Adda Aya Aniaman a Makaisina Kadakayo iti Ayat ti Dios?

“Ta diak duaduaen nga uray ni patay wenno uray ti biag wenno uray dagiti anghel wenno uray dagiti pagturayan wenno uray dagiti bambanag nga agdama wenno uray dagiti bambanag nga umayto wenno uray dagiti pannakabalin wenno uray ti nangato wenno uray ti nababa wenno uray aniaman a sabsabali a parsua, didatay mabalinto nga isina iti ayat ti Dios nga adda ken Kristo Jesus nga Apotayo.”​—ROMA 8:38, 39.

1. Kadagiti ania a pamay-an a maiparparangarang ti inaldaw a panagayat ti Dios?

TI DIOS isu ti ayat. Kadagiti makaited-biag a pamay-an daytoy ti maiyeb-ebkas kadatayo iti inaldaw-aldaw. Ti angin nga ang-angsentayo, ti danum nga in-inumentayo, ti taraon a kankanentayo​—dumtengda amin kas panangiparangarang iti ayat ti Dios. Mainayon pay, dumtengda nga agpadpada kadagiti naimbag ken dakes, apresiarenda man dayta wenno saan. Paneknekan daytoy ni Jesus idi a kinunana maipapan ti nailangitan nga Amana: “Paruarenna ti initna kadagiti dakes ken kadagiti naimbag ket pagtuduenna kadagiti nalinteg ken nakillo.” (Mateo 5:45) Tunggal sibibiag a parsua ditoy daga utangda ti panagyaman iti Dios kadagiti pagbibiagda.​—Salmo 145:15, 16.

2. Kasano a naipakita ti naindaklan nga ayat ni Jehova iti sangatauan, ket kasano ti panangipakita ni Jesus iti panangipategna iti pagayatan ni Jehova?

² Agpaay kadagiti natauan a parparsua ti ayat ti Dios nalablabes pay ngem basta panangsustener iti daytoy agdama a biag nga agkupas kas ti sabong ken malaylay kas ti ruot. (1 Pedro 1:24) Isu ti nagaramid ti sagana a maipaay iti sangatauan tapno agbiag iti agnanayon: “Ta kasta la unay ti panagayat ti Dios iti lubong nga intedna ti Anakna a bugbugtong, tapno isuamin a mangwatwat ti pammati kenkuana saan a mapukaw no di ket adda biagna nga agnanayon.” (Juan 3:16) Daytoy a sagana ti naaramid a dakkel ti pategna agpadpada iti Ama ken ti Anak. Idiay Getsemane, iti rabii sakbay ti ipapatayna, nagparintumeng ni Jesus iti daga ket nagkararag iti kasta unay nga ut-ot ket “nagling-et iti kasla tedted ti dara a nagtinnag iti daga.” Iti daytoy a kanito ti panagtutuok, silalagip ni Jesus iti umsi a naiyegna iti nagan ti Dios, ket indawatna pay a ti kopa maiyadayo koma kenkuana. Ngem innayonna: “Nupay kasta saan a ti kayatko, no di ta kayatmo.” (Lucas 22:44; Marcos 14:36) Nupay ni Jesus agpapaut-ot unay, no ania ti kayat ni Jehova isu ti umun-una. Uray pay ti namnama a pannakasaplit ken ti nabannayat nga ipapatay babaen ti pannakailansa iti kayo a pagtutuokan di makaisina kenkuana manipud ayat ti Dios.

3. Ania a sasao ni Pablo ti al-alaen ita dagiti Saksi ni Jehova kas kabukbukodanda, ket iti ania ti nagbanaganna kadakuada?

³ No ania ti kayat ni Jehova isu met ti umun-una kadagiti Saksi ni Jehova nga ita magmagna kadagiti addang ni Jesus. “No ti Dios adda a bumuyog kadatayo,” kunada, a tultuladenda dagiti sasao ni apostol Pablo, “siasino ti bumusor kadatayo? Siasino ti mangisinanto kadatayo iti ayat ni Kristo? Tinto ladingit wenno ti rigat wenno ti pannakaidadanes wenno ti bisin wenno ti kinalamolamo wenno ti peggad wenno ti kampilan? Saan, no di ket kadagitoy amin a bambanag agballigitayo a naan-anay gapu iti daydiay nagayat kadatayo.” (Roma 8:31, 35, 37) Bayat daytoy a siglo dagiti Saksi ni Jehova marangranggasanda, makabkabilda, napakpakbuanda ti alkitran ken dutdot, naputputolan ti paset ti bagida, naramramesda, nabisbisinanda, napappapatayda babaen iti pannakapaltog, ken naputolanda pay ti ulo kadagiti kampo konsentrasion dagiti Nazi​—amin gapu iti panagkedkedda a mangisina iti bagbagida manipud ayat ti Dios.

