Maysa a Dakkel a Bunggoy Dagiti Pudno a Managdaydayaw​—Sadinot’ Naggapuanda?

“Adtoy! maysa a dakkel a bunggoy, . . . manipud kadagiti isuamin a nasion ken kadagiti tribo ken kadagiti il-ili ken kadagiti pagsasao, a sitatakderda iti sanguanan ti trono ken iti sanguanan ti Kordero.”​—APOCALIPSIS 7:9.

1. Apay a makapainteres unay kadatayo itatta dagiti naimpadtuan a sirmata iti Apocalipsis?

IDI arinunos ti umuna a siglo K.P., nakakita ni apostol Juan kadagiti sirmata maipanggep kadagiti nakaskasdaaw a pasamak a mainaig iti panggep ni Jehova. Matungtungpal ita ti dadduma kadagiti banag a nakitana iti sirmata. Naikeddeng a matungpal dagiti dadduma iti asidegen a masanguanan. Nainaig amin dagitoy iti dramatiko a tampok ti naindaklan a panggep ni Jehova a mangsantipikar iti naganna iti imatang ti amin a parsua. (Ezequiel 38:23; Apocalipsis 4:11; 5:13) Kanayonanna, ramanen dagitoy ti namnama iti biag ti tunggal maysa kadatayo. Kasano a kasta?

2. (a) Aniat’ nakita ni apostol Juan iti maikapat a sirmatana? (b) Aniada a salsaludsod maipanggep itoy a sirmata ti usigentayo?

² Iti maikapat kadagiti agsasaganad a sirmata iti Apocalipsis, nakakita ni Juan kadagiti anghel a mangtengtengngel kadagiti angin ti pannakadadael agingga a maselioan “dagiti adipen ti Diostayo” kadagiti mugingda. Kalpasanna, nakakita iti makapagagar unay a pasamak​—“maysa a dakkel a bunggoy, nga awan ti tao a makabael a mangbilang, manipud kadagiti isuamin a nasion ken kadagiti tribo ken kadagiti il-ili ken kadagiti pagsasao,” a nagkaykaysa nga agdaydayaw ken ni Jehova ken mangitantan-ok iti Anakna. Naibaga ken ni Juan a dagitoy dagiti tattao a rummuarto iti dakkel a rigat. (Apocalipsis 7:1-17) Siasino dagidiay nailadawan kas “dagiti adipen ti Diostayo”? Ket siasino ti mangbukel iti “dakkel a bunggoy” a makalasatto iti rigat? Maysakayto kadi kadakuada?

Siasino “Dagiti Adipen ti Diostayo”?

3. (a) Idiay Juan 10:1-18, kasano nga inladawan ni Jesus ti relasionna kadagiti pasurotna? (b) Aniat’ pinagbalin ni Jesus a posible para kadagiti karnerona babaen ti sakripisio nga ipapatayna?

³ Agarup uppat a bulan sakbay ti ipapatayna, inladawan ni Jesus ti bagina kas “ti nasayaat a pastor” ken dagiti pasurotna kas “dagiti karnero” a pangipaayanna iti biagna. Isut’ nangaramid iti naisangsangayan a panangdakamat kadagiti karnero a nasarakanna iti maysa a piguratibo a pagaponan sana inaywanan a naimbag. (Juan 10:1-18)a Siaayat nga insuko ni Jesus ti kararuana gapu kadagiti karnerona, a nangipaay iti pateg ti subbot a kasapulan tapno mawayawayaanda iti basol ken ipapatay.

