Dagiti Saludsod Manipud Kadagiti Managbasa

Iti aniat’ dakdakamaten ni Jesus kas “dagitoy” idi a sinaludsodanna ni apostol Pedro, “Ad-adda ti panagayatmo kaniak ngem dagitoy?”

Ni napagungar a Jesus ti adda idiay Baybay ti Galilea. Mabasatayo: “Idi ngarud nakapamigatda, ni Jesus kunana ken Simon Pedro: ‘Simon, anak ni Juan, ad-adda ti panagayatmo kaniak ngem dagitoy?’ Kunana kenkuana: ‘Wen, Apo, sika ammom nga ayatenka.’ Kunana kenkuana: ‘Pakanem dagiti korderok.’”​—Juan 21:15.

Nupay ti sekso ti Griego a pronumbre no maminsan ipamatmatna ti suhetona, ti plural a touʹton (“dagitoy”) ti mabalin a maaddaan ti panglalaki, pangbabai, wenno neuter a suheto. Gapuna, nangisingasing dagiti iskolar ti tallo a posibilidad a kaipapanan ti saludsod ni Jesus:

1. Ad-adda aya ti panagayatmo kaniak ngem ti panagayatmo kadagitoy dadduma nga adalan?

2. Ad-adda aya ti panagayatmo kaniak ngem ti panagayat kaniak dagitoy nga adalan?

3. Ad-adda aya ti panagayatmo kaniak ngem kadagitoy a bambanag, kas iti ikan?

Pagsasaritaantayo dagitoy tallo tapno makita no aniat’ mabalbalin.

Numero 1. Iti prangkaan, mammano a Kristiano ti mamati nga agsaludsod ni Kristo, ‘Ad-adda aya ti panagayatmo kaniak ngem ti panagayatmo kadagitoy dadduma nga adalan?’ Siempre rebbengtayo a kasta! Agparang a kasla karkarna nga imtuoden dayta ken Pedro. Kagapgapuna pay laeng iti barangay a kadua ti innem a sabsabali nga adalan, ngem idi nalasinna ni Jesus idiay igid ti baybay. Ti mangipakita ti umas-asping pay a kinasinged, idi insaludsod ni Kristo no kayat dagiti apostol ti kumuyogen kadagidiay naitibkol, kinuna ni Pedro nga isut’ determinado nga agtalinaed iti sibay ni Jesus.​—Juan 6:66-69; 21:7, 8.

Numero 2. Ket ti met ngay posibilidad a kayat a sawen ni Jesus, ‘Pedro, ad-adda aya ti panagayatmo kaniak ngem ti panagayat dagiti dadduma nga adalan?’ Adu a komentarista ti mamati iti daytoy a panangmatmat, ta iti nasapsapa kinuna ni Pedro a dakdakkel ti kinasungdona ken Jesus ngem kadagiti dadduma. (Mateo 26:33-35) Ngem, ti panangtarus iti Juan 21:15 iti kastoy sapulenna a ti di naiyebkas a verbo ti naisingasing, kas koma ti “Ad-adda aya ti panagayatmo kaniak ngem [ti panagayat] dagitoy?” Ngem ti kasta a kanayonan a verbo ket awan iti saludsod ni Jesus, ken daytat’ mangiparang laeng ti pakariribukan iti gramatika. Mainayon pay, kasla awan iti lugar ti panangsaludsod ni Jesus ken Pedro nga idilig ti kawadwad ti ayatna iti kawadwad ti ayat dagiti dadduma kenkuana. Di met aya kinorehir ni Jesus dagiti apostol idi a natnagda iti panagiinnapal?​—Marcos 9:33-37; 10:35-44; Lucas 22:24-27.

Ngarud, mabalin kadi, a ti Numero 3 ti salsaludsoden ni Jesus, ‘Ay-ayatennak kadi a nangnangruna ngem dagitoy a bambanag, kas ti ikan?’ Daytoy a posibilidad ti maibagay iti pamay-an a pannakabukel ti saludsod iti Griego, ta maikalkalikagum ken Pedro nga agpili kadagiti dua a bambanag (ni Jesus ken “dagitoy”). Ti kasta a saludsod ti maiyanatup met gaput’ napalabas ni Pedro. Isut’ maysa kadagiti immununa nga adalan a simmurot ken Jesus. (Juan 1:35-42) Ngem, agparang, a saan a dagdagus a simmurot ni Pedro ken ni Jesus iti amin a tiempo. Imbes ketdi, isut’ nagsubli iti panagdakdaklisna. Gapuna, sumagmamano a bulan kamaudiananna inayaban ni Jesus ni Pedro a pumanaw iti dayta kalalainganna a negosio tapno agbalin a ‘dumadaklis kadagiti tao.’ (Mateo 4:18-20; Lucas 5:1-11) Nupay kasta, kalpasan ti ipapatay ni Jesus, nagreggetan ni Pedro ti panagsubli iti daytoy a karera, a kinunana kadagiti dadduma nga adalan: “Innak agdaklis.”​—Juan 21:2, 3.

Gapuna mabalin a posible nga ipagpaganetget ni Jesus ken Pedro ti pannakasapul ti panangaramid ti desidido a panagpili. Ania ti ipangpangrunana iti panagbiag​—ti panagbalin a pasurot ni Jesus wenno daydiay mangsursurot ti karerana, kas isingsingasing dagiti nakatambak nga ikan iti sanguananda? Kasano a nagpateg a lugar ti salsalimetmetan dagiti ikan, ti ik-iket, dagiti barangay, ken ti pannakikadkadua kadagiti padana a dumadaklis iti puso ni Pedro? Pudpudno kadi a panawan ni Pedro dagidiay makaparagsak a bambanag tapno ipangpangrunana ti ayatna ken Kristo ken ti kanayonanna a panangtaraon kadagiti “babassit a karnero” ni Jesus?​—Juan 21:17.

Mabalintay met a saludsodan ti bagbagitayo iti umasping a saludsod maipapan ‘kadagitoy a bambanag’ a mabalin makaatrakar kadatayo, kas iti interesante a trabahotayo wenno negosiotayo, ti ragsaktayo iti nailubongan nga edukasion, ti pagtaengantayo, wenno ti paboritotayo a porma ti paglinglingayan. Mabalintay a pampanunoten a sipaprangka: ‘Ay-ayatek met laeng aya ni Jesus nga ad-adda ngem iti aniaman wenno amin dagitoy a bambanag?’ Impakita ni Jesus a no ti sungbattayo ket wen, ipakitatayto dayta babaen iti intay panangpakan wenno panangtaraon kadagiti “babassit a karnero.”

[Picture Credit Line iti panid 31]

Pictorial Archive (Near Eastern History) Est.