Umadanika iti Dios
“Saan nga Adayo iti Tunggal Maysa Kadatayo”
TALAGA nga awan kaimudingan dagiti tattao no idilig iti nakalawlawa nga uniberso. Nalabit a napanunotmon, ‘Talaga kadi a posible para kadagiti tattao ti maaddaan iti nasinged a relasion iti Mannakabalin-amin a Dios?’ Dayta ket posible laeng no ti Dios nga agnagan iti Jehova ket kayatna nga agbalintayo a nasinged kenkuana. Kayatna kadi? Masarakan ti makaliwliwa a sungbat iti makagutugot a sasao ni apostol Pablo kadagiti edukado a tattao idiay Atenas kas naisalaysay iti Aramid 17:24-27. Imutektekam ti uppat a banag a dinakamat ni Pablo maipapan ken Jehova.
Umuna, dinakamat ni Pablo a ti Dios ti “nangaramid iti lubong ken amin a bambanag nga adda iti dayta.” (Bersikulo 24) Ti kinangayed ken kinanadumaduma dagiti parsuana a mangparparagsak unay iti biag ket pammaneknek a ti Namarsua kadatayo ket managayat ken sipapanunot kadagiti kasapulan dagiti pinarsuana. (Roma 1:20) Kinamaag a panunoten a ti kasta a Dios ket adaywanna dagiti ay-ayatenna.
Maikadua, ni Jehova ket “mangted iti biag ken anges ken amin a bambanag iti amin a tattao.” (Bersikulo 25) Ni Jehova ti Mangsussustiner iti biag. (Salmo 36:9) Ti Namarsua kadatayo ti nangisagut iti amin a banag a nakapatpateg iti biag, a kas iti angin, danum, ken taraon. (Santiago 1:17) Rasonable kadi a panunoten nga inyadayo ti naparabur a Diostayo ti bagina kadatayo ken impaidamna ti gundaway a maam-ammotayo isuna ken makaadanitayo kenkuana?
Maikatlo, “manipud iti maysa a tao inaramid [ti Dios] ti tunggal nasion.” (Bersikulo 26) Saan a mangidumduma ni Jehova. (Aramid 10:34) Kasano koma a mangidumduma idinto ta pinarsuana ti “maysa a tao” a ni Adan, a nagtaudan ti amin a nasion ken puli? Ti “pagayatan [ti Dios] ket maisalakan koma dagiti amin a kita ti tattao.” (1 Timoteo 2:4) Gapuna, silulukat kadatayo ti gundaway nga umadani kenkuana aniaman ti kolor, nasionalidad, wenno kulturatayo.
Kamaudiananna, inyebkas ni Pablo ti makapabileg unay a kinapudno: Ni Jehova ket “saan nga adayo iti tunggal maysa kadatayo.” (Bersikulo 27) Nupay isu ti katan-okan, ni Jehova ket kanayon a maasitgan dagidiay sipapasnek nga umadani kenkuana. Ipatalged kadatayo ti Saona a ni Jehova ket saan nga adayo no di ket “asideg kadagidiay amin nga umaw-awag kenkuana.”—Salmo 145:18.
Nalawag iti sasao ni Pablo a kayat ti Dios nga agbalintayo a nasinged kenkuana. Ngem kas inlawlawag ni Pablo, ti palubosan ni Jehova nga umadani kenkuana ket dagidiay laeng sidadaan a ‘mangsapul’ ken ‘mangarikap’ kenkuana. (Bersikulo 27) Kuna ti maysa a reperensia para kadagiti mangipatpatarus iti Biblia a “dagita a berbo ket agpada nga iparipiripda ti magun-odan a posibilidad . . . wenno magun-odan a tarigagay.” Kas panangyilustrar: Iti nasipnget a siledmo, mabalin a kasapulan nga agarikapka tapno masapulam ti ridaw wenno ti switch ti silaw, ngem ammom a masapulam dayta. Kasta met a no sipapasnek a sapulentayo ti Dios ken arigna agarikaptayo iti panagsapultayo, manamnamatayo a magunggonaan dagiti panagreggettayo. ‘Pudno a masarakantayo,’ kas impatalged kadatayo ni Pablo.—Bersikulo 27.
Tartarigagayam kadi ti makaadani iti Dios? No arigna nga ‘agarikapka’ iti ‘panangsapulmo iti Dios’ buyogen ti pammati, saanka a mapaay. Saan a narigat ti panangsapul ken Jehova gapu ta “saan nga adayo iti tunggal maysa kadatayo.”