“Dagiti Pammalagipmo Isuda ti Pakaay-ayatak”

“Ti amin a bambanag a naisurat a nasaksakbay naisuratda a pakasursuruantayo.”​—ROMA 15:4.

1. Kasano nga ipapaay ni Jehova dagiti pammalagipna, ken apay a kasapulantayo dagita?

MANGIPAPAAY ni Jehova iti pammalagip kadagiti adipenna tapno matulonganna ida a mangsango kadagiti karit iti daytoy narigat a tiempo. Mabigbigtayo ti dadduma kadagita a pammalagip kabayatan ti personal a panagbasatayo iti Biblia, wenno babaen kadagiti impormasion ken komento a maidatag kadagiti Nakristianuan a gimong. Saan a kabbaro kadatayo ti adu kadagiti mabasbasa wenno mangngegantayo kadagita a gundaway. Nalabit nga adda pay dagiti umasping nga impormasion a napagadalantayon idi. Ngem gapu ta adda tendensiatayo a makalipat, masapul nga agtultuloy a maipalagip kadatayo dagiti panggep, linteg, ken bilbilin ni Jehova. Ipategtayo koma dagiti pammalagip ti Dios. Makapabileg dagita yantangay tumulongda kadatayo nga agtalinaed a sipapanunot kadagiti rason no apay nga agbibiagtayo maitunos iti pagayatan ti Dios. Dayta ti makagapu no apay nga inkanta ti salmista ken ni Jehova: “Dagiti pammalagipmo isuda ti pakaay-ayatak.”​—Salmo 119:24.

2, 3. (a) Apay nga intalimeng ni Jehova agingga iti kaaldawantayo dagiti pakasaritaan iti biag dagiti karakter iti Biblia? (b) Aniada a salaysay iti Kasuratan ti usigentayo iti daytoy nga artikulo?

² Nabileg ti Sao ti Dios uray no naisurat dayta sinigsiglon ti napalabas. (Hebreo 4:12) Naglaon dayta kadagiti pudno a salaysay maipapan iti biag dagiti karakter iti Biblia. Nupay dakkel ti nagbalbaliwan dagiti kostumbre ken panangmatmat dagiti tattao sipud idi panawen ti Biblia, masansan nga umasping dagiti karit a pakaipaspasanguantayo ita kadagiti karit a sinangoda idi. Makaisuro dagiti adu a pakasaritaan a naitalimeng iti Biblia, dagiti makatukay iti rikna nga ulidan dagiti tattao a nagayat ken ni Jehova ken simamatalek a nagserbi kenkuana iti laksid dagiti narigat a kasasaad. Ti dadduma met a salaysay itampokda dagiti kababalin a kagura ti Dios. Amin dagita a pakasaritaan, naimbag man wenno dakes, ket intalimeng ni Jehova iti Biblia tapno agserbida a pammalagip. Kas insurat ni apostol Pablo: “Ti amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.”​—Roma 15:4.

³ Usigentayo ti tallo a salaysay a nadakamat iti Kasuratan: ti pannakilangen ni David ken ni Saul, ni Ananias ken ni Safira, ken ti tignay ni Jose mainaig iti asawa ni Potifar. Agkakapateg a leksion ti isuro kadatayo ti tunggal maysa kadagita a salaysay.

Kinasungdo Kadagiti Urnos ti Dios

4, 5. (a) Ania ti napasamak iti nagbaetan da Ari Saul ken David? (b) Kasano a nagtignay ni David iti ibubusor ni Saul?

⁴ Saan a nagtalinaed a matalek ni Ari Saul ken ni Jehova isu a saanen idi a maikari a mangituray iti ili ti Dios. Gapuna, napukawna ti anamong ti Dios. Imbilin ni Jehova ken ni propeta a Samuel a pulotanna ni David kas ti masanguanan nga ari ti Israel. Idi nangipakita ni David iti kinamaingel kas mannakigubat ken immawat iti pammadayaw kadagiti tattao, nangrugi a minatmatan ni Saul a karibalna ni David. Maulit-ulit a ginandat ni Saul ti biag ni David. Nalasatan amin dagita ni David gapu ta adda kenkuana ni Jehova.―1 Samuel 18:6-12, 25; 19:10, 11.

