Agbalin a Progresibo ken Mannakibagay a Ministro
“Nagbalinak nga amin a bambanag iti amin a kita ti tattao, tapno iti amin a pamay-an maisalakanko ti sumagmamano.”—1 CORINTO 9:22.
1, 2. (a) Kadagiti ania a wagas a makuna nga epektibo a ministro ni apostol Pablo? (b) Kasano ti panangdeskribir ni Pablo iti mismo a panangmatmatna iti annongenna?
ISU ket saan nga alusiisen agpadpada kadagiti natan-ok a mamasirib ken kadagiti nanumo nga agar-aramid iti tolda. Makombinsirna agpadpada dagiti opisial ti Roma ken dagiti adipen iti Frigia. Makatukay dagiti suratna agpadpada kadagiti liberal a Griego ken konserbatibo a Judio. Lohikal ti panagrasrasonna ken nalaing a manggutugot iti rikna. Inkagumaanna ti nangsapul iti banag a pagtunosanda iti asinoman a kasarsaritana tapno mayadanina ken ni Kristo ti dadduma.―Aramid 20:21.
2 Isu ni apostol Pablo, awan duadua a maysa nga epektibo ken progresibo a ministro. (1 Timoteo 1:12) Inawatna ken ni Jesus ti bilin nga “ipanna ti nagan [ni Kristo] kadagiti nasion kasta met iti ar-ari ken iti annak ti Israel.” (Aramid 9:15) Kasanona a minatmatan dayta nga annongen? Kinunana: “Nagbalinak nga amin a bambanag iti amin a kita ti tattao, tapno iti amin a pamay-an maisalakanko ti sumagmamano. Ngem aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.” (1 Corinto 9:19-23) Ania ti maadaltayo iti ulidan ni Pablo a tumulong tapno agbalintayo nga ad-adda nga epektibo iti panangasaba ken panangisuro?
Ti Nagbalbaliw a Tao Napagballigianna ti Karit
3. Ania ti panangmatmat ni Pablo kadagiti Kristiano sakbay ti pannakakombertena?
3 Sigud kadin a naanus ken nakonsiderar a tao ni Pablo, nga isu ket maikari iti naawatna nga annongen? Saan! Relihioso a panatiko idi ni Saulo (ti nagan idi ni Pablo) isu a siraranggas nga indadanesna dagiti pasurot ni Kristo. Kas maysa nga agtutubo, inanamonganna ti pannakapapatay ni Esteban. Kalpasanna, siuulpit nga inanupna dagiti Kristiano. (Aramid 7:58; 8:1, 3; 1 Timoteo 1:13) Intultuloyna ti nangyesngaw iti “pamutbuteng ken panangpapatay maibusor kadagiti adalan ti Apo.” Gapu ta saan a mapnek a mangparaut kadagiti manamati nga agnanaed idiay Jerusalem, rinugianna nga insaknap ti kampaniana a tinignay ti gura agingga iti adayo nga amianan iti Damasco.―Aramid 9:1, 2.
4. Ania a panagbalbaliw ti nasken idi nga aramiden ni Pablo tapno matungpalna ti annongenna?
4 Nakaro idi ti pananggura ni Pablo iti Kristianidad nalabit gapu ta patienna a mabalin a mamulitan ti Judaismo babaen kadagiti sursuro dagiti Gentil. Nangruna ta maysa ni Pablo a “Fariseo,” a dayta a mismo nga awag kaipapananna “naisina.” (Aramid 23:6) Panunotenyo ti pannakaklaat ni Pablo idi naammuanna nga isu ti pinili ti Dios a mangikasaba kadagiti Gentil ti maipapan ken ni Kristo! (Aramid 22:14, 15; 26:16-18) Di pay ketdi kayat dagiti Fariseo ti makipangan kadagidiay ibilangda a managbasol! (Lucas 7:36-39) Awan duadua a nasken nga ikagumaan ni Pablo a balbaliwan ti panangmatmatna ken itunosna dayta iti pagayatan ti Dios, ti pannakaisalakan ti amin a kita ti tattao.―Galacia 1:13-17.
