“Ammoda ti Timekna”

“NI Jehova isu ti Pastorko.” Dagitoy dagiti panglukat a sasao ti Salmo 23. Inyarig manen ti Kasuratan ni Jehova a Dios iti maysa a pastor iti padto ni Isaias, a kunana: “Pagarabennanto ti arbanna a kas la maysa nga agpaspastor. Urnongennanto dagiti kordero iti takkiagna; ken awitenna ida iti barukongna. Idalannanto a nainayad dagiti adda urbonna.”​—Isaias 40:11.

Kasta met, mayasping ni Jesu-Kristo iti maysa a pastor. Kinunana: “Siak ti nasayaat a pastor; ti nasayaat a pastor isukona ti kararuana maigapu kadagiti karnero.” (Juan 10:11) Kinuna ni Jesus a “dagiti karnero imdenganda ti timek [ti pastor], ken ayabanna nga inaganan dagiti bukodna a karnero ken iturongna nga iruar ida.” Innayonna a “dagiti karnero sumurotda [iti pastor], agsipud ta ammoda ti timekna. Saandanto a pulos suroten ti maysa a ganggannaet no di ket pumanawda kenkuana, agsipud ta dida ammo ti timek dagiti ganggannaet.”​—Juan 10:2-5.

Agpada nga agtigtignay ni Jehova a Dios ken ti Anakna, ni Jesu-Kristo, a maitunos iti nailadawan kadagiti nadakamat a kasuratan. Sidudungngo ken siaayat nga ay-aywananda dagiti piguratibo a karneroda. Kas resultana, marikna dagiti mara-karnero a maay-ayat, natalged, ken masalsalaknibanda.

Daytoy a relasion ket mayasping unay iti relasion dagiti literal a karnero ken ti pastorda. Idi 1831, nagsurat ni John Hartley maipapan kadagiti kapaliiwanna iti daytoy a banag. Napaliiwna nga idiay Grecia kadawyanen kadagiti pastor a panaganan dagiti karneroda. No maawagan ti naganda, ipangag ti karnero ti timek ti pastor. Agarup 51 a tawen kalpasanna, idi 1882, addaan met ni J. L. Porter iti umasping a kapaliiwan. Nakitana a mismo dagiti pastor a “mangisasao . . . iti maysa a karkarna nga awag” nga ipangpangag met dagiti karnero babaen ti panangsurotda a situtulnog kadagiti pastor. Iti dayta met la a tawen nagsurat ni William M. Thomson maipapan iti maulit-ulit a panageksperimento a mangipakpakita a dagiti karnero ket masursuruan a sumurot iti pastorda ken mailasinda ti timekna.

Nakita met aya kadagitoy kallabes a tiempo daytoy naisangsangayan a relasion iti nagbaetan dagiti pastor ken dagiti karnero? Wen. Iti Setiembre 1993 nga isyu ti National Geographic, insurat ti Australiano nga abenturero a ni Robyn Davidson ti sumaganad maipapan kadagiti pastoralist a Rabari iti amianan a laud ti India: “Tunggal pastor ket addaan iti naidumduma bassit a panagawag, nadumaduma iti tema. Adda dagiti awag iti bigat a pangparuar, awag tapno painumen dagiti karnero, ken dadduma pay. Ammo ti tunggal pastor ti bukodna a karnero ken dagiti karnero ti pastorda, ket ti partikular nga arbanna ti sumina manipud iti dakdakkel a pangen ken sumurot kenkuana iti agsapa.”

Awan duadua a napaliiw ni Jesus ti inladawan dagiti uppat a managpasiar a kadakdakamat laeng. Ti bukodna a kapaliiwan ti nangnayon ti kinapudno iti ilustrasionna maipapan kadagiti karnero a makaammo iti timekna. Maysakay aya kadagiti karnero ni Jesus? Mailasinyo aya ti timekna ken ipangpangagyo aya dayta? No bigbigen ken awatenyo dagiti sursurona kas kinapudno ken no tungpalenyo dagiti bilinna ken surotenyo ti panangidaulona iti panagdaydayaw ken Jehova, no kasta mapasaranyo ti naayat ken nadungngo a panangipastor ni Jehova a Dios ken ti Anakna, ni Jesu-Kristo.​—Juan 15:10.