Maysa Aya a Kulto Dagiti Saksi ni Jehova?

NAIDARUM ni Jesu-Kristo kas mammartek, narawet, mananglabsing iti Sabbath, ulbod a saksi, manangtabbaaw iti Dios, ken babaonen ni Satanas. Naidarum met kas managalsa.​—Mateo 9:34; 11:19; 12:24; 26:65; Juan 8:13; 9:16; 19:12.

Kalpasan ti ipapatay ken panagungar ni Jesus, naidissuor met kadagiti adalanna dagiti agkakadagsen a pammabasol. Maysa a grupo dagiti Kristiano idi umuna a siglo ti inulod dagiti umili sada insaklang kadagiti agturay ti siudad. ‘Riniribuk dagitoy a lallaki ti mapagnaedan a daga,’ impukpukkawda. (Aramid 17:6) Iti naminsan, naisaklang ni apostol Pablo ken ti kaduana a ni Silas kadagiti agtuturay ken napabasolda iti panangriribuk iti kasta unay iti siudad ti Filipos.​—Aramid 16:20.

Iti saan a nabayag, naidarum ni Pablo kas maysa a “peste a tao ket mangparparnuay kadagiti iyaalsa kadagiti amin a Judio iti intero a mapagnaedan a daga” ken iti panangpadpadas “a mangtabbaaw iti templo.” (Aramid 24:5, 6) Siuumiso ti panangiladawan dagiti panguluen a Judio idiay Roma iti kasasaad dagiti pasurot ni Jesus idi a binigbigda: “Ta pudno a no maipapan itoy a sekta naammuanmi a masupsuppiat iti isuamin a lugar.”​—Aramid 28:22.

Nalawag, imbilang dagiti dadduma daytoy baro a grupo a binangon ni Jesu-Kristo kas maysa a relihiuso a grupo nga addaan kadagiti radikal a kapanunotan ken ug-ugali a maisupadi iti maawat a normal a sosial a kababalin kadagidi a tiempo. Awan duadua nga adu ita ti mangipagarup kadagiti Kristiano kas maysa a napeggad a kulto. Masansan a dagiti prominente ken mararaem a kameng ti kagimongan ti mangidardarum, ket kasla daytoy ti nangpadagsen kadagiti pammabasol. Adu ti namati kadagiti pammabasol maibusor ken Jesus ken kadagiti adalanna. Ngem, kas mabalin a pagaammoyo, bin-ig a kinaulbod dagitoy a pammabasol! Ti kinapudno nga imbagbaga dagiti tao dagitoy a bambanag saanna a kayat a sawen a pudno dagitoy.

Komusta met ngay ita? Tumutop kadi a tukoyen dagiti Saksi ni Jehova kas maysa a relihiuso a grupo nga addaan kadagiti radikal a kapanunotan ken ug-ugali a maisupadi iti maawat a normal a sosial a kababalin? Maysa aya a kulto dagiti Saksi ni Jehova?

No Ania ti Ipakita ti Pammaneknek

Inlawlawag ti maysa nga opisial ti gobierno idiay siudad ti St. Petersburg, Russia: “Imparangda kadakami dagiti Saksi ni Jehova kas maysa a kita ti nalimed a sekta a nakatugaw iti kasipngetan ken mangpappapatay kadagiti ubbing ken iti bagbagida.” Nupay kasta, iti di pay nabayag, nalawlawagan dagiti umili ti Russia maipapan iti pudno a kinasiasino dagiti Saksi. Kalpasan ti pannakipagtrabahona kadagiti Saksi ni Jehova mainaig iti maysa a kumbension internasional, kinuna ti isu met laeng nga opisial: “Ita makitakon a normal ken naragsakda a tattao, nasaysayaatda pay ketdi ngem dagiti adu a tattao nga am-ammok. Mannakikappia ken natalnada, ken kasta unay ti panangipategda iti maysa ken maysa.” Innayonna: “Talaga a diak maawatan no apay a padpadaksen ida dagiti tattao.”

Saan a mangang-angay dagiti Saksi ni Jehova kadagiti ritual no aggigimongda, ken saan met a nalimed ti panagdaydayawda. Kinuna ni mannurat a Julia Mitchell Corbett, saan a Saksi: “No agtataripnongda, kadawyanna iti sumagmamano a daras iti makalawas, kadagiti Kingdom Hall (saan a simbaan ti pangawagda iti pagtataripnonganda), busbosenda ti kaaduan a tiempoda iti panagadal ken panangsalaysay iti Biblia.” Namarkaan dagiti pagtataripnonganda iti nalawag a karatula. Silulukat dagiti gimong, ken maawis ti publiko a tumabuno. Maabrasa unay dagiti di ninamnama a bisita.