5. Kasanotayo a matulad ni Pablo iti ministeriotayo?
5 Mabalin a kasta ti masapul nga aramidentayo. Bayat nga umad-adu ti makasarsaritatayo a tattao manipud iti nagduduma a nasionalidad ken lenguahe, masapul a pagreggetantayo a sukimaten ti kababalintayo ket iwaksi ti aniaman a panangidumduma. (Efeso 4:22-24) Mabigbigtayo man wenno saan, adda impluensiana kadatayo ti dimmakkelantayo a kagimongan ken ti naragpattayo nga edukasion. Mabalin nga imulada kadatayo dagiti mangidumduma ken di mannakibagay a panangmatmat ken kababalin. Nasken nga iwaksitayo dagiti kasta a rikna tapno masarakan ken matulongantayo dagiti arig karnero a tattao. (Roma 15:7) Kasta ti inaramid ni Pablo. Inawatna ti karit a panangpalawa iti ministeriona. Gapu iti ayat, pinatanorna dagiti paglaingan iti panangisuro a maikari a tuladen. Kinapudnona, ti panangsukimat iti ministerio ti “apostol kadagiti nasion” ipakitana a nasiput, mannakibagay, ken manangipamuspusan ni Pablo no maipapan iti panangasaba ken panangisurona.a―Roma 11:13.
No Kasano a Nakibagay ni Pablo iti Nagduduma a Kasasaad
6. Kasano a nasiput ni Pablo kadagiti nalikudan dagiti agdengdengngeg kenkuana, ket ania ti resultana?
6 Nasiput ni Pablo no maipapan kadagiti patpatien ken nalikudan dagiti agdengdengngeg kenkuana. Idi kasarsaritana ni Ari Agripa II, binigbig ni Pablo a ti ari ket ‘nalaing unay kadagiti amin a kaugalian kasta met kadagiti panagsusubang iti tengnga dagiti Judio.’ Kalpasanna, sisisigo nga inusar ni Pablo ti pannakaammona kadagiti patpatien ni Agripa ket nakipatang maipapan kadagiti bambanag a pagaammo ti ari. Nalawag ken makakombinsir ti panagrasrason ni Pablo isu a nakuna ni Agripa: “Iti apagbiit a tiempo maguyugoynak nga agbalin a Kristiano.”—Aramid 26:2, 3, 27, 28.
7. Kasano nga impakita ni Pablo nga isu ket mannakibagay idi nangasaba iti maysa a bunggoy idiay Listra?
7 Mannakibagay met ni Pablo. Imutektekanyo no kasano a binaliwanna ti pamay-anna idi kinasaritana ti maysa a bunggoy iti siudad ti Listra tapno isardengda ti agdayaw kenkuana, agraman iti kaduana a ni Bernabe, a kunam la no diosda. Dagitoy a tattao, a makapagsao iti Licaonia, ket karaman kadagiti umili a nababa ti adalda ken napeklan a managanito. Iti Aramid 14:14-18, intampok ni Pablo ti nakaparsuaan ken dagiti aglaplapusanan a bungada kas pammaneknek a ti pudno a Dios ti katan-okan. Nalaka la a maawatan ti argumentona, ket nabatad a dayta ti ‘nangpawil kadagiti bunggoy iti panagisakripisioda’ kada Pablo ken Bernabe.
8. Nupay adda dagiti gundaway a dina magawidan ti riknana, kadagiti ania a wagas nga impakita ni Pablo nga isu ket mannakibagay?
8 Siempre, saan a perpekto ni Pablo isu a no dadduma, adda dagiti gundaway a dina magawidan ti riknana. Kas pagarigan, idi naminsan a naibabain ken di nainkalintegan ti pannakatratona, pinagsasawanna ti maysa a Judio nga agnagan Ananias. Ngem idi naibaga a ti di inggagara nga ininsultona ket maysa a nangato a padi, dagus a nagpadispensar ni Pablo. (Aramid 23:1-5) Idiay Atenas, isu ket “nagrurod [idi damo] idi makitana a ti siudad napno kadagiti idolo.” Ngem iti palawagna idiay Areopago, awan ti impakita ni Pablo a kasta a panagrurod. Imbes ketdi, kinasaritana dagiti taga-Atenas iti lugar a pagtataripnonganda, ket nakirinnason iti banag a pagtutunosanda babaen ti panangtukoyna iti altarda a “Maipaay iti Dios a Di Am-ammo” ken dinakamatna pay ti maysa kadagiti mannaniwda.―Aramid 17:16-28.
