Dagiti Saludsod Manipud Kadagiti Managbasa
◼ Ti kadi maysa a Kristiano nga addaan iti naindagaan a namnama mabalin a sawen a kas paset iti “dakkel a bunggoy” itan, gapu iti kinapudno nga isu saan pay a nakalasat “iti dakkel a rigat”?—Apocalipsis 7:9, 14.
Wen, daytat’ maiyanatop gapu kadagiti namnamada.
Tuktukoyen ti Apocalipsis kapitulo 7 ti dua a grupo. Umuna dagiti 144,000 “dagiti naselioan kadagiti isuamin a kaputotan dagiti annak ti Israel.” (Apocalipsis 7:4) No idildilig iti Apocalipsis 14:1-5 ipakitana a dagiti 144,000 ti “nasubbot kadagiti tattao,” nga agbalin nga “umuna a bunbunga a maipaay iti Dios.” Ngarud, dagitoy, isuda dagidiay makipagari idiay langit a kadua ni Kristo (Galacia 6:16; 2 Timoteo 4:18) Ti maikadua a grupo isu ti “dakkel a bunggoy, nga awan ti makabalin a bumilang,” a “naggapuda iti dakkel a rigat.”
Iti nakaisaadanna, iladladawan ti Apocalipsis 7:9-17 dagiti naindagaan a makalasat iti um-umay a rigat. Gapuna ti asinoman a tarigagayanna ti agbalin a nalabes unay ti pangngeddengna ti mabalin nga istriktuanna ti termino a “dakkel a bunggoy” kadagiti tattao a makalasat iti dayta a rigat. Ngem kasapulan aya ti panagbalin nga istrikto unay? Dikam patien a kasta. Kaawatan dagidiay a makalasat masapul a maurnongda sakbay “ti dakkel a rigat” tapno makakualipikarda iti pannakailasat. Ngarud inyaplikarmi ti termino a “dakkel a bunggoy” kadagiti nasungdo a Kristiano nga iti daytoy a tiempo agserserbida ken ni Jehova a Dios nga addaan ti namnama a makalasat ken ti ‘pannakaiturongdanto kadagiti ubbog ti danum ti biag’ ditoy daga. (Apocalipsis 7:17) No ti maysa iti “dakkel a bunggoy” ket matay itatta, kasakbayan ti “dakkel a rigat,” adda amin a rason a panginanamaan iti panagungarnanto iti biag ditoy daga.
Ti umas-asping a punto ti mabalin nga aramiden met maipapan iti termino a “sabsabali a karnero.” Idiay Juan 10:7-16, nagsao nga immuna ni Jesus maipapan kadagiti “karnerona,” a maawatantayo nga isu ti “bassit nga ipastoran” a naikeddeng a maipaay iti nailangitan a biag. Sumaganad kuna ni Jesus: “Adda pay sabsabali a karnerok a saanda a naitipon itoy a pagtaraknan [a nailangitan]; dagidiay masapul nga iyegko ket denggendanto ti timekko, ket addanto maymaysa nga arban, ken maymaysa a pastor.” Masansan a mangiparparangkami kadagiti Nainkasuratan a mangpampaneknek a “dagiti sabsabali a karnero” isu dagiti addaan namnama iti naindagaan a panagbiag.—Lucas 12:32.
Mabalin a mairason ti maysa: Itudtudo ni Jesus ti maysa a masanguanan a panangurnong kadagiti “sabsabali a karnero,” gapuna agaplikar laeng ti termino kadagidiay a, kalpasan panagsao ni Jesus, ket akseptarendanto ti namnama a naibatay iti Biblia a biag nga agnanayon ditoy daga. Nupay kasta, agparang a saanen a nesisita ti panangipamaysa iti termino a kasla koma ni Jesus dipdepinarenna dagiti bambanag sigun iti kronolohia wenno ti panagsasaganad dagiti bambanag. Patienmi a ti ipagpaganetgetna ket isu ti pastor ti nagkaykaysa a karnero. Dadduma kadagiti kimmarnero a tattao nga immay iti arban ti mapan idiay langit. Addada met dagidiay sabsabali a karnero a nangawat kenkuana kas pastor; dagitoy ti makipagkaykaysa kadagidiay immuna a nadakamat. No adda daytoy a panangmatmat, ti termino a “sabsabali a karnero” ramanenna dagiti tattao ti pammati a natnatay sakbay a rinugian ni Jesus ti dalan nga agturong idiay langit kas kada Noe, Abraham, Job, David, ken ni Juan a Mammautisar. (Mateo 11:11; Aramid 2:29; Hebreo 10:19, 20) Inton dagitoy ti mapagungar idiay baro a sistema dagiti bambanag, awatendanto ti Naimbag a Pastor ken addaanda ti namnama iti awan inggana a biag ditoy daga a kadua dagiti dadduma iti “sabsabali a karnero” ni Jesus.