4. Kasano a nagsiddaawanyo ti panagkitakit ti maysa nga agtutubo a di mangisina ti bagina manipud ayat ti Dios?

⁴ Iti uppat a pulo ket uppat a tawen a napalabasen, maysa nga agtutubo a lalaki, maysa kadagiti Saksi ni Jehova, nagsurat kadagiti nagannak kenkuana manipud iti maysa a kampo konsentrasion dagiti Nazi, a kunkunana, iti pasetna:

“Itan alas 9 ti orasen iti aldaw a pannakabistak, ngem masapul nga agurayak agingga iti 11:30. Agsursuratak manipud iti naiputputong a selda iti korte militar. Addaanak ti kinatalna, a pudno a kasla nagrigat a patien; ngem intalekko aminen iti Apo, gapuna mabalinko nga urayen a sikakalma daytoy nga oras ken ti kankanayon a pannakarepreppet. Imbagada kadakayo a saandakto a kadkadenaan. Kinaulbod dayta! Aldaw ken rabii: no laeng agsukatak ken no dalusanda ti selda a ti maysa maikat ti kadenana . . .

“12:35 ti orasen. Itan nalpas ti isuaminen. Gapu ta tinaginayonko ti panagkedkedko [iti dawatda nga isukok ti panagdayawko ken Jehova a Dios], naikeddengen ti ipapatay. Nagimdengak, ket kalpasan ti panangibbetko kadagiti sasao nga ‘Agtalgedka agingga ken patay’ ken sumagmamano a dadduma pay a sasao ni Apotayo, daytat’ nalpas aminen. Ngem dikay pampanunoten dayta itan. Addaanak iti kinatalna, ti kasta unay a kinaulimek, a nalabit dikay maripirip. . . . Daytoy a kinatalna, daytoy a rag-o a nanglapunos kaniakon idiay pangukoman, a ti lubong dinanto pulos matarusan, a nanglapunos ken nangringbaw kaniak bayat a simrekak manen iti seldak . . . Dikay agsangit. . . . Isu daytoy ti kasayaatanen a maipaayko kadakayo, ken amin dagiti ay-ayatek a kakabsat itatta, ti maudi a Domingo sakbay ti pannakapapatayko (ti pannakaputol ti ulok), nga iti daytanto nga aldaw awanton dagiti repreppetko.”a

“Patibkerennakayto, Papigsaennakayto”

5, 6. Ania dagiti pammatalged nga inted da Pablo ken Pedro a makaliwliwa kadagidiay masusuot unay gapu iti panangsalimetmetda iti ayat ti Dios?

⁵ Daytoy agtutubo a lalaki naisina iti biag ngem saan a naisina manipud iti ayat ti Dios. Dagiti umas-asping a kinadawel ti naipapaay kadagiti Saksi ni Jehova bayat ti panaglabas dagiti adu a siglo. Ti abilidad dagiti ad-adipen ti Dios a mangibtur kadagiti kakasta a pannakaidadanes, uray pay agingga ken patay, ket saan nga iti kabukbukodanda a pigsa no di ket iti Dios. “Ngem ti Dios mapagtalkan,” impasiguro kadatayo ni Pablo, “isu a dinto mangipalubos a masulisogkayo iti aglabes iti mabalinanyo no di ket maigiddanto iti pannakasulisog isaganananto met ti dalan a paglisian tapno mabalinyo a pagballigian.” (1 Corinto 10:13) No maiyegda iti pannakasuot dagiti matalek a Saksi ni Jehova itatta mabalinanda a maikuna a kas ken Pablo idi a naibalud: “Ngem ti Apo kimmappon kaniak ket pinapigsanak.”​—2 Timoteo 4:17.

