Paneknekanyo a Sisasaganakayo!
“Paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.”—MAT. 24:44.
1, 2. (a) Ania dagiti pasamak a naipadto iti Biblia a mabalin a mayarig iti iduduklos ti maysa a tigre? (b) Apay a pakaseknantayo ti um-umay nga iraraut?
ITI adun a tawen, maysa a nalatak nga agpabpabuya ti manglinglingay kadagiti tattao babaen ti pannakiay-ayamna iti nasursuruan a Bengal tiger. Kinunana: “No adda panagtalek kenka ti maysa nga animal, panagriknam, naikkanka iti naisangsangayan a regalo ditoy lubong.” Ngem idi Oktubre 3, 2003, nagpatingga dayta a panagtalek. Maysa kadagiti ay-aywananna nga animal nga agdagsen iti 172 a kilo a white tiger ti awan gapgapuna a nangduklos kenkuana. Saan a ninamnama dayta a panangduklos ken di nakasagana ti parasanay.
2 Makapainteres ta impadto ti Biblia ti iraraut ti “atap nga animal,” isu a masapul a nakasaganatayo. (Basaen ti Apocalipsis 17:15-18.) Asino daytoy nga “atap nga animal”? Siasino ti rautenna? Ti atap nga animal iladawanna ti United Nations ken ti amin a gobierno iti lubong. Bueltaen ken siraranggas a dadaelennanto ti Babilonia a Dakkel, ti amin a palso a relihion. Adunto ti maklaat gapu ta kasla aggayyem ti atap nga animal ken ti Babilonia a Dakkel. Pasetda amin ti lubong ni Satanas. Ngem kaano a mapasamak dayta a panangraut? Ditay ammo ti aldaw ken oras. (Mat. 24:36) Ngem ammotayo a mapasamak dayta iti oras a ditayo ninamnama ken ababan ti tiempo a nabatbati sakbay daytoy nga iraraut. (Mat. 24:44; 1 Cor. 7:29) Nagpateg ngarud a kanayon a nakasaganatayo tapno inton mapasamak dayta nga iraraut ken umay mangdadael ni Kristo, isalakannatayto! (Luc. 21:28) Tapno nakasaganatayo a kanayon, adalentayo ti ulidan dagiti matalek nga adipen ti Dios a nangpaneknek a sisasaganada isu a nakitada a mismo ti kaitungpalan dagiti kari ti Dios. Ipapusotayo kadi dagitoy a pudno a kapadasan?
Paneknekanyo a Nakasaganakayo—Kas ken Noe
3. Ania dagiti kasasaad a namagbalin a narigat para ken Noe nga agserbi a simamatalek iti Dios?
3 Iti laksid ti nakaam-amak a kasasaad idi kaaldawan ni Noe, pinaneknekanna a sisasagana a makakita iti kaitungpalan ti kari ti Dios. Panunotenyo dagiti karit a nakaipasanguan ni Noe idi naglasag dagiti rebelde nga anghel ken nakidennada kadagiti napintas a babbai! Gapu iti dayta a di nainkasigudan a panagdenna, naaddaanda iti annak a “mannakabalin,” wenno nabilbileg ngem tao, a nangusar iti bilegda a mangranggas iti sabsabali. (Gen. 6:4) Panunotenyo ti kinaranggas dagitoy a higante a mangrirriribuk iti sadinoman a papananda. Kas resultana, nagsaknap ti kinadakes ken nagbalin a naan-anay a nalulok ti panagpampanunot ken kababalin dagiti tattao. Gapuna, ti Soberano nga Apo Jehova ket nangikeddeng iti tiempo a panangdadaelna kadagiti nadangkes a tattao.—Basaen ti Genesis 6:3, 5, 11, 12.a
4, 5. Kadagiti ania a pamay-an nga umasping ti kasasaadtayo idi kaaldawan ni Noe?
