Napnuan Aramid iti Naimbag a Damag
NI APOSTOL Pablo adda iti kasasaad a pagaammo unay dagiti Saksi ni Jehova nga amin-tiempo a ministro—isut’ agkurkurang iti gastosen. Gapuna idiay Corinto nagtrabaho iti nanumo a trabaho a panagaramid iti tolda isu a nasursurona manipud pay kinaubingna. Narigat ti trabaho, ket no dadduma mabalin a nagdara pay dagiti imana iti panangpetpet kadagiti nakersang a tela ti tolda. Apag-isu laeng ti mabirukanna iti sustentona ken pagan-anayna, ngem isut’ kontento, ta no malpasen ti sekular a trabahona iti inaldaw, idulinnan dagiti alikamenna iti trabahona ket inaramidna ti nangnangruna a panggep ti inayanna idiay Corinto—inkasabana ti naimbag a damag!—Filipos 4:11, 12.
Kadagiti aldaw ti Sabbath, nagturong ni Pablo idiay sinagoga. Pudno, ni Pablo idi damona immadani kadagiti managdengngegna a taga Corinto a buyogen ‘iti kinakapuy ken panagbuteng ken sitatayegteg unay.’ (1 Corinto 2:1, 3) Ngem gapu ta naparegta iti panagtignay ti dadduma iti mensahena, intultuloy ni Pablo ti “nagpalawag idiay sinagoga iti tunggal sabbath ket inallukoyna dagiti Judio ken dagiti Griego.”—Aramid 18:1-4.
Kabayatanna, nupay kasta, awan maaramidan ni Pablo no di mangasaba laeng iti paset-tiempo. Idin dimteng da Silas ken ni Timoteo manipud Macedonia nga addaan iti kalalainganna a kontribusion a ‘a siwawadwad a nangpunno iti nagkuranganna.’ (2 Corinto 11:9; Filipos 4:15) Makaparagsak, met, ti damag a dagiti kakabsat idiay Tesalonica natibkerda nupay adda pannakaidadanes.—1 Tesalonica 3:6.
Aniat’ epektona ken Pablo? “Ni Pablo napnuan aramid iti sao [“impamaysana ti amin a tiempona iti panangasaba,” The Jerusalem Bible; Today’s English Version], a nangaskasaba kadagiti Judio a pampaneknekanna a ni Jesus isu ti Kristo.” (Aramid 18:5) Gaput’ nawayawayaan iti apagkanito iti pinansial a pakadagsenan, di namingga ni Pablo agingga a di nakasubli iti amin-tiempo a panangasaba. Sinublianna daytoy a trabaho a buyogen iti kasta unay a pigsa ken regta, a saan laeng a nangasaba kadagiti Judio no di ket nangipaay pay iti tiempo a mangisurat iti umuna kadagiti napaltiingan a suratna—ti suratna kadagiti taga Tesalonica!
Pagulidanantayo Itatta
Ti rekord iti napasnek a panagtrabaho ni Pablo idiay Corinto naitalimeng tapno paregtaenna dagiti amin a Kristiano nga aduanda koma iti aramid iti naimbag a damag. Nabigbig ni Pablo a ni Apo Jesus a mismo impasana kadagiti adalanna ti natan-ok a dayaw a panagbalin a “ti silaw iti lubong.” Saanda koma nga ilinged daytoy a lawag. Imbaga ni Jesus kadakuada: “Pagsilnagenyo ti lawagyo kadagiti tattao, tapno makitada ti naimbag nga aramidyo ket dayawenda koma ni Amayo nga adda sadi langit.” (Mateo 5:14-16) Daytoy kaipapananna ti kaadda ti naan-anay a paset iti trabaho a panangasaba nga impadto ni Jesus. (Mateo 24:14; 28:19, 20; Aramid 1:6-8) Ti panangikasaba itoy naimbag a damag ti Pagarian isut’ kangrunaan a rason iti kaadda ti kongregasion Kristiano.
Dagiti immuna a Kristiano, kas ken ni Pablo, impasnekda daytoy trabaho a panangasaba. Gapuna, idi impagarup dagiti kabusor ti Dios a naiddepdan ti pudno a lawag babaen ti sidadangkok a panangpapatayda “iti Kangrunaan nga Ahente ti Biag,” nagtultuloy dagiti pasurotna kas silaw iti lubong, a sipipinget a nangasabada. (Aramid 3:15) Uray pay ti pannakaidadanes dina pinasardeng ti panangikagumaanda. Kuna ti rekord ti Biblia: “Ket inaldaw-aldaw iti templo ken kadagiti balbalay dida namingga a nanursuro ken mangaskasaba maipapan iti Kristo, ni Jesus.” (Aramid 5:42) Awan ti makalapped kadakuada!