9. Kasano nga impakita ni Pablo nga isu ket manangipamuspusan no iti pannakilangenna kadagiti agdengdengngeg kenkuana?
9 Iti pannakilangenna iti nagduduma nga agdengdengngeg, impakita ni Pablo nga isu ket manangipamuspusan. Inkabilanganna ti kultura ken kasasaad a nangsukog iti panagpampanunot dagiti agdengdengngeg kenkuana. Idi nagsurat kadagiti Kristiano idiay Roma, pagaammona nga agnanaedda iti kabesera ti kabilgan a turay iti daydi a panawen. Ti maysa a kangrunaan a punto ti suratna kadakuada ket maipapan iti pannakabalin ti basol ni Adan a pinarmek ti pannakabalin ni Kristo a mangispal. Makagutugot ti pannakisaritana kadagiti Kristiano a Romano ken kadagiti adda iti aglawlawda.―Roma 1:4; 5:14, 15.
10, 11. Kasano nga imbagay ni Pablo dagiti ilustrasionna kadagiti agdengdengngeg kenkuana? (Kitaenyo met ti footnote.)
10 Ania ti inaramid ni Pablo no kayatna nga ilawlawag kadagiti agdengdengngeg kenkuana dagiti nauuneg a kinapudno iti Biblia? Nasigo ti apostol a mangusar kadagiti gagangay, nalaka a maawatan nga ilustrasion tapno malawlawagan dagiti narikut a naespirituan a kapanunotan. Kas pagarigan, ammo ni Pablo a pamiliar dagiti umili ti Roma no maipapan iti sistema ti panangadipen a nasaknap iti Imperio ti Roma. Kinapudnona, nalabit nga adipen ti adu kadagiti sinuratanna. Gapuna, inusar ni Pablo ti panangadipen kas ilustrasion a mangsuporta iti nabileg nga argumentona maipapan iti panagpili ti tao iti pagpasakupanna, no iti basol wenno iti kinalinteg.―Roma 6:16-20.
11 “Kadagiti Romano,” sigun iti maysa a reperensia, “ti maysa nga apo mabalinna latta a wayawayaan ti adipenna, wenno mabalin a gatangen ti adipen ti wayawayana babaen ti panagbayadna iti apona. Mabalin met a magun-od ti wayawaya no ti adipen ket maipasa iti maysa a dios.” Ti maysa a nawayawayaan nga adipen mabalinna ti agtultuloy a mangged iti apona. Nalabit a dayta ti iparparipirip ni Pablo idi insuratna a mabalin a pilien ti adipen no ania nga apo ti pagserbianna―ti basol wenno ti kinalinteg. Dagiti Kristiano idiay Roma nawayawayaanda manipud basol ket nagbalindan a kukua ti Dios. Nawayadan nga agserbi iti Dios, ngem mabalinda latta a pilien ti agserbi iti basol―ti damo nga apoda―no dayta ti tarigagayanda. Gapu iti kasta a simple ngem pamiliar nga ilustrasion, mabalin a matignay dagiti Kristiano idiay Roma a mangimtuod iti bagida, ‘Asino nga apo ti pagserserbiak?’b
Makasursuro Manipud iti Ulidan ni Pablo
12, 13. (a) Ania a panagregget ti kasapulan ita tapno madanon ti puso dagiti nagduduma a tattao a makasaritatayo? (b) Ania ti nasarakanyo nga epektibo no mangaskasabakayo kadagiti tattao manipud iti nagduduma a nalikudan?
12 Kas ken Pablo, masapul nga agbalintayo a nasiput, mannakibagay, ken manangipamuspusan tapno madanontayo ti puso dagiti nagduduma a tattao a makasaritatayo. Tapno maipakaawattayo kadakuada ti naimbag a damag, saantay laeng nga agsarungkar, mangidanon iti maysa a naisagana a mensahe, wenno mangibati iti sumagmamano a literatura ti Biblia. Ikagumaantayo a tarusan no ania ti kasapulan ken pakaseknanda, dagiti makaay-ayo ken di makaay-ayo kadakuada, ken dagiti pagam-amkan ken personal nga opinionda. Nupay agkalikagum daytoy iti naannad a panangtingiting ken dakkel a panagregget, sigagagar a kasta ti ar-aramiden dagiti agibumbunannag iti Pagarian iti intero a lubong. Kas pagarigan, ipadamag ti sanga nga opisina dagiti Saksi ni Jehova idiay Hungary: “Raemen dagiti kakabsat ti kostumbre ken estilo ti panagbiag ti dadduma a puli ket dida namnamaen a sumurot dagitoy iti kostumbreda.” Kasta met laeng ti ikagkagumaan nga aramiden dagiti Saksi iti sadinoman.
