NASAYAAT A SASANGLADAN

Maysa a sangladan iti asideg ti siudad ti Lasea a maikunkuna nga isu ti luek iti makin-abagatan a dapnis ti Creta. Naawagan dayta iti Kaloi Limniones, a dayta pay laeng ti naganna iti moderno a Griego. (Ara 27:7, 8) Daytoy a luek ket agarup 8 km (5 mi) iti daya ti rawis a daga a maaw-awagan Matala (Akra Lithinon), ti kaabagatanan a paset ti Creta.

Idi agarup 58 K.P., kas maysa a balud, naglayag ni apostol Pablo manipud Mira (iti makin-abagatan a dapnis ti Asia Menor) a lumasat iti Cnido nga agturong idiay Roma. Ti mas direkta a ruta manipud Cnido nga agturong iti Roma ket ti ilalasat iti amianan ti Creta. Ngem nabatad a gapu iti sumuba nga angin, nalabit manipud amianan a laud, napilitan dagiti marino a dumalan iti makin-abagatan a ruta manipud Cnido nga agturong iti Creta sa naglayagda iti malingdan ti makin-abagatan a dapnis ti isla. Nupay narigatanda, nakagtengda met laeng idi agangay iti Nasayaat a Sasangladan.​—Ara 27:5-8.

“Napalabasen ti adu a tiempo” idi pampanunotendan ti agluas manipud Nasayaat a Sasangladan nalabit gapu ta inur-urayda sadiay nga agkalma ti angin wenno gapu ta nainayad ken narigat ti panagdaliasat. Nalpas idin ti panagayunar iti Aldaw ti Panangabbong (naladaw a paset ti Setiembre wenno nasapa a paset ti Oktubre), isu a napeggad ti panaglayag.​—Ara 27:9.

Yantangay masansan a napasaran idin ni Pablo dagiti peggad iti baybay ken napadasanna a mismo ti di kumurang a tallo a pannakarba iti barko (2Co 11:25, 26), nainsiriban nga insingasingna a ti barangay ket agpalabas iti kalam-ekna iti Nasayaat a Sasangladan. (Saan a naipalgak iti salaysay no naipaltiing ti balakadna iti daytoy a gundaway.) Nupay kasta, ti singasing ti piloto ken ti makinkukua iti barko ti impangag ti opisial ti buyot, a nabatad nga isu ti agdesdesision iti rumbeng a maaramid. Ti Nasayaat a Sasangladan ket “saan a mainugot” a pagpalabasan iti tiempo ti lam-ek; isu nga insingasing ti kaaduan a pumanawda sadiay, ket naglayag dagiti marino nga agturong iti Fenix nga as-asideg pay iti dapnis. Makaallilaw ti nakapsut a pul-oy ti abagat nga angin. Di nagbayag kalpasanna, adda nadawel unay nga angin a nangdalapus iti barko ket kamaudiananna narba iti dapnis ti Malta, agarup 900 km (560 mi) iti laud.​—Ara 27:9-15, 39-41; 28:1.

Kastoy ti insurat ni James Smith maipapan itoy a salaysay iti Aramid: “Makapainteres a makita no kasano a tunggal manayonan ti pannakaammotayo maipapan iti pasamak ti salaysay ad-adda a mapatalgedan ti kinamapagpiaran ken kinaumiso ti libro. Agparang itan, manipud kadagiti kapaliiwan ni Mr. Brown ken kadagiti naud-udi a panagsirarak, a ti Nasayaat a Sasangladan ket salsalakniban unay dagiti isla, a nupay saan a maipada iti Lutro [naipagarup a ti Fenix], mabalin a nakasaysayaat a sangladan iti kalam-ekna; ket no ikabilangan ti kellaat nga idadateng, ti kasansan, ken ti kinadawel dagiti napigsa nga angin iti amianan, ken ti kinasigurado a pannakaiduron ti barko nga agpataaw no dumteng ti kasta a napigsa nga angin iti ruta manipud Nasayaat a Sasangladan agingga iti Lutro, ngarud mapagduaduaan unay ti kinanainsiriban ti singasing ti apo ken makinkukua iti barko, ket ti singasing nga impaay ni San Pablo ket nalabit pasingkedan a mismo uray dagiti pamay-an ti panaglayag.”​—The Voyage and Shipwreck of St. Paul, London, 1866, p. 85, ftn.