Ti Pudno nga Ayat Makagunggona
“Ta saan a nakillo ti Dios tapno lipatenna ti aramidyo ken ti ayat nga impakitayo iti naganna.”—HEBREO 6:10.
1, 2. Apay a ti pudno nga ayat makagunggona kadatayo a personal?
TI AWAN agumna nga ayat ti kadadakkelan, katataknengan, kasusudian a kualidad a mabalintay a maiyebkas. Daytoy nga ayat (Griego, a·gaʹpe) naynay nga adut’ kalikagumanna kadatayo. Ngem gapu ta naparsuatayo iti Dios ti kinahustisia ken ayat, makitatayo a ti awan agumna nga ayat ti pudpudno a makagunggona. Apay nga agpayso daytoy?
2 Maysa a rason a ti pudno nga ayat ket makagunggona ramanenna ti sikosomatiko a prinsipio, ti epekto dagiti panunot ken emosion iti bagbagitayo. Maysa nga autoridad iti panagdandanag (stress) kunana: “Ti ‘ayatem ti padam a tao’ ket maysa kadagiti kasisiriban a simple a medikal a balakad a naited pay laeng.” Wen, “ti manangngaasi a tao agaramid iti pagimbagan ti kararuana met laeng.” (Proverbio 11:17) Umas-asping ti pategna dagiti sasao a: “Ti managparabur a kararua mapalukmegto, ket ti agsibug isu met laeng masibuganto.”—Proverbio 11:25; idiligyo ti Lucas 6:38.
3. Kasanot’ panagtignay ti Dios a mamagbalin iti pudno nga ayat a makagunggona?
3 Ti ayat makagunggona met agsipud ta gunggonaan ti Dios ti kinaawan-agum. Mabasatayo: “Ti addaan kaasi kadagiti napanglaw pabulodanna ni Jehova, ket ti naimbag nga aramidna [ti Dios] bayadannanto nga isubli kenkuana.” (Proverbio 19:17) Dagiti Saksi ni Jehova agtigtignayda a maitunos kadagitoy a sasao no iwarwaragawagda ti naimbag a damag ti Pagarian ti Dios. Ammoda a ‘saan a nakillo ti Dios tapno lipatenna ti aramidda ken ti ayat nga impakitada iti naganna.’—Hebreo 6:10.
Ti Kasasayaatan nga Ulidantayo
4. Asinot’ mangipaay ti kasasayaatan nga ulidan a ti pudno nga ayat ket makagunggona, ken kasanot’ panangaramidna a kasta?
4 Sinot’ nangipaay ti kasasayaatan nga ulidan a ti pudno nga ayat ket makagunggona? Daytoy ti impaay awan sabali no di ti Dios a mismo! Isu “kasta la unay ti panagayatna ti lubong [ti sangatauan] nga intedna ti bugbugtong nga Anakna.” (Juan 3:16) Ti panangtedna ti Anakna tapno dagidiay umawat ti daton a subbotna maaddaanda koma ti biag nga agnanayon ket pudno a dakkel ti gatadna ken Jehova, ken nalawag nga impamatmat dayta nga agpadpada nga isut’ addaan ayat ken pannakipagrikna. Ad-adda pay a naipakita daytoy babaen iti kinapudno a ‘bayat ti amin a kinaladingit ti Israel idiay Egipto, daytat’ makapaladingit met kenkuana.’ (Isaias 63:9) Anian nga ad-adda a makapaladingit pay ken Jehova ti pannakakita iti Anakna a nagsagaba idiay kayo a pagtutuokan ken ti pannakangngegna kenkuana nga umkis: “Diosko, Diosko, apay-apay a binaybay-annak?”—Mateo 27:46.
5. Aniat’ napasamaken gapu ta inayat unay ti Dios ti sangatauan nga intedna ti Anakna kas daton?
5 Nakita aya ni Jehova a ti bukodna nga ebkas ti pudno nga ayat ket makagunggona? Sigurado a kasta. Kangrunaanna, anian a sungbat ti naipasango ti Dios iti rupa ti Diablo gapu ta ni Jesus nagmatalek agpapanpay amin a naaramidan ni Satanas kenkuana! (Proverbio 27:11) Kinapudnona, amin a maaramidan ti Pagarian ti Dios a mangdalus iti nagan ni Jehova iti pannakaumsi, ti panangisubli ti Paraiso ditoy daga, ken panangted kadagiti riniwriw iti biag nga awan inggana maaramidto gapu ta ti Dios inayatna unay ti sangatauan nga intedna ti kanginginaan a gameng ti pusona kas maysa a daton.
