Kasanotay nga Awaten nga Awan-agumna ti Ayat ti Dios?
“No kasta unay ti pinagayat ti Dios kadatayo, rebbengtay met ti agayan-ayat.” —1 JUAN 4:11.
1, 2. Aniat’ kasapulan tapno awatentay nga awan-agumna dagiti pannakaipamatmat ti ayat ti Dios?
NI Jehova ti personipikasion unay ti ayat. Wen, iti napalabas nga artikulo, nakitatayo no kasano ti kina-aglaplapusanan dagiti aktual a pannakaiparangarang ti ayatna. Naammuantayo met no kasano a da Moises, David, ken ni Jesu-Kristo inawatda nga awan-agumna dagidiay a demostrasion ti ayat. Di aya rebbeng met a tarigagayan ti tunggal Saksi ni Jehova nga aramiden ti kasta? Talaga!
2 Aniat’ kasapulan no kayattay nga awaten nga awan-agumna dagiti ebkas ti ayat ti Dios? Ti maysa ket, masapul nga isut’ ipangrunatayo iti biagtayo, nga isut’ ayaten iti amin a puso, kararua, isip, ken pigsatayo. (Marcos 12:29, 30) Kayat a sawen dayta ti pannakitunos iti Dios, nga addaan ti nabara a personal a pannakirelasion ken Jehova. Tarigagayantayo aya ti makisasao iti nailangitan nga Amatayo iti kararag? Agkarkararagtayo aya a di agressat ken managtalinaed iti karkararag? Wenno ap-apuraentay laeng dagiti karkararagtayo, a no maminsan okupadotay unay nga agkararag? (Roma 12:12; 1 Tesalonica 5:17) Iturturongtay ayat’ atensiontayo ken Jehova, nga isut’ ipapaayan ken ti organisasionna iti dayaw kadagiti nagapuanantayo? (1 Corinto 3:7; 4:7) Wen, mariknatay aya kas iti panagrikna ti salmista? Maipapan iti Dios, kinunana: “Mamimpito iti inaldaw nga idaydayawka.”—Salmo 119:164.
3. No agtataripnongtayo a sosial, kasanotay a maipakita nga aw-awatentayo nga awan-agumna ti ayat ti Dios?
3 No aw-awatentay man wenno saan nga awan-agumna ti ayat ti Dios ket maipanayag no agtitipontayo a maipaay iti good time. Dagiti aya panagpapatangtayo ket maipaay kadagiti nailubongan a bambanag wenno kadagiti naespirituan? Saanna met ketdi kayat a sawen a kanayontay lattan a maaddaan ti serioso a panagadal ti Biblia tunggal makitimpuyogtayo kadagiti pada a Kristiano. Ngem sigurado a makasapultay met kadagiti makapainteres a banag a naespirituan nga iraman iti panagpapatangtayo. Ti ngay panangisalaysay kadagiti kapadasan iti tay-ak, panangsalaysay iti paboritotay a teksto ti Biblia, ti panangistoria no kasano a naammuantay ti kinapudno, wenno panangisitar kadagiti ebidensia ti kinamanagayat ti Dios ken ti bembendisionna?
4. Kasanot’ rebbeng a panangmatmattayo kadagiti bambanag no napaaytayo maipapan iti maysa a pribilehio ti serbisio?
4 Sabali pay a sirkumstansia a mabalin makaipanayag ti rukod ti panangipategtayo iti ayat ti Dios ket no nalabsantayo a maipaayan iti dadduma a pribilehio ti serbisio iti organisasion ni Jehova. Kasanot’ panagriknatayo? No maseknantayo nangnangruna iti panangidayaw ken Jehova, umanamongtayo a maidayawto met laeng ti pagayatan ti Dios babaen iti asinoman a naaddaan iti dayta a partikular a pribilehio ti serbisio. (Idiligyo ti Lucas 9:48.) Ngem no sobra a maseknantay ti kabukodantayo a bentaha wenno nagan, lumdaangtayto no datayo ti nalabsan, kas iti ipagaruptayo. Rebbengtay a laglagipen nga inayatnatayo ni Jehova ken mabalin nga ammona pay ketdi nga iti agdama saantayo pay a maibaklay ti dagsen ti maysa a nateokratikuan a responsabilidad. Mabalin a bembendisionannatayo a sibabaknang iti dadduma a pamay-an, ket dagita a panangiparangarang ti ayatna rebbeng a tulongannatayo a mangsalimetmet iti naespirituan a kinatimbengtayo.—Proverbio 10:22.