4 Impadto ni Jesus a dagiti kasasaad ita ket umasping idi kaaldawan ni Noe. (Mat. 24:37) Kas pagarigan, maim-imatangantayo met ti ar-aramid dagiti dakes nga espiritu. (Apoc. 12:7-9, 12) Idi kaaldawan ni Noe, naglasag dagiti demonio nga anghel. Nupay saandan a mabalin ti aglasag, ikagkagumaanda ita nga impluensiaan dagiti ubbing ken nataengan. Saan nga ammo dagiti tattao a dagitoy a demonio nga anghel maragragsakanda iti dakes ken nalulok nga aramid dagidiay kabaelanda nga allilawen ditoy daga.—Efe. 6:11, 12.
5 Ti Sao ti Dios tinukoyna ni Satanas kas “mammapatay” ken adda ‘pannakabalinna a mangyeg iti ipapatay.’ (Juan 8:44; Heb. 2:14) Ngem saan nga ipalubos ti Dios a papatayen ni Satanas ti asinoman a kayatna. Kaskasdi, mangal-allilaw ken manggargari daytoy a dakes nga espiritu. Imulmulana iti isip ken puso dagiti tattao ti pagannayasan a pumatay. Kas pagarigan, 1 iti kada 142 a maipasngay nga ubbing iti Estados Unidos ket agbalinto a biktima ti panangpapatay. Gapu ta nakasaksaknap ti nakaro a kinaranggas, panagkunayo, maseknan ngata ni Jehova kas idi kaaldawan ni Noe? Saanto ngata nga agtignay?
6, 7. Kasano nga impakita ni Noe ken ti pamiliana ti pammati ken nadiosan a panagbuteng?
6 Idi agangay, naipakaammo ken Noe ti pangngeddeng ti Dios a mangyeg iti layus ditoy daga tapno matalipupos ti amin a lasag. (Gen. 6:13, 17) Ni Jehova binilinna ni Noe a mangibangon iti daong a kasla lakasa ti pormana. Kalpasanna, rinugian ni Noe ken ti pamiliana nga aramiden dayta. Ania ti nakatulong kadakuada nga agtulnog ken sisasagana iti idadateng ti panangukom ti Dios?
7 Ti nabileg a pammati ken nadiosan a panagbuteng ti nangtignay ken ni Noe ken ti pamiliana a mangaramid iti imbilin ti Dios. (Gen. 6:22; Heb. 11:7) Kas ulo ti pamilia, nagtalinaed ni Noe a siririing iti naespirituan ken dina tinulad ti dakes nga ar-aramid dagiti tattao idi kaaldawanna. (Gen. 6:9) Ammona a masapul nga agannad ti pamiliana tapno dida matulad ti naranggas ken rebelioso a kababalin dagiti tattao iti aglawlawda. Masapul a saanda nga okupado unay kadagiti inaldaw a pakaseknan dagiti tattao. Adda impaaramid ti Dios kadakuada, ket nagpateg nga ipamaysada dayta a trabaho.—Basaen ti Genesis 6:14, 18.
Pinaneknekan ni Noe ken ti Pamiliana a Sisasaganada
8. Ania ti mangipakita a ti pamilia ni Noe imparangarangda ti nadiosan a debosion?
8 Ti salaysay ti Biblia ket naipamaysa iti ulo ti pamilia a ni Noe. Ngem agdaydayaw met ken Jehova ti asawana, annakna, ken dagiti manugangna. Pinatalgedan dayta ni Ezequiel. Kinunana a no nagbiag ni Noe idi kaaldawanna, saan a maispal dagiti annak ni Noe maibatay iti kinalinteg ti amada. Nataengandan isu a kabaelandan nga ikeddeng no agtulnogda wenno saan. Gapuna, pinaneknekanda a mismo ti panagayatda iti Dios ken iti daldalanna. (Ezeq. 14:19, 20) Nagtulnog ken Noe ti pamiliana, tinuladda ti pammatina, ken saanda nga impalubos a maimpluensiaan ida ti sabsabali a mangisardeng iti inted-Dios a trabahoda.