Ti Nagsayaat nga Ulidan ni Jesus
6. Ti ayat tinignaynan Jesus a mangaramid ti ania?
6 Ti sabali pay a nagsayaat nga ulidan a mangpaneknek a ti pudno nga ayat makagunggona ket isun Jesu-Kristo, nga Anak ti Dios. Inay-ayatna ti nailangitan nga Amana, ket dayta nga ayat ti nangtignay ken Jesus a mangaramid ti pagayatan ni Jehova uray aniat’ mapaspasamak. (Juan 14:31; Filipos 2:5-8) Intultuloy nga impakita ni Jesus ti ayatna iti Dios uray no maminsan kaipapanan daytat’ panagpakpakaasi ken Amana “iti nasged nga araraw ken lulua.”—Hebreo 5:7.
7. Kadagiti ania a pamay-an a nakita ni Jesus a ti pudno nga ayat makagunggona?
7 Nagunggonaan aya ni Jesus iti kasta a managsakripisio nga ayat? Pudno a nagunggonaan! Panunotenyo laengen ti rag-o a nagun-odanna manipud amin a naimbag a bambanag nga inaramidna bayat ti tallo-ket-kagudua-a-tawen a ministeriona. Anian a nagdakkel ti naitulongna kadagiti tattao iti naespirituan ken iti pisikal! Kangrunaanna, babaen ti panangidemostrana a mabalinan ti perpekto a tao a salimetmetan ti kinatarnawna iti Dios agpapanpay amin a maiyeg ni Satanas a maibusor kenkuana, naaddaan ni Jesus ti pannakapnek a mangpaneknek nga ulbod ti Diablo. Mainayon pay, kas matalek nga adipen ti Dios, immawat ni Jesus ti dakkel a gunggona ti imortalidad idi napagungar iti nailangitan a biag. (Roma 6:9; Filipos 2:9-11; 1 Timoteo 6:15, 16; Hebreo 1:3, 4) Ket anian a nakaskasdaaw a pribilehio ti addat’ sanguananna inton Armagedon ken bayat ti Milenio a Turayna, inton ti paraiso maisublin ditoy daga ken binilbilion ti mapagungar manipud ken patay! (Lucas 23:43) Awan duadua a ni Jesus nasarakanna a ti pudno nga ayat makagunggona.
Ti Ulidan ni Pablo
8. Aniat’ kapadasan ni Pablo gapu iti pudno nga ayatna iti Dios ken iti padana a tao?
8 Ni apostol Pedro naminsan a sinaludsodanna ni Jesus: “Adtoy! Dakami pinanawanmi ti isuamin ket sinurotdaka; anianto ngarud ti kukuami?” Iti pasetna, insungbat ni Jesus: “Tunggal maysa a nangpanaw kadagiti balbalay wenno kakabsat a lallaki wenno babbai wenno ama wenno ina wenno asawa wenno anak wenno dagdaga gapu iti naganko umawatto ti maminsangagasut a kastoy ken tawidennanto ti biag nga agnanayon.” (Mateo 19:27-29) Addaantayo ti sabali manen a naisangsangayan nga ulidan iti daytoy ken apostol Pablo, a tinagiragsakna ti adu a bembendision, kas inlanad nangnangruna ni Lucas idiay libro ti Aramid. Ti pudno nga ayat iti Dios ken ti padana a tao ti nangtignay ken Pablo a mangisuko ti karerana kas nadayaw a Fariseo. Panunotenyo, met, dagiti inibturan ni Pablo kadagiti pannakakabkabil, iti dandani ipapatay, pegpeggad, ken kinakirang—amin gapu ti pudno nga ayat iti Dios ken iti sagrado a serbisiona.—2 Corinto 11:23-27.