Iti moderno a tiempo, dagiti Kristiano napnuanda met iti aramid iti trabaho a panangasaba. Idi pagnguduan ti maika-19 a siglo, dagiti napasnek nga estudiante iti Sao ti Dios nangrugi a nakitada a masapul nga iraman dagiti kinapudno ti Biblia kadagiti sabsabali. Ti Zion’s Watch Tower Tract Society—maysa nga organisasion a nagbalinen nga internasional—nagbalin a legal a korporasion idi 1884. Dagitoy nga Estudiante ti Biblia, a pagaammo nanipud 1931 kas dagiti Saksi ni Jehova, literal a pinunnoda ti daga iti pannakaammo iti Sao ti Dios. Ti napasnek a panagtrabahoda nagbanag iti dakkel a buyot a nasuroken nga uppat a milion ti bilangda! Ket awan duadua agtultuloy nga umadu ti bilangda iti sidong ti panangiturong ni Jehova.—Isaias 60:22.
Ar-aramidenyo Aya ti Pasetyo?
Kinuna ni Jesus: “Ti anien adu, ngem bassit dagiti agani.” (Mateo 9:37, 38) Idi 1990 dandani sangapulo milion a tattao ti timmabuno iti Memorial ti ipapatay ni Kristo. Anian a nagsayaatan a gundaway iti irarang-ay iti sangalubongan nga anien! Ngem bayat a tagtagiragsaken daytoy agtultuloy nga irarang-ay, tunggal maysa masapul nga imtuodenna ti bagina, ‘Aniat’ kasaknap ti pannakiramramanko iti daytoy naindaklan a trabaho? Kankanayon aya nga ar-aramidek dayta—linawas no mabalin?’
Dagiti panglakayen masapul a mangidauloda itoy a trabaho kas “ulidan iti arban.” (1 Pedro 5:3) Pudno, kaaduan a panglakayen addaanda kadagiti sekular a trabaho. Kasta met ni apostol Pablo idi adda idiay Corinto. Kaskasdi, nangipaay iti tiempo para iti kankanayon a panangasaba. Adu a panglakayen itatta kasta met a napnuanda kadagiti naespirituan nga ar-aramid iti ngudot’ lawas. Daytoy mabalin nga addaan iti nabileg ken makaparegta nga epekto kadagiti amin iti kongregasion. Kadagiti dadduma a bulbulan no adda ti maipaay a naisangsangayan a panangikagumaan, adu a kongregasion ti addaan iti kaaduan kadagiti manangibunannagda nga agserserbi kas payunir. Ti sekreto? Mangidaulo dagiti panglakayen agpadpada iti panangasaba ken iti panangorganisar kadagiti urnos iti panagserbi iti tay-ak.
Dagiti ministerial nga ad-adipen maaddaanda met iti nagsayaatan nga impluensia iti kongregasion no kankanayon a makipasetda iti tay-ak ti serbisio. Laglagipenyo, kalikaguman ti Kasuratan nga agbalinda a “napasnek, . . . lallaki nga agserbi iti naimbag a pamay-an.” (1 Timoteo 3:8, 13) Ti kinamatalek iti panagserbi iti tay-ak nasken iti maysa a kabsat a lalaki tapno makakualipikar kas maysa a panglakayen wenno ministerial nga adipen.—Tito 1:8, 9.
Kas ken Pablo, daddumat’ mangkissay iti sekular a trabahoda ket iti kasta makapagpayunir. Immadu ti bilang dagiti regular, auxiliary, ken espesial payunir manipud 137,861 sangapulo a tawen laeng ti napalabas agingga iti 536,508 idi 1990. Sigurado, ti laeng bendision ken anamong ni Jehova ti nangibanag itoy. Dagiti payunir, nupay kasta, masapul nga usarenda a nainsiriban ti tiempo, saan laeng a mangasabada iti adu nga oras tapno maaddaan iti nasayaat a report. Dakayo a payunir, nakasaganakayo aya ken epektibo iti ministerio? Ikagkagumaanyo aya ti agtultuloy a rumang-ay tapno agbalinto a pudno a nabunga ti ministerioyo?