⁵ Napilitan ni David nga agbalin a pugante iti mano a tawen. Idi adda gundawayna a mangpapatay ken ni Saul, indagadag dagiti kakaduana nga aramidenna dayta, a kunada a ni Jehova ti nangaramid iti pamay-an tapno mapapatayna ti kabusorna. Nupay kasta, nagkedked ni David gapu ta isu ket nasungdo ken ni Jehova ken raemenna ti saad ni Saul kas ti napulotan nga ari iti ili ti Dios. Saan aya a ni Jehova ti nangpulot ken ni Saul kas ari ti Israel? No kasta, ni Jehova met laeng ti mangikkat kenkuana no makitana a maitutop dayta. Iti panangmatmat ni David, awan karbenganna tapno un-unaanna ti Dios. Kalpasan nga inaramidna ti amin a kabaelanna a makikappia ken ni Saul, ingngudo ni David: “Kabilento a mismo ni Jehova; wenno dumtengto ti aldawna ket kasapulanto a matay, wenno sumalogto a mapan iti bakal, ket sigurado a mapunasto. Narigat a pagarupen, iti biangko, manipud panangmatmat ni Jehova, nga iyunnatko ti imak maibusor iti pinulotan ni Jehova!”​—1 Samuel 24:3-15; 26:7-20.

6. Apay a napateg nga usigentayo ti napasamak iti nagbaetan da David ken Saul?

⁶ Napateg ti maadaltayo iti daytoy a salaysay. Pinampanunotmo kadin no apay nga adda dagiti parikut a tumaud iti uneg ti kongregasion Kristiano? Mabalin nga adda maysa a di umiso ti ar-aramidenna. Mabalin a saan a nadagsen a basol ti ar-aramidenna ngem riribukennaka. Ania koma ti aramidem? Gapu ta maseknanka iti pagimbagan ti kabsatmo ken gapu ta nasungdoka ken ni Jehova, mabalinmo a kasarita iti naayat a pamay-an, a ti panggepmo ket tapno matulongam dayta a tao. Ngem kasano ngay no agtultuloy ti parikut? No la ket ta inaramidmon ti amin a kabaelam, nasaysayaat nga ipabiangmon ken ni Jehova dayta a banag. Kasta ti inaramid ni David.

7. Kas panangtulad ken ni David, ania koma ti aramidentayo no makapasartayo iti di nainkalintegan a pannakatrato wenno panangidumduma?

⁷ Nalabit nga agpaspasarka iti di nainkalintegan a pannakatrato wenno narelihiosuan a panangidumduma. Iti agdama, mabalin a bassit laeng wenno awan pay ketdi ti maaramidam kadagita a banag. Nagrigat la ketdi nga anduran ti kasta a kasasaad, ngem makaisuro kadatayo ti tignay ni David idi nagpasar iti di nainkalintegan a pannakatrato. Dagiti salmo nga insurat ni David ket naglaon saan laeng a kadagiti napasnek a karkararagna iti Dios tapno maispal manipud iti ima ni Saul no di ket naglaon met kadagiti makatukay a rekord ti kinasungdona ken ni Jehova ken ti pannakaseknanna iti pannakaipadayag ti nagan ti Dios. (Salmo 18:1-6, 25-27, 30-32, 48-50; 57:1-11) Nagtalinaed ni David a nasungdo ken ni Jehova uray no nagtultuloy ti di nainkalintegan a panangtrato kenkuana ni Saul iti adu a tawen. Masapul met nga agtalinaedtayo a matalek ken ni Jehova ken iti organisasionna aniaman ti mapasarantayo a di nainkalintegan a pannakatrato ken aniaman ti aramiden dagiti dadduma. Masiguradotayo a naan-anay nga ammo ni Jehova no ania ti mapaspasamak.―Salmo 86:2.

