AREOPAGO

[Turod ni Ares; Turod ni Mars].

Maysa a turod iti makinlaud nga amianan-a-laud ti nangato nga Acropolis ti Atenas, ket adda narabaw a ginget iti nagbaetanda. Daytoy nga akikid ken natikag a pantok a buklen ti apug a bato ket agtayag iti 113 m (370 pie), ket ti Acropolis iti makin-abagatan a daya a deppaarna nataytayag iti 43 m (141 pie). Manipud iti amianan, ti dalan a sumang-at iti Turod ni Mars ket in-inut nga agpangato; ngem nasang-at iti abagatan. Adda idi tiempo a naarkosan daytoy a turod kadagiti inaramid dagiti Griego nga altar, templo a santuario, estatua, ken ti nawayang a korte suprema ti Areopago. Ita awanen amin dagitoy, ket adda laengen nabatbati a sumagmamano kadagiti pagtugawan a kasla bangko a nataga iti bato.

Iti maysa kadagiti isasarungkar ni apostol Pablo idiay Atenas, adda dagiti taga Atenas a nangtengngel kenkuana ket impanda idiay Areopago, a kunkunada: “Mabalinmi kadi nga ammuen no ania daytoy baro a sursuro a sasawem? Ta mangidatdatagka iti sumagmamano a bambanag a karkarna kadagiti lapayagmi.” (Ara 17:19, 20) Kas sungbat, siaannad a nangidatag ni Pablo iti agsasaganad a nabibileg a kinapudno, a bayat ti panagtultuloyna nakabukel iti lohikal, makaguyugoy, ken makaallukoy nga argumento. Saan a naileppas ni Pablo ti palawagna, ta “idi nangngegda maipapan ti panagungar dagiti natay” nangrugi a manglais dagiti mangrabrabak. Nupay kasta, apaman a napasamak daytoy a pannakasinga, nagballigin ti apostol a nangbingay kadagiti agdengdengngeg iti tallo a nagduduma a kapanunotan. Nupay nangrabrabak ti sumagmamano, ken kinuna ti dadduma a dumngegdanto pay iti sabali a gundaway, adda dagidiay ‘nagbalin a manamati, nga adda met kadakuada ni Dionisio, maysa nga ukom iti pangukoman ti Areopago, ken ti maysa a babai a managan Damaris, ken sabsabali pay malaksid kadakuada.’ (Ara 17:22-34) Iti agdama, ti maysa a bronse a plake iti Turod ni Mars a pakalaglagipan iti dayta a pasamak ket naglaon iti daytoy a palawag ni apostol Pablo. Saan a sigurado a maikuna nga iti daydi a gundaway nagsao ni Pablo iti sanguanan ti korte ti Areopago, ngem adda la ketdi maysa nga agdengdengngeg kenkuana a kameng dayta agdindinamag a korte.​—LADAWAN, Tomo 2, p. 746.