Ammoyo Kadi?
Kabagian kadi ni Jesus ti dadduma kadagiti 12 nga apostolna?
▪ Awan ti masinunuo a sungbat ti Biblia. Nupay kasta, dagiti nadeskribir a pasamak ken dagiti nagkauna a reperensia ipasimudaagda a kabagian ni Jesus ti dadduma kadagiti 12.
Dagiti mannurat ti Ebanghelio innagananda dagiti babbai a nakaimatang ken Jesus bayat ti ipapatayna iti kayo a pagtutuokan. Nadakamat iti Juan 19:25 ti uppat kadakuada: “Ti inana [a ni Maria] ken ti kabsat a babai ti inana; ni Maria nga asawa ni Clopas, ken ni Maria Magdalena.” No idiligtayo daytoy a bersikulo iti panangiladawan da Mateo ken Marcos iti dayta nga eksena, maikunatayo a ni Salome daydiay nadakamat a kabsat ti ina ni Jesus. Agparang a ni Salome ti ina dagiti annak a lallaki ni Zebedeo. (Mateo 27:55, 56; Marcos 15:40) No kasta, kasinsin a mismo ni Jesus dagiti annak ni Salome a da Santiago ken Juan a natukoy iti dadduma a teksto. Inayaban ni Jesus dagitoy nga agkabsat a mangngalap tapno agbalinda nga adalanna.—Mateo 4:21, 22.
Malaksid iti Biblia, ipakita ti dadduma a nagkauna a reperensia a ni Clopas, wenno ni Alfeo nga asawa ti maysa kadagiti babbai a nadakamat iti Juan 19:25 ket kabsat ni Jose a pannakaama ni Jesus. No pudno dayta nga impormasion, kasinsin met ngarud ni Jesus ti anak ni Alfeo a ni Santiago, a kabilang kadagiti 12 nga apostol.—Mateo 10:3.
Kasano ti panagkabagian da Jesus ken Juan a Mammautisar?
▪ Mamati ti dadduma nga agkapiduada. Naibatay daytoy a panamati iti di umiso a pannakaipatarus ti Lucas 1:36. Kas pagarigan, iti King James Version, kuna dayta a bersikulo nga agkasinsin ti ina ni Juan a ni Elizabeth ken ti ina ni Jesus a ni Maria.
Ngem iti kinapudnona, ti orihinal a Griego a sao a nausar iti daytoy a bersikulo ket saanna nga espesipiko nga ibaga nga agkasinsin dagiti dua a babbai no di ket ipasimudaagna laeng nga agkabagianda. Kas kuna ti The Interpreter’s Dictionary of the Bible, “nakalawlawa ti saklawen dayta a sao, isu a saan a makatulong dayta iti panangammotayo iti talaga a relasionda.” Nagtaudan ngarud ti kapanunotan nga agkasinsin da Jesus ken Juan? Kastoy ti sungbat ti The Catholic Encyclopedia: “Amin nga impormasion maipapan . . . iti nagannak ni Maria . . . ket nagtaud iti literatura nga apokripa.”
Saan ngarud a masinunuo no agkapidua da Jesus ken Juan, nupay adda panagkabagianda.