“Agdindinamag dagiti Saksi gapu iti kinamapagpiaran, kinadayaw, ken kinagagetda,” innayon ni Corbett iti librona a Religion in America. Sidadaan a bigbigen dagiti adu a saan a Saksi nga awan ti naisangsangayan wenno karkarna maipapan kadagiti Saksi ni Jehova. Saan a maisupadi ti kababalinda iti maawat kas normal a sosial a kababalin. Siuumiso a kinuna ti The New Encyclopædia Britannica a “siiinget a salsalimetmetan [dagiti Saksi] ti nangato a moral a pagannurotan iti personal a kababalin.”

Nagsurat kadagiti Saksi ni Jehova ti direktor ti warnakan ken dagiti espesial a proyekto para iti maysa nga estasion ti telebision idiay Estados Unidos kas sungbat iti di nainkalintegan a report maipapan kadagiti Saksi iti programa ti TV a 60 Minutes. Kinunana: “No ad-adu pay a tao ti agbiag a kas iti panangannurotyo iti pammatiyo, saan koma a kastoy ti kasasaad daytoy a nasion. Maysaak nga agiwarwarnak ket ammok a naipasdek ti organisasionyo iti ayat ken natibker a pammati iti Namarsua. Kayatko a maammuanyo a saan nga amin nga agiwarwarnak ket mangidumduma.”

Pagaammo a Relihion

Nainkalintegan aya nga ibaga a dagiti Saksi ni Jehova ket maysa a bassit ken panatiko a grupo? Pudno a bassit ti bilang dagiti Saksi ni Jehova no idilig kadagiti dadduma a relihion. Nupay kasta, lagipenyo ti kinuna ni Jesus: “Akikid ti ruangan ken nailet ti dalan nga agturong iti biag, ket bassit dagidiay makasarak iti dayta.”​—Mateo 7:13, 14.

Uray pay kasta, saan a maysa a bassit ken panatiko a kulto dagiti Saksi. Idi primavera ti 1993, nasurok a 11 a milion ti dimmar-ay iti Panglaglagip iti ipapatay ni Kristo nga inangay dagiti Saksi. Ngem ti napatpateg ngem iti bilangda isu ti natakneng ken mapagulidanan a kababalinda. Mapadpadayawanda iti intero a lubong gapu iti dayta. Awan duadua a daytoy ti maysa a makagapu nga iti adu a pagilian opisial a mabigbigbigdan kas maysa a pagaammo, pudpudno a relihion.

Naipangruna ti nabiit pay a pangngeddeng ti European Court of Human Rights. Indeklarana a rumbeng a tagiragsaken dagiti Saksi ti wayawaya iti panunot, konsiensia, ken relihion ken adda karbenganda a mangisarsarita ken mangisuro iti pammatida kadagiti sabsabali. Saan a maibaga [ti European Commission] daytoy no pagaammo dagiti Saksi ni Jehova a mangar-aramat kadagiti makaallilaw ken di maawat a pamay-an ti panangawis kadagiti miembro wenno no mangar-aramatda kadagiti nasikap a wagas ti panangtengngel iti panunot dagiti pasurotda.

Umariwekwek iti intero a lubong ti makaammo unay kadagiti Saksi ni Jehova. Maipapan kadagiti riniwriw a saan a Saksi a makipagad-adal iti Biblia kadagiti Saksi wenno nakapadas a nakipagadal kadakuada, maisaludsodtayo, Pinadpadasda aya a sabidongan ti panunotyo? Nangaramat aya dagiti Saksi kadagiti pamay-an a mangtengngel iti panunotyo? “Saan” ti awan duadua a nabatad a sungbatyo. Nalawag, no nausar dagitoy a pamay-an, nakaad-adu koma dagiti biktima a mangsuppiat iti aniaman nga argumento iti pabor dagiti Saksi ni Jehova.

“Sipapasnek a Tumultulongda Kadagiti Tattao”

Masansan a suminsina dagiti miembro ti kulto kadagiti pamilia, gagayyem, ken uray iti kagimongan. Kasta aya dagiti Saksi ni Jehova? “Saanak a maysa kadagiti Saksi ni Jehova,” insurat ti maysa nga agiwarwarnak idiay Czech Republic. Ngem innayonna: “Nalawag nga addaanda [dagiti Saksi ni Jehova] iti naruay a moral a pigsa. . . . Bigbigenda dagiti agtuturay ti gobierno ngem patienda a ti laeng Pagarian ti Dios ti makarisut kadagiti amin a parikut ti tao. Ngem tandaananyo​—saanda a panatiko. Sipapasnek a tumultulongda kadagiti tattao.”

Ken saanda nga agbibiag nga is-isuda, a suminsina kadagiti kakabagian ken dadduma pay. Bigbigen dagiti Saksi ni Jehova nga addaanda iti Nainkasuratan a rebbengen a mangipateg ken mangaywan kadagiti pamiliada. Makipagnaed ken makipagtrabahoda kadagiti tattao a naggapu iti amin a puli ken relihion. No dumteng dagiti didigra, alistoda nga agtignay babaen ti panangipaayda kadagiti bambanag a pangsaranay ken dadduma pay a naparabur a tulong.

Napatpateg pay, makipaspasetda iti maysa nga edukasional a programa nga awan kapadana. Mano a relihion ti addaan iti organisado a sistema ti isasarungkar iti tunggal tao iti lugarda? Ar-aramiden dagiti Saksi ni Jehova daytoy iti nasurok a 200 a daga ken iti nasurok a 200 a pagsasao! Nalawag, “sipapasnek a tumultulong [dagiti Saksi ni Jehova] kadagiti tattao.”

Nainget a Panangsurot iti Biblia

Pudno a naiduma ti sursuro dagiti Saksi ni Jehova iti sursuro dagiti iglesia. Patien dagiti Saksi ni Jehova a ni Jehova ti mannakabalin-amin a Dios ket ni Jesus ti Anakna, saan a paset ti nagkatlo a dios. Sititibker a naibatay ti pammatida iti pammati a ti laeng Pagarian ti Dios ti makabang-ar iti agsagsagaba a sangatauan. Pakpakdaaranda dagiti tattao maipapan iti umas-asideg a pannakadadael daytoy rinuker a sistema ti bambanag. Ikaskasabada ti maipapan iti naindagaan a paraiso nga inkari ti Dios nga agpaay iti natulnog a sangatauan. Saanda a pagrukbaban ti krus. Saanda a rambakan ti Christmas. Patienda a matay ti kararua ken awan ti apuy iti impierno. Saanda nga agsida iti dara, wenno agpayalison iti dara. Saanda a makinamin iti politika ken makipaset iti gubat. Naisaludsodyo kadin no apay a naiduma unay ti sursuro dagiti Saksi ni Jehova?

Inlawlawag ti maysa a pagiwarnak ti Massachusetts, ti Daily Hampshire Gazette, a ti “nainget a panangipatarus [dagiti Saksi ni Jehova] iti Biblia iparitna dagiti adu nga aramid nga ipagarup dagiti sabsabali a saan a dakes . . . , iti panagreggetda a mangsurot iti ulidan dagiti Kristiano idi umuna a siglo ken iti sao ti Biblia.” Umanamong ti The Encyclopedia of Religion a “naibatay amin a patpatienda iti Biblia. Mangaramatda iti teksto ti Biblia tapno pasingkedan ti gistay tunggal sao ti pammatida, nga awatenda nga awan panagduadua ti autoridad ti Biblia, a mangilaksid a naan-anay iti tradision.” Kuna ti libro a Religion in America: “Saan a pulos a nagmawmaw ti reggetda nga agad-adal iti Biblia, ken suportado dagiti sursuroda iti naurnos a sistema ti panangaramat kadagiti kasuratan.”

Asino ti Panguloda?

Awan duadua a gapu iti daytoy nainget a panangsurot iti sursuro ti Biblia a ti panagrukbab ken panagdayaw kadagiti natauan a panguluen nga ar-aramiden dagiti kulto ita ket saan a masarakan kadagiti Saksi ni Jehova. Laksidenda ti kapanunotan maipapan iti panaglasin ti klero ken ti laigo. Pudno la unay ti kinuna ti The Encyclopedia of Religion maipapan kadagiti Saksi ni Jehova: “Maiparit ti klase klero ken dagiti titulo a pakabigbigan.”

Sursurotenda ni Jesu-Kristo kas Panguloda ken kas Ulo ti kongregasion Kristiano. Kinuna ni Jesus: “Ngem dakayo, dikay maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Dikay met maawagan iti ‘papanguluen,’ ta ti Panguluenyo ket maymaysa, ni Kristo.”​—Mateo 23:8-12.

Nalawag a saan a maysa a kulto dagiti Saksi ni Jehova, no kasano a ni Jesus ket saan a narawet ken mammartek. Kinapudnona, saan nga amin a naimpluensiaan kadagiti saan nga agpayso a report maipapan ken Jesus ken kadagiti adalanna ket nasugsogan a mamardaya kenkuana. Mabalin a saan nga ammo dagiti dadduma ti pudno a kasasaad. No adda salsaludsodyo maipapan kadagiti Saksi ni Jehova ken kadagiti patpatienda, apay a dikay am-ammuen ida a naimbag? Silulukat dagiti Kingdom Hall-da kadagiti amin nga agsapsapul iti kinapudno.

Magunggonaankay met iti naannad a panangsukimatda iti umiso a pannakaammo iti Biblia ken masursuroyo no kasano ti agdayaw iti Dios a maitunos iti sasao ni Jesus nga: “Um-umayen ti oras, ket isu dayta itan, inton dagiti pudno a managdaydayaw agdaydayawdanton iti Ama buyogen ti espiritu ken kinapudno, ta, pudno unay, ti Ama sapsapulenna dagiti kakasta nga agdaydayaw kenkuana.”​—Juan 4:23.