9. Kasano a nagunggonaan ni Pablo iti panangipamatmatna ti pudno nga ayat?
9 Ginunggonaan aya ni Jehova ni Pablo iti kasta a nasayaat nga ulidan iti panangipamatmat ti pudno nga ayat? Bueno, panunotenyo laengen no kasano a nakabungbunga ti ministerio idi ni Pablo. Nagsasaruno dagiti naipasdekna a kongregasion Kristiano. Ket anian a milagro ti impaay ti Dios nga aramidenna! (Aramid 19:11, 12) Naikkan met ti pribilehio ni Pablo nga umawat kadagiti supernatural a sirmata ken nangisurat ti 14 a sursurat a paset itan ti Kristiano a Griego a Kasuratan. Ti manglab-aw kadagitoy amin, ti gunggona ti imortalidad kadagiti langlangit naited kenkuana. (1 Corinto 15:53, 54; 2 Corinto 12:1-7; 2 Timoteo 4:7, 8) Pudno unay a nakita ni Pablo a ti Dios gunggonaanna ti pudno nga ayat.
Ti Pudno nga Ayat Makagunggona iti Kaaldawantayo
10. Aniat’ mabalin a gatad ti panagbalin nga adalan ni Jesus ken panangiyebkas ti ayattayo ken Jehova?
10 Nasarakan met dagiti Saksi ni Jehova itatta a ti pudno nga ayat makagunggona. Ti panagiyebkastay ti ayattayo ken Jehova babaen ti panangalatay ti takdertayo iti sibayna ken panagbalin kas ad-adalan ni Jesus mabalin kaipapananna pay ti pannakapukawtay ti biagtayo kas manangsalimetmet ti kinatarnaw. (Idiligyo ti Apocalipsis 2:10.) Isut’ gapuna a kuna ni Jesus a masapul a kuentaentay ti gatadna. Ngem ditay ar-aramiden dayta tapno ikeddeng no ti panagbalin nga adalan ket makagunggona wenno saan. Imbes ketdi, ar-aramidentayo dayta tapno isaganatay ti bagbagitayo a mangipaay iti aniaman a sapulen ti kinaadalan.—Lucas 14:28.
11. Apay a dadduma napaayda a mangidedikar ti bagida iti Dios?
11 Itatta, adu—awan duadua a minilmilion—ti mamati iti mensahe nga iyeg dagiti Saksi ni Jehova kadakuada manipud Sao ti Dios. Ngem agsanudda a mangidedikar ti bagbagida iti Dios ken mabautisaran. Mabalin kadi a daytoy ket gapu ta kurangda ti pudno nga ayat iti Dios kas ik-ikutan dagiti dadduma? Napaay ti adu a nangala kadagiti addang ti dedikasion ken bautismo agsipud ta kayatda a masalimetmetan ti pabor ti di mamati nga asawada. Dadduma saanda a makaadani iti Dios agsipud ta addaandat’ kababalin daydiay maysa a negosiante a nagkuna iti maysa a Saksi: “Kayatko ti basol.” Kaawatan, a dagita a tattao saanda apresiaren amin a naaramidanen kadakuada ti Dios ken ni Kristo.
12. Aniat’ kinunan daytoy a pagbasaan a mangitampok kadagiti gunggona ti pannakaammo a mangiyadani kadatayo iti Dios iti pudno nga ayat?
12 No addaantay pudpudno a panangipateg iti amin a naaramidanen ni Jehova a Dios ken ni Jesu-Kristo kadatayo, ipakitatay daytoy babaen ti situtulok a panangted ti aniaman a kalikaguman ti panagserbi iti nailangitan nga Amatayo ken agbalin a maysa kadagiti adalan ni Jesus. Gaput’ pudno nga ayat iti Dios, dagiti lallaki ken babbai iti amin a kasasaad ti biag—dagiti naballigi a negosiante, prominente a tattao ti sports, ken dadduma pay—sinuktandat’ naagum a karkarerada iti Nakristianuan a ministerio, kas inaramid ni apostol Pablo. Ket awan isukatda kadagiti gunggona iti pannakaammo ken panagserbi iti Dios. Gapu itoy, kuna a naminsan ti The Watch Tower: “Naisaludsodmi idin, Mano a kakabsat ti mayat nga umawat ti sangaribo a doliar a kasukat ti ammoda iti Kinapudno? Awan nangitayag ti imana! Asino ti umawat ti sangapulo ribo a doliar? Awan! Asino ti umawat ti sangamilion a doliar? Asino ti mangala ti intero a lubong a kasukat iti ammona maipapan iti Nadiosan a kababalin ken ti Nadiosan a Plano? Awan pulos! Kalpasanna kinunami, Saankayo a maysa nga awan pannakapnekna a bunggoy, ingungotenmi a gagayyem. No mariknayo a nabaknangkayo a dikay umawat ti aniaman a kasukat ti pannakaammoyo iti Dios, no kasta mariknayo a nabaknangkayo kas kadakami.” (Disiembre 15, 1914, panid 377) Wen, ti umiso a pannakaammo iti Dios ken ti pangpanggepna iyadaninatayo kenkuana iti pudno nga ayat a talaga a makagunggona.