13 Iti maysa a pagilian iti Adayo a Daya, kaaduan a tattao ti maseknan iti salun-at, panangisuro kadagiti ubbing, ken edukasion. Dagitoy a topiko ti pakisaritaan dagiti agibumbunannag imbes a pakisaritaanda ti maipapan iti lumanlanlan a kasasaad ti lubong wenno dagiti komplikado nga isyu ti kagimongan. Dagiti met agibumbunannag kadagiti dadakkel a siudad iti Estados Unidos nadlawda nga adda maysa a komunidad iti teritoriada a maseknan kadagiti bambanag a kas iti panagkunniber, nakaro a trapiko, ken krimen. Babaen kadagita a topiko, nakairugi dagiti Saksi kadagiti saritaan a naibatay iti Biblia. Dagiti epektibo a mannursuro iti Biblia siguraduenda nga aniaman a topiko ti pilienda, agtalinaedda a positibo ken makaparegta, nga ipaganetgetda ti praktikal a kinapateg ti panangyaplikar kadagiti prinsipio ti Biblia ita ken dagiti agkakaimbag a namnama nga isagsagana ti Dios iti masanguanan.―Isaias 48:17, 18; 52:7.
14. Ania dagiti wagas a maibagaytayo ti pannakisaritatayo kadagiti tattao nga addaan iti nagduduma a kasapulan ken kasasaad?
14 Makatulong met no balbaliwantayo ti wagas ti panangasabatayo, yantangay nagduduma ti kultura, edukasion, ken relihion dagiti tattao. Ti pannakisaritatayo kadagiti tattao a mamati iti Namarsua ngem di mamati iti Biblia ket naiduma no iti pannakisaritatayo kadagidiay saan a mamati nga adda ti Dios. No adda makasaritatayo a mangipagarup a ti amin a narelihiosuan a literatura ket nairanta laeng a pangkomberte, saantayo nga usaren kenkuana ti presentasion nga ar-aramatentayo no kasaritatayo ti maysa a mamati kadagiti sursuro ti Biblia. Kasapulan met nga ibagaytayo ti pannakisaritatayo kadagiti tattao nga addaan iti nagduduma a natun-oy nga edukasion. Dagiti nasigo a mannursuro usarenda dagiti ilustrasion ken pannakirinnason a maitutop iti pakaipasanguanda a kasasaad.―1 Juan 5:20.
Tulong Kadagiti Kabbaro a Ministro
15, 16. Apay a kasapulan ti panangsanay kadagiti kabbaro a ministro?
15 Saan laeng a dagiti bukodna a wagas ti panangisuro ti kayat a pasayaaten ni Pablo. Nakitana met a kasapulan ti panangsanay ken panangisuro kadagiti ub-ubing, kas ken ni Timoteo ken Tito, tapno agbalinda nga epektibo a ministro. (2 Timoteo 2:2; 3:10, 14; Tito 1:4) Umasping iti dayta, kasapulan met unay ita ti mangsanay ken agpaisuro.
16 Idi 1914, agarup 5,000 ti agibumbunannag iti Pagarian iti intero a lubong; iti agdama, agarup 5,000 ti mababautisaran iti kada lawas! (Isaias 54:2, 3; Aramid 11:21) Apaman a mangrugi a makitimpuyog dagiti kabbaro iti kongregasion Kristiano ken tarigagayandan ti makipaset iti ministerio, kasapulanda ti pannakasanay ken panangiwanwan. (Galacia 6:6) Napateg nga usarentayo dagiti wagas ni Apo Jesus no iti panangisuro ken panangsanay kadagiti adalan.c
17, 18. Kasanotay a matulongan dagiti kabbaro a maaddaan iti kompiansa a mangasaba?
17 Saan a basta nangbirok ni Jesus iti maysa a bunggoy sana pinagsao lattan dagiti apostolna. Impaganetgetna nga umuna no apay a napateg ti panangasaba ken imparegtana a sipipinget nga ikararagda ti ministerioda. Kalpasanna, nangipaay iti tallo a probision: maysa a kadua, teritoria, ken mensahe. (Mateo 9:35-38; 10:5-7; Marcos 6:7; Lucas 9:2, 6) Mabalintayo met nga aramiden ti kasta. Ti tultulongantayo man ket anaktayo, baro nga estudiante ti Biblia, wenno maysa a nabayagen a di nakipaset iti panangasaba, maiparbeng nga ikagumaantayo ti mangsanay iti kasta a wagas.
