BAR-JESUS

[Anak ni Jesus].

Maysa a Judio iti Pafo idiay isla ti Chipre idi umuna a siglo K.P., a maysa a “mangkukulam, ulbod a mammadto.” (Ara 13:6) Innalana ti propesional a nagan wenno titulo nga Elimas, a kaipapananna ti “Mangkukulam.”​—Kitaenyo ti ELIMAS.

Agparang nga ik-ikutan idi ni Bar-Jesus ti naturay a saad kas maysa a managsalamangka iti palasio ken manangbalakad ni Sergio Paulo, ti Romano a prokonsul idiay Pafo. Kas maysa a “padi” ti kulto a panagpadles, gagangay a busoren ni Bar-Jesus ti Nakristianuan a pammati, ket yantangay kayatna a salakniban ti saadna nga addaan dakkel a sapul, determinado a mangbusor iti panangaskasaba da Pablo ken Bernabe. Gapuna, idi ‘inkagumaan ni Sergio Paulo a denggen ti sao ti Dios, rinugian ni Elimas a binusor ida, nga inkagkagumaanna nga iyadayo ti prokonsul manipud iti pammati.’​—Ara 13:7, 8.

Idin, ni Pablo a “napno iti nasantuan nga espiritu” pinerrengna daytoy Sataniko a mangkukulam ket kinunana: “O tao a napno iti tunggal kita ti kinasaur ken tunggal kita ti kinadangkok, sika nga anak ti Diablo, sika a kabusor ti isuamin a nalinteg, saankanto kadi a sumardeng a mangkilkillo kadagiti nalinteg a dalan ni Jehova? Ala ket, ngarud, adtoy! ti ima ni Jehova agdisso kenka, ket mabulsekkanto, a saanmonto a makita ti lawag ti init iti maysa a kapaut ti tiempo.” Giddato a nabulsek ni Bar-Jesus. Idi nasaksian ti prokonsul daytoy umuna a nailanad a milagro ni Pablo, “nagsiddaaw unay iti sursuro ni Jehova,” ket dagus nga inawatna ti mensahe ket “nagbalin a manamati.”​—Ara 13:9-12.