13. Kasanot’ rebbeng a panangmatmattayo iti personal a panagadal?
13 No inayattayo ti Dios, pagreggetantayo a maammuan ken aramiden ti pagayatanna. (1 Juan 5:3) Alaentayo ti serioso a panangmatmat ti personal a panagadal, panagkararag, ken itatabuno kadagiti Nakristianuan a panaggigimong. Amin daytoy sapulenna ti panagsakripisio, ta dagitoy nga aramid ramanenna ti panangbusbos ti tiempo, pigsa, ken dadduma pay a kinabaknangtayo. Mabalin a kaipapanannat’ panagpilitayo iti panagbuya ti programa ti telebision wenno ti panagaramid ti personal a panagadal ti Biblia. Ngem anian a napigpigsatayto iti naespirituan, anian a nasaysayaatto ti panangaskasabatay kadagiti dadduma, ken anian a dakdakkelto ti magun-odantayo kadagiti Nakristianuan a gimgimong no sisiserioso ti panagadaltayo ken ipaayan dayta ti nawadwad a tiempo!—Salmo 1:1-3.
14. Kasano kapateg ti kararag ken ti nasayaat a pannakirelasion ken Jehova a Dios?
14 Regular aya a tagtagiragsakentayo ti pannakisarsarita iti nailangitan nga Amatayo babaen ti ‘panagtalinaed iti panagkararag’? (Roma 12:12) Wenno masansan nga okupadotayo a mangaramid a sisasayaat itoy nasudi a pribilehio? Ti ‘panagkararag a di agressat’ ket nasken a pamay-an a panangpabileg ti pannakirelasiontay ken Jehova a Dios. (1 Tesalonica 5:17) Ket awan naim-imbagen ngem ti nasayaat a pannakirelasion ken Jehova a mangtulong kadatayo no naipasango kadagiti pakasulisogan. Aniat’ nakatulong ken Jose nga agresistir idi sinulisog ti asawa ni Potifar? Ken apay a di nagsardeng ni Daniel a nagkarkararag uray no ti linteg dagiti Medos ken Persas iparitnat’ panagdawatna ken Jehova? (Genesis 39:7-16; Daniel 6:4-11) Siempre, ti nasayaat a pannakirelasion iti Dios ti nangtulong kadagidiay a lallaki a nagballigi, kas ti panangtulongna met kadatayo a mangaramid ti kasta!
15. Kasanot’ rebbeng a panangmatmattayo kadagiti Nakristianuan a gimgimong, ken apay?
15 Sa, kasanot’ kinaseriosotayo iti itatabuno kadagiti lima a linawas a panaggigimongtayo? Palpalubosantay aya ti kinabannog, ti bassit laeng a di nasayaat a rikna ti pisikal, wenno ti bassit a dakes a panniempo a mangsinga ti obligasiontayo a di mangliway ti pannakikadkadua kadagiti kapammatian? (Hebreo 10:24, 25) Maysa a nasayaat-sueldona nga Americano a makinista nakitana a ti panggedanna masansan singsingaennat’ kaaddana kadagiti Nakristianuan a panaggigimong. Gapuna binaliwanna ti trabahona, nga inawatna ti pannakalugina tapno makaatender a regular kadagiti amin a panaggigimong ti kongregasion. Ti panaggigimongtayo ipalubosnat’ intay panangtagiragsak ti panagpipinnaregta ken panangpabileg ti pammati ti maysa ken mysa. (Roma 1:11, 12) Kadagitoy amin a bambanag, ditay kadi makita a “ti agmula iti nawadwad aganinto met iti nawadwad”? (2 Corinto 9:6) Wen, ti panangidemostra ti pudno nga ayat kadagita a pamay-an makagunggona unay.
