“Ti Tulong ni Jehova Adda Kadakuada”
“Iti kasta rimmang-ay a sipipigsa ket nagballigi ti sao ni Jehova.”—ARAMID 19:20.
1. (a) Ania a reklamo ti inaramid dagiti kabusor ti Kinakristiano idi umuna a siglo K.P.? (b) Aniat’ sumarsaruno sadinoman ti nangikaskasabaan ni misionero a Pablo ti naimbag a damag ti Pagarian ti Dios, ket ania a kanayon ti adda kadagiti immuna a Kristiano?
NASUROK ngem 1,900 a tawen ti napalabasen, nagreklamo dagiti kabusor ti Nakristianuan a mensahe ken dagiti bumusbusor ken misionero nga apostol Pablo: “Dagitoy a mangriribuk iti mapagnaedan a daga immayda met ditoy, . . . ket amin dagitoy agaramidda iti maisalungasing kadagiti bilbilin ni Cesar, a kunkunada nga adda sabali nga ari, nga isu ni Jesus.” (Aramid 17:6, 7) Uray sadino a nangipakaammuan ti Kristiano a misionero a Pablo ti naimbag a damag ti Pagarian ni Jehova, adda aksion ken reaksion, ken masansan pannakaidadanes. Dadduma kadagiti immuna a Kristiano nagsagabada met ti pannakaidadanes. Ngem kanayon a “ti tulong ni Jehova adda kadakuada.”—Aramid 11:21.
2. Asinot’ nangiyusuat ti Nakristianuan a panagmisionero, ken kasano?
2 Asinot’ nangiyusuat iti daytoy nasken a trabaho a Nakristianuan a panagmisionero? Isu ni Jesus, maysa a naisalsalumina a lalaki nga addaan makatignay a mensahe ken naisangsangayan a metodo a panangisaknap iti dayta. Laglagipenyo a ni Jesus, ti Anak ti Dios, immay kadagiti Judio nga addaan makapakellaat nga anunsio maipapan iti Pagarian ti Dios. Ngem interesadoda laeng iti kabukbukodan a pannakaisalakanda babaen kadagiti ar-aramid ti Linteg.—Mateo 4:17; Lucas 8:1; 11:45, 46.
“Kadagiti Isuamin a Nasion”
3. Ania a padto ni Jesus ti mabalin a nakakellaat kadagiti adalan a Judio, ken apay?
3 Gapuna, mabalin a maripiriptayo ti pannakakellaat dagiti adalan ni Jesus a Judio idi imbagana kadakuada tallo nga aldaw sakbay ti ipapatayna: “Ket daytoy naimbag a damag ti pagarian maikaskasabanto iti amin a mapagnaedan a daga kas pammaneknek kadagiti amin a nasion; ket iti kasta umayton ti panungpalan.” Mabalin a pinampanunot dagiti adalanna no kasanot’ panangikasabada ti naimbag a damag “kadagiti amin a nasion.” Kasanonto ngata a mairingpas ti kasta a nagbassitan a bunggoy dagiti manamati iti kasta a nagdakkelan a trabaho?—Mateo 24:14; Marcos 13:10.
4. Ania a bilin ti inted ni napagungaren a Jesus kadagiti adalanna?
4 Iti kamaudianan, ni napagungaren a Jesus ti nanginayon ti maysa pay a bilin, a kunkunana: “Isuamin a pannakabalin naited kaniak idiay langit ken iti rabaw ti daga. Inkayo ngarud ket pagbalinenyo nga ad-adalan dagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.” Gapuna naibaonda a mangipan ti mensahe ti Apoda “[ka]dagiti tattao iti amin a nasion.”—Mateo 28:18-20.
5, 6. (a) Kasano a nakagteng ti panangikaskasaba ti naimbag a damag, ti Pagarian ti Dios kadagiti Gentil, ket ania ti resultana? (b) Kasano a nagtignay dagiti panglakayen idiay Jerusalem idi insalaysay ni Pedro kadakuada ti kapadasanna ken Gentil a Cornelio?