⁶ Ni apostol Pedro, kalpasan ti panangpakdaarna kadakayo nga agbantay a maibusor iti Diablo, isu a magmagna a kasla ngumerngernger a leon nga agsapsapul ti panangalun-onna kadatayo, ti nangted iti daytoy a pammasiguro: “Ket ti Dios ti amin a di Kaikarian a kinamanangngaasi a nangawis kadatayo iti agnanayon a gloriana ken Kristo, iti kalpasan ti panagsagabayo iti bassit nga aldaw isu met laeng palaingennakayto, patibkerennakayto, papigsaennakayto.” (1 Pedro 5:8-10) No pampanunotentay amin daytoy nasantuan a tulong, maysa a banag ti nalawag: Ti ayat ti Dios di mapaay; aniaman a pannakaisinatayo iti dayta ket basoltayo, saanna a basol.

7. Ania dagiti taktika nga inaramat ni Satanas ken Jesus, ket kasanot’ panangtungday ni Jesus kenkuana?

⁷ Ni Satanas di kanayon a rumaraut kas ngumerngernger a leon. Iti mamin-adu a daras isut’ um-umay kas maysa a ‘nasikap nga uleg’ ken uray pay kas maysa nga apostata nga “anghel ti lawag.” Isut’ addaan kadagiti dakes a gakat kadatayo, ket masapul nga alistotayo tapno dinatayo makemmeg. Masapul nga ikawestayo ti naan-anay a kabal manipud iti Dios “tapno mabalintayo ti agtalinaed a bumusor kadagiti panangallilaw ti Diablo.” (Genesis 3:1, The Jerusalem Bible; 2 Corinto 2:11; 11:13-15; Efeso 6:11, Ref. Bi., footnote) Iti panangrugi ti ministerio ni Jesus, napan ni Satanas kenkuana nga agad-adaw kadagiti Kasuratan, a di umiso ti panangiyaplikarna kadakuada iti panagreggetna a mangsulisog ken Jesus nga agaramid iti di umiso. Namitlo a daras a sinulisogna ni Jesus ket namitlo met a daras a napaay. Inwaksi ni Jesus dagiti panangtirtiritir ni Satanas iti Kasuratan babaen iti umiso a panangyaplikarna kadagiti teksto. Kalpasanna kinuna ni Jesus a pumanawen ni Satanas. Ngem ni Satanas “pimmanaw laeng kenkuana iti sumagmamano a tiempo.”​—Lucas 4:13; Mateo 4:3-11.

8, 9. Kadagiti ania a makaallilaw a pamay-an a nagsubli ni Satanas tapno rautenna ni Jesus, ket iti ania ti nangiturongan ni Pablo kadatayo nga aramiden nga agpaay iti pakasalaknibantayo?

⁸ Ni Satanas nakapingpinget. Isut’ kanayon nga agsublisubli iti nadumaduma a pananglimlimo. Isut’ nagsubli ken Jesus babaen kadagiti relihiuso a klero iti dayta a panawen. Natarusan ni Jesus daytoy ket sibabatad nga imbagana kadakuada: “Kukuanakayo ti Diablo nga amayo.” Dadduma a tattao mabalin a serserbianda pay dagiti pangpanggep ni Satanas a dida mapupuotan. Naaramidan ni apostol Pedro daytoy idi a, nupay nasayaat ti panggepna binagbagaanna ni Jesus a kunkunana: “Apo, kaasiam ta bagim; uray kaanoman saan koma a maaramid kenka daytoy.” Kasapulan a bagbagaan ni Jesus a siinget ni Pedro: “Pumanawka iti sanguanak, Satanas! Sika ti pakaitibkolak.” (Juan 8:44; Mateo 16:22, 23) Umas-asping iti dayta, dagiti pangpanggep ni Satanas ti mabalin a di ginaggagara a serbian ti maysa nga amo, maysa a katrabahuan, kaeskuelaan, gayyem, kabagian, naganak, wenno uray pay ti asawa. Masapul nga agannadtayo a kankanayon ken ditay ipalubos ti aniaman a mangpakapuy iti pannakirelasiontayo ken Jehova.

⁹ Gapuna nasken nga “isuot ti naan-anay a kabal manipud iti Dios tapno mabalinyo ti agtalinaed a bumusor kadagiti pangallilaw ti Diablo; ta ti pannakidangadangtayo saan a maibusor iti lasag ken dara, no di ket . . . kadagiti espiritu ti kinadakes idiay langit.”​—Efeso 6:11, 12.

