Ti Panangmatmat ti Biblia

Kumpirma—Kasapulan Aya ti Kristiano?

“Ti kumpirma ket maysa a sakramento a mangipaay iti nabautisaran a Kristiano iti naan-anay a Nakristianuan a panagbiag, isu a mamagbalin kenkuana a naespirituan a nataengan, maysa a soldado, ken maysa a saksi ni Kristo.”—The Catholic Encyclopedia for School and Home.

KAADUAN a Protestante dida awaten ti kapanunotan a ti kumpirma ket maysa a sakramento. Nupay kasta, ti maika-13-siglo a teologo a Katoliko a ni Thomas Aquinas nagsurat a ti “kumpirma isut’ maudi a mangan-anay iti sakramento ti bautismo.” Iti aniaman a pamay-an, tumaud ti saludsod: Ar-aramiden kadi dagiti immuna a Kristiano ti kumpirma? Dayta kadi a seremonia maysa a kasapulan iti Kristiano itatta?

“Awan a pulos iti Ebanghelio ti mangipamatmat a ni Jesus a Mismo rinugianna ti Sakramento iti Kumpirma,” inamin ti New Catholic Encyclopedia. Gapuna apay a dagiti mannursuro iti iglesia pinarang-ayda kamaudiananna ti kapanunotan a sumaruno iti bautismo, ti maikadua a seremonia, a mabalin a mangiraman iti pannakapulot iti lana ken panangipatay kadagiti im-ima, ket kasapulan a mamagbalin iti maysa a tao a naan-anay a miembro iti iglesia?

Kasano a Nangrugi ti Kumpirma?

Ti bautismo (buniag) dagiti maladaga ket maysa a kangrunaan a banag a nangiturong iti pannakasapul ti sabali pay a sakramento. “Gaput’ pagaammoda dagiti parikut a pinataud ti panangbautisar kadagiti maladaga,” kuna ti libro a Christianity, “dagiti ig-iglesia . . . ti mangipalagip kadagidiay a nabautisaran no aniat’ kaipapanan daytoy babaen ti ‘panangkumpirma’ kadakuada iti kamaudianan iti panagbiag.” Ti kadi kumpirma pudno a palagipanna ida no ania ti kaipapanan ti bautismo, wenno palidemenna ti kinapudno maipapan iti bautismo?

Ti kinapudno ket ti bautismo dagiti maladaga awan a pulos ti suportarna iti Kasuratan. Ti panangiwarsi iti danum iti ubing, kas pangarigan, dina wayawayaan ti ubing manipud iti dati a basol; ti laeng pammati iti daton a subbot ni Kristo Jesus ti makaaramid iti dayta. (Juan 3:16, 36; 1 Juan 1:7) Ti bautismo iti danum ket maysa a makinruar a simbolo a ti nabautisaran nakaaramiden iti naan-anay a dedikasion babaen ken Jesus a mangaramid iti pagayatan ni Jehova a Dios. Ti bautismo iti danum a maipaay kadagiti ad-adalanna—dagiti manamati—saan nga agpaay kadagiti maladaga.—Mateo 28:19, 20; Aramid 8:12.

“Sadino ti pagpatinggaan ti Bautismo ken sadino ti pangrugian ti Kumpirma?” imtuoden ti New Catholic Encyclopedia. Daytat’ sumungbat: “Nalabit ditay koma padasen nga ilasin dayta iti apag-isu unay, ta tamtamingentayo ti maymaysa a ritual iti immuna nga Iglesia.” Wen, idi umuna a siglo, ti “maymaysa a ritual” a nangiyeg iti naan-anay a kinamiembro iti kongregasion Kristiano isut’ bautismo.—Aramid 2:41, 42.

Ti kadi seremonia ti kumpirma, agraman ti panangipatay kadagiti im-ima, kasapulan sakbay nga awaten ti maysa ti nasantuan nga espiritu? Saan. Iti immuna a kongregasion Kristiano, ti panangipatay kadagiti im-ima a sarunuen ti bautismo ket gagangay a mangaramid kadagiti naisangsangayan a panangtuding wenno mangipaay kadagiti namilagruan a sagsagut iti espiritu. Dagitoy a sagsagut nagpatinggadan idi natay dagiti apostol. (1 Corinto 13:1, 8-10) Ket ti panangipatay kadagiti im-ima masansan a mainaig, saan nga iti bautismo iti danum, no di ket kadagiti espisipiko nga ar-aramid a masapul a maaramid a mainaig iti trabaho a Nakristianuan a kinamisionero. (Aramid 6:1-6; 13:1-3) Gapuna, ti kapanunotan a ti kumpirma itultuloyna ti kasta nga apostoliko a panangipatay kadagiti im-ima ken, kas kunaen ti Basics of the Faith: A Catholic Catechism, “maysa a sakramento a nangbalbaliw a naan-anay iti maysa a tao ta mabalin nga awaten dayta iti maminsan laeng,” napaneknekan nga ulbod iti sidong ti naan-anay a panangusig.