5 Daytoy ti nangiraman ti panangaskasaba kadagiti Gentil, a nagbalin a maysa a karit. Ti kababalin ni Pedro iti tallo a tawen kamaudiananna ket pammaneknek iti dayta. Babaen iti maysa a sirmata, naibaga ken Pedro nga agsida kadagiti natulawan a parparsua kas taraon. Idi impamatmat ti Dios kenkuana a dagiti bambanag a dati maibilbilang a natulawan ket mamatmatanda itan a nadalus, nariribukan ni Pedro. Kalpasanna ni Pedro ti inturong ti espiritu ti Dios a sumarungkar iti balay ni Gentil a Cornelio, maysa a Romano a senturion. Idiay, naawatanna a pagayatan ti Dios para kenkuana a kaskasabaan ni Cornelio, numan pay iti napalabas impagarupna a ti pannakaidenna kadagiti tattao iti dadduma a rasa ket saan a nainkalintegan. Bayat nga agsasao ni Pedro, bimmaba ti nasantuan nga espiritu iti dayta a pamilia a Gentil, ket daytoy impamatmatna, a ti tay-ak para iti Nakristianuan a panagmisionero ti agsaknap itan a mangiraman iti lubong a di Judio.—Aramid 10:9-16, 28, 34, 35, 44.
6 Idi inlawlawag ni Pedro daytoy a pasamak kadagiti panglakayen idiay Jerusalem, “nagulimekda ket dinaydayawda ti Dios, a kunkunada: ‘No kasta, inted met ti Dios kadagiti Gentil ti panagbabawi a pakabiagan.’” (Aramid 11:18) Itan mabalinanen ti nasnasion a Gentil nga umawat a siwayawaya ti naimbag a damag maipapan ken Kristo ken ti Pagarianna!
Dagiti Misionero kadagiti Nasnasion
7. Kasano a nangrugi nga agsaknap ti Nakristianuan a panagmisionero iti dagdaga nga aglawlaw ti Mediteraneo, ket kasanot’ panangmatmat ni Jehova iti daytoy?
7 Ti panangasaba, a pimmartak kalpasan ti pannakamartir ni Esteban, ti naaddaan itan ti naiduma a kadakkel. Malaksid kadagiti apostol, ti kongregasion idiay Jerusalem ti nawarawara. Idi damo, dagidiay naidadanes a Judio a manamati ti nangaskasaba laeng kadagiti Judio idiay Fenecia, Chipre, ken Antioquia. “Ket, . . . dadduma kadakuada a lallaki a taga-Chipre ken Cirene . . . insaoda met kadagiti Griego, nga inkaskasabada ti naimbag a damag ni Apo Jesus.” Kasanot’ panangmatmat ni Jehova iti daytoy a panagmisionero kadagiti nasion? “Ket ti tulong ni Jehova adda kadakuada, ket dakkel a bilang namatida ken nagsublida iti Apo.” Pagyamanan iti kinatured dagidiay immuna a Kristiano, ti epektibo a panagmisionero ket nangrugi a nagsaknap kadagiti dagdaga iti aglawlaw ti Mediteraneo. Ngem adu pay ti umay.—Aramid 4:31; 8:1; 11:19-21.
