DALAN, TI

Daytoy a sasao mabalin a mayaplikar iti maysa a kalsada, lansangan, desdes, wenno dana; wagas ti panagtignay wenno kababalin; wenno kadawyan a turongen, pamay-an, wenno metodo. Iti Kasuratan masansan a maar-aramat dayta mainaig iti dana ti kababalin ken panagtignay a mabalin nga anamongan wenno di anamongan ni Jehova a Dios. (Uk 2:22; 2Ar 21:22; Sal 27:11; 32:8; 86:11; Isa 30:21; Jer 7:23; 10:23; 21:8) Iti iyaay ni Jesu-Kristo, ti panangtagiragsak ti maysa a tao iti umiso a pannakirelasion iti Dios ken iti naanamongan nga iyaadani kenkuana iti kararag nagpannuray iti panangawat ken Jesu-Kristo. Kas kinuna ti Anak ti Dios: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Jn 14:6; Heb 10:19-22) Dagidiay nagbalin a paspasurot ni Jesu-Kristo naikuna a kameng ida “Ti Dalan,” kayatna a sawen, inannurotda ti maysa a wagas wenno pamay-an ti panagbiag a naisentro iti pammati ken Jesu-Kristo, a sinurotda ti ulidanna.​—Ara 9:2; 19:9, 23; 22:4; 24:22.