9. Ania ti makitatayo a pagarigan ita dagiti addaan pammati a kas ken Noe?
9 Anian a makaparegta a makita ita dagiti ulo ti pamilia a paset ti sangalubongan a panagkakabsat a mangar-aramid iti amin a kabaelanda a mangtulad ken Noe! Ammoda a saan nga umdas nga ipaayanda ti pamiliada iti taraon, kawes, pagnaedan, ken edukasion. Masapul met nga ipaayda ti naespirituan a kasapulan ti pamiliada. Iti kasta, pampaneknekanda a sisasaganada iti dandanin aramiden ni Jehova.
10, 11. (a) Ania ti mabalin a narikna da Noe ken ti pamiliana bayat ti kaaddada iti daong? (b) Ania dagiti nasayaat nga isaludsodtayo iti bagitayo?
10 Mabalin nga agarup 50 a tawen nga imbangon da Noe ken ti pamiliana ti daong. Panunotenyo ti kinarigat ti trabahoda: Kinalupkopanda dayta iti alkitran. Pinunduanda iti taraon. Inserrekda dagiti animal. Ginasut la ketdi a daras a rummuar-sumrekda iti daong. Kalpasanna, idi maika-17 nga aldaw ti maikadua a bulan ti tawen 2370 K.K.P., dimtengen ti layus. Iladawanyo ti eksena. Simrekda iti daong ket nagtalinaedda iti uneg. Idi inserra ni Jehova ti ruangan, nangrugin nga agtudo. Saan laeng a basta bumayakabak a tudo dayta. Naglukat ti aribengbeng ti langit ket nagbuyat ti kasla baybay ti kaaduna a danum. (Gen. 7:11, 16) Natay dagiti adda iti ruar ti daong ngem naispal dagiti adda iti uneg. Ania ngata ti narikna ti pamilia ni Noe? Napalaus la ketdi ti panagyamanda iti Dios! Ngem awan duadua a napanunotda, ‘Imbag la ketdin ta nakipagnatayo iti pudno a Dios ken nagtalinaedtayo a sisasagana!’ (Gen. 6:9) Umasping iti dayta, mailadawanmo kadi a napalaus ti panagyamanmo gapu ta maysaka kadagiti naisalakan iti Armagedon?
11 Awan ti makalapped iti Mannakabalin-amin a mangitungpal iti karina a mamagpatingga iti daytoy sistema ti bambanag ni Satanas. Isaludsodyo iti bagiyo, ‘Naan-anay kadi nga agtalekak nga amin a kari ti Dios ket matungpal uray ti kabassitan a detalyena ken matungpal dagita iti inkeddengna a tiempo?’ No kasta, paneknekanyo a sisasaganakayo babaen ti panagtalinaedyo a sipapanunot iti umad-adanin nga “aldaw ni Jehova.”—2 Ped. 3:12.
Nagtalinaed nga Alerto ni Moises
12. Ania ti mabalin a nangpakudrep koma iti naespirituan a panangmatmat ni Moises?
12 Usigentayo ti sabali pay a pagarigan. No iti panangmatmat ti tao, kasla nakasaysayaat ti kasasaad ni Moises idiay Egipto. Kas ampon ti balasang ni Faraon, nalabit mararaem unay ken tinagiragsakna dagiti naimas a taraon, kasayaatan a kawes, ken nakapimpintas nga aglawlaw. Nakagun-od met iti nangato nga adal. (Basaen ti Aramid 7:20-22.) Mabalin a dakkel pay ti manamnamana a tawid.
13. Kasano a nagtalinaed ni Moises a sipapanunot kadagiti kari ti Dios?
13 Agparang a ti nasapa a panangisuro dagiti nagannak ni Moises ti nakatulong kenkuana tapno mabigbigna a kinamaag ti panagdayaw dagiti Egipcio iti idolo. (Ex. 32:8) Saan a tinallikudan ni Moises ti pudno a panagdayaw gapu iti sistema ti edukasion ti Egipto ken iti kinabaknang ti naarian a sangakabbalayan ni Faraon. Inutobna la ketdi a naimbag dagiti kari ti Dios kadagiti ammada ken addaan iti nabileg a tarigagay a mangipakita nga isu ket sisasagana a mangaramid iti pagayatan ti Dios. Kinapudnona, kinuna ni Moises kadagiti Israelita: “Ni Jehova . . . ti Dios ni Abraham, ti Dios ni Isaac ken ti Dios ni Jacob, imbaonnak kadakayo.”—Basaen ti Exodo 3:15-17.