8. Kasanot’ panangipamatmat ti Dios ti desidido a tignay a maipaay iti panangisaknap ti panagmisionero?
8 Idi agarup 47-48 K.P., ti Dios, babaen iti nasantuan nga espiritu, impamatmatna ti desidido a panagtignay a maipaay iti panangisaknap ti panagmisionero. Ti rekord idiay Aramid 13:2-4 ti mangibaga kadatayo: “Kinuna ti nasantuan nga espiritu: ‘Ilasinyo a maipaay kaniak da Bernabe ken Saulo a maikabil iti aramid a nangayabak kadakuada.’ . . . Gapuna nga isuda, idinto nga imbaon ida ti nasantuan nga espiritu, simmalogda idiay Seleucia [ti puerto idiay Antioquia ti Siria], ket nanipud idiay naglayagda a napan idiay Chipre.” Ania ngatan a nakaay-ayat dayta kada Pablo ken Bernabe—a naglayagda a nagturong iti umuna a ballasiw-taaw a nakaitudinganda! Ni apostol Pablo ti mangidadaulo ti Nakristianuan a panagmisionero. Isu met ti mangisasaad ti pundasion iti trabaho a mairingpasto iti maika-20 a siglotayo.
9. Aniat’ nagapuanan ni apostol Pablo babaen iti panagmisionerona?
9 Gapuna nangaramid ni Pablo kadagiti tallo a nairekord a panagrikusna kas misionero agraman panagdaliasatna a napan idiay Roma kas maysa a balud. Kabayatan dagitoy, linuktanna ti trabaho kadagiti sumagmamano a siudad idiay Europa ken inkaskasabana ti mensahe ti Pagarian kadagiti pagilian ken purpuro nga itatta maaw-awaganda kas ti Syria, Cyprus, Creta, Turkia, Grecia, Malta, ken Sicily. Mabalin nga isut’ nakagteng pay idiay Espana. Isut’ timmulong a nagipasdek kadagiti kongregasion iti adu a siudad. Aniat’ sekreto ti epektibo a panagmisionerona?
Epektibo a Panangisuro
10. Apay nga epektibo ni Pablo iti panagmisionerona?
10 Ni Pablo tinuladna ti panangisursuro ni Kristo. Gapuna ammona ti makibagay kadagiti tattao. Ammona no kasanot’ panangisuro ken panangsanay kadagiti dadduma kas mannursuro. Imbasarna ti sursurona iti Kasuratan. Saanna a pinadpadas a pagsiddaawen dagiti dadduma gapu iti kabukbukodanna a kinasirib no di ket, isut’ nakirinnason manipud iti Kasuratan. (Aramid 17:2, 3) Ammo met ni Pablo no kasanot’ bumagay kadagiti managdengngegna ken no kasanot’ panangusar iti lokal a kasasaad kas pangikugnalanna ti mensahena. Kas kinunana: “Pinaadipenak kadagiti isuamin, tapno mairagpatko dagiti ad-adu. Iti kasta kadagiti Judio, nagbalinak a Judio . . . Kadagiti awan lintegda, kaslaak la awan lintegna . . . Kadagiti nakapuy nagbalinak a kas nakapuy tapno mairagpatko dagiti nakapuy. Nagbalinak nga isuamin kadagiti isuamin, tapno kadagiti isuamin a pamay-an maisalakanko dagiti dadduma.”—1 Corinto 9:19-23; Aramid 17:22, 23.
11. Aniat’ nangipamatmat a ni Pablo ken dagiti kakaduana ket epektiboda a misionero, ket kasano kalawa idi ti Nakristianuan a ministerio?
11 Ni Pablo ken dagiti kakaduana ket epektiboda a misioneros. Babaen iti kinapinget ken anus, nagipasdekda ken nangpapigsada kadagiti Nakristianuan a kongregasion sadinoman a napananda. (Aramid 13:14, 43, 48, 49; 14:19-28) Nakasaksaknapen ti immuna a Nakristianuan a ministerio a gapu itoy idi agangay nabalinan nga insurat ni Pablo maipapan “ti kinapudno ti naimbag a damag a dimteng kadakayo, a kas met iti isuamin a lubong adda nga agbungbunga ken dumakkel . . . , a naikaskasaba iti amin a parsua iti baba ti langit.” Pudno unay, ti immuna a Nakristianuan a panagmisionero ti nangapektar kadagiti tattao.—Colosas 1:5, 6, 23.