8. Ania ti inaramid dagiti Saksi ni Jehova idiay Mozambique idi nasubok ti kinasungdoda ken ni Jehova?

⁸ Maysa a moderno-aldaw a pagwadantayo dagiti Kristiano idiay Mozambique, isuda a nagtalinaed a nasungdo ken ni Jehova bayat ti tiempo ti pannubok. Idi 1984, maulit-ulit ti pannakaraut dagiti purokda babaen kadagiti armado a rebelde, a ti aramid dagitoy ket mangsamsam, mangpuor kadagiti balbalay, ken mangpapatay. Agparang nga awan ti maaramidan dagitoy a pudno a Kristiano tapno masalaknibanda ti bagida. Adda dagiti panangikagumaan a mangpilit kadagiti lumugar tapno makikaduada kadagiti rebelde wenno mangpuersa kadakuada a sumuporta iti sabali a pamay-an. Ngem iti panangmatmat dagiti Saksi ni Jehova, maisalungasing dayta iti neutral a takderda kas Kristiano. Nakapungtot dagiti rebelde gapu iti panagkedkedda. Agarup 30 a Saksi ti napapatay iti dayta a nariribuk a tiempo, ngem uray ti pangta ni patay dina nadadael ti kinasungdo dagiti adipen ti Dios.a Kas ken David, inibturanda dagiti di nainkalintegan a pannakatratoda agingga a nagballigida idi agangay.

Mangpakdaar a Pammalagip

9, 10. (a) Ania ti masursurotayo kadagiti sumagmamano a pagarigan iti Kasuratan? (b) Ania ti di umiso nga inaramid da Ananias ken Safira?

⁹ Adda dagiti indibidual a nadakamat iti Kasuratan nga agserbi a pakdaar no maipapan iti kababalin a nasken a liklikan. Wen, naglaon ti Biblia iti adu a pakasaritaan dagiti tattao, uray dagiti adipen ti Dios, a nakaaramid iti di umiso ket inapitda dagiti imbungana. (1 Corinto 10:11) Maysa kadagita a salaysay isu ti maipapan kada Ananias ken Safira, agassawa a kameng ti kongregasion Kristiano idiay Jerusalem idi umuna a siglo.

¹⁰ Kalpasan ti Pentecostes 33 K.P., masapul idi a maipaay ti material a kasapulan dagiti baro a manamati a nagtalinaed idiay Jerusalem gapu ta kayatda a tagiragsaken ti makagunggona a pannakitimpuyog kadagiti apostol. Dadduma a kameng ti kongregasion ti nangilako kadagiti sanikuada tapno masiguradoda a maipaay ti kasapulan ti isuamin. (Aramid 2:41-45) Adda talon nga inlako da Ananias ken Safira. Nupay dadduma laeng kadagiti naglakuanda ti intedda kadagiti apostol, siuulbod nga imbagada nga isuamin dayta ti naglakuanda. Pudno, awan ti espesipiko a gatad a makalkalikaguman kada Ananias ken Safira, ngem dakes ti motiboda ken panagulbod ti inaramidda. Kayatda ti agparammag ken pagparangenda nga ad-adu ti naipaayda ngem iti pudpudno nga intedda. Iti sidong ti panangipaltiing ti nasantuan nga espiritu, imbutaktak ni apostol Pedro ti kinaulbod ken panaginsisingpetda, ket pinapatay ida ni Jehova.​—Aramid 5:1-10.

11, 12. (a) Ania ti sumagmamano a pammalagip maipapan iti panagbalin a napudno? (b) Ania dagiti gunggona nga iyeg ti panagbalin a napudno?

¹¹ No magargaritayo a mangballikug iti kinapudno tapno laeng agparang a nasayaat ti takdertayo iti imatang dagiti tattao, agserbi koma a nabileg a pammalagip kadatayo ti napasamak kada Ananias ken Safira. Mabalintayo nga allilawen dagiti padatayo a tattao, ngem ditay maallilaw ni Jehova. (Hebreo 4:13) Kanayon a palagipannatayo ti Kasuratan a rumbeng nga agbalintayo a napudno iti maysa ken maysa, yantangay awan ti lugar dagiti naulbod a tattao iti maysa a daga a nadalusan manipud iti kinadakes. (Proverbio 14:2; Apocalipsis 21:8; 22:15) Nalawag ti makagapu no apay. Ni Satanas a Diablo ti mangitantandudo iti amin a kinaulbod.―Juan 8:44.

