Agtawen iti Nasuroken a Sangagasut nga Addaan iti Panggep iti Biag
NI Elin ket maysa kadagiti 60 a tattao idiay Sweden a nabiit pay a nailista kas agtawen iti 105 wenno natataengan pay. Isu a mismo ket agtawenen iti 105. Nupay agnanaeden iti pagtaengan dagiti lallakay ken babbaket, kabaelanna pay laeng ti agserbi kas maysa nga aktibo a Saksi ni Jehova, ti panagbiag a pinilina nasurok nga 60 a tawenen ti napalabas.
Iti panangasabana, sursuroten ni Elin ti inyulidan ni apostol Pablo idi isu ket naibalud iti maysa a pagtaengan. Kinasabaan ni Pablo ti amin a sangailina. (Aramid 28:16, 30, 31) Umasping iti dayta, ap-aprobetsaren ni Elin ti tunggal gundaway tapno makasabaanna dagiti para dalus, dentista, doktor, mammukis, nars, ken dadduma pay nga umay iti pagtaenganna. Iranranudna kadakuada ti naimbag a damag a masarakan iti Biblia. Ni Elin ket pasaray sarungkaran dagiti kakongregasionna ken awisenda pay dagiti iyad-adalanda iti Biblia a sumarungkar kenkuana tapno makasursuroda iti pannakaammo ken kinasiribna.
Dagiti kakongregasion ni Elin apresiarenda ti naragsak a personalidadna ken ti tarigagayna nga agsursuro. Kuna ti padana a Saksi: “Makapasiddaaw ti abilidadna a makidanggay kadagiti aktibidad ti kongregasion. Malagipna ti nagnagan ti amin nga ubbing ken dagidiay nabiit pay nga immakar iti kongregasionmi.” Agdinamag met ni Elin gapu iti kinamanagpadagus, kinamanagpakatawa, ken positibo a panangmatmatna iti biag.
Ania ti tumultulong ken ni Elin tapno agtultuloy a naragsak ken sipapanunot latta iti panggepna iti biag? Inaldaw a basbasaenna ti maysa a teksto iti bokleta a Panangsukimat Kadagiti Kasuratan iti Inaldaw, nga impablaak dagiti Saksi ni Jehova. Babaen iti magnifying glass, inaldaw a basbasaenna met ti sumagmamano a paset ti Biblia. Agsagsagana ni Elin para iti linawas a gimong dagiti Saksi ni Jehova, ket nupay saanna a matabunuan dagitoy, dumdumngeg kadagiti nairekord a paset dagitoy a gimong. Aniaman ti edadtayo, ti regular a panagbasa iti Biblia ken kadagiti naibasar iti Biblia a publikasion agraman ti saan a panagliway kadagiti Nakristianuan a gimong ti makatulong kadatayo a maaddaan iti makapnek ken napnuan panggep a biag.—Salmo 1:2; Hebreo 10:24, 25.