12. Aniat’ nakagapu a ti pudpudno a Nakristianuan a panagmisionero nagsardeng iti apagbiit?
12 Nupay kasta, idi pangrugian ti maikadua a siglo K.P., kumarkarayamen ti apostasia iti kongregasion Kristiano, kas impakdaar ni Jesus ken dagiti apostol. (Mateo 7:15, 21-23; Aramid 20:29, 30; 1 Juan 2:18, 19) Kadagiti siglo a simmaruno, linemmes ti teolohia ken dagiti pagano a doktrina ti mensahe ti Pagarian. Nagibaon met ti Kakristianuan kadagiti misionero, saan a tapno ikaskasaba ti pudno a Pagarian ti Dios, no di ket tapno ipapilit kadagiti awan depdepensana a katutubo a tattao—masansan babaen iti kampilan—ti pagarian dagiti napolitikaan nga appoda ken manggasgastos kadakuada. Ti pudpudno a Nakristianuan a panagmisionero ket nagpukaw ngem saan nga agnanayon.
13. Kasano a nangrugi ti kampania a panagmisionero iti moderno a tiempo, ket aniat’ naaramidanen idi panagpatingga ti 1916?
13 Idi agtapos ti maika-19 a siglo, ni Charles T. Russell, ti umuna a presidente ti Watch Tower Society, nakitana ti pannakasapul ti panagmisionero. Ngarud inyorganisarna ti nalawa a kampania ti panangasaba, ket isu a mismo ti simmarungkar kadagiti adu a siudad idiay Estados Unidos, agraman panagbaniagana iti intero a lubong babaen iti barko tapno bumisita kadagiti adu a pagilian inggat’ kabaelanna. Dagiti naibatay iti Biblia a sursuratna ti naipablaak iti 35 a pagsasao. Naikuna nga isut’ nakadaliasat iti nasurok a sangamilion a milia kas pumapalawag iti publiko ken nangibitla ti nasurok a 30,000 a sermon sakbay ti ipapatayna idi 1916.
14. Aniat’ inaramid ni Joseph F. Rutherford tapno maisaknap ti panagmisionero?
14 Nalasin met ti kasunona, a ni Joseph F. Rutherford, ti nasken a pannakasapul ti panagmisionero. Idi karrugi ti 1920’s, isut’ nagibaon kadagiti lallaki a makabael kadagiti nadumaduma a pagilian a tumulong iti panangipasdek ti trabaho a panangasaba. Dagiti misionero ti nangibagnos iti daytoy trabaho ti Pagarian idiay Espana, Sud America, ken Makinlaud nga Africa. Idi 1931 naaramid ti awis maipaay kadagiti boluntario tapno mapabileg ti trabaho idiay Espana. Tallo nga agtutubo a lallaki a taga Inglatera ti simmungbat ket nagserbida sadiay iti karirigatan unay ken makabannog a sirkumstansia iti uppat a tawen agingga iti ibebettak ti Guerra Sibil Espanol idi 1936. Kalpasanna masapul nga agkamangda gaput’ biagda.
15. Aniat’ napasamak kadagidi 1940’s tapno maisaknap iti kalalainganna ti panagmisionero?
15 Bayat ti dekada ti 1940’s, dumteng dagiti nasaysayaat a bambanag iti panagmisionero. Ti maikatlo a presidente ti Watch Tower Society, a ni Nathan H. Knorr, naaddaan ti bunggoy dagiti nareregta a lallaki nga agtartrabaho iti sidongna. Nalawag babaen ti panangiturong ti nasantuan nga espiritu, idi 1942 nakitana ti pannakasapul a mangilukat ti eskuelaan ti panagmisionero kas panagsagana para iti karit kalpasan ti Gubat Sangalubongan II. Iti tengnga dayta a sangalubongan a gubat, isut’ nagregget, ket naisibbo ti Watchtower Bible School of Gilead idiay umamianan nga Estado ti Nueva York idi Pebrero 1943. Babaen kadagiti uppat nga instruktor, daytat’ nangted ti naibatay iti Biblia a panagsanay iti serbisio a panagmisionero iti nasurok a sangagasut a nareregta a payunir a ministro, lallaki ken babbai, iti kada innem a bulan. Epektibo kadi ti bunga ti trabahoda?
