MARINO

Maysa a mangimatmaton iti panaglayag ti maysa a barko wenno tumultulong iti pannakaiturong dayta; lumalayag wenno marinero. (1Ar 9:26, 27; Eze 27:8, 9; Apo 18:17-19) Napeggad ti biag dagiti marino iti nagkauna a tiempo. Iti baybay nga ipallapallayog ti bagyo, gistay awan gawgawayda. Insurat ti salmista: “Gapu iti didigra masarakan ti mismo a kararuada a malunlunag. Agibar-ibar ken agdiwengdiwengda a kas iti maysa a nabartek a tao, ket uray ti isuamin a siribda mapaneknekan a nakiro. Ket mangrugida nga umkis ken Jehova iti rigatda.”​—Sal 107:26-28.

Aglaon ti Aramid 27:15-19 iti nabiag a salaysay maipapan kadagiti addang nga inaramid dagiti marino bayat ti maysa a bagyo. Ti bilog, a naiguyod ken nabatad a nagpaay kas pangispal-biag a barangay no kasapulan, ket naisagpat. Dagiti pangtulong, nalabit taltali wenno kawkawar, ket naaramat tapno mapatibker ti sirok ti barangay, kayatna a sawen, maipalikmutda iti bagi ti barko ket mapairutanda iti makinrabaw a kadsaaran. Naibaba ti alikamen a paglayag. Mabalin a kaipapanan daytoy a ti makinngato a paset ti kangrunaan a layag ket nalukot a naipababa. Naitapuak dagiti aruaten tapno mapalag-anan ti sasakayan, iti kasta ad-adda a makapagtapaw ti barko.​—Idiligyo ti Jon 1:5; Ara 27:38; kitaenyo ti BARKO.