“Ti Lawag ti Lubong”​—Ti Anak ti Dios

Iti maudi nga aldaw ti Piesta ti Tabernakulo, ti maikapito nga aldaw, nangisuro ni Jesus iti paset ti templo a maawagan iti “pagidulinan iti gameng.” (Juan 8:20; Lucas 21:1) Adda daytoy iti Paraangan ti Babbai, a sadiay ikabil dagiti tattao ti kontribusionda.

Iti rabii bayat ti piesta, nakalawlawag daytoy a paset ti templo. Adda uppat a kandelero sadiay, a tunggal maysa ket addaan iti uppat a dadakkel a pagkargaan a napno iti lana. Nakaranraniag dagitoy a pagsilawan ta naglawa ti malawaganna. Ti sumaruno nga ibaga ni Jesus mabalin nga ipalagipna kadagiti dumdumngeg ti lawag dagitoy a pagsilawan. Kinunana: “Siak ti lawag ti lubong. Ti sumurot kaniak saanto a pulos magna iti kinasipnget, no di ket addanto kenkuana ti lawag a mangted iti biag.”​—Juan 8:12.

Saan nga umanamong dagiti Fariseo iti imbaga ni Jesus. Kinunada: “Agsasaoka maipapan iti bagim; ket saan a pudno ti ibagbagam.” Insungbat ni Jesus: “Uray no agsaoak maipapan iti bagik, pudno ti ibagbagak, ta ammok ti naggapuak ken ti papanak. Ngem saanyo nga ammo ti naggapuak ken ti papanak.” Kinunana pay: “Naisurat met iti Lintegyo: ‘No adda dua a saksi, pudno ti pammaneknekda.’ Agsasaoak maipapan iti bagik, ken agsasao met maipapan kaniak ti Ama a nangibaon kaniak.”​—Juan 8:​13-18.

Gapu ta saan a mamati dagiti Fariseo iti ibagbagana, dinamagda: “Ayan ti Amam?” Prangka ti sungbat ni Jesus: “Saandak nga am-ammo ken ti Amak. Ta no am-ammodak, am-ammoyo met koma ti Amak.” (Juan 8:19) Uray no kayat dagiti Fariseo nga arestuen ni Jesus, awan ti nangtiliw kenkuana.

Imbaga manen ni Jesus ti imbagana idin: “Pumanawak, ket sapulendakto, ngem mataykayto a sibabasol. Saankayo a makaumay iti papanak.” Nagsiddaaw dagiti Judio gapu ta saanda a naawatan ti imbaga ni Jesus. Insaludsodda: “Agpakamatay ngata ta imbagana, ‘Saankayo a makaumay iti papanak’?” Saanda a naawatan ti imbaga ni Jesus gapu ta saanda nga ammo ti naggapuanna. Kinunana: “Naggapukayo ditoy daga, ngem naggapuak idiay langit. Naggapukayo iti daytoy a lubong, ngem saanak a naggapu iti daytoy a lubong.”​—Juan 8:​21-23.

Tuktukoyen ni Jesus ti biagna idi adda idiay langit ken ti panagbalinna a naikari a Mesias, wenno Kristo, nga ur-urayen koma dagitoy a lider ti relihion. Ngem nakapungtotda ken Jesus, ket insaludsodda: “Asinoka?”​—Juan 8:25.

Uray saanda a patien ken busbusorenda, kinuna ni Jesus kadakuada: “Awan serserbina a makisarsaritaak kadakayo.” Ngem inturong latta ni Jesus ti atensionna iti Amana ken inlawlawagna kadagiti Judio no apay a masapul a dumngegda iti Anak. Kinunana: “Ibagbagak dagiti mismo a nangngegko iti Daydiay nangibaon kaniak ditoy lubong, a kanayon nga agsao iti pudno.”​—Juan 8:​25, 26.

Kalpasanna, inyebkas ni Jesus ti panagtalekna iti Amana, a dayta ti awan kadagiti Judio: “Inton mailansayo iti kayo ti Anak ti tao, maammuanyonto a siak daydiay, ket awan ti aramidek iti bukodko a nakem; no di ket dagiti laeng insuro ti Ama nga ibagak. Kaduak Daydiay nangibaon kaniak; saannak a binaybay-an nga agmaymaysa, ta kanayon nga ar-aramidek ti makaay-ayo kenkuana.”​—Juan 8:​28, 29.

Ngem dadduma a Judio ti mamati ken Jesus, ket kinunana kadakuada: “No salimetmetanyo ti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.”​—Juan 8:​31, 32.

Para iti dadduma, kasla karkarna ti imbaga ni Jesus a pannakawayawaya. Kunada: “Kaputotannakami ni Abraham ket pulos a saankami a nagbalin nga adipen ti asinoman. Apay koma nga ibagam a mawayawayaankamto?” Ammo dagiti Judio nga adda idi tiempo nga inturayan ida ti sabali a nasion, ngem saanda a kayat ti maawagan nga adipen. Ngem impakita ni Jesus nga adipenda pay laeng: “Ibagak kadakayo, asinoman nga agar-aramid iti basol ket adipen ti basol.”​—Juan 8:​33, 34.

Gapu ta saan a bigbigen dagiti Judio a naadipenda iti basol, agpegpeggad ti sasaadenda. “Ti adipen saan nga agnaed nga agnanayon iti balay ti apona,” kinuna ni Jesus. “Ngem ti anak agnaed iti dayta nga agnanayon.” (Juan 8:35) Awan ti karbengan ti adipen a maikkan iti tawid, ken mabalin a mapapanaw iti aniaman a tiempo. Ti laeng anak wenno ti ampon ti agtalinaed iti sangakabbalayan iti “agnanayon,” kayatna a sawen, agingga a sibibiag.

Gapuna, ti kinapudno maipapan iti Anak ket ti kinapudno nga agnanayon a mangwayawaya kadagiti tattao manipud iti makapapatay a basol. Kinuna ni Jesus: “No wayawayaannakayo ti Anak, pudno a mawayawayaankayo.”​—Juan 8:36.