Saan a Mapaay “ti Bilin ni Jehova”

“Dakamatek ti bilin ni Jehova; kinunana kaniak: ‘Sika ti anakko . . . Agkiddawka kaniak, tapno maitedko ti nasnasion kas tawidmo.’”​—SALMO 2:7, 8.

1. Ania ti nagdumaan ti panggep ti Dios ken ti panggep dagiti nasion?

ADDA panggep ni Jehova agpaay iti sangatauan ken iti daga. Adda met panggep dagiti nasion. Ngem anian a nagduma dagitoy a panggep! Saantay a pagsiddaawan dayta yantangay kuna ti Dios: “No kasano a ti langlangit nangatngatoda ngem iti daga, kasta met a ti daldalanko nangatngatoda ngem iti daldalanyo, ken ti pampanunotko ngem iti pampanunotyo.” Sigurado a matungpal ti panggep ti Dios gapu ta intuloyna a kinuna: “No kasano a ti agbuyat a tudo bumaba, ken ti niebe, manipud iti langlangit ket saan nga agsubli iti dayta a lugar, malaksid no pudno nga umagsep iti daga ket mamagtaud manipud iti dayta ken mamagtubo, ket ti bin-i pudno a maited iti managmula ken tinapay iti mangan, kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:9-11.

2, 3. Ania ti imbatad ti maikadua a salmo, ngem ania a salsaludsod ti tumaud?

² Imbatad ti maikadua a salmo a matungpal ti panggep ti Dios mainaig iti Mesianiko nga Ari nga insaadna. Ni Ari David, a nangputar iti dayta a salmo, pinaltiingan ti Dios a mangipakauna nga addanto nakadkadlaw a tiempo ti riribuk a mapasaran dagiti nasion. Dagiti agtuturayda bumusordanto ken ni Jehova a Dios ken iti Pinulotanna. Ngem inkanta met ti salmista: “Dakamatek ti bilin ni Jehova; kinunana kaniak: ‘Sika ti anakko . . . Agkiddawka kaniak, tapno maitedko ti nasnasion kas tawidmo ken dagiti ungto ti daga kas bukodmo a sanikua.’”​—Salmo 2:7, 8.

³ Ania ti epektona kadagiti nasion “ti bilin ni Jehova”? Kasanona nga apektaran ti sangatauan? Kinapudnona, ania ti kaipapanan dagitoy a pasamak kadagiti amin a managbuteng-Dios nga agbasbasa iti maikadua a salmo?

Agarimbangaw Dagiti Nasion

4. Kasanoyo a gupgopen dagiti kangrunaan a punto ti Salmo 2:1, 2?

⁴ Iti panangtukoyna kadagiti tignay dagiti nasion ken dagiti agturay kadakuada, kinuna ti salmista iti rugi ti pinutarna a kanta: “Apay a nagaarimbangaw dagiti nasion ket dagiti met laeng nasional a bunggoy nangidaydayamudomda iti ubbaw a banag? Ti ar-ari ti daga agtakderda ket dagiti met laeng nangato nga opisial naguurnongda a nagmaymaysa maibusor ken Jehova ken maibusor iti daydiay pinulotanna.”​—Salmo 2:1, 2.a

5, 6. Ania nga “ubbaw a banag” ti ‘idaydayamudom’ dagiti nasional a bunggoy?

⁵ Ania nga “ubbaw a banag” ti ‘idaydayamudom’ dagiti agdama a nasional a bunggoy? Imbes a bigbigenda daydiay Pinulotan ti Dios​—ti Mesias, wenno Kristo​—‘idaydayamudom’ dagiti nasion ti pannakataginayon ti turayda. Dagitoy a sasao ti maikadua a salmo ket addaan iti kaitungpalan idi umuna a siglo K.P. idi nagkumplot dagiti Judio ken Romano nga agtuturay tapno papatayenda ni Jesu-Kristo, ti Ari a pinili ti Dios. Ngem idi 1914 ti kangrunaan a kaitungpalanna, idi naitrono ni Jesus kas Ari idiay langit. Sipud idi, awan ti uray maysa a napolitikaan nga organisasion ditoy daga a nangbigbig iti Ari nga introno ti Dios.