¹² Adu ti gunggona nga iyeg ti panagbalin a napudno. Karaman kadagita ti nadalus a konsiensia ken ti pannakapnek gapu ta agtalek kenka dagiti sabsabali. Adun a kapadasan ti mangipakita a nagun-od wenno nataginayon dagiti Kristiano ti sekular a trabahoda gapu ta mapagpiaranda. Ngem ti kangrunaan a gunggona ti panagbalin a napudno isu ti panagbalin a gayyem ti Mannakabalin-amin a Dios.―Salmo 15:1, 2.

Agtalinaed a Di Namulitan

13. Ania ti napasamak ken ni Jose, ken ania ti inaramidna?

¹³ Ni Jose, ti anak ni patriarka a Jacob, nailako iti pannakaadipen idi agtawen iti 17. Idi agangay, isu ket nagserbi iti sangakabbalayan ni Potifar, maysa nga opisial iti pagarian ti Egipto. Gapu ta nataer nga agtutubo ni Jose, isu ket nagesman ti asawa ni apona, nga inaldaw a nangidagadag kenkuana: “Kaiddaennak.” Adda ni Jose iti lugar nga awan ti makaam-ammo kenkuana ken adayo iti pamiliana. Mabalinna koma latta ti nakidenna iti dayta a babai a di maammuan ti asinoman. Kaskasdi, idi ginammatan ti asawa ni Potifar, nagtalaw ni Jose.​—Genesis 37:2, 18-28; 39:1-12.

14, 15. (a) Apay a paginteresantayo ti salaysay maipapan ken ni Jose? (b) Apay nga agyaman ti maysa a Kristiano a babai nga impangagna dagiti pammalagip ti Dios?

¹⁴ Napadakkel ni Jose iti pamilia nga addaan iti panagbuteng iti Dios, ket ammona a di umiso no agdenna ti saan nga agassawa. “Kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?” inyimtuodna. Kasta ti panangmatmatna gapu ta mabalin a napanunotna ti pagalagadan ti Dios a nayebkas idiay Eden, ti pannakiasawa iti maysa laeng. (Genesis 2:24) Makagunggona ita kadagiti adipen ti Dios no utobenda ti inaramid ni Jose iti dayta a situasion. Iti dadduma a lugar, matagtagilag-an ti seksual a panagdenna nga uray la umsien dagiti agtutubo dagiti kapatadanda nga agkedked a makiraman iti imoralidad. Gagangayen dagiti naasawaan a makidenna kadagiti dida asawa. Gapuna, naintiempuan a pammalagip kadatayo ti kapadasan ni Jose. Saan a nagbalbaliw ti pagalagadan ti Dios a mangibilang a maysa a basol ti pannakiabig ken pannakikamalala. (Hebreo 13:4) Adu kadagidiay natnag iti seksual nga imoralidad ti umanamong nga adda ti naimbag a rason no apay a masapul a liklikan dayta. Karaman kadagiti saan a matarigagayan a bungana ket pannakaibabain, pannakaburibor ti konsiensia, imon, panagsikog, ken sakit a mayakar babaen ti sekso. Kas ipalagip kadatayo ti Kasuratan, ti tao a makipaspaset iti pannakiabig “agbasbasol a maikaniwas iti bukodna a bagi.”​—1 Corinto 5:9-12; 6:18; Proverbio 6:23-29, 32.