Panagayat ti Kinalinteg, Pananggura ti Kinadakes
5. Dagiti pannakaipamatmat ti ayat ti Dios rebbeng a maaddaandat’ ania nga epekto iti kababalintayo?
5 Dagiti pannakaipamatmat ti ayat ti Dios kadatayo rebbeng a gutugotennatayo a mangtulad ken Kristo iti panagayat ti kinalinteg ken pananggura ti kinadakes. (Hebreo 1:9) Pudno, ditay maaramid daytoy a naan-anay, kas iti panangaramid ni Jesus. Kaskasdi, mabalintay a pagbalinen a kalattayo ti agbalin a nasantuan, nasingpet, ken managtungpal-linteg inggat’ kabaelan ti imperpekto a kasasaadtayo. Tapno maaramidan daytoy, saantay laeng koma a parang-ayen ti panagayat ti kinalinteg ken naimbag a bambanag no di ket sukayentay met koma ti pananggura, panagsimron, pannakarimon, iti dakes. Kas panangiyebkas ni apostol Pablo iti dayta: “Guraenyo ti dakes, salimetmetanyo ti naimbag.” (Roma 12:9) Ti ‘guraen’ ket nadagsen unay a sao, a kayatna a sawen “panangibilang a buyogen ti nakaro a panagsimron.”—Webster’s New Collegiate Dictionary.
6. Aniat’ makatulong kadatayo nga agannad maibusor kadagiti pannulisog nga ipasango kadatayo ti lubong, ti managbasol a lasagtayo, ken ti Diablo?
6 Aniat’ makatulong kadatayo a makapagannad kontra kadagiti maipasango kadatayo a sulisog babaen iti lubong, ti mismo a managbasol a lasagtayo, ken ti Diablo? Ti kinasungdo ken Jehova a Dios. Isut’ agapelar kadatayo: “Anakko, agsiribka, ket paragsakem toy pusok, tapno masungbatak ti mangumsi kaniak.” (Proverbio 27:11) Wen, ti kinasungdo ken Jehova tignayennatayo a mangala ti nainsiriban a kurso a manggura iti kagurana. Mainayon pay, uray no kasano ti kasla karagsak wenno kinaay-ayo ti panangsalungasing iti maysa kadagiti linlinteg ti Dios, masapul nga ibagatayo a kanayon iti bagitayo a ti panangaramid ti kasta ket saan a maikari iti dayta. (Galacia 6:7, 8) Ti puso ti tao ket nasikap, nasuitik, manangallilaw, kas naipalagip kadatayo idiay Jeremias 17:9. Ti Nakristianuan a puso kaay-ayona dagiti naimbag, napipintas, nadalus a bambanag. Ngem no maminsan ti kinamanagbasol iturongna dayta nga agtarigagay met iti dakes. Kas iti puspuso dagiti Israelita a nagdaydayaw ken Jehova ngem kaskasdi a sinalimetmetanda dagiti idolatroso a “nangato a disso,” kasta met a dagiti mismo a pusotayo mabalin a naimut ken nasikapda. (1 Ar-ari 22:43; Deuteronomio 12:2) Mabalin a ti imperpekto a pusotayo padasennat’ sumapul ti pampambar tapno iyegnatayo iti dalan ti pannakasulisog. Mabalin a pabpabassitenna ti kinaserioso ti kinadakes a pakasulsulisogantayo. Wenno mabalin a ti pusotayo kumbinsirennatayo nga aniaman a dusa ket temporario laeng.
7. Apay nga agannadtayo maibusor iti panagtarigagay iti dakes?
7 Gaput’ panangipateg iti ayat ti Dios, masapul nga agannadtay met iti panangtarigagay iti dakes, kas ti panagannayas iti seksual nga imoralidad, agwaywayastay man wenno naasawaanen. Kadarato, daydiay nangrugi a kasla awan dakdakesna a panagalembong ket nagturong iti panagbalin dagiti dua a Kristiano a naisinggalut ti emosionda iti maysa ken maysa ket naiyugalida ti panagbasol ket nailaksidda. Uