Siasino ti Mangisina Kadatayo iti Panagayat ti Dios?
“No maipapan kadatayo, agayattayo, agsipud ta isu ti immuna a nagayat kadatayo.”—1 JUAN 4:19.
1, 2. (a) Apay a napateg kadatayo ti pannakaammo nga adda mangay-ayat kadatayo? (b) Ti panagayat ti siasino ti kangrunaan a kasapulantayo?
KASANO kapateg kadakayo ti pannakaammo nga adda mangay-ayat kadakayo? Manipud kinamaladaga agingga iti kinanataengan, paseten ti biag dagiti tattao ti ayat. Napaliiwyo kadi ti maladaga a sidudungngo a sinakruy ti inana? Masansan nga uray ania ti mapaspasamak iti aglawlawna, no makitana ti nakaisem nga inana, natalged ti rikna ti maladaga ken komportable iti sakruy ti ina a mangay-ayat kenkuana. Wenno malagipyo kadi ti panawen ti kinaagtutuboyo, a nariribuk idi no dadduma? (1 Tesalonica 2:7) Adda gundaway a diyo ammo no ania ti kayatyo, wenno diyo pay ketdi maawatan ti riknayo. Kaskasdi, anian a nagpateg nga ammoyo nga ay-ayatendakayo dagiti dadakkelyo! Saan kadi a makatulong ti pannakaammo a mabalinyo nga iyuman kadakuada ti aniaman a parikut wenno saludsodyo? Wen, iti las-ud ti panagbiag, maysa kadagiti kangrunaan a kasapulantayo isu ti panagayat. Iparikna dayta nga ayat nga adda pategtayo.
2 No maipapan iti umiso a panangpadakkel kadagiti annak, napateg ti maaramidan ti di agkupas a panagayat dagiti nagannak. Ngem no maipapan iti naespirituan ken emosional a panagrang-aytayo, napatpateg nga amang ti pannakaadda iti panagtalek nga ay-ayatennatayo ti nailangitan nga Amatayo, ni Jehova. Dadduma nga agbasbasa iti daytoy a magasin ti nalabit di nakarikna iti pudno a panagayat dagiti nagannak. No kasta ti kasasaadyo, dikay maupay. Nupay diyo narikna wenno nagkurang ti panagayat ti nagannak kadakayo, ti nasungdo nga ayat ti Dios ti mangsupusop iti dayta.
3. Kasano a pinatalgedan ni Jehova ti panagayatna iti ilina?
3 Babaen ken propeta Isaias, impatuldo ni Jehova a nupay mabalin a ‘lipaten’ ti maysa nga ina ti maladagana, ti Dios dina pulos lipaten ti ilina. (Isaias 49:15) Umasping iti dayta, addaan kompiansa a kinuna ni David: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” (Salmo 27:10) Anian a makaliwliwa! Aniaman ti kasasaadyo, no nadekket ti relasionyo ken Jehova a Dios, kanayon koma a laglagipenyo a dakdakkel nga amang ti panagayatna kadakayo ngem ti panagayat ti asinoman a tao!
Agtalinaedkayo iti Panagayat ti Dios
4. Kasano a naipatalged kadagiti Kristiano idi umuna a siglo ti panagayat ti Dios?
4 Kaano ti damo a pannakariknayo iti panagayat ni Jehova? Mabalin nga umarngi ti kapadasanyo iti napasamak kadagiti Kristiano idi umuna a siglo. Nagsayaat ti panangiladawan ti maikalima a kapitulo ti surat ni Pablo kadagiti taga Roma maipapan iti pannakarikna dagiti managbasol iti panagayat ni Jehova nupay dati a naisinada iti Dios. Mabasatayo iti bersikulo 5: “Ti ayat ti Dios naiparukpok iti puspusotayo babaen ti nasantuan nga espiritu, a naited kadatayo.” Iti bersikulo 8, innayon ni Pablo: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.”
5. Ania ti nakatulong kadakayo a mangapresiar iti kadakkel ti panagayat ti Dios?
5 Umasping iti dayta, idi nayam-ammo kadakayo ti kinapudno ti Sao ti Dios ken rinugianyo ti mamati, nangrugin nga agtignay ti nasantuan nga espiritu ni Jehova iti pusoyo. Iti kasta, nangrugi a maapresiaryo ti kapateg ti inaramid ni Jehova idi imbaonna ti dungdunguenna nga Anak tapno matay maigapu kadakayo. Tinulongannakayo ngarud ni Jehova a mangtarus no kasano kadakkel ti panagayatna iti sangatauan. Saan kadi a natukay ti pusoyo idi naammuanyo nga uray pay nayanakkayo a managbasol a naisina iti Dios, linuktan ni Jehova ti gundaway tapno maideklara a nalinteg dagiti tattao ken maaddaanda iti namnama a biag nga agnanayon? Saankay kadi a natignay a mangayat ken ni Jehova?—Roma 5:10.
6. Apay a mariknatayo no dadduma a kasla adayotayo ken ni Jehova?
6 Indedikaryo ti biagyo iti Dios kalpasan a natignaykayo iti panagayat ti nailangitan nga Ama ken binalbaliwanyo ti biagyo tapno agbalin a makaay-ayo kenkuana. Naikaykaysakayo itan iti Dios. Kaskasdi, mariknayo kadi no dadduma a kasla adayokayo ken ni Jehova? Mabalin a makarikna iti kasta ti asinoman kadatayo. Ngem kanayon a laglagipenyo a di pulos agbalbaliw ti Dios. Ti panagayatna ket kas iti init a di agbaliw ken permanente, a di pulos agsardeng a mangisilnag iti nabara nga anaraarna ditoy daga. (Malakias 3:6; Santiago 1:17) Iti sabali a bangir, mabalin nga agbaliwtayo—uray temporario laeng. Iti panagtayyek ti daga, kagudua ti planeta ti maabbungotan iti sipnget. Umasping iti dayta, no tallikudantayo ti Dios, uray kadagiti bassit laeng a banag, mariknatay a bumaaw ti relasiontayo kenkuana. Ania ti mabalintay nga aramiden tapno maatur dayta a kasasaad?
7. Kasano a ti panangsukimat iti bagi matulongannatayo nga agtalinaed iti panagayat ti Dios?
7 No mariknatay a kasla naisinatayo iti panagayat ti Dios, masapul a saludsodantay ti bagitayo: ‘Tagtagilag-anek kadi ti panagayat ti Dios? In-inut kadi nga umad-adayoak iti sibibiag ken naayat a Dios, a madlaw a kimmapuy ti pammatik iti nadumaduma a wagas? Naipamaysa kadi ti panunotko “iti bambanag ti lasag,” imbes nga “iti bambanag ti espiritu”?’ (Roma 8:5-8; Hebreo 3:12) No nayadayotayo ken ni Jehova, adda dagiti addang a mabalintay nga aramiden tapno maatur dagiti bambanag, ket maisubli ti nasinged ken nabara a relasiontayo kenkuana. Indagadag kadatayo ni Santiago: “Umadanikayo iti Dios, ket isu umadaninto kadakayo.” (Santiago 4:8) Ipangagyo ti sasao ni Judas: “Dungdungnguen, babaen ti panangpabilegyo iti bagbagiyo iti kasasantuan a pammatiyo, ken panagkararagyo buyogen ti nasantuan nga espiritu, pagtalinaedenyo ti bagbagiyo iti ayat ti Dios.”—Judas 20, 21.
Ti Agbalbaliw a Kasasaad Dina Apektaran ti Panagayat ti Dios
8. Aniada a panagbalbaliw ti mabalin a kellaat a dumteng iti biagtayo?
8 Iti daytoy a sistema ti bambanag, adu ti mapasamak a panagbalbaliw iti biagtayo. Napaliiw ni Ari Solomon a “ti tiempo ken ti di mapakpakadaan a pasamak mapagteng [kadatayo] amin.” (Eclesiastes 9:11) Iti apagdarikmat, mabalin nga agbaliw nga interamente ti biagtayo. Maysa nga aldaw, nasalun-attayo; kabigatanna, mabalin nga agsakittayo iti nakaro. Maysa nga aldaw, kasla natalged ti panggedantayo; kabigatanna, awanen ti trabahotayo. Di mapakpakadaan a matay ti maysa nga ing-ingungoten. Iti maysa a pagilian, mabalin a tagtagiragsaken dagiti Kristiano ti natalna a kasasaad, pagammuan, bumtak ti nakaro a pannakaidadanes. Nalabit padaksendatayo ket agbanag dayta iti di nainkalintegan a panagsagaba. Wen, saan a natalged ti biag.—Santiago 4:13-15.
9. Apay a nainsiriban nga usigen ti sumagmamano a paset ti Roma kapitulo 8?
9 No dumteng dagiti naladingit a pasamak, mariknatay a kasla nabaybay-antayo, nga uray la ipapantayo a bimmaawen ti panagayat ti Dios kadatayo. Yantangay posible a mapasamak dagita iti uray siasino, nasayaat no usigentayo a naimbag ti makaliwliwa unay a sasao ni apostol Pablo a nairekord iti Roma kapitulo 8. Naiturong dagidiay a sasao kadagiti napulotan iti espiritu a Kristiano. Kaskasdi, agaplikar met ti prinsipiona kadagiti sabsabali a karnero, a naideklara a nalinteg kas gagayyem ti Dios, kas ken Abraham sakbay ti panawen dagiti Kristiano.—Roma 4:20-22; Santiago 2:21-23.
10, 11. (a) Ania dagiti pasaray ipabasol dagiti bumusbusor iti ili ti Dios? (b) Apay a di pakaseknan dagiti Kristiano dagiti kasta a pammabasol?
10 Basaenyo ti Roma 8:31-34. Iyimtuod ni Pablo: “No ti Dios adda kadatayo, siasinonto ti bumusor kadatayo?” Pudno, busorennatayo ni Satanas ken ti nagdakes a lubongna. Mabalin a padaksendatayo dagiti bumusbusor, uray kadagiti korte ti pagilian. Dadduma a nagannak a Kristiano ti naakusar a kagurada ti annakda gapu ta dida palubosan dagitoy nga umawat kadagiti medikal a pamay-an a mangsalungasing iti linteg ti Dios wenno makiraman kadagiti pinapagano a selebrasion. (Aramid 15:28, 29; 2 Corinto 6:14-16) Dadduma a matalek a Kristiano ti napabasol iti sedision gapu ta dida kayat a patayen ti padada a tao iti paggugubatan wenno makiraman iti politika. (Juan 17:16) Adda dagiti bumusbusor a mangiwaras kadagiti pammardaya babaen ti media, a siuulbod nga akusaranda pay dagiti Saksi ni Jehova kas napeggad a kulto.
11 Ngem diyo liplipatan nga idi kaaldawan dagiti apostol, adda a naikuna: “No maipapan itoy a sekta naammuanmi a masupsupiat iti isuamin a lugar.” (Aramid 28:22) Pakadanagan kadi dagiti ulbod a pammabasol? Ti Dios ti mangideklara a nalinteg dagiti pudno a Kristiano, maibatay iti pammatida iti daton ni Kristo. Apay koma nga isardeng ni Jehova nga ayaten dagiti agdaydayaw kenkuana idinto ta impaayna kadakuada ti kapatgan a sagut a maitedna—ti dungdungnguenna nga Anak? (1 Juan 4:10) Ita ta napagungaren ni Jesus ken naisaad iti makannawan ti Dios, siaaktibo a supsuportaranna dagiti Kristiano. Asino ti makailibak a salsalakniban ni Kristo dagiti pasurotna, wenno asino ti mabalin a mangkuestion iti anamong ti Dios kadagiti matalek kenkuana? Awan a pulos!—Isaias 50:8, 9; Hebreo 4:15, 16.
12, 13. (a) Aniada a kasasaad ti di mabalin a mangisina kadatayo iti panagayat ti Dios? (b) Apay a parparigatennatayo ti Diablo? (c) Apay a naan-anay a makapagballigi dagiti Kristiano?
12 Basaenyo ti Roma 8:35-37. Malaksid kadatayo, adda pay kadi asinoman wenno aniaman a mangisina kadatayo iti panagayat ni Jehova ken ti Anakna, ni Kristo Jesus? Mabalin nga usaren ni Satanas dagiti ahentena ditoy daga tapno riribukenna dagiti Kristiano. Kadagiti naglabas a siglo, adu kadagiti kakabsattayo a lallaki ken babbai ti nagbalin a puntiria ti nakaro a panangidadanes iti adu a pagilian. Iti dadduma a lugar ita, inaldaw a maipaspasango dagiti kakabsattayo iti rigat ti biag. Dadduma ti makapasar iti bisin wenno awanan iti umdas a pagkawes. Apay a patauden ti Diablo dagitoy a pakarigatan? Daytoy ti maysa kadagiti panggepna: tapno lapdanna ti pudno a panagdayaw ken ni Jehova. Kayat ni Satanas a patientayo a bimmaawen ti ayat ti Dios. Ngem pudno kadi dayta?
13 Kas ken Pablo, a nagadaw iti Salmo 44:22, inadaltayo ti naisurat a Sao ti Dios. Ammotayo a maigapu iti nagan ti Dios a mapaspasamak dagitoy kadatayo a “karnero[na].” Nairaman iti dayta ti pannakasantipikar ti nagan ti Dios ken ti pannakaalangon ti sapasap a kinasoberanona. Dagita a napateg nga isyu ti makagapu nga impalubosna dagiti pakasuotan, saan a gapu ta dinatay ay-ayatenen. Kasanoman ti karigat ti kasasaad, mainanamatayo a di pulos nagbalbaliw ti panagayat ti Dios iti ilina, a pakairamanan ti tunggal maysa kadatayo. Agbanagto a balligi ti aniaman a kasla pannakaabaktayo no la ket ta agtalinaedtayo a natarnaw. Pabilgen ken patibkerennatayo ti pammatalged a di agbaliw ti panagayat ti Dios.
14. Apay a kombinsido ni Pablo iti panagayat ti Dios uray dumteng dagiti pakarigatan kadagiti Kristiano?
14 Basaenyo ti Roma 8:38, 39. Apay a kombinsido ni Pablo nga awan ti mangisina kadagiti Kristiano iti panagayat ti Dios? Awan duadua a ti mismo a kapadasan ni Pablo iti ministerio ti nangpabileg iti pammatina nga awan ti rigat a mangapektar iti panagayat ti Dios kadatayo. (2 Corinto 11:23-27; Filipos 4:13) Maysa pay, ammo ni Pablo ti agnanayon a panggep ni Jehova ken dagiti naglabas nga inaramidna iti ilina. Malapdan kadi ni patay ti panagayat ti Dios kadagidiay nasungdo a nagserbi kenkuana? Saan a pulos! Agtalinaed iti perpekto a lagip ti Dios dagidiay natay a matalek, ket pagungarenna ida iti naituding a tiempo.—Lucas 20:37, 38; 1 Corinto 15:22-26.
15, 16. Mangdakamat iti sumagmamano a banag a di mabalin a mangpasardeng iti panagayat ti Dios kadagiti matalek nga adipenna.
15 Aniaman a kinadaksanggasat iti biag ti sumangbay kadatayo—dayta man ket mangbaldado nga aksidente, awan agasna a sakit, wenno panagsagaba iti pinansial—awan ti makalapped iti panagayat ti Dios iti ilina. Dagiti mannakabalin nga anghel, kas iti nasukir nga anghel a nagbalin a Satanas, dida mabalin nga impluensiaan ni Jehova tapno isardengna nga ayaten dagiti dedikado nga adipenna. (Job 2:3) Mabalin a pawilan, ibalud, ken sigugubsang a tratuen dagiti gobierno ti ad-adipen ti Dios ken nalabit dida ikabilangan dagitoy kas umili. (1 Corinto 4:13) Mabalin a mapilitan dagiti tattao a mangbusor kadatayo gapu iti kasta a di nainkalintegan a pananggura dagiti nasion, ngem saan a dayta ti mangituggod iti Soberano ti uniberso a mangbaybay-a kadatayo.
16 Kas Kristiano, ditay koma pagdanagan a baka magsat ti relasion ti Dios iti ilina gapu iti aniaman kadagiti inawagan ni Pablo a “bambanag nga addan,” dagiti pasamak, kasasaad, ken situasion iti daytoy agdama a sistema ti bambanag, wenno “bambanag nga umay” iti masanguanan. Nupay gubgubatendatayo dagiti natauan ken naespirituan a puersa, ti nasungdo a panagayat ti Dios ti mangsustiner kadatayo. Kas impaganetget ni Pablo, awan ti “kangato wenno kauneg” a makalapped iti panagayat ti Dios. Wen, aniaman a nairanta a mangupay kadatayo, wenno aniaman a nabilbileg a pannakabalin a mangimpluensia kadatayo, dinatay maisina iti panagayat ti Dios; ket awan ti aniaman a parsua a mabalin a mangdadael iti relasion ti Namarsua kadagiti matalek nga adipenna. Saan a pulos nga aggibus ti ayat ti Dios; agnanayon dayta.—1 Corinto 13:8.
Tagipatgenyo nga Agnanayon ti Naayat a Kinamanangngaasi ti Dios
17. (a) Apay a ti panangtagiragsak iti ayat ti Dios “nasaysayaat ngem iti biag”? (b) Kasanotay a maipakita nga ipatpategtayo ti naayat a kinamanangngaasi ti Dios?
17 Kasano kapateg ti panagayat ti Dios kadakayo? Mariknayo kadi ti kas iti narikna ni David, a nangisurat: “Agsipud ta ti naayat a kinamanangngaasim nasaysayaat ngem iti biag, dagiti bukodko a bibig padayawandakanto. Iti kasta bendituenkanto bayat ti panagbiagko; iti naganmo itag-aykonto dagiti dakulapko”? (Salmo 63:3, 4) Kinapudnona, adda kadi aniaman a maitukon ti biag iti daytoy a lubong a nasaysayaat ngem iti panangtagiragsak iti ayat ken nasungdo a pannakigayyem ti Dios? Kas pagarigan, nasaysayaat kadi ti pananggun-od iti sekular a karera a pagbaknangan ngem iti panangsagrap iti natalna a panunot ken kinaragsak a resulta ti nasinged a pannakirelasion iti Dios? (Lucas 12:15) Dadduma a Kristiano ti naipasango iti panagpili: tallikudanda ni Jehova wenno mapapatayda. Kasta ti napasamak iti adu a Saksi ni Jehova iti kampo konsentrasion ti Nazi idi Gubat Sangalubongan II. Nupay adda sumagmamano a timmallikud, pinili dagiti Kristiano a kakabsattayo ti agtalinaed iti panagayat ti Dios, a sidadaanda a matay no kasapulan. Dagidi a sisusungdo a nagtalinaed iti ayatna ti makapagtalek nga umawatda iti agnanayon a biag iti masanguanan manipud iti Dios, banag a di maited ti lubong kadatayo. (Marcos 8:34-36) Ngem saan la a ti biag nga agnanayon ti nairaman.
18. Apay a matarigagayan unay ti biag nga agnanayon?
18 Nupay imposible a makapagbiagtayo nga agnanayon no awan ni Jehova, panunotenyo no ania ti kasasaad ti napaut a biag no awan ti Namarsua. Kawaw ken awanan iti pudno a direksion ti kasta a biag. Inikkan ni Jehova ti ilina iti makapnek a trabaho nga aramidenda iti daytoy maudi nga al-aldaw. Kas ti Naindaklan a Managpanggep, makapagtalektayo nga inton ipaay ni Jehova ti biag nga agnanayon, adunto ti makapainteres ken makagunggona a bambanag nga adalen ken aramidentayo. (Eclesiastes 3:11) Ngem uray kasano kaadu ti masursurotayo kadagiti sumungsungad a milenio, ditayto pulos naan-anay a marukod ti ‘kinauneg ti kinabaknang ken sirib ken pannakaammo ti Dios.’—Roma 11:33.
Ay-ayatennakayo ti Ama
19. Idi agpakadan ni Jesu-Kristo kadagiti adalanna, ania ti impanamnamana kadakuada?
19 Idi Nisan 14, 33 K.P., bayat ti maudi a rabii a kaduana ti 11 a matalek nga apostolna, adu ti makapabileg nga imbaga ni Jesus tapno makapagsaganada kadagiti adda nga agur-uray kadakuada. Nagtalinaedda amin a matalek ken ni Jesus bayat ti pannakasuotna, ket personal a nariknada ti panagayatna kadakuada. (Lucas 22:28, 30; Juan 1:16; 13:1) Kalpasanna, impanamnama kadakuada ni Jesus: “Ti Ama a mismo addaan panagayat kadakayo.” (Juan 16:27) Anian a nakatulong dagidi a sasao tapno marikna dagiti adalan ti nasged a panagayat kadakuada ti nailangitan nga Ama!
20. Ania ti determinado nga aramidenyo, ket ania ti manamnamayo?
20 Adu a sibibiag ita ti simamatalek a nagserbi ken ni Jehova iti adun a dekada. Awan duadua nga adu pay a suot ti mapasarantayo sakbay a manungpal daytoy dakes a sistema ti bambanag. Diyo koma pagduaduaan ti nasungdo a panagayat ti Dios kadakayo gapu kadagita a pakasuotan wenno pakarigatan. Saan a panaglablabes no maulit-ulit a maikuna: Ay-ayatennakayo ni Jehova. (Santiago 5:11) Itultuloy koma ti tunggal maysa nga aramiden ti pasetna, a sisusungdo nga agtungpal iti bilin ti Dios. (Juan 15:8-10) Aprobetsarentayo koma ti kada gundaway a mangidayaw iti naganna. Masapul a patibkerentay ti determinasiontayo nga agtultuloy nga umadani ken ni Jehova babaen ti panagkararag ken panagadal iti Saona. Aniaman ti mapasamak iti masanguanan, no aramidentayo ti amin a kabaelantayo a mangay-ayo ken ni Jehova, makapagtalinaedtayo a maaddaan iti talna ken naan-anay a manamnamatayo ti di agbalbaliw a panagayatna.—2 Pedro 3:14.
Ania ti Sungbatyo?
• Tapno mataginayontayo ti kinatimbeng iti naespirituan ken iti emosion, ti panagayat ti siasino ti nangnangruna a kasapulantayo?
• Ania a bambanag ti di pulos makalapped iti panagayat ni Jehova kadagiti adipenna?
• Apay a ti pananggun-od iti panagayat ni Jehova “nasaysayaat ngem iti biag”?
[Dagiti Ladawan iti panid 13]
No mariknatayo a kasla naisinatayo iti panagayat ti Dios, mabalintayo nga aturen dagiti bambanag
[Ladawan iti panid 15]
Naawatan ni Pablo no apay a naidadanes