⁶ Ania ti ipamatmat ti panangisaludsod ti salmista nga ‘apay nga idaydayamudom dagiti nasional a bunggoy ti ubbaw a banag’? Ipakitana nga ubbaw ti panggepda; awan kaes-eskanna ken sigurado a mapaay. Dida maiyeg ti talna ken panagkaykaysa ditoy lubong. Kaskasdi a busorenda ti turay ti Dios. Kinapudnona, sitatangsit a nagaaliansada tapno makigubatda iti Kangatuan ken iti Daydiay Pinulotanna. Anian a kinamaag!

Ti Naballigi nga Ari nga Insaad ni Jehova

7. Iti kararag, kasano nga inyaplikar dagiti pasurot ni Jesus ti Salmo 2:1, 2?

⁷ Dagiti pasurot ni Jesus inyaplikarda kenkuana dagiti sasao ti Salmo 2:1, 2. Idi naidadanesda gapu iti pammatida, inkararagda: “Soberano nga Apo [Jehova], sika Daydiay nangaramid ti langit ken ti daga ken ti baybay ken ti amin a bambanag nga adda kadakuada, ken nagkuna baeten ti nasantuan nga espiritu babaen ti ngiwat ni amami a David, nga adipenmo, ‘Apay a nagaarimbangaw dagiti nasion ket dagiti ili nagmennamennada iti ubbaw a bambanag? Ti ar-ari ti daga timmakderda ket dagiti agtuturay naguurnongda a nagmaymaysa maibusor ken Jehova ken maibusor iti daydiay pinulotanna.’ Nupay kasta, agpadpada a da Herodes [Antipas] ken Poncio Pilato agraman dagiti tattao iti nasnasion ken agraman dagiti tattao ti Israel iti kinaagpaysuanna naguurnongda a sangsangkamaysa iti daytoy a siudad maibusor iti nasantuan nga adipenmo a ni Jesus, a pinulotam.” (Aramid 4:24-27; Lucas 23:1-12)b Wen, idi umuna a siglo, adda dagiti nagkukumplot maibusor ken ni Jesus, ti napulotan nga adipen ti Dios. Ngem adda sabali pay a kaitungpalan daytoy a salmo sinigsiglo kalpasanna.

8. Kasano nga agaplikar ti Salmo 2:3 kadagiti agdama a nasion?

⁸ Idi adda naindagaan nga ari ti nagkauna nga Israel, kas ken David, nagkaykaysa dagiti pagano a nasion ken agtuturay maibusor iti Dios ken iti daydiay pinulotanna nga ari. Ngem komusta met iti kaaldawantayo? Dagiti agdama a nasion dida kayat ti agtulnog kadagiti kalikagum ni Jehova ken ti Mesias. Gapuna, kasla kunkunada: “Pugsatentayo dagiti pagparautda ket dagiti paggalutda ibellengtayo iti adayo kadatayo!” (Salmo 2:3) Busoren dagiti agtuturay ken nasnasion ti aniaman nga ipawil ti Dios ken ti Pinulotanna. Sigurado nga awan serserbina ti aniaman a panagregget a mangpugsat kadagiti kasta a pagparaut ken mangibelleng kadagiti kasta a paggalut.

Uyawen Ida ni Jehova

9, 10. Apay nga uyawen ni Jehova dagiti nasion?

⁹ Saan nga apektado ni Jehova iti aniaman a panagregget dagiti agtuturay a mangipasdek iti bukodda a turay. Ituloy ti maikadua a salmo: “Daydiay mismo a situtugaw iti langlangit agkatawanto; ni met laeng Jehova aramidennanto ida a mauy-uyaw.” (Salmo 2:4) Agtultuloy ti panangitungpal ti Dios kadagiti panggepna ket saan a malapdan dagiti agtuturay. Katawaanna ti panaginlalaingda ken uyawenna ida. Bay-anna nga ipagpannakkelda ti kayatda nga aramiden. Ngem para ken ni Jehova, nakakatkatawada. Umsienna ti ubbaw nga ibubusorda.

¹⁰ Iti dadduma a salmo a pinutarna, tinukoy ni David dagiti kabusor a lallaki ken nasnasion ket inkantana: “Sika, O Jehova a Dios ti buybuyot, ti Dios ti Israel. Agriingka tapno iturongmo ti asikasom kadagiti amin a nasion. Dika mangipaay iti parabur kadagiti asinoman a makapasakit a traidor. Agtultuloyda nga agsubli iti oras ti rabii; agtultuloyda nga agtaul a kas iti aso ket liklikmutenda ti siudad. Adtoy! Agyesngawda babaen iti ngiwatda; kamkampilan ti adda kadagiti bibigda, ta siasino ti umim-imdeng? Ngem sika, O Jehova, katawaamto ida; amin dagiti nasion aramidemto a mauy-uyaw.” (Salmo 59:5-8) Katawaan ni Jehova ti kinatangsit ken pannakariribuk dagiti nasion gapu iti minamaag a tignayda maibusor kenkuana.

11. Ania ti mapasamak no agporsegi dagiti nasion a mangbusor iti panggep ti Dios?

¹¹ Dagiti sasao ti Salmo 2 pabilgenna ti panagtalektayo a marisut ti Dios ti aniaman a parikut. Makapagtalektayo a kanayon nga aramidenna ti pagayatanna ken dina pulos baybay-an dagiti nasungdo nga adipenna. (Salmo 94:14) No kasta, ania ti mapasamak no agporsegi dagiti nasion a mangbusor iti panggep ni Jehova? Sigun iti daytoy a salmo, ti Dios “agsaonto kadakuada iti ungetna,” a kas iti gumgumluong nga uni ti gurruod. Kanayonanna, “iti nabara a rurodna,” kasla napartak a kimat a “riribukennanto ida.”​—Salmo 2:5.

Ti Dios Insaadna ti Ari

12. Ania a pannakaitrono ti tuktukoyen ti Salmo 2:6?

¹² Sigurado a makapungtot dagiti nasion iti sumaruno nga ibaga ni Jehova babaen ti salmista. Kuna ti Dios: “Siak, mismo a siak, insaadko ti arik iti rabaw ti Sion, ti nasantuan a bantayko.” (Salmo 2:6) Ti Bantay Sion ket maysa a turod idiay Jerusalem a nagturayan ni David kas ari iti intero nga Israel. Ngem saan nga agtugaw ti Mesianiko nga Ari iti dayta a siudad wenno iti sadinoman ditoy daga. Kinapudnona, ni Jehova insaadnan ni Jesu-Kristo kas ti pinilina a Mesianiko nga Ari iti nailangitan a Bantay Sion.​—Apocalipsis 14:1.

13. Ania a tulag ti impasdek ni Jehova iti Anakna?

¹³ Ita, agsao ti Mesianiko nga Ari. Kunana: “Dakamatek ti bilin ni Jehova [a nakitulag iti Anakna agpaay iti Pagarian]; [ni Jehova] kinunana kaniak: ‘Sika ti anakko; siak, ita nga aldaw, nagbalinak nga amam.’” (Salmo 2:7) Ti tulag ti Pagarian ti tuktukoyen ni Kristo idi kinunana kadagiti apostolna: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.”​—Lucas 22:28, 29.

14. Apay a makuna nga adda kalintegan ni Jesus nga agbalin nga ari?

¹⁴ Kas naipadto iti Salmo 2:7, ni Jehova binigbigna ni Jesus kas ti Anakna idi nabautisaran daytoy ken babaen ti panangpagungarna kenkuana iti espiritu a biag. (Marcos 1:9-11; Roma 1:4; Hebreo 1:5; 5:5) Wen, ti Ari iti nailangitan a Pagarian isu ti bugbugtong nga Anak ti Dios. (Juan 3:16) Kas natan-ok a kaputotan ni Ari David, adda kalintegan ni Jesus nga agbalin nga ari. (2 Samuel 7:4-17; Mateo 1:6, 16) Sigun iti daytoy a salmo, kinuna ti Dios iti Anakna: “Agkiddawka kaniak, tapno maitedko ti nasnasion kas tawidmo ken dagiti ungto ti daga kas bukodmo a sanikua.”​—Salmo 2:8.

15. Apay a kiddawen ni Jesus nga agbalin a tawidna ti nasnasion?

¹⁵ Ti Ari​—ti mismo nga Anak ti Dios​—isu ti maikadua ken ni Jehova. Ni Jesus daydiay nasubok, nasungdo, ken pagtaltalkan ni Jehova. Maysa pay, ni Jesus ti Inauna nga Anak ti Dios. Kinapudnona, ni Jesu-Kristo “ti ladawan ti di makita a Dios, ti inauna iti isuamin a parsua.” (Colosas 1:15) Agkiddaw laeng ni Jesus ket ti Dios ‘itedna ti nasnasion kas tawidna ken dagiti ungto ti daga kas bukodna a sanikua.’ Kiddawen dayta ni Jesus gapu ta ‘kaay-ayatna dagiti bambanag mainaig iti annak ti tattao’ ken gapu iti nasged a tarigagayna a mangibanag iti pagayatan ti nailangitan nga Amana agpaay iti daga ken iti sangatauan.​—Proverbio 8:30, 31.

Ti Bilin ni Jehova Maibusor Kadagiti Nasion

16, 17. Sigun iti Salmo 2:9, ania ti agur-uray kadagiti nasion?

¹⁶ Gapu ta matungtungpal ita ti maikadua a salmo, kabayatan ti di makita a kaadda ni Jesu-Kristo, ania ti agur-uray kadagiti nasion? Asidegen nga itungpal ti Ari ti bilin ti Dios: “Rumekemto ida [dagiti nasion] babaen iti setro a landok, burakemto ida a kasla maysa a basehas ti agdamdamili.”​—Salmo 2:9.

¹⁷ Ti setro dagiti ar-ari idi umuna a panawen ket simbolo ti natan-ok nga autoridad. Dadduma a setro ti naaramid iti landok, kas iti nadakamat iti daytoy a salmo. Ti piguratibo a sasao a naaramat ditoy ipasimudaagna no kasano kalaka ti aramiden ni Kristo a panangdadael kadagiti nasnasion. Ti damili a basehas ket maburak no mapang-or iti napigsa babaen ti maysa a landok a setro, ket saanen a maisubli.

18, 19. Tapno magun-odda ti anamong ti Dios, ania ti masapul nga aramiden dagiti ar-ari ti daga?

¹⁸ Saan kadi a maliklikan dagiti agtuturay a makita ti kasta a panangdadael? Maliklikanda yantangay aw-awisen ida ti salmista babaen kadagitoy a sasao: “Ita, O ar-ari, watwatenyo ti pannakatarus; mailintegkayo koma, O uk-ukom ti daga.” (Salmo 2:10) Maidagdagadag kadagiti ar-ari nga umimdengda, a watwatenda ti pannakatarus. Masapul a bigbigenda ti kinaubbaw dagiti planoda, a maisupadi iti aramiden ti Pagarian ti Dios agpaay iti pagimbagan ti sangatauan.

¹⁹ Tapno magun-odda ti anamong ni Jehova, masapul nga agbalbaliw dagiti ar-ari ti daga. Maidagadag kadakuada nga ‘agserbida ken ni Jehova buyogen ti panagbuteng ket agrag-oda buyogen ti panagpigerger.’ (Salmo 2:11) Ania ti pagbanaganna no kasta ti aramidenda? Imbes a mariribukda, mabalinda a pagrag-oan dagiti bendision nga iburay kadakuada ti Mesianiko nga Ari. Masapul nga iwaksida ti kinatangsit ken kinapalangguad nga iparparangarangda bayat ti panagturayda. Maysa pay, nasken a sigaganat nga agbalbaliwda ken watwatenda ti nauneg a pannakaawat mainaig iti di maartapan a kinatan-ok ti soberania ni Jehova ken ti di malapdan a pannakabalin ti Dios ken ti Mesianiko nga Ari nga insaadna.

“Agepenyo ti Anak”

20, 21. Ania ti kaipapanan ti ‘panangagep iti anak’?

²⁰ Adda naasi nga iyaw-awis ita ti Salmo 2 kadagiti agtuturay iti nasnasion. Imbes nga agkukumplotda a bumusor, kastoy ti balakad kadakuada: “Agepanyo ti anak, tapno Isu saan nga agpungtot unay ket saankayo a mapukaw iti dalan, ta ti ungetna nalaka a sumged.” (Salmo 2:12a) Rumbeng nga ipangagda ti Soberano nga Apo Jehova no mangipaulog iti bilin. Idi introno ti Dios ti Anakna, nagsardeng koman dagiti agtuturay iti daga a ‘mangidayamudom kadagiti ubbaw a bambanag.’ Dagus koma a binigbigda ti Ari ken naan-anay a nagtulnogda kenkuana.

²¹ Apay nga ‘agependa ti anak’? Idi naputar daytoy a salmo, ti panangagep ket ebkas ti panaggayyem ken pangabrasa kadagiti bisita iti pagtaengan, a pakasarakanda iti kinamanagpadagus. Ti panangagep ket mabalin met nga ebkas ti kinasungdo, wenno kinamatalek. (1 Samuel 10:1) Iti daytoy a teksto ti maikadua a salmo, bilbilinen ti Dios dagiti nasion nga agependa, wenno abrasaenda, ti Anakna kas napulotan nga Ari.