4. Siasino dagiti immuna a naurnong kas karnero maitunos iti kinuna ni Jesus ditoy?

⁴ Nupay kasta, sakbay nga inaramidna dayta, ni Jesus, kas ti Nasayaat a Pastor, personal a nangurnong kadagiti adalan. Dagiti immuna ket inyam-ammo kenkuana ni Juan a Mammautisar, ti “agay-aywan iti ruangan” iti pangngarig ni Jesus. Agsapsapul idi ni Jesus kadagiti tattao a mangawat iti gundaway nga agbalin a paset ti ragup a ‘bin-i ni Abraham.’ (Genesis 22:18; Galacia 3:16, 29) Sinukayna kadagiti pusoda ti panangipateg iti Pagarian ti langlangit, ken impanamnamana kadakuada nga isaganaanna ida iti maysa a lugar iti balay ti nailangitan nga Amana. (Mateo 13:44-46; Juan 14:2, 3) Maitutop la unay a kinunana: “Nanipud iti kaaldawan ni Juan a Mammautisar agingga ita ti pagarian ti langlangit isu ti kalat a pagreggetan a ragpaten dagiti tattao, ket dagidiay agregregget nga agtultuloy ti makagunggun-od iti dayta.” (Mateo 11:12) Dagitoy a simmurot kenkuana tapno maragpatda dayta a kalat ket napaneknekan nga addada iti pagaponan a nadakamat ni Jesus.

5. (a) Siasino “dagiti adipen ti Diostayo” a natukoy iti Apocalipsis 7:3-8? (b) Aniat’ mangipakita nga adunto pay ti tumipon kadagiti naespirituan nga Israelita nga agdaydayaw?

⁵ Idiay Apocalipsis 7:3-8, naawagan met dagidiay sibaballigi nga agtultuloy a mangragpat iti dayta a nailangitan a kalat kas “dagiti adipen ti Diostayo.” (Kitaenyo ti 1 Pedro 2:9, 16.) Dagiti laeng aya natural a Judio ti mangbukel iti 144,000 a nadakamat sadiay? Dagiti laeng aya Judio ti adda iti piguratibo a pagaponan iti pangngarig ni Jesus? Nalawag a saan; kamkameng dagitoy ti naespirituan nga Israel ti Dios, a kakadua ni Kristo iti naespirituan a bin-i ni Abraham. (Galacia 3:28, 29; 6:16; Apocalipsis 14:1, 3) Siempre, dumtengto ti tiempo a makompleto ti naikeddeng a bilang. Kalpasanna, aniat’ mapasamak? Kas impadto ti Biblia, dagiti dadduma​—maysa a dakkel a bunggoy​—​tumipondanto kadagitoy a naespirituan nga Israelita nga agdaydayaw ken Jehova.​—Zacarias 8:23.

Ti “Sabsabali a Karnero”​—Kristiano a Gentil?

6. Aniat’ tuktukoyen ti Juan 10:16?

⁶ Kalpasan ti panangdakamatna iti maysa a pagaponan dagiti karnero iti Juan 10:7-15, nasao ni Jesus ti maipapan iti sabali a grupo, a kunkunana: “Addaanak pay iti sabsabali a karnero, nga awan iti daytoy a pagiyaponan; masapul met nga iyegko dagidiay, ket imdengandanto ti timekko, ket agbalindanto a maymaysa nga arban, maymaysa a pastor.” (Juan 10:16) Siasino dagidiay “sabsabali a karnero”?

7, 8. (a) Apay a ti kapanunotan a ti sabsabali a karnero isuda dagiti Kristiano a Gentil ket naibatay iti di umiso a panangipapan? (b) Aniada a kinapudno maipapan iti panggep ti Dios iti daga ti rumbeng nga addaan pakainaigan iti pannakaawattayo iti kinasiasino ti sabsabali a karnero?

⁷ Patien ti kaaduan a komentarista ti Kakristianuan a dagitoy sabsabali a karnero isuda dagiti Kristiano a Gentil ket dagidiay adda iti pagaponan nga immun-una a natukoy isuda dagiti Judio, nga adda iti babaen ti tulag ti Linteg, ken agpada a mapan dagitoy a grupo idiay langit. Ngem nayanak ni Jesus a Judio ket kas makipagili, adda iti babaen ti tulag ti Linteg. (Galacia 4:4) Maysa pay, dagidiay mangipagarup a ti sabsabali a karnero isuda dagiti Kristiano a Gentil a magunggonaanto iti nailangitan a biag naliwayanda nga inkonsiderar ti maysa a napateg a paset ti panggep ti Dios. Idi pinarsua ni Jehova dagiti immuna a tao ken insaadna ida iti minuyongan ti Eden, imbatadna a panggepna a punnuen ti daga iti tao, pagbalinen dayta a paraiso, ken tagiragsaken dagiti tattao nga agay-aywan iti dayta ti biag nga agnanayon​—no la ket ta raemen ken agtulnogda iti Namarsua kadakuada.​—Genesis 1:26-28; 2:15-17; Isaias 45:18.

⁸ Idi nagbasol ni Adan, saan a napaay ti panggep ni Jehova. Siaayat a nangaramid ti Dios iti probision tapno maaddaan dagiti annak ni Adan iti gundaway a mangtagiragsak iti daydi di impateg ni Adan. Impakpakauna ni Jehova a mangibaonto iti manangisalakan, maysa a bin-i, a babaen kenkuana mabendisionanto amin a nasion. (Genesis 3:15; 22:18) Dayta a kari dina kaipapanan a mapanto idiay langit dagiti amin a naimbag a tattao ditoy daga. Insuro ni Jesus dagiti pasurotna nga agkararag: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:9, 10) Di pay nabayag sakbay a sinaritana ti pangngarig a nailanad iti Juan 10:1-16, imbaga ni Jesus kadagiti adalanna a ti laeng “bassit nga ipastoran” ti inanamongan ni Amana a pangtedan iti nailangitan a Pagarian. (Lucas 12:32, 33) Isu a no mabasatayo ti panangiladawan ni Jesus iti bagina kas ti Nasayaat a Pastor a mangisuko iti kararuana gapu kadagiti karnerona, maysa a biddut ti panangipuera iti kaaduan kadagidiay inyeg ni Jesus iti sidong ti naayat a panangaywanna, dagidiay agbalin a naindagaan nga iturayan ti nailangitan a Pagarianna.​—Juan 3:16.

9. Idi 1884, siasino ti impagarup dagiti Estudiante ti Biblia a mangbukel iti sabsabali a karnero?

⁹ Idi pay 1884 nga impakita ti Watch Tower a ti sabsabali a karnero isuda dagiti tattao a maikkanto iti gundaway nga agbiag iti daytoy a daga iti sidong dagiti kasasaad a pakaitungpalan ti orihinal a panggep ti Dios. Naawatan dagidiay immuna nga Estudiante ti Biblia a karaman kadagitoy sabsabali a karnero dagiti tattao a nagbiag ken natay sakbay ti ministerio ni Jesus ditoy daga. Nupay kasta, adda dagiti detalye a saanda a naawatan a siuumiso. Kas pagarigan, impagarupda a maurnong ti sabsabali a karnero kalpasan a maawat dagiti amin a napulotan ti nailangitan a gunggonada. Kaskasdi, masinunuoda a saan laeng a dagiti Kristiano a Gentil ti mangbukel iti sabsabali a karnero. Silulukat ti gundaway nga agbalin a paset ti sabsabali a karnero agpadpada kadagiti Judio ken Gentil, kadagiti tattao iti amin a nasion ken pulí.​—Idiligyo ti Aramid 10:34, 35.

10. Tapno karamantayo kadagidiay pudpudno nga ibilang ni Jesus a sabsabali a karnerona, aniat’ masapul a pudno kadatayo?

¹⁰ Tapno maibagayda iti panangiladawan ni Jesus, ti sabsabali a karnero masapul a tattaoda, aniaman ti pulí wenno nasion a naggapuanda, a mangbigbig ken ni Jesu-Kristo kas ti Nasayaat a Pastor. Aniat’ ramanen dayta? Masapul a siiemma ken situtulokda a paiturong kas kadagiti karnero. (Salmo 37:11) Kas iti bassit nga ipastoran, masapul nga ‘ammoda ti timek’ ti nasayaat a pastor ken saanda a sumurot kadagiti sabali a mabalin a mangimpluensia kadakuada. (Juan 10:4; 2 Juan 9, 10) Masapul nga apresiarenda ti kinapateg ti panangisuko ni Jesus iti kararuana gapu kadagiti karnerona ken watwatenda ti naan-anay a pammati iti dayta a probision. (Aramid 4:12) Masapul nga “imdenganda” ti timek ti Nasayaat a Pastor no gutugotenna ida a mangipaay iti sagrado a panagserbi ken ni Jehova laeng, nga itultuloyda a biroken nga umuna ti Pagarian, agtalinaed a naisina iti lubong, ken mangipakita iti managsakripisio nga ayat iti maysa ken maysa. (Mateo 4:10; 6:31-33; Juan 15:12, 13, 19) Maibagaykayo kadi iti dayta a pannakailadawan dagidiay ibilang ni Jesus kas sabsabali a karnerona? Kayatyo kadi? Anian a nagpateg a relasion ti silulukat kadagiti amin a pudpudno nga agbalin a sabsabali a karnero ni Jesus!