¹⁵ Ni Jenny,b maysa a balasang a Saksi ni Jehova, adda makagapu nga agyaman kadagiti pammalagip ti Dios. Adda nataer a katrabahuanna nga agrayo kenkuana. Idi saanna nga inkankano, ad-adda nga impapati ti lalaki ti nagarem. “Nagrigat ti agtalinaed a nasin-aw,” inadmitir ni Jenny, “yantangay makapalukmeg iti puso no agrayo kenka ti kasungani a sekso.” Ngem nabigbigna nga isu ket pagbalinen laeng ti lalaki a maysa kadagiti nagadu a babbai a nakadennanan. Isu nga idi mariknana a kumapkapuy ti determinasionna nga agkedked, inyararawna ti tulong ni Jehova tapno makapagtalinaed a matalek Kenkuana. Nakita ni Jenny a dagiti banag a nasukimatna iti Biblia ken kadagiti Nakristianuan a publikasion ket nagserbi a pammalagip a mayarig iti bakuna a nangpapigsa iti resistensiana. Maysa kadagita a pammalagip ket ti salaysay maipapan ken ni Jose ken ti asawa ni Potifar. “Agingga a palpalagipak ti bagik no kasano kadakkel ti panagayatko ken ni Jehova,” kinunana, “awan ti pagamkak nga amangan no matnagak iti daytoy a nakaro a kinadakes ket makabasolak kenkuana.”

Ipangagmo Dagiti Pammalagip ti Dios!

16. Kasano a makagunggona kadatayo ti panangrepaso ken panangutob iti kabibiag dagiti indibidual a nadakamat iti Biblia?

¹⁶ Maparayraytayo ti apresasiontayo kadagiti pagalagadan ni Jehova babaen ti panangikagumaantayo a mangtarus no apay nga impaisuratna ti sumagmamano a salaysay iti Kasuratan. Ania ti isuroda kadatayo? Ania dagiti galad wenno pagannayasan dagiti karakter iti Biblia a masapul a tuladen wenno liklikantayo? Ginasut a kapadasan ti nailanad kadagiti binulong ti Sao ti Dios. Pagimbagan ti asinoman a mangipatpateg kadagiti bilin ti Dios no parayrayenna ti panagtarigagayna iti mangted-biag a sirib, agraman dagiti leksion a maadal kadagiti pagarigan a siaannad nga intalimeng ni Jehova. Dagiti isyu daytoy a magasin masansan nga itampokda dagiti artikulo a naglaon kadagiti makaisuro a kapadasan dagiti kasta nga indibidual. Apay a diyo iwayaan a repasuen dagita?

17. Ania ti makunayo maipapan kadagiti pammalagip ni Jehova, ken apay?

¹⁷ Anian a yamantayo gapu iti naayat a pannakaseknan nga ipakpakita ni Jehova kadagidiay mangikagkagumaan a mangaramid iti pagayatanna! Saantayo a perpekto, no kasano a saan met a perpekto dagiti lallaki ken babbai a nadakamat iti Biblia. Nupay kasta, makagunggona unay kadatayo dagiti naisurat a kapadasanda. Babaen ti panangipangag kadagiti pammalagip ni Jehova, maliklikantayo ti makaaramid kadagiti nadagsen a basol, ken matuladtayo dagiti agkakaimbag nga ulidan dagidiay nagna iti dana ti kinalinteg. No aramidentayo dayta, mabalintayo ti makipagkanta iti salmista: “Naragsak dagidiay mangsalsalimetmet kadagiti pammalagip [ni Jehova]; buyogen ti isuamin a puso agtultuloyda a mangbirok kenkuana. Ti kararuak sinalimetmetanna dagiti pammalagipmo, ket ayatek ida iti kasta unay.”​—Salmo 119:2, 167.

[Footnotes]

Ania ti Sungbatyo?

• Ania ti maadaltayo iti kababalin ni David nga impakitana ken ni Saul?

• Ania ti isuro kadatayo ti salaysay maipapan kada Ananias ken Safira?

• Apay a paginteresantayo ti pakasaritaan ni Jose?

[Ladawan iti panid 26]

Apay a di impalubos ni David a mapapatay ni Saul?

[Ladawan iti panid 27]

Ania ti maadaltayo iti salaysay maipapan kada Ananias ken Safira?

[Ladawan iti panid 28]

Apay a liniklikan ni Jose dagiti imoral a pananggargari?