Ti Panangpetpet ti Basol iti Managbasol a Lasag

10. Aniat’ kaipapanan ti sao a “basol,” ket ania nga ar-aramid ti makaisina kadatayo manipud ayat ti Dios?

¹⁰ Ni Satanas kumabil idiay pagkapuyantayo. Gapuna pagbalbalinenna ti nainlasagan a pagannayasantayo iti basol a paborito a puntiriana. (Salmo 51:5) Ti sao a Griego a naipatarus a basol isu ti ha·mar·tiʹa. Ti berbo ket ha·mar·taʹno, a ti kangrunaan a kaipapananna ket “pannakaikapis iti marka.” (Roma 3:9, Ref. Bi., footnote) No ad-adda ti pannakaikapistayo iti marka ken pannakapaay a mangsalimetmet kadagiti bilbilin ti Dios, ad-adda met a maiyadayotayo manipud iti ayat ti Dios, ta “daytoy ti kaipapanan ti ayat ti Dios, a tungpalentayo koma dagiti bilbilinna.” (1 Juan 5:3) Ti pannakikamalala, ti pannakiabig, seksual a panangbalbalikog, panagbarbartek, ragragsak nga aglablabes, ti di mamedmedan a nainlasagan a kinaderrep, panagim-imon, panagpungpungtot, dagiti materialistiko a panagapal​—amin dagita a bambanag ti mangisina kadatayo manipud ayat ti Dios, ket “dagiti agaramid [kadagitoy] saandanto a tawiden ti pagarian ti Dios.”​—Galacia 5:19-21.

11. Kasano a ti basol mabalinnatay nga in-inoten a kemmegen, nga iti agangay anianto ti resultana?

¹¹ Dagiti pelikula, liblibro, pabuya iti entablado, programa iti TV​—a natatek kadagiti materialistiko, siak ti umuna, naipamaysa iti sekso a komersial​—iyadelantarda ti panangsurot kadagiti di mamedmedmedan ken awan panagbabainna a ragragsak. Ti umuna a basol pagbalinenna a nalaklakan ti maikadua, ti maikatlo ken ti maikapat a sumaruno, ket di agbayag ti pannakaitappuak iti kinanailubongan nakaparpartakton. Iti kamaudiananna, dagidiay “managayat kadagiti ragragsak a nangnangruna ngem ti panagayatda iti Dios agbalindanton nga okupado nga agsagana a maipaay iti linalasag tapno matungpal ti derrepda.” (2 Timoteo 3:4; Roma 13:14) Agpadpada a ti nataengan ken agtutubo ket maitappuak iti ngiwat ti basol, ket dagiti konsiensiada nabibinegton a naan-anay. “Nga idinto a napukaw ti amin a riknada, inyawatda ti bagida iti kinaderrep tapno aramidenda a siaagum ti amin a kinarugit.”​—Efeso 4:19; 1 Timoteo 4:2.

12. Ania dagiti kasuratan a mangipakpakita ti pannakabalin ti basol kadatayo, ket kasano a nagladingitan ni Pablo daytoy?

¹² Dagidiay determinado a di paisina manipud ayat ti Dios masapul a sarikedkedanda ti bagbagida a maibusor iti panangpetpet ti basol iti managbasol a lasag. Dayta ti nagpigsa a kabusor, kas maulit-ulit a panangipagpaganetget ti Biblia: “Amin nga agaramid ti basol ket tagabo ti basol,” “amin [addada] iti babaen ti basol,” “ta isuda amin nagbasolda,” “saan koma ngarud nga agari ti basol iti bagitayo,” “iti pangidatonanyo a siaannugot kadagiti bagbagiyo met laeng isu dayta ti mangadipen kadakayo,” “dagiti supapak ti basol isu ni patay,” ken amin “impupokna iti babaen ti basol.” (Juan 8:34; Roma 3:9, 23; 6:12, 16, 23; Galacia 3:22) Ni Pablo ti “nalako iti biang ti basol,” a “sikakayaw iti linteg ti basol,” nga isu nangtignay kenkuana a nagkuna a silaladingit: “Ti naimbag a panggepek diak aramiden, ngem ti dakes a diak panggepen isu ketdi ti ar-aramidek.” (Roma 7:14, 19, 23) Gapuna inyikkisna: “O nakaay-ay-ayak a tao! Siasino ti mangluk-atto kaniak itoy bagi ni patay?” Kalpasanna immay ti nakaragragsak a sungbat: “Agyamanak iti Dios gapu ken Jesu-Kristo nga Apotayo!”​—Roma 7:24, 25.