14. Kasano a nasubok ti pammati ken kinatured ni Moises?
14 Saan a kas iti amin nga idolo a mangirepresentar kadagiti awan biagna a didiosen ti Egipto, ni Jehova a pudno a Dios ket pudpudno ken Moises. Paneknekan ti wagas ti panagbiagna a kasla makitkitana “daydiay Maysa a di makita.” Mamati ni Moises a mawayawayaan ti ili ti Dios, ngem dina ammo no kaano. (Heb. 11:24, 25, 27) Ti nabileg a tarigagayna a makakita a mawayawayaan dagiti Hebreo ket naiparangarang idi indepensana ti makabkabil a tagabo nga Israelita. (Ex. 2:11, 12) Ngem saan pay idi a dayta ti inkeddeng ni Jehova a tiempo isu a nagbiag kas pugante iti adayo a lugar. Narigatan la ketdi a nagbiag iti let-ang gapu ta komportable idi ti biagna idiay Egipto. Kaskasdi, pinaneknekan ni Moises nga isu ket sisasagana babaen ti panagtalinaedna nga alerto iti tunggal bilin nga ited kenkuana ni Jehova. Gapuna, isu ti inusar ti Dios a mangwayawaya kadagiti kakabsatna kalpasan ti 40 a tawen a panagnaedna idiay Midian. Situtulnog a nagsubli ni Moises idiay Egipto kas imbilin ti Dios. Dimtengen ti tiempo nga itungpalna ti nadiosan nga annongen ken aramidenna ti trabaho ti Dios sigun iti pamay-an ti Dios. (Ex. 3:2, 7, 8, 10) Idi nakasubli idiay Egipto ni Moises, ti ‘kaemmaan iti amin a tattao,’ kasapulanna ti pammati ken kinatured a sumango ken Faraon. (Num. 12:3) Saan la a naminsan nga inaramidna dayta no di ket maulit-ulit bayat ti agsasaruno a pannakapasamak dagiti saplit, a dina ammo no mamin-ano pay a sumango ken Faraon sakbay ti sumaruno a saplit.
15. Iti laksid ti pannakaupay ni Moises, ania ti nangtignay kenkuana a mangsapul kadagiti gundaway a mangidayaw iti nailangitan nga Amana?
15 Iti uneg ti nasurok nga 40 a tawen manipud 1513 K.K.P. agingga iti 1473 K.K.P., nakarikna ni Moises iti pannakaupay. Kaskasdi, nangsapul kadagiti gundaway a mangidayaw ken ni Jehova ken naimpusuan a pinaregtana dagiti padana nga Israelita a mangaramid met iti kasta. (Deut. 31:1-8) Apay? Gapu ta napatpateg kenkuana ti nagan ken kinasoberano ni Jehova ngem iti bukodna a dayaw. (Ex. 32:10-13; Num. 14:11-16) Iti laksid ti pannakaupaytayo, masapul nga itultuloytayo met a suportaran ti turay ti Dios, nga agtalektayo a ti wagas a panangaramidna iti bambanag ket ad-adda a nainsiriban, nalinlinteg, ken nasaysayaat ngem iti asinoman. (Isa. 55:8-11; Jer. 10:23) Kasta kadi ti panagriknam?
Agtalinaed a Siririing!
16, 17. Apay a nagpateg kadatayo ti nailanad iti Marcos 13:35-37?