Panagraem iti Turay ti Pagarian

11. (a) Iti pagilasinan ti kaaddana, aniat’ kinuna ni Jesus maipapan kadagiti karnero ken kalding? (b) Siasino dagiti kakabsat a tinukoy ni Jesus?

¹¹ Sumagmamano a bulan kalpasan ti panangipaayna iti nadakamat a pangngarig, adda manen ni Jesus idiay Jerusalem. Bayat a nakatugaw idiay Bantay dagiti Olibo a tumantannawag iti templo, imbinsabinsana kadagiti adalanna dagiti detalye ‘ti pagilasinan ti kaaddana ken ti panungpalan ti sistema ti bambanag.’ (Mateo 24:3) Nasaona manen ti pannakaurnong dagiti karnero. Malaksid kadagiti dadduma pay a banag, kinunana: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket isuamin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding. Ket ikabilnanto dagiti karnero iti makannawan nga imana, ngem dagiti kalding iti makannigidna.” Iti daytoy a pangngarig, impakita ni Jesus a dagidiay pangiturongan ti Ari iti imatangna maukomda maibatay iti panangtratoda kadagiti “kakabsat[na].” (Mateo 25:31-46) Siasino dagitoy a kakabsat? Isuda dagiti napulotan-espiritu a Kristiano nga “annak [no kasta] ti Dios.” Ni Jesus ti inauna nga Anak ti Dios. Gapuna, kakabsat ida ni Kristo. Isuda “dagiti adipen ti Diostayo” a nadakamat iti Apocalipsis 7:3, dagidiay napili manipud iti sangatauan a makiraman ken Kristo iti nailangitan a Pagarianna.​—Roma 8:14-17.

12. Apay a nagpateg ti wagas a panangtrato dagiti tattao kadagiti kakabsat ni Kristo?

¹² Nagpateg ti wagas a panangtrato dagiti dadduma a tattao kadagitoy nga agtawid iti Pagarian. Ti kadi panangmatmatyo kadakuada ket kas iti panangmatmat da Jesu-Kristo ken ni Jehova? (Mateo 24:45-47; 2 Tesalonica 2:13) Ti kababalin ti maysa a tao kadagitoy a napulotan yanninawna ti kababalinna ken ni Jesu-Kristo a mismo ken iti Amana, ti Sapasap a Soberano.​—Mateo 10:40; 25:34-46.

13. Kasano kalawa ti pannakaawat dagiti Estudiante ti Biblia idi 1884 iti pangngarig maipapan kadagiti karnero ken kalding?

¹³ Iti ruar ti Watch Tower nga Agosto 1884, siuumiso a naipakita a dagiti “karnero” iti daytoy a pangngarig isuda dagidiay mangnamnama iti perpekto a biag ditoy daga. Naawatanda met nga awan duadua a matungpal ti pangngarig kabayatan ti panagturay ni Kristo iti nadayag a nailangitan a tronona. Kaskasdi, saan idi a nalawag kadakuada no kaanona a rugian ti trabaho a panamaglalasin a nailadawan sadiay wenno no kasano kapaut dayta.

14. Kasano a nakatulong ti maysa a diskurso iti kombension idi 1923 kadagiti Estudiante ti Biblia a mangtarus no kaano a matungpal ti naimpadtuan a pangngarig ni Jesus?

