehova nga agturayda. (Roma 13:1) Isu nga ammotayo a relatibo wenno limitado laeng ti autoridad ti gobierno ti tao. Agtalektayo a solbarento ti Dios ken ti nailangitan a Pagarianna ti amin a problema dagiti tattao.

2. Kasanotayo a maipakita a neutraltayo?

Kas ken Jesus, saantayo a makiramraman iti politika. Idi nakita dagiti tattao ti maysa a milagro ni Jesus, kayatda a pagbalinen nga ari, ngem saanna a kinayat. (Juan 6:15) Apay? Gapu ta kas iti imbagana, “ti Pagariak ket saan a paset daytoy a lubong.” (Juan 18:36) Kas adalan ni Jesus, maipakitatayo a neutraltayo iti adu a pamay-an. Kas pagarigan, saantayo a makiramraman iti gubat. (Basaen ti Mikias 4:3.) Resrespetuentayo dagiti simbolo ti nasion​—kas iti bandera​—ngem saantayo a pagdayawan dagita. (1 Juan 5:21) Ken awan ti dasdasigantayo wenno gurguraentayo a kandidato wenno partido ti politika. No aramidentayo dagita, ipakpakitatayo a talaga a matalektayo iti gobierno ti Dios​—ti Pagarianna.

AMMUEM TI AD-ADU PAY

3. Neutral dagiti pudno a Kristiano

Nangipakita ni Jesus ken dagiti pasurotna iti pagtuladantayo. Basaen ti Roma 13:1, 5-7 ken 1 Pedro 2:13, 14. Kalpasanna, i-play ti VIDEO sa pagsaritaan dagiti sumaruno a saludsod.

VIDEO: Neutral Dagiti Pudno a Kristiano​—Paset 1 (4:28)

• Apay a masapul a respetuentayo dagiti gobierno ti tao?

• Kasanotayo a maipakita nga agtultulnogtayo kadakuada?

No adda gubat, ibagbaga ti dadduma a nasion a neutralda, ngem agpada met a supsuportaranda ti agkalaban a grupo. Ania a talaga ti kayat a sawen ti panagbalin a neutral? Basaen ti Juan 17:16. Kalpasanna, i-play ti VIDEO sa pagsaritaan ti sumaruno a saludsod.

VIDEO: Neutral Dagiti Pudno a Kristiano​—Paset 2 (3:11)

• Ania ti kayat a sawen ti panagbalin a neutral?

Kasanon no adda ipaaramid dagiti gobierno a maikontra iti linteg ti Dios? Basaen ti Aramid 5:28, 29. Kalpasanna, i-play ti VIDEO sa pagsaritaan dagiti sumaruno a saludsod.

VIDEO: Neutral Dagiti Pudno a Kristiano​—Paset 3 (1:18)

• No agkontra ti linteg ti tao ken ti linteg ti Dios, ania ti masapul a surotentayo?

• Adda kadi mapanunotmo a situasion a saan a rumbeng nga agtulnog dagiti Kristiano iti gobierno?

4. Agbalinka a neutral iti panunot ken aramid

Basaen ti 1 Juan 5:21. Kalpasanna, i-play ti VIDEO sa pagsaritaan dagiti sumaruno a saludsod.

VIDEO: No Apay a Kasapulan Dagiti Pudno a Kristiano ti Tured​—Nga Agtalinaed a Neutral (2:49)

• Iti video, apay a saan a nakiraman ni Ayenge iti maysa a partido ti politika wenno iti panagsaludo iti bandera?

• Panagkunam, husto kadi ti desisionna?

Ania pay dagiti situasion a mabalin a mangsubok iti panagbalintayo a neutral? I-play ti VIDEO, sa pagsaritaan dagiti sumaruno a saludsod.

VIDEO: Dagiti Leksion Manipud iti Pagwanawanan​—Agtalinaed a Neutral iti Nabingaybingay a Lubong (5:16)

• Kasanotayo nga agbalin a neutral no agbuybuyatayo kadagiti isports a ti aglalaban ket nagduduma a nasion?

• Kasanotayo nga agbalin a neutral uray no apektadotayo a mismo iti desision dagiti politiko?

• Kasano a mabalin a maapektaran ti panagbalintayo a neutral gapu iti media wenno kadagiti pakikadkaduaantayo?

SUMARIO

Ikagkagumaan dagiti Kristiano ti agbalin a neutral iti politika​—iti panunot, panagsasao, ken ar-aramidda.

Rebiu

• Ania ti obligasiontayo iti gobierno ti tao?

• Apay nga agtalinaedtayo a neutral iti politika?

• Ania dagiti situasion a mabalin a mangsubok iti panagbalintayo a neutral?

AGDISKOBREKA PAY

Ania dagiti masapul nga isakripisiotayo no dadduma tapno makapagtalinaedtayo a neutral?

Saannakami a Binaybay-an ni Jehova (3:14)

Kasano a makapagsagana dagiti pamilia para kadagiti posiblento a mangsubok iti panagbalinda a neutral?

Agtalinaed a Neutral Kadagiti Publiko nga Aktibidad (4:25)

Apay a saan a ti panangidepensa iti pagilian ti kangatuan a pammadayaw a mabalin a maawat ti maysa?

“Amin a Banag ket Posible iti Dios” (5:19)

Kitaem no kasanoka a makapagtalinaed a saan a paset ti lubong no agdesisionka maipapan iti trabaho.

“Tunggal Maysa Awitennanto ti Bukodna nga Awit” (Ti Pagwanawanan, Marso 15, 2006)