16. (a) Kasano kaadu dagiti Saksi a mangaskasaban idi 1943, ket kasanot’ pannakaidilig dayta itattan? (b) Aniat’ paset a naaramidan dagiti misionero iti daytoy nga idudur-as? Ilawlawagyo.
16 Idi 1943 adda laeng 126,329 a Saksi a mangaskasaba iti 54 a pagilian. Aniat’ kasasaad itatta? Itan, 45 a tawen kamaudiananna, addan 28 daras nga ad-adu, nasurok a tallo ket kagudua a milion dagiti aktibo a ministro kadagiti 212 a pagilian ken purpuro ti baybay. Ti kadakkelan a paset daytoy nga idudur-as ket gapu iti nagsayaat a pundasion nga insaad dagiti nasurok ngem 6,000 a misionero a nagturpos iti Gilead School. Dagitoy ti naggapun kadagiti 59 a pagilian ken naibaondan kadagiti 148 a nagduduma a dagdaga bayat dagiti napalabas a lima a dekada. Babaen iti tulongda, imbes a ti nasurok laeng a ginasut a ribo a Saksi iti intero a lubong, kas adda idi 45 a tawenen ti napalabas, adda itan sangapulo a pagilian a tunggal maysa ti addaanen iti nasurok a sangagasut a ribo a ministro a mangaskasaba ken mangisursuro ti naimbag a damag. Iti kaaduan kadagitoy a nasnasion, dagiti misionero ti Gilead ti manangidaulo iti trabaho a panag-ebanghelio.
17. Ania dagiti tallo a pamunganayan a makagapu a namagbalin nga epektibo agpadpada ti immuna ken moderno a Nakristianuan a panagmisionero?
17 Tuktukoyentay man ti immuna wenno ti moderno a Nakristianuan a panagmisionero, addada pamunganayan a bambanag a namagbalin nga epektibo iti dayta. Ti maysa isut’ direkta a pannakisango kadagiti tattao a bunga ti panagbalaybalay a ministerio ken di pormal a panangasaba, agraman ti urnos a panangyadal ti Biblia kadagiti pagtaengan. (Juan 4:7-26; Aramid 20:20) Ti maysa pay a rason isu ti direkta ken simple laeng a naibatay iti Biblia a mensahe a mangitamtampok ti Pagarian ti Dios kas ti kakaisuna a permanente a solusion dagiti parikut ti sangatauan. (Aramid 19:8; 28:16, 23, 30, 31) Ken adu kadagiti misionerotayo ti agserserbi kadagiti napanglaw a pagilian a sadiay makitkita ti pannakasapul iti nalinteg a panagturay ti Dios. Ti maikatlo a makagapu isu ti ayat nga insuro ni Kristo ken isut’ iparparangarang dagiti moderno a misionerotayo iti inaldaw-aldaw a pannakilanglangenda kadagiti tattao iti amin a kita ken namunganayan. Awan duadua nga, iti napalabas a 45 a tawtawen, dagiti misionero ti Watch Tower ti nakaaramid ti dakkel a tulong iti sangalubongan a panagsaknap ti organisasion ni Jehova.—Roma 1:14-17; 1 Corinto 3:5, 6.
Kimpet ti Espiritu ti Panagpayunir
18. Asino pay dagiti nakainum iti isu met laeng nga espiritu ti naregta a panagmisionero kas kadagiti nagturpos ti Gilead?