Ti Pudno nga Ayat ken ti Ministeriotayo
16. Aniat’ mabalin nga ibungana no ti ayat tignayennatayo a mangasaba a di pormal?
16 Ti ayat tignayennatayo a mangikaskasaba ti naimbag a damag kas ili ni Jehova. Kas pangarigan, daytat’ mangtignay kadatayo a makiraman iti di pormal a panangasaba. Mabalin nga agalikakatayo a mangasaba a di pormal, ngem ti ayat iduronnatayo nga agsao. Pudno unay, ti ayat tignayennatayo a mangpanunot kadagiti nataktika a pamay-an a marugian ti pannakipatpatang ken kalpasanna iturong dayta iti Pagarian. Kas panangiyilustrar: Nakalugan iti eroplano, maysa a panglakayen a Kristiano ti naminsan nasarakanna ti bagina a nakatugaw iti sibay ti maysa a padi a Romano Katoliko. Idi damo, ti panglakayen impaayanna ti padi kadagiti di makasair a salsaludsod. Ngem idi a makadissaagen ti padi iti eroplano, ti interesna ti nangtignay kenkuana a mangala iti dua kadagiti librotayo. Anian a nagsayaat a bunga ti panangaskasaba a di pormal!
17, 18. Ti ayat tignayennatayo a mangaramid ti ania maipapan iti Nakristianuan a ministerio?
17 Ti pudno nga ayat tignayennatayo met a makiraman a regular iti panangasaba iti binalaybalay ken dadduma pay a langa ti Nakristianuan a ministerio. Agingga a mabalintay ti makisarsarita maipapan iti Biblia, mangyegtay ti dayaw ken Jehova a Dios ken tulongantay dagiti kimmarnero a tattao a magna iti dalan agturong iti biag nga agnanayon. (Idiligyo ti Mateo 7:13, 14.) Uray no ditay mabalin ti maaddaan ti pannakisarsarita maipapan iti Biblia, saanto nga ubbaw dagiti panagreggettayo. Ti mismo a kaaddatayo iti pagtaengan dagiti tattao agserbin kas pammaneknek, ken datay a mismo magunggonaantay iti ministerio, ta mapapigsatayo ti pammatitayo no iwaragawagtay dagiti kinapudno ti Biblia. Pudno, sapulenna ti kinapakumbaba iti ipapan a panagbalaybalay, ‘nga aramiden amin a banag gapu iti naimbag a damag, tapno agbalintayo met a manangiraman iti dayta kadagiti sabsabali.’ (1 Corinto 9:19-23) Ngem gaput’ ayat iti Dios ken ti pada a tao, sipapakumbaba a pagreggetantay dayta ket magunggonaantayo kadagiti nabaknang a bendision.—Proverbio 10:22.
18 Kasapulan met ti pudno nga ayat tapno dagiti ad-adipen ni Jehova agbalinda a napasnek iti panagsarungkar kadagiti tattao nga interesado ti kinapudno ti Biblia. Ti panangidadaulo kadagiti panagadal ti Biblia a linawas ken binulan ket ebkas ti panagayat iti Dios ken iti kaarruba, ta daytoy a trabaho kalikagumannat’ panangbusbos ti panawen, pigsa, ken material a kinabaknang. (Marcos 12:28-31) Kaskasdi, no makitatayo a ti maysa kadagitoy nga estudiante ti Biblia mabautisaranen ken nalabit sumrek pay iti amin-tiempo a ministerio, saantay aya a kumbinsido a ti pudno nga ayat makagunggona?—Idiligyo ti 2 Corinto 3:1-3.
