ICONIO
Maysa a kadaanan a siudad ti Asia Menor a nagsaad iti agarup 1,027 m (3,370 pie) iti ngatuen ti patar ti baybay. Pagaammo ita ti Iconio kas Konya (Konia), masarakan iti agarup 240 km (150 mi) iti abagatan ti Ankara iti makin-abagatan a laud nga igid ti nangato a lantag ti makintengnga a paset ti Turkey. Idi umuna a siglo K.P., maysa ti Iconio kadagiti kangrunaan a siudad iti Galacia a probinsia ti Roma ken sinakawna ti kangrunaan a ruta ti komersio manipud Efeso agingga iti Siria.
Napigsa ti impluensia dagiti Judio nga agnanaed iti dayta a siudad. Da Pablo ken Bernabe, kalpasan ti pannakapilitda a pumanaw iti Antioquia ti Pisidia, nangasabada iti siudad ti Iconio ken iti sinagoga dayta, ket tinulonganda sadiay ti adu a Judio ken Griego nga agbalin a manamati. Ngem idi adda gandat a panangubor kadakuada, nagtalawda manipud Iconio ket nagturongda idiay Listra. Ngem di nagbayag kalpasan dayta, dagiti Judio manipud Antioquia ken Iconio napanda idiay Listra ket sinulbogda dagiti bunggoy sadiay iti kasta inuborda ni Pablo. Kalpasanna, napan da Pablo ken Bernabe idiay Derbe ken situtured a nagsublida idiay Listra, Iconio, ken Antioquia, a pinabpabilegda dagiti kakabsat ken nangdutokda iti “lallakay” a mangakem kadagiti annongen iti kongkongregasion a naipasdek kadagitoy a siudad.—Ara 13:50, 51; 14:1-7, 19-23.
Idi agangay, kalpasan a rimsua ti isyu maipapan iti panagkugit ken narisut babaen kadagiti apostol ken lallakay ti kongregasion ti Jerusalem, mabalin a simmarungkar manen ni Pablo idiay Iconio. Iti daytoy maikadua a panagbaniagana kas misionero, inkuyogna ni Timoteo, maysa nga agtutubo a lalaki nga addaan nasayaat a pakasarsaritaan kadagiti kakabsat idiay Listra ken Iconio.—Ara 16:1-5; 2Ti 3:10, 11.
Adda ti Iconio iti nagbaetan ti Frigia ken Licaonia. Mabalin a daytoy ti makagapu no apay a ti sumagmamano a nagkauna a mannurat, a pakairamanan da Strabo ken Cicero, kinunada a paset dayta ti Licaonia, idinto ta ni Xenophon inawaganna dayta kas maudi a siudad ti Frigia. No ibatay iti lokasionna, ti Iconio ket sakup ti Licaonia, ngem kas impasimudaag ti natakuatan dagiti arkeologo, maar-aramat sadiay ti kultura ken pagsasao dagiti Frigiano. Dagiti kitikit a nasarakan iti dayta a disso idi 1910 ipakitada a Frigiano ti pagsasao a naus-usar sadiay iti las-ud ti dua a siglo kalpasan ti tiempo ni Pablo. Mayanatup laeng ngarud a ti mannurat ti Aramid saanna nga inraman ti Iconio kas paset ti Licaonia, a nakausaran ti “pagsasao a Licaonia”.—Ara 14:6, 11.