16 “Agtultuloykayo a kumita, agtultuloykayo a siririing, ta saanyo nga ammo no kaano ti naituding a tiempo.” (Mar. 13:33) Dayta ti impakdaar ni Jesus idi inlawlawagna ti pagilasinan a tanda ti panungpalan daytoy dakes a sistema ti bambanag. Usigenyo ti konklusion ni Jesus iti naindaklan a padtona kas inlanad ni Marcos: “Agtultuloykayo nga agbantay, ta saanyo nga ammo no kaano nga umay ti apo ti balay, no iti mumalemen wenno iti tengnga ti rabii wenno iti panagtaraok ti kawitan wenno iti nasapa iti bigat; tapno no dumteng a kellaat, saannakayo a masarakan a matmaturog. Ngem ti kunaek kadakayo kunaek iti isuamin, Agtultuloykayo nga agbantay.”—Mar. 13:35-37.
17 Mamagpanunot ti pakdaar ni Jesus. Tinukoyna ti uppat a nagduduma a panagbantay iti rabii. Narigat ti agtalinaed a siririing bayat ti maudi a panagbantay, ta mangrugi dayta iti agarup alas tres ti parbangon agingga iti isisingising ti init. Dagiti aduan kapadasan a mannakigubat ibilangda dayta a kasayaatan a gundaway a panangraut iti kabusor, ta dakdakkel ti posibilidadna a madanonanda ida a “matmaturog.” Umasping iti dayta, bayat a nargaan ti turog ti lubong iti naespirituan nga anag, mabalin a nagrigat met kadatayo ti agtalinaed a siririing. Pagduaduaantayo kadi ti kinapateg ti ‘panagtultuloy a siririing’ ken ‘panagtultuloy a kumita,’ no maipapan iti naipadto a panungpalan ken pannakaisalakantayo?
18. Kas Saksi ni Jehova, ania a nagpateg a pribilehio ti tagtagiragsakentayo?
18 Ti parasanay iti animal a nadakamat iti rugi nalasatanna ti iduduklos kenkuana ti Bengal tiger. Ngem nabatad nga ipakita ti padto ti Biblia a saan a malasatan ti palso a relihion ken ti dadduma pay a paset ti dakes a sistema ti umad-adanin a panungpalan. (Apoc. 18:4-8) Kas ad-adipen ti Dios, ubbing man wenno nataengan, makitatayo koma ti kinapateg ti panangaramid iti amin a kabaelantayo nga agtalinaed a sisasagana iti aldaw ni Jehova a kas iti inaramid ni Noe ken ti pamiliana. Ti lubong ita ibabainna ti Dios, yantangay dagiti mannursuro iti palso a relihion, kasta met dagiti agnostiko ken ateista um-umsienda ti Namarsua babaen kadagiti pannursuroda. Ngem dina kayat a sawen a ditay maimpluensiaan. Ipapusotayo koma dagiti pagarigan nga inusigtayo ken agtultuloytayo a mangsapul kadagiti gundaway a mangidepensa ken mangidayaw ken Jehova kas “ti Dios dagiti didios,” wen, “ti Dios a naindaklan, nabileg ken nakaam-amak.”—Deut. 10:17.
[Footnote]
a No maipapan iti “sangagasut ket duapulo a tawen” a nadakamat iti Genesis 6:3, kitaenyo Ti Pagwanawanan a Disiembre 15, 2010, panid 30.
Malagipyo Kadi?
• Apay a masapul nga ipangpangruna ni Noe ti naespirituan a kasapulan ti pamiliana?
• Kasano nga umasping unay ti tiempotayo iti kaaldawan ni Noe?
• Iti laksid ti pannakaupay ni Moises, apay a nagtultuloy nga impamaysana ti atensionna kadagiti kari ni Jehova?
• Ania dagiti padto ti Biblia a mangtignay kadakayo nga agtalinaed a siririing iti naespirituan?
[Ladawan iti panid 25]
Ni Noe ken ti pamiliana impamaysada
ti trabaho nga inted ni Jehova
[Ladawan iti panid 26]
Dagiti mapangnamnamaan a kari ni Jehova ti nangtulong ken Moises nga agtalinaed a siririing