19. Aniat’ relasion ti ayat ken ti amin-tiempo a serbisio?
19 Ti awan-agumna nga ayat tignayennatayo a mangisakripisio kadagiti material a pagnam-ayan maipaay iti amin-tiempo a serbisio no posible kadatayo ti makiraman iti kasta a trabaho. Rinibribo kadagiti Saksi ti makapaneknek a ti panangiyebkas ti ayatda babaen iti dayta ket makagunggona unay. No ipalubos dagiti sirkumstansia a makiramankayo iti amin-tiempo a ministerio ngem dikay gunggundawayan ida, dikay laeng ammo no ania dagiti bendision a saysayangenyo.—Idiligyo ti Marcos 10:29, 30.
Makagunggona iti Dadduma a Wagas
20. Kasano a ti ayat tulongannatayo nga agbalin a manangpakawan?
20 Ti sabali pay a pamay-an a ti pudno nga ayat ket makagunggona a ta tulongannatayo nga agbalin a manangpakawan. Wen, ti ayat “saanna nga ikankano ti maysa a pannakaranggas.” Kinapudnona, “ti ayat abbunganna ti umariwekwek a basbasol.” (1 Corinto 13:5; 1 Pedro 4:8) “Ti umariwekwek” kaipapanannat’ adu unay a basbasol, saan aya? Ket anian a makagunggona ti panagbalin a manangpakawan! No mamakawankayo, pagbalinennakayo ken daydiay nagbasol kadakayo a nasaysayaat ti riknana. Ngem adayo a napatpateg isut’ kinapudno a malaksid no pinakawantayon dagidiay nagbasol kadatayo, ditay namnamaen a ni Jehova pakawanennatayo.—Mateo 6:12; 18:23-35.
21. Kasano a ti pudno nga ayat tulongannatayo nga agbalin a managpasakup?
21 Mainayon pay, ti pudno nga ayat ket makagunggona ta tulongannatayo nga agbalin a managpasakup. No inayattayo ni Jehova, agpakumbabatayo iti sidong ti mannakabalin nga imana. (1 Pedro 5:6) Ti ayat kenkuana tignayennatay met nga agpasakup iti pinilina nga instrumento, “ti matalek ken naannad nga adipen.” Daytoy ramanenna ti panagpasakup kadagidiay mangidadaulo ti kongregasion. Daytoy ti makagunggona agsipud ta ti saan a panangaramid iti dayta ket “makadadael” kadatayo. (Mateo 24:45-47; Hebreo 13:17) Siempre, daytoy a prinsipio ti panagpasakup agaplikar met iti uneg ti pamilia. Dayta a kurso ket makagunggona agsipud ta parang-ayenna ti rag-o ti pamilia, ti talna, ken ti panagtutunos bayat a mangted met pannakapnek kadatayo gaput’ pannakaammo nga ay-ayuentayo ti Dios.—Efeso 5:22; 6:1-3.
22. Kasanotay nga agbalin a pudpudno a naragsak?
22 Ngarud, nalawag, ti kadakkelan a kualidad a mabalintay a sukayen isut’ a·gaʹpe, ti awan agumna, naprinsipiuan a kita ti ayat. Ken awan duadua a ti pudno nga ayat makagunggona. Gapuna, pudno a naragsaktayto no sukayentayo ken iyebkastayo daytoy a kualidad iti dakdakkel a rukod agpaay a pakaidayawan ti naayat a Diostayo, a ni Jehova.
Kasanot’ Panangsungbatyo?
◻ Kadagiti ania a pamay-an nga impamatmat ni Jehova a Dios ti pudno nga ayat?
◻ Kasano nga impakita ni Jesu-Kristo ti ayat?
◻ Ania nga ulidan ti impakita ni Pablo iti panangipakita ti pudno nga ayat?
◻ Kasanot’ panangipampamatmat dagiti Saksi ni Jehova ti ayat?
◻ Apay a kunaenyo a ti pudno nga ayat makagunggona?
[Ladawan iti panid 16]
Ti ayat ni Jehova iti sangatauan ti nangtignay kenkuana nga ited ti Anakna tapno magun-odantay ti biag nga awan inggana. Apresiarenyo aya ti kasta a pudno nga ayat?
[Ladawan iti panid 18]
Ti pudno nga ayat ken Jehova tignayennatayo a “managtalinaed iti panagkararag”