18 Dagiti kabbaro kasapulanda ti dakkel a tulong sakbay a maaddaanda iti kompiansa a mangikasaba iti mensahe ti Pagarian. Mabalinyo kadi a tulongan ida a mangisagana ken mangensayo iti maysa a simple, makaay-ayo a presentasion? Iti pangasabaan, makasursuroda iti pamay-anyo bayat a dakayo ti makisarita kadagiti umuna a sumagmamano a bumalay. Mabalinyo a tuladen ti inaramid ni Gideon, a nagkuna kadagiti kakaduana a mannakigubat: “Rebbeng nga agsursurokayo iti panangimatangyo kaniak, ket kasta ti rebbeng nga aramidenyo.” (Uk-ukom 7:17) Kalpasanna, bay-anyo a ti kabbaro nga agibumbunannag ti agsao met. Sibabara a komendaranyo ti panagregget dagiti kabbaro, ket no maitutop, mangted kadagiti singasing a makatulong iti panagrang-ayda.
19. Ania ti determinasionyo bayat nga ikagkagumaanyo nga ‘iringpas a naan-anay ti ministerioyo’?
19 Tapno ‘naan-anay a mairingpastayo ti ministeriotayo,’ determinadotayo a pagbalinen nga ad-adda a mannakibagay ti pannakisaritatayo, ken kayattayo nga isuro kadagiti kabbaro a ministro nga aramidenda met ti kasta. No panunotentayo ti kinapateg ti kalattayo―ti panangiranud iti pannakaammo maipapan iti Dios a mangiturong iti pannakaisalakan―masiguradotayo a makagunggona ti amin a panangikagumaantayo nga agbalin nga “amin a bambanag iti amin a kita ti tattao, tapno iti amin a pamay-an maisalakan[tayo] ti sumagmamano.”―2 Timoteo 4:5; 1 Corinto 9:22.
[Footnotes]
a No maipapan kadagiti pagarigan dagiti kasta a galad iti ministerio ni Pablo, usigenyo ti Aramid 13:9, 16-42; 17:2-4; 18:1-4; 19:11-20; 20:34; Roma 10:11-15; 2 Corinto 6:11-13.
b Umasping iti dayta, tapno mailawlawagna ti baro a relasion ti Dios ken dagiti napulotan iti espiritu nga ‘annakna,’ nangusar ni Pablo iti maysa a konsepto ti linteg a pamiliar kadagiti umili iti Imperio ti Roma nga agbasbasa kadagiti suratna. (Roma 8:14-17) “Ti panagampon ket kadawyan kadagiti Romano, ken mainaig unay dayta kadagiti kapanunotan dagiti Romano maipapan iti pamilia,” kuna ti libro a St. Paul at Rome.
c Iti agdama, amin a kongregasion dagiti Saksi ni Jehova ket addaan iti programa a Pioneers Assist Others. Mausar iti daytoy a programa ti kapadasan ken pannakasanay a nagun-od dagiti amin-tiempo a ministro no maipapan iti panangtulong kadagiti saan pay unay nga eksperiensiado nga agibumbunannag.
Malagipyo Kadi?
• Kadagiti ania a pamay-an a matuladtayo ni Pablo iti ministeriotayo?
• Ania dagiti mabalin a balbaliwantayo no iti panagpampanunottayo?
• Kasanotayo a mapagtalinaed a positibo ti mensahetayo?
• Ania ti kasapulan dagiti kabbaro a ministro tapno maaddaanda iti kompiansa?
[Blurb iti panid 29]
Nasiput, mannakibagay, ken manangipamuspusan ni apostol Pablo no iti panangasaba ken panangisurona
[Blurb iti panid 31]
Nangipaay ni Jesus iti tallo a kangrunaan a probision kadagiti adalanna: maysa a kadua, teritoria, ken mensahe
[Dagiti Ladawan iti panid 28]
Gapu ta mannakibagay, nakasabaan ni Pablo ti nadumaduma a tattao
[Ladawan iti panid 30]
Dagiti epektibo a ministro ikabilanganda ti kultura dagiti kasarsaritada
[Ladawan iti panid 31]
Dagiti progresibo a ministro tulonganda dagiti kabbaro nga agsagana agpaay iti ministerio