¹⁴ Nupay kasta, idi 1923, iti maysa a diskurso iti kombension, inlawlawag ni J. F. Rutherford, ti presidente idi ti Watch Tower Society, ti tiempo a pannakatungpal ti pangngarig maipapan kadagiti karnero ken kalding. Apay? Iti pasetna, gapu ta ipakita ti pangngarig nga addanto pay laeng ditoy daga dagiti kakabsat ti Ari​—uray kaskasano, ti sumagmamano kadakuada. Kadagiti tattao, dagiti laeng napulotan-espiritu a pasurotna ti pudpudno a maawagan a kakabsatna. (Hebreo 2:10-12) Saan nga agtalinaed dagitoy iti daga kabayatan ti Milenio, a mangipaay iti gundaway kadagiti tattao nga agaramid iti naimbag kadakuada iti pamay-an nga inladawan ni Jesus.​—Apocalipsis 20:6.

15. (a) Aniada a paspasamak ti nakatulong kadagiti Estudiante ti Biblia a mangilasin a siuumiso kadagiti karnero iti pangngarig ni Jesus? (b) Kasano nga ipakpakita dagiti karnero ti panangipategda iti Pagarian?

¹⁵ Idi dayta a diskurso idi 1923, inkagumaanda nga inlawlawag no siasino dagidiay pakaitutopan ti panangiladawan ti Apo kadagiti karnero ken kalding, ngem adda dadduma pay a banag a kasapulan a matarusan sakbay a mailawlawag ti naan-anay a kaipapanan ti pangngarig. Kadagiti simmaganad a tawen, in-inut nga inturong ni Jehova dagitoy a napateg a detalye iti imatang dagiti adipenna. Karaman kadagitoy ti nalawag a pannakaawat, idi 1927, a “ti matalek ken masirib nga adipen” ket buklen dagiti amin a napulotan-espiritu a Kristiano ditoy daga; kasta met ti pannakabigbig, idi 1932, iti kinapateg ti situtured nga idadasig kadagiti napulotan nga adipen ni Jehova, kas iti idadasig ni Jonadab ken ni Jehu. (Mateo 24:45; 2 Ar-ari 10:15) Iti daydi a tiempo, maibatay iti Apocalipsis 22:17, espesipiko a naparegta dagitoy a kimmarnero a tattao a mangipakaammo iti mensahe ti Pagarian kadagiti sabsabali. Ti panangipategda iti Mesianiko a Pagarian tignayenna ida a saan laeng a mangipakita iti natauan a kinaimbag kadagiti pinulotan ti Apo no di ket mangidedikar iti biagda ken ni Jehova babaen ken Kristo ken sidedekket a makitimpuyog kadagiti pinulotanna, a sireregta a makiramanda iti trabaho nga ar-aramiden dagitoy. Ar-aramidenyo kadi dayta? Kadagidiay mangar-aramid iti dayta, kunaento ti Ari: “Umaykayo, dakayo a binendisionan ni Amak, tawidenyo ti pagarian a naisagana a maipaay kadakayo manipud iti pannakabangon ti lubong.” Agur-uray kadakuada ti naindaklan a namnama nga agbiag nga agnanayon iti kinanaan-anay iti naindagan a sakup ti Pagarian.​—Mateo 25:34, 46.

Ti “Dakkel a Bunggoy” ​—Sadinot’ Pagturonganda?

16. (a) Ania dagiti di umiso a kapanunotan dagiti immuna nga Estudiante ti Biblia maipapan iti kinasiasino ti dakkel nga umariwekwek, wenno dakkel a bunggoy, iti Apocalipsis 7:9? (b) Kaano ken aniat’ nakaibatayanna a naatur ti panangmatmatda?

