EUTICO

[Naimbag ti Lak-amna; Naballigi].

Maysa nga agtutubo a lalaki idiay Troas a kaudian a tao a nailanad iti Kasuratan a simimilagro a napagbiag manen. Idi simmarungkar ni Pablo idiay Troas iti maikatlo a panagdaliasatna kas misionero, inyat-atiddogna ti bitlana kadagiti kakabsat agingga iti tengnga ti rabii. Yantangay napaksuyan ken mabalin a gapu iti pudot ti adu a pagsilawan ken pannakapusek ti makinngato a siled, nakaturog iti nargaan ni Eutico ket natnag manipud iti tawa ti maikatlo a kadsaaran. Ti mangngagas a ni Lucas, ti mannurat iti Aramid ken nalawag a maysa a nakasaksi iti napasamak, impadamagna a saan laeng a naawanan iti puot ni Eutico no di ket “inakupda a natay.” Kas panangtuladna iti inaramid ni Eliseo idi pinagungarna ti anak ti Sunamita, nagpakleb ni Pablo iti rabaw ni Eutico nga inarakupna. Impasimudaag ti sasao ni Pablo a “Sumardengkayo nga agar-ariwawa, ta ti kararuana adda kenkuana” a napasubli ti biag ni Eutico.​—Ara 20:7-12; kitaenyo met ti 2Ar 4:34.