Namakdaar ni apostol Pablo maipapan iti isisiasi manipud iti kangrunaan a kinapudno ti Biblia: “Ta umayto ti aldaw, a didanto maanusan ti nasayaat a sursuro, ket pagreggetanto dagiti tattao ti kaudian nga uso . . . ket kalpasanna, imbes a dumngegda iti kinapudno, agturongda kadagiti pinarbo a sarita.” (2 Timoteo 4:3, 4, The Jerusalem Bible) Kaskasdi, dagidiay a mamati iti ritual iti kumpirma mangisitarda iti dua nga ulidan kas pammaneknek.

Naespirituan a Pakaibatayan?

Ti salaysay a masarakan idiay Aramid 8:14-17 ket masansan a nausar a pakaibatayan iti kumpirma. Nupay kasta, daytoy a panangipatay kadagiti im-ima tapno umawat iti nasantuan nga espiritu ket maysa a naisangsangayan nga okasion. Kasano a kasta? Dagiti Samaritano saanda a proselita a Judio. Gapuna, isudat’ immuna a di-Israelita a nainayon iti kongregasion Kristiano. Idi nangasaba ti adalan a ni Santiago idiay Samaria, adu a Samaritano ti “nabautisaran, agpadpada dagiti lallaki ken babbai,” ngem saanda a dagus nga immawat iti nasantuan nga espiritu. (Aramid 8:12) Apay?

Laglagipenyo, ni Pedro ti nangitalkan ni Kristo Jesus “kadagiti tulbek iti pagarian”—ti pribilehio a damdamo a mangiparang iti gundaway a sumrek “iti pagarian dagiti langlangit” agpaay iti naiduma a grupo dagiti kumberte. (Mateo 16:19) Gapuna saan nga agingga a napan ni Pedro ken ni Juan idiay Samaria ken impatayda dagiti im-imada kadagidiay immuna a di-Judio nga ad-adalan a naibukbok ti nasantuan nga espiritu kadakuada kas mangipamatmat iti mainanama a pannakimiembroda “iti pagarian iti langlangit.”

Daddumat’ makakita idiay Aramid 19:1-6 kadagiti pammaneknek a dagiti immuna a Kristiano addaanda ti naisina a ritual kalpasan ti bautismo. Iti daytoy a kaso, nupay kasta, nalawag a ti rason iti pannakaitantan ti nasantuan nga espiritu kadagiti dadduma nga adalan idiay siudad ti Efeso ket dagitoy a baro a manamati ket nabautisaranda “iti bautismo ni Juan,” isu a saanen nga agkurkuri idi. (Kitaenyo met ti Aramid 18:24-26.) Idi nailawlawag daytoy kadakuada, dagitoy dagdagus a “nabautisaranda iti nagan iti Apo a ni Jesus.” Ket iti daytoy a gundaway, ni apostol Pablo “impatayna dagiti im-imana kadakuada” tapno awatenda ti dadduma kadagiti namilagruan a sagsagut iti nasantuan nga espiritu malaksid ti pannakaawatda kas naespirituan nga annak ti Dios.—Roma 8:15, 16.

Kadagitoy a salaysay, ti New Dictionary of Theology kunaenna: “Awan ti direkta a pannakaitultuloy ti pannakausarna a mabalin a tuntonen kadagitoy a paspasamak, ket uray pay no dagitoy mangipaayda iti paguadan, pagduaduaan a dagitoy mamatmatanda a kas normal a pangrugian iti Kristiano kas iti pamay-an a pannakabautisar. . . . Dagiti Aramid dagiti Apostol addaan kadagiti adu a pasamak a nakausaran iti bautismo iti danum nga awan ti simmaruno a panangipatay kadagiti im-ima (ta dagitoy a pasamak iti kinapudnona agparang a mailaksid).” Wen, dagitoy ket mailaksid a tigtignay tapno masaranget dagiti naisangsangayan a kasasaad.

“Ti ritual a maawagan ‘kumpirma,’ kuna ti New Dictionary of Theology, “nagbalinen a ‘ritual iti panangsapul iti teolohia.’” Dayta, kinapudnona, ket di nainkasuratan a ritual, maysa a produkto ti ulbod a sursuro, ket pudno a saan a kasapulan agpaay kadagiti Kristiano.