SOSTENES

[manipud puon a sasao a kaipapananda ti “isalakan” ken “pigsa”].

Ti mangidadaulo nga opisial iti sinagoga idiay Corinto bayat ti isasarungkar ni Pablo sadiay; mabalin a sinunuanna ni Crispo, a nagbalin a Kristiano. Idi nagkedked ni Prokonsul Galion a dumngeg kadagiti pammabasol dagiti Judio maibusor iti narelihiosuan a sursuro ni Pablo, ti bunggoy innalada ni Sostenes sa kinabkabilda. Kunaen ti sumagmamano a manuskrito a ti bunggoy ket buklen “dagiti Griego” a bumusbusor kadagiti Judio; “dagiti Judio” ti naaramat iti dadduma a manuskrito. Nupay kasta, agpada a nainayon laeng dagitoy a sao, yantangay ti tallo a kadaanan a manuskrito saanda nga ibaga kadatayo no ania a bumusbusor a bunggoy ti nangdarup ken Sostenes.​—Ara 18:8, 12-17.

Posible a daytoy a dakes a kapadasan ni Sostenes ti nangiturong iti panagbalinna a Kristiano ken iti pannakaitimpuyogna ken Pablo idiay Efeso idi agangay, ta kadagiti kablaaw iti rugi ti umuna a surat ni Pablo kadagiti taga Corinto, inramanna ti kablaaw ti maysa nga agnagan Sostenes (saan a kadawyan a Griego a nagan) ken dinakamatna kas “kabsattayo.”​—1Co 1:1.