13, 14. (a) Babaen iti ania a pamay-an a mawayawayaantayo manipud iti basol? (b) Kasanotay ti agtalinaed iti ayat ni Kristo?

¹³ Agingga nga immay ni Kristo Jesus, “ti basol nagari a kadua ti ipapatay.” (Roma 5:14, 17, 21) Ngem babaen iti ipapatay ken panagungar ni Jesus, ni ari a basol ti naikkat manipud iti trono kadagidiay a nangabrasa iti naayat a sagut ti Dios nga Anakna. Insalakannatayo manipud kadagiti basbasoltayo, inugasanna ida, dinalusannatayo manipud kadakuada, ket winayawayaannatayo manipud kadakuada, ket dayta ti naan-anay a pinunasna manipud kadatayo. (Mateo 1:21; Aramid 3:19; 22:16; 2 Pedro 1:9; 1 Juan 1:7; Apocalipsis 1:5) Gapuna saan laeng a ni apostol Pablo no di ket amin dagidiay namati iti naiparukpok a dara ni Kristo Jesus ti rebbeng nga agyaman iti Dios babaen ken Jesu-Kristo nga Apotayo iti panangilukatda iti dalan a maipaay iti pannakawayawaya manipud iti nakaay-ay-ay a nainlasagan a pannakakayaw iti basol ken ipapatay.

¹⁴ Gapuna inkapilitan a saan laeng a liklikan ti aniaman a pannakaisina manipud ayat ti Dios no di ket agtalinaed met iti ayat ni Kristo. Ti pormula a maipaay iti panagtalinaed a nasinged ken Jesus isu met laeng kas met iti iyaasideg iti Dios. Intudo ni Jesus daytoy, a kunkunana: “Kas iti panagayat ti Ama kaniak, kasta met ti panagayatko kadakayo, agtaengkay iti ayatko. No tungpalenyo dagiti bilbilinko, agtaengkayto iti ayatko, kas met iti panagtungpalko kadagiti bilbilin ni Amak ken nagtaengak iti ayatna.”​—Juan 15:9, 10.

Ti Peggad iti Pannakaiyayus

15. Iti ania ti pagkapuyantayo, ket aniat’ masapul nga aramidentayo tapno malisian ti peggad?

¹⁵ Dikay koma pukpukawen daytoy a pannakawayawaya manipud panangadipen ti basol ken ipapatay babaen iti pannakailigsay nga agsanud wenno pannakaiyayus. Daytat’ mapasamak nga agin-inot a mabalin ditay mapupuotan. Kas kunaen ti Galacia 6:1. “Kakabsat, numan pay ti maysa a tao masukalan iti uray ania a panagsalungasing sakbay a mapuotanna dakayo nga addaan ti naespirituan a kualipikasion bagbagaanyo dayta babaen iti espiritu ti kinatakneng, a kitaenyo ti bagiyo met laeng, di la ket ta masulisogkayo.” Uray pay no ti maysa balbalakadanna ti sabali, masapul a ‘kitaenna ti bagina met laeng.’ Datay amin ti nakapuy wenno nalaka a maraut! “Gapuna rebbengtayo a regtaan nga imatangan dagiti bambanag a nangngegtayo, di la ket ta maiyayustayo a maiyadayo kadakuada.”​—Hebreo 2:1.

16, 17. Aniat’ mangiyilustrar ti peggad iti pannakaiyayus iti naespirituan, ket aniat’ rebbeng nga aramidentayo tapno malisian dayta?

¹⁶ Ti pannakaiyayus ket awan rigrigatna. Gapuna dayta ti nakalaklaka​—ken nakapegpeggad unay, iti naespirituan a panagsao. Mabalin a makitayonto ti bagbagiyo a maisinsinan manipud ayat iti Dios sakbay a madlawda dayta. Kaiyariganna ti maysa a karnero a maiyaw-awan. Kasanot’ pannakaiyaw-awanna? Ilawlawag ti maysa a pastor: ‘Ar-araben dayta ti pannakapukawna met laeng. Dayta ti makakita ti bassit a nalangto a ruot iti sumagmamano a pie iti sibayna, agturong iti dayta tapno arabenna. Daytanto manen ti makakita iti sabali a lugar ti ruot sangapulo a pie iti kaadayona ket mapanto manen sadiay nga agarab. Ti maikatlo a lugar makaaw-awis ti buyana, ket ti karnero mapan sadiay nga agarab iti dayta. Di agbayag dayta adayonton manipud iti arban. Isut’ nagarab iti pannakapukawna met laeng.’