22. Ania a pakdaar ti nasken nga ipangag dagiti agtuturay kadagiti nasion?

²² Insulto ken ni Jehova ti saan a panangbigbig iti autoridad ti Ari a pinilina. Laklaksidenda ti sapasap a kinasoberano ni Jehova a Dios, agraman ti autoridad ken abilidadna a mangpili iti Ari a kasayaatan a mangituray iti sangatauan. Makitanto dagiti agtuturay kadagiti nasion a kellaat nga agdissuor kadakuada ti pungtot ti Dios, inton ikagkagumaanda nga ibanag dagiti planoda. “Ti ungetna nalaka a sumged,” wenno napartak nga agramaram ken di masebseban. Agyaman pay ketdi koma iti daytoy a pakdaar dagiti agtuturay kadagiti nasion ket agtignayda maitunos iti dayta. Mataginayonda ti biagda no kasta ti aramidenda.

23. Adda pay gundaway ti tunggal indibidual a mangaramid iti ania?

²³ Inngudo daytoy makapikapik a salmo: “Naragsak dagidiay amin nga agkamang kenkuana [ni Jehova].” (Salmo 2:12b) Adda pay gundaway nga agkamang ti tunggal indibidual. Pudno dayta uray iti indibidual nga agtuturay a mangitantandudo kadagiti plano dagiti nasion. Mabalinda ti agtaklin ken ni Jehova, daydiay mangipaay iti pagkamangan iti sidong ti turay ti Pagarian. Ngem masapul nga agtignaydan sakbay a rumeken ti Mesianiko a Pagarian dagiti bumusbusor a nasnasion.

24. Kasanotay a maaddaan iti makapnek a panagbiag uray iti daytoy nariribuk a lubong?

²⁴ No siaanep nga adalentayo ti Kasuratan ken iyaplikartayo dagiti balakadna, ad-adda a makapnek ti panagbiagtayo uray iti agdama a nariribuk a lubong. Ti panangyaplikar kadagiti balakad ti Kasuratan ket mangyeg iti naragragsak a relasion ti pamilia ken pannakabang-ar kadagiti adu a pakadukotan ken pagbutbutngan iti daytoy a lubong. No an-annurotentayo dagiti pagalagadan ti Biblia, makapagtalektayo nga ar-aramidentayo ti makaay-ayo iti Namarsua. Ti laeng Sapasap a Soberano ti makaipaay iti pammasiguro ti “biag itan ken daydiay nga umay” kalpasan a madalusanna ti daga kadagidiay bumusbusor iti kinalinteg babaen ti panangilaksidda iti turay ti Pagarian.​—1 Timoteo 4:8.

25. Gapu ta saan a mapaay “ti bilin ni Jehova,” ania ti manamnamatayo a mapasamak iti panawentayo?

²⁵ Saan a mapaay “ti bilin ni Jehova.” Kas Namarsua kadatayo, ammo ti Dios no ania ti kasayaatan para iti sangatauan ken tungpalenna ti panggepna a mangbendision kadagiti natulnog a tattao buyogen ti talna, pannakapnek, ken manayon a kinatalged iti sidong ti Pagarian ti dungdungnguenna nga Anak. No maipapan iti kaaldawantayo, insurat ni propeta a Daniel: “Iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. . . . Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” (Daniel 2:44) No kasta, panawenen tapno ‘agepen ti Anak’ ken pagserbian ti Soberano nga Apo Jehova!

[Footnotes]

Ania ti Sungbatyo?

• Ania nga “ubbaw a bambanag” ti ‘idaydayamudom’ dagiti nasional a bunggoy?

• Apay nga uyawen ni Jehova dagiti nasion?

• Ania ti bilin ti Dios maibusor kadagiti nasion?

• Ania ti kaipapanan ti ‘panangagep iti anak’?

[Ladawan iti panid 16]

Nagkanta ni David maipapan iti naballigi a Mesianiko nga Ari

[Ladawan iti panid 17]

Dagiti agtuturay ken umili iti Israel nagkukumplotda maibusor ken ni Jesu-Kristo

[Ladawan iti panid 18]

Naitronon ni Kristo kas Ari iti nailangitan a Bantay Sion