3. Kasano nga ipasimudaag dagiti sasao ni Jesus iti Juan 5:16, 17 a madama pay laeng ti maikapito nga aldaw idi kaaldawan ni Jesus?

³ Adda dua a rason a maikunatayo a madama pay laeng ti maikapito nga aldaw idi panawen ni Jesus ken dagiti nagkauna a Kristiano. Umuna, usigentayo dagiti sasao ni Jesus kadagiti bumusbusor a nangbabalaw iti panangagasna bayat ti Sabbath, nga ibilangda a panagtrabaho. Kinuna kadakuada ni Jesus: “Ni Amak agtultuloy nga agar-aramid agingga ita, ket agtultuloyak nga agar-aramid.” (Juan 5:16, 17) Ania ti kayatna a sawen? Naakusaran ni Jesus nga agtartrabaho bayat ti Sabbath. Kas sungbat iti akusasionda, kinunana: “Ni Amak agtultuloy nga agar-aramid.” Kasla ibagbagana: ‘Agpada ti ar-aramidenmi ken Amak. Nagtrabaho ni Amak bayat ti rinibu a tawen ti Sabbath isu a mabalinko met ti agtultuloy nga agtrabaho uray Sabbath.’ Gapuna, ipaspasimudaag ni Jesus nga idi kaaldawanna madama pay laeng ti maikapito nga aldaw, ti aldaw a panaginana ti Dios manipud pinarsuana dagiti bambanag ditoy daga.a

5. Ania ti panggep ti maikapito nga aldaw, ken kaano a naan-anay a matungpal dayta?

⁵ Tapno masungbatan dayta a saludsod, laglagipentayo ti panggep ti maikapito nga aldaw. Kuna ti Genesis 2:3: “Ti Dios binendisionanna ti maikapito nga aldaw ket pinagbalinna a sagrado.” Dayta nga aldaw ket ‘nagbalin a sagrado’​—sinantipikar, wenno pinili ni Jehova​—tapno maibanag ti panggepna a mapagnaedan ti daga kadagiti natulnog a tattao a mangaywan iti dayta ken iti amin a parsua nga adda iti dayta. (Gen. 1:28) Tapno matungpal ti panggepna, “agtultuloy nga agar-aramid agingga ita” ni Jehova a Dios ken ni Jesu-Kristo, ti “Apo ti sabbath.” (Mat. 12:8) Agtultuloy ti aldaw a panaginana ti Dios agingga a naan-anay a maitungpal ti panggepna iti ngudo ti sangaribu a tawen a panagturay ni Kristo.