SEKTA
Ti Griego a sao (haiʹre·sis, a nagtaudan ti sao nga “erehe”) a naipatarus a sekta ket kaipapananna ti “pili” (Le 22:18, LXX) wenno “ti napili,” ngarud tumukoy iti “maysa a grupo dagiti lallaki a mangisinsina iti bagbagida manipud sabsabali ken mangsursurot kadagiti bukodda a patpatien [maysa a sekta wenno gunglo].” (Greek-English Lexicon of the New Testament ni Thayer, 1889, p. 16) Nayaplikar daytoy a termino kadagiti pasurot ti dua a nalatak a sanga ti Judaismo, dagiti Fariseo ken Saduceo. (Ara 5:17; 15:5; 26:5) Ti Nakristianuan a pammati ket inawagan met dagiti di Kristiano iti “sekta” wenno “ti sekta dagiti Nazareno,” a nalabit ibilbilangda dayta kas simmina iti Judaismo.—Ara 24:5, 14; 28:22.
Ti namunganay iti Kristianidad, ni Jesu-Kristo, inkararagna nga agari koma ti panagkaykaysa kadagiti pasurotna (Jn 17:21), ket interesado unay dagiti apostol a mataginayon ti panagkaykaysa ti kongregasion Kristiano. (1Co 1:10; Jud 17-19) Ti di panagkaykaysa iti patpatien ket mangparnuay iti nakaro a panagsusupiat, di panagtutunos, ken uray pay iti ginnura. (Idiligyo ti Ara 23:7-10.) Gapuna rumbeng a liklikan dagiti sekta, yantangay karaman dayta kadagiti aramid ti lasag. (Ga 5:19-21) Napakdaaran dagiti Kristiano a saanda koma nga agbalin a manangitandudo kadagiti sekta wenno agpayaw-awan kadagiti ulbod a mannursuro. (Ara 20:28; 2Ti 2:17, 18; 2Pe 2:1) Iti surat ni apostol Pablo ken Tito, imbilinna a ti maysa a tao nga agtultuloy a mangitandudo iti maysa a sekta kalpasan a naminduan a nabagbagaan ket mailaksid, nabatad a kaipapananna a maparuar dayta a tao manipud kongregasion. (Tit 3:10) Dagidiay saan a nakiraman a nangparnuay iti panaglalasin iti uneg ti kongregasion wenno saan a nangsuporta iti maysa a gunglo ipakitada a naidumada babaen ti panagbiagda a simamatalek ken ti panangiparangarangda iti pammaneknek nga an-anamongan ida ti Dios. Nalawag a daytoy ti kayat a sawen ni Pablo idi imbagana kadagiti taga Corinto: ‘Sigurado met nga adda dagiti sekta iti nagtetengngaanyo, tapno dagiti tattao a naanamongan maiparangarang met iti nagtetengngaanyo.’—1Co 11:19.