¹⁶ Patien idi dagiti adipen ni Jehova a naigidiat ti dakkel nga umariwekwek (wenno, dakkel a bunggoy) iti Apocalipsis 7:9, 10 kadagiti sabsabali a karnero iti Juan 10:16 ken kadagiti karnero iti Mateo 25:33. Gapu ta kuna ti Biblia a “sitatakderda iti sanguanan ti trono,” naipagarup nga addadanto idiay langit, saan a kadagiti trono, nga agturay kas makipagtawid ken Kristo, no di ket iti sumarsaruno a saad iti sanguanan ti trono. Naipagarup nga isuda dagiti saan unay a matalek a Kristiano, dagidiay di nangipakita iti espiritu ti pudpudno a panagsakripisio. Idi 1935, naatur dayta a panangmatmat.b Ti panangusig iti Apocalipsis 7:9 iti lawag dagiti teksto a kas iti Mateo 25:31, 32 sibabatad nga impakitana a dagiti tattao ditoy daga maikuna nga addada “iti sanguanan ti trono.” Naipakita met nga awanan ti Dios iti dua a pagalagadan ti kinamatalek. Masapul a salimetmetan dagiti amin nga anamonganna ti kinatarnawda kenkuana.​—Mateo 22:37, 38; Lucas 16:10.

17, 18. (a) Aniat’ makagapu iti kasta unay a yaadu dagidiay mangnamnama iti biag nga agnanayon ditoy daga, nanipud 1935? (b) Ania a napateg a trabaho ti sireregta a pakiramramanan dagiti kameng ti dakkel a bunggoy?

¹⁷ Adu a tawen nga insarsarita ti ili ni Jehova ti maipapan kadagiti kari ti Dios maipanggep iti daga. Gapu iti ninamnamada a mapasamak iti 1920’s, inwaragawagda a “Riniwriw Dagiti Agbibiag Ita a Pulos a Dinto Matay.” Ngem awan riniwriw nga immawat kadagiti probision ti Dios maipaay iti biag iti daydi a tiempo. Nailangitan a biag ti namnama nga imparikna ti nasantuan nga espiritu kadagiti kaaduan a nangawat iti kinapudno. Nupay kasta, nangnangruna kalpasan ti 1935, adda napasamak a dakkel a panagbalbaliw. Saan a gapu ta inwaksi ti The Watchtower ti namnama iti biag nga agnanayon ditoy daga. No mano a dekada nga insarsarita dagiti adipen ni Jehova daytoy ken sinapsapulda dagidiay maibagay iti panangiladawan ti Biblia. Nupay kasta, iti naikeddeng a tiempo ni Jehova, inturongna dagiti bambanag tapno maiparangarang dagitoy.

¹⁸ Ipakita dagiti adda a rekord nga iti adu a tawen, nakiraman kadagiti emblema ti kaaduan kadagiti timmabuno iti Panglaglagip. Ngem iti las-ud ti 25 a tawen kalpasan ti 1935, nasurok a maminsangagasut nga ad-adu ti tumabtabuno iti tinawen a Panglaglagip iti ipapatay ni Kristo ngem dagiti makiramraman. Siasino dagitoy dadduma? Dagiti mainanama a kameng ti dakkel a bunggoy. Nalawag a dimtengen ti tiempo a panangurnong ni Jehova kadakuada ken panangisaganana kadakuada a lumasat iti sumungsungad a dakkel a rigat. Kas naipadto, naggapuda “kadagiti isuamin a nasion ken kadagiti tribo ken kadagiti il-ili ken kadagiti pagsasao.” (Apocalipsis 7:9) Sireregta a makiramramanda iti trabaho nga impakpakauna ni Jesus idi kinunana: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”​—Mateo 24:14.

[Footnotes]

Aniat’ Makunayo?

◻ Apay a makapainteres unay ti sirmata iti Apocalipsis kapitulo 7?

◻ Apay a saan a dagiti Kristiano a Gentil laeng ti mangbukel iti sabsabali a karnero iti Juan 10:16?

◻ Aniat’ masapul a pudno kadagidiay pakaitutopan ti panangiladawan ti Biblia iti sabsabali a karnero?

◻ Kasano nga itampok ti pangngarig maipapan kadagiti karnero ken kalding ti panagraem iti turay ti Pagarian?

◻ Aniat’ mangipakita no kaano a dimteng ti tiempo a panangurnong ni Jehova iti dakkel a bunggoy iti Apocalipsis 7:9?