¹⁷ Kasta met kadagidiay maiyayus iti naespirituan. Mabalin a daytat’ mangrugi a di madmadlaw unay babaen iti sumagmamano a namaterialan a bambanag, wenno nailubongan a pannakikuykuyog, wenno panangpugpogto kadagiti sumagmamano a kasuratan. Ngem saggabassit dagiti kakasta maiyad-adayodan nga umadayo nga umadayo manipud arban ti Dios, ket di agbayag naisinadanton ti bagbagida manipud iti kongregasion ken manipud iti ayat ti Dios. Saanda nga impangag ti panangiyunay-unay ni Pablo: “Sukimatenyo dagiti bagbagiyo met laeng no addakayo iti pammati, suotenyo dagiti bagbagiyo met laeng.”​—2 Corinto 13:5.

18, 19. Kasanotayo a pagtalawen ti Diablo kadatayo, ken kasanotay ti umadani iti Dios?

¹⁸ “Makibakalkayo iti Diablo,” naibaga kadatayo, “ket isu agtalawto kadakayo.” Babaen iti silalaing a panangusar “iti kampilan ti espiritu, nga isu, ti sao ti Dios,” mabalin a mapagsanudtayo dagiti nasikap nga iraraut ni Satanas. Kastat’ namay-an ni Jesus idiay let-ang tapno pumanaw ni Satanas. Naibaga met kadatayo: “Umadanikayo iti Dios, ket isu umasidegto kadakayo.” (Santiago 4:7, 8; Efeso 6:17) Kas kadagiti mannurat ti Salmo, rebbengna nga umadanitayo iti Dios babaen iti ikakapettayo a naimbag iti saona: “Ti pammaneknek ni Jehova manamnama, pagsiribenna ti nanengneng.” “Utobekto dagiti pammaneknekmo. Ti Saom pagsilawan kadagiti saksakak, ket silaw iti danak. . . . Diak simiasi kadagiti pammaneknekmo.”​—Salmo 19:7; 119:95, 105, 157.

¹⁹ Babaen iti kararag, babaen iti panagadal iti Sao ti Dios, babaen ti panangayattayo kadagiti kakabsat ken pannakigimong a regular a kaduada, babaen ti panangibagbaga kadagiti dadduma ti maipapan iti Pagarian ti Dios​—kadagitoy amin a pamay-an mabalintayo ti umadani iti Dios ken iti ayatna kas imparangarang ni Kristo Jesus nga Apotayo.​—1 Tesalonica 5:17; Roma 12:2; Hebreo 10:24, 25; Lucas 9:2.

20. Ania a determinasion ti inwaragawag ni Pablo a pinagbalin ita dagiti Saksi ni Jehova a kabukbukodanda?

²⁰ Iti nalawa ken napigsa a panangiwaragawag, inyebkas ni Pablo ti determinasion dagiti amin a matalek a saksi ni Jehova ditoy daga itatta, a kunkunana: “Ta diak duaduaen nga uray ni patay wenno uray ti biag wenno uray dagiti anghel wenno uray dagiti pagturayan wenno uray dagiti bambanag nga agdama wenno uray dagiti bambanag nga umayto wenno uray ti pannakabalin wenno uray ti nangato wenno uray ti nababa wenno uray ti aniaman a sabsabali a parsua didatay mabalinto nga isina iti ayat ti Dios nga adda [a naaramid a makita, JB] ken Kristo Jesus nga Apotayo.”​—Roma 8:38, 39.

[Dagiti Footnote]

Malagipyo Pay Aya?

◻ Kasano a naipakita ti ayat ni Jehova kadagiti saganana a maipaay iti biag?

◻ Tapno maisina dagiti Saksi ni Jehova manipud iti ayat ti Dios, ania dagiti pamay-an a pinadasen ni Satanas?

◻ Ania dagiti kasuratan a mangipakpakita iti panangpetpet ti basol kadatayo, ken kasano a dadaelen daytoy?

◻ Apay a ti pannakaiyayus napeggad unay, ken kasano a maparmek dayta?

[Ladawan iti panid 13]

Ti karnero ti saggabassit a maisina agingga a daytat’ napukawen