18 Awan duadua ti nareregta nga ulidan dagiti nagturpos ti Gilead ti nangparegta kadagiti dadduma iti tarigagay nga agbalin nga amin-tiempo a ministro. Itatta, addan ginasgasut a ribo a dadduma pay a saksi ni Jehova ti nakainum ti isu met laeng nga espiritu ti kinaregta ti panagmisionero. Uray met dagitoy isudat’ payunir iti pudpudno a kaipapananna, a sumursurot iti ulidan ni Jesus, “ti Payunir ti pannakaisalakanda.”—Hebreo 2:10; 12:2, Moffatt.
19. Aniat’ imboluntario nga aramiden dagiti adu a Saksi nga addaan espiritu ti panagpayunir, ket kasano a mariknada ti pannakasupapakda?
19 Nanipud 1960’s nagrigaten ti panangibaon kadagiti misionero iti adu a pagpagilian. Ti Watchtower Bible School of Gilead ti agtultuloy a mangmangted kadagiti misionero, agingganat’ mabalin, sigun iti pannakasapul dagiti dagdaga iti ballasiw-taaw. Nupay kasta, adda pay naglawaan a sangalubongan a tay-ak nga agpaay kadagidiay Saksi nga addaan ti pudpudno nga espiritu ti panagpayunir. Adun ti nagboluntario a mangaramid kadagiti kabukbukodanda nga urnos nga agserbi kadagiti daga a sadiay dakdakkel ti pakasapulan. Maysakay aya kadagidiay mabalin a tumipon kadakuada? Dagiti kakasta masansan ikumkumentoda a dagiti rigat ken panagsakripisio ti mamin-adu a masupsupapakan babaen iti dakkel a rag-o a panangpakan ti kinapudno ti Pagarian kadagiti kimmarnero a tattao kadagiti rumangrang-ay a pagilian. Masupsupapakanda iti maminggasut a daras iti pannakasapul kadagiti baro a “kakabsat a lallaki ken babbai ken inna ken annak” ken iti panangiranud kadagitoy ti nakaskasdaaw a namnama ti biag nga awan inggana “iti um-umay a sistema dagiti bambanag.”—Marcos 10:28-30.
20. (a) Asinoda ti mangar-aramid ti dakdakkel a paset ti panangaskasaba iti adu a pagilian? (b) Kasano a ti Japan mangirepreport ti ad-adu a dagup ti oras iti tay-ak ti serbisio kada tawen ngem iti ngangngani aniaman a sabali a pagilian? (c) Ania a saludsod ti nasayaat nga usigentayo?
20 Kasta met, addada ginasgasut a ribo kadagiti ad-adipen ni Jehova itatta nga agrepreport ti sagrado a serbisio kada bulan kas regular wenno auxiliary a payunir. Kaaduan kadagitoy ti siaanep nga agtartrabaho kadagiti teritoria iti il-ilida. Iti adu a pagilian, dagitoy ti mangar-aramid iti dakkel a paset ti panangasaba, ken masansan sumarsarungkarda kadagiti isu met laeng a balbalay a linawanlawas. Ti namnamada iti Pagarian ket maisarsarming iti naraniag a langlangada ken naragsak a kababalinda bayat a maaddaanda ti baro a gagayyem ken sukayenda ti ad-adu nga interes kadagiti teritoriada. No adu dagiti payunir kaipapananna ti ad-adu a mabusbos iti panagdayaw iti Dios. Iti nasurok a sangapulo a tawenen, ti Japan, a sadiay ti kadakkelan a bilang dagiti Saksi ni Jehova ket dati a Buddhistada, ket nakaireport ti ad-adu a dagup ti oras iti tay-ak ti serbisio kada tawen ngem iti aniaman a sabali a pagilian iti ruar ti Estados Unidos. Ngamin ta ngangngani kagudua kadagiti manangibumbunannagda ti Pagarian ket agpaypayunirda. Mabalinyo met aya a maiyurnos ti kabibiagyo tapno makiramankayo iti daytoy kagrandean a pribilehio, ti payunir a serbisio?
