CHIOS

Maysa kadagiti dadakkel nga isla iti Baybay Aegeano ken naisina manipud makinlaud a dapnis ti Asia Menor babaen iti maysa a lipit a 8 km (5 mi) ti kalawana wenno nasursurok pay. Ti isla ket addaan iti kaatiddog nga agarup 50 km (30 mi) (manipud amianan nga agpaabagatan) ken agduduma ti kaakabana a 13 agingga iti 29 km (8 agingga iti 18 mi) (manipud daya nga agpalaud).

Nadakamat ti Chios iti salaysay iti Aramid 20 maipapan iti panagsubli ni Pablo idiay Jerusalem idi agngudon ti maikatlo a panagbaniagana kas misionero, idi agarup 56 K.P. Ti barko a nagluganan ni Pablo nalabit nagluas iti bigat manipud Mitilene (Ara 20:14) nga agarup 100 km (60 mi) iti amianan a daya, ket nalabit ‘dimteng iti ballasiw ti Chios’ (Ara 20:15) idi lumneken ti init. Kalpasanna, iti sumaganad nga aldaw, nagtultuloy ti panaglayag agingga idiay Samos, agarup 100 km (60 mi) nga agpababa manipud iti dapnis.

Idi tiempo ti panagbaniaga ni Pablo, naibilang ti Chios kas siwayawaya a siudad-estado ti Asia a probinsia ti Roma, nagtalinaed a kasta ti kasasaadna agingga iti panagturay ni Emperador Vespasian (69-79 K.P.). Agpada a ti isla ken ti kangrunaan a siudadna ket aw-awagan ita dagiti Griego iti Khios, ket Scio met ti awag dagiti Italiano.