DERBE

Maysa a “siudad ti Licaonia” iti Asia Menor, a namindua wenno nalabit namitlo a sinarungkaran a mismo ni apostol Pablo.

Nalabit maysa a tiempo sakbay ti panawen ti lam-ek idi 47-48 K.P., bayat ti umuna a panagbaniaga ni Pablo kas misionero, dimteng idiay Derbe kalpasan ti nakaro a pannakauborna iti kabangibang a Listra. Idiay Derbe, ‘indeklara da Pablo ken Bernabe ti naimbag a damag’ ket nangaramidda iti “adu nga adalan,” a mabalin a nakairamanan ni “Gayo a taga Derbe,” a nadakamat idi agangay kas kadua ti apostol iti panagdaliasatna. Nupay ti sekular a pakasaritaan ipasimudaagna a ti Derbe ti kadadayaan a siudad ti napolitikaan a probinsia ti Galacia kalpasan ti 41 K.P., agparang nga iti daytoy a salaysay, ti panangiladawan ni Lucas iti Derbe kas maysa a “siudad ti Licaonia” ket nalawag a maigapu ta dayta idi ti kadawyan a maar-aramat. (Ara 14:6, 19-21; 20:4) Napalabas ti sumagmamano a bulan, kalpasan a naangay ti panagnunumo idiay Jerusalem mainaig iti panagpakugit (a. 49 K.P.), ken bayat ti maikadua a panagdaliasatna, nagsubli ni Pablo idiay Derbe. (Ara 15:36; 16:1) Nupay saan a nadakamat ti Derbe, mabalin a dimmagas met sadiay ni Pablo iti maikatlo a panagdaliasatna idi pinabilegna dagiti adalan iti “pagilian ti Galacia.” (Ara 18:23) Awan nairekord a pisikal a pannakadangran ni Pablo idiay Derbe, ket adu a tawen kalpasanna saanna a dinakamat ti siudad idi imbinsabinsana dagiti panagsagabana iti dadduma a lugar iti aglawlaw ti Derbe.​—2Ti 3:11.

Ti Derbe ket isu itan ti Kerti Hüyük a 21 km (13 mi) iti amianan nga amianan-a-daya ti Karaman (kadaanan a Laranda) ken agarup 100 km (62 mi) iti abagatan a daya ti Konya (kadaanan nga Iconio). Tapno maammuan no nairaman ti Derbe iti surat ni Pablo a naiturong “kadagiti kongregasion ti Galacia,” kitaenyo ti GALACIA, SURAT KADAGITI TAGA.​—Ga 1:2.