Roma 12:2—“Pabaroenyo a Naan-anay ti Panunotyo”

“Isardengyon ti agpaimpluensia iti daytoy a sistema ti bambanag, no di ket pabaruenyo ti kinataoyo babaen ti panangbalbaliwyo iti panunotyo, tapno mapaneknekanyo iti bagiyo ti nasayaat, makaay-ayo, ken perpekto a pagayatan ti Dios.”—Roma 12:2, Baro a Lubong a Patarus.

“Saanyo a tultuladen dagiti ugali iti daytoy a lubong ngem palubosanyo a baliwannakayo ti Dios ket pabaroenyo a naan-anay ti panunotyo. Ket maammoanyonto ti pagayatan ti Dios—no ania ti naimbag, makaay-ayo kenkuana ken awan pagkuranganna.”—Roma 12:2, Ti Baro a Naimbag a Damag Biblia.

Kaipapanan ti Roma 12:2

Tapno maparagsak ti Dios, masapul a liklikan dagiti dakes nga impluensia ken masapul a balbaliwan dagiti dakes nga ugali. Saan a pilpiliten ti Dios nga agbalbaliw dagiti tattao; aramidenda dayta gapu ta ay-ayatenda ti Dios ken maawatanda a dagiti bilinna ket naasi, nainkalintegan, ken pagsayaatanda.—Isaias 48:17.

“Isardengyon ti agpaimpluensia iti daytoy a sistema ti bambanag.” Ti tuktukoyen ti “sistema ti bambanag,” ket dagiti tattao iti lubong, agraman dagiti paglintegan, ar-aramid, ken kababalinda a maikontra kadagiti prinsipio wenno pampanunot ti Dios. (1 Juan 2:15-17) Dayta ti agtultuloy a mangimpluensia iti ugali ken personalidad dagiti tattao. Tapno awaten ti Dios ti panagdaydayawtayo, masapul a labanantayo ti impluensia ti lubong, ta no saan tumubo kadatayo dagiti dakes nga ugali a pagdaksantayo ken saan a kayat ti Dios.—Efeso 2:1-3; 4:17-19.

“Pabaruenyo ti kinataoyo babaen ti panangbalbaliwyo iti panunotyo.” Masapul nga ikagumaan ti maysa a tao a balbaliwan ti kababalin ken panagpampanunotna. Dakkel dayta a panagbalbaliw kas ipakita ti Griego a sao a naipatarus a “pabaruenyo,” kas iti panagbalbaliw ti maysa nga igges nga agbalin a kulibangbang. Masapul nga isuot dagiti agdaydayaw iti Dios ti “baro a personalidad.”—Efeso 4:23, 24; Colosas 3:9, 10.

‘Paneknekanyo iti bagiyo ti nasayaat, makaay-ayo, ken perpekto a pagayatan ti Dios.’ Kayat ti Dios a talaga a kombinsido dagiti agdaydayaw kenkuana iti patpatienda. Maaramidda dayta no adalenda ti Sao ti Dios, aramidenda dagiti naadalda, ken no makitada dagiti pagsayaatan ti panangsurot kadagiti bilin ti Dios. Iti kasta, mapaneknekanda a ti panangsurot iti pagayatan ti Dios ti kasayaatan.—Salmo 34:8.

Konteksto ti Roma 12:2

Ilawlawag ti Roma kapitulo 12 no ania dagiti masapul nga aramiden tapno awaten ti Dios ti panagdayawtayo. Dayta a panagdaydayaw apektaranna ti amin nga aspeto ti biag ken masapul nga usaren ti maysa a tao ti ‘abilidadna nga agpanunot’ imbes a sumursurot lattan wenno gapu ta dayta ti idiktar ti riknana. (Roma 12:1, 3) Naglaon daytoy a kapitulo kadagiti nagsayaat a pammagbaga no kasano nga ipakita dagiti nadiosan a kababalin, no kasano a tratuen ti dadduma, ken no ania ti aramidem no saan a nasayaat ti pannakatratom.—Roma 12:9-21.