21. (a) Kasano a dagiti dadduma a Saksi a di ipalubos ti kasasaadda a makastrek kas regular payunir kaskasdi a maipakitada ti espiritu ti kinapayunir? (b) Kasano met a maipakita dagiti agtutubo ti espiritu ti kinapayunir?
21 Addada pay met sabsabali a Saksi a “naregta kadagiti naimbag nga ar-aramid.” (Tito 2:14) Ramanenna dagiti natataengan, dagidiay nakapuy salun-atda, dagiti adu nga addaan responsabilidad ti pamilia, ken dagiti agtutubo nga ages-eskuela pay laeng a ti kasasaadda ti di mangipalubos kadakuada a makapasalista kas regular payunir. Dagitoy ti makaipakita met ti espiritu ti kinapayunir babaen ti panangted ti makaparegta a panangsuportar kadagiti payunir, a makikadua kadakuada nga inggat’ mabalin iti serbisio, ken panangsalimetmet ti positibo a kababalin iti mismo a gundawayda a makapangasaba. Mabalinan dagiti agtutubo a pagbalinen ti amin-tiempo a serbisio iti Pagarian kas kalatda ken, apaman a nabautisarandan, makiramanda a sagpaminsan iti panag-auxiliary payunir. Kas ken agtutubo a Timoteo, mabalinda a pampanunoten dagitoy a bambanag tapno makaaramidda ti naespirituan nga irarang-ay a kadua amin a tattao ti Dios.—1 Timoteo 4:15, 16.
22. Aniaman ti kasasaadtayo iti biag, aniat’ rebbeng nga aramidentay a determinasiontayo, ket ania dagiti nasayaat a resultana?
22 Aniaman ti kasasaadtayo iti biag, sapay koma ta matignaytay amin babaen ti espiritu ni Jehova a makiraman a naan-anay iti serbisiona. Sapay koma ta “ti tulong ni Jehova” agtultuloy nga adda iti tunggal maysa kadatayo tapno maikuna met maipapan iti nanumo a panagreggettayo nga “iti kasta rimmang-ay a sipipigsa unay ket nagballigi ti sao ni Jehova.”—Aramid 11:21; 19:20.
Salsaludsod a Pangrepaso
◻ Kasano a nangrugi ti Nakristianuan a panagmisionero, ken kasano kasaknap ti nagbalinanna?
◻ Aniat’ paset ni apostol Pablo iti panangipasaknap ti panagmisionero?
◻ Kasano a napabiag manen ti panagmisionero kadagiti moderno a tiempo?
◻ Ania dagiti bambanag a namagbalin nga epektibo iti serbisio a panagmisionero ken panagpayunir?
◻ Kasanotay met a mainum ti espiritu ti panagpayunir itatta?
[Tsart iti panid 7]
Trabaho ti Pagarian kadagiti Sangapulo a Pagilian—1988
(Amin dagitoy ti nakaireport ti nasurok ngem 100,000 nga agibumbunannag)
Pagilian Kangatuan a Promedio a Oras ti Timmabuno iti
Bilang dagiti Payunir Panangasaba Memorial
Agibumbunannag
E.U.A. 797,104 96,947 161,478,732 1,822,607
Mexico 248,822 32,117 58,061,457 1,004,062
Brazil 245,610 22,725 44,218,022 718,414
Italia 160,584 25,477 43,354,687 330,461
Nigeria 134,543 14,022 27,800,623 398,555
Japan 128,817 52,183 60,626,840 297,171
Alemania 125,068 8,416 22,029,942 215,385
Britania 113,412 11,927 22,103,713 211,060
Filipinas 107,679 21,320 26,337,621 305,087
Francia 103,734 9,189 21,598,308 205,256
[Ladawan iti panid 4]
Indauluan da Pablo ken Bernabe ti trabaho a panagmisionero