Dagiti Gunggona iti Natimbeng a Ministerio
Apresiarenyo aya ti makaited-biag nga impormasion a maiparparang iti binulan iti Ti Pagwanawanan ken ti kaduana, ti Agriingkayo!? Awan duadua apresiarenyo dayta. Tinignaynakayon aya ti panangapresiaryo a makiraman iti panangiwaras kadagitoy a pagiwarnak? Maysa a kabsat a babai idiay Botswana ti nakiraman. Dati isut’ bumusbusor iti kinapudno, ngem binasa ti asawana kenkuana dagiti magasin. Idi agangay binalbaliwanna ti pusona ket nagbalin a Saksi. Nupay di makabasa, isut’ nakabalballigi iti panagipaima kadagiti magasin, a kunkunana, “Diak ammo ti agbasa, ngem ibasbasa ni lakayko kaniak dagitoy a magasin. Tagtagiragsakek ida, ket masiguradok a tagiragsakenyo met ida.”
Apay a dikay makiraman a linawas iti daytoy makaispal-biag a trabaho? No kualipikadokayon iti naespirituan, maragsakan ti kongregasion Kristiano a tumulong kadakayo a mangrugi. Ti panagipaima kadagiti magasin, nupay kasta, ket maysa laeng a paset ti serbisio. Siasinoman a napnuan aramid iti naimbag a damag ikagumaanna ti maaddaan iti natimbeng a ministerio. Kas pangarigan, ipablaak ti Watch Tower Society dagiti minilion a libro, ket dagitoy maitukonda iti publiko kas ad-adda a permanente a gubuayan iti naimbag a naespirituan a taraon. Nagbalinkayon aya a nasigo iti ministerioyo tapno agipaima kadagiti libro a kas iti Mabalinyo ti Agbiag nga Agnanayon iti Paraiso iti Daga?
Ket dagiti ngay tattao a mangipakita iti interes? Mangidulinkay kadi iti nasayaat a rekord tapno makapagsarungkarkay kadakuada? Dagita nga isasarungkar mabalin nga agturong iti paset ti serbisio a mangiyeg iti kadadakkelan a rag-o—ti panangiyadal iti Biblia iti pagtaengan. Laglagipenyo, imbilin ni Jesus idiay Mateo 28:19, 20 ti ‘panangaramid iti adalan, a bautisaran ida.’ Daytoy kaipapananna ti panangiyadal ti Biblia kadakuada. Pudno, ti panangyadal iti Biblia masansan a sapulenna ti di pannakauma. Maysa a Saksi ti nakasabet iti maysa a lakay ken baketen nga agasawa a naimpusuan nga immanamong nga agadal iti Biblia iti pagtaengan. Ngem intantanda ti panagadal iti tallo a lawas nga agsasaruno. Idi agangay narugianen ti panagadal. Kalpasanna, iti sumagmamano a tiempo, kinanselar ti agasawa ti panagadal iti dandani tunggal maikadua a lawas. Kamaudiananna, nupay kasta, ti babai rimmang-ay agingga iti punto ti bautismo. “Kalpasan ti pannakabautisarna,” nalagip ti kabsat a lalaki, “kasta unay ti luluana gapu iti ragsak, isu a nangpalua kaniak ken ti asawak.” Wen, ti panagbalin a napnuan aramid iti naimbag a damag mangiyeg iti di mailadawan a rag-o!
Ipaayyo ti Bagiyo!
Ni Jesu-Kristo ken ni apostol Pablo nangipaayda iti nagsayaatan a pagwadan iti debosion a tuladentayo. Ket addaantay kadagiti adu a naindaklan nga ulidan kadagiti Saksi ni Jehova iti moderno a tiempo. Itan ti tiempo para kadagiti amin a makaammo iti naimbag a damag nga agbalin a naan-anay nga aktibo iti panangipakaammo iti dayta kadagiti sabsabali. Ipanamnama ti Biblia kadatayo a dagita a panagbannog “addanto kapapay-anna.”—1 Corinto 15:58.
Kas ken ni Pablo, kaaduan ti addaan pinansial nga obligasion a tamingen. Gapu itoy, adut’ mabalin a di makapagpayunir. Ngem babaen iti tulong ni Jehova, amin mabalin a surotenda ti naimbag a balakad a naited idiay Roma 12:11: “Dikay agpampamayan iti aramidyo. Nasgedkayo koma iti espiritu. Agbalinkay nga adipen ni Jehova.” Ket no agbaliw ti kasasaad a mangipalubos iti ad-adu a mabusbos a tiempo iti serbisio ni Jehova, siasinoman a pudno nga agayat ken ni Jehova, kas ken Pablo, gundawayannanto ti tiempo. Agbalin a napnuan aramid iti naimbag a damag! Ti panangaramid iti kasta saan laeng a mangiyeg kadagiti bendision ita no di ket agbanag pay iti biag nga agnanayon iti masanguanan nga addaan iti awan inggana a rag-o ken kinaragsak!—Mateo 19:28, 29.