SACCUT

Mabalin a maysa a bituen a didiosen, kas ipasimudaag ti pannakailanad ti “Saccut” a kapadpada ti sasao a “ti bituen ti diosyo.” (Am 5:26) Daytoy a nagan nairanta a naikkan iti bokales iti Hebreo a Masoretiko a teksto tapno tumupag iti shiq·qutsʹ, a kaipapananna ti “makarimon a banag.” Nalabit a ti Saccut ket isu ti “Sakkut,” nga awag dagiti Babilonio ken Saturno (maysa a dios-bituen). Nupay kasta, iti Griego a Septuagint, ti sasao a “Saccut nga ariyo” ket naipatarus a “ti tolda ni Moloc,” ket ni Esteban, a nalabit nagadaw iti Septuagint, inaramatna met ti sasao a “ti tolda ni Moloc.” (Ara 7:43) Ipasimudaag daytoy a ti “Saccut” ket mabalin a mayakar-akar a santuario, maysa a tolda wenno abong-abong, a nakaibalayan ti imahen ni Moloc.​—Kitaenyo ti ASTROLOGO (Ni Molec ken ti Astrolohia iti Israel).