ENON

Disso a ‘nakaad-adu ti danumna,’ a nangaramidan ni Juan a Manangbautisar kadagiti panagitanebna kalpasan ti Paskua ti 30 K.P. (Jn 3:23) Asideg dayta iti nalatlatak a disso nga agnagan Salim. Saan a masigurado ti eksakto a nagsaadan dagitoy a disso; nupay kasta, ni Eusebius nga obispo ti Cesarea a nagbiag idi maikatlo ken maikapat a siglo K.P. ipatuldona ti maysa a lugar iti Ginget Jordan, agarup 8 a Romano a milia (12 km; 7.5 mi) iti abagatan ti Bet-sean. Adda iti daytoy a lugar ti Tell Ridgha (Tel Shalem), a maikunkuna nga isu ti Salim. Iti asideg, adda sumagmamano nga ubbog a mabalin a tumutop iti panangiladawan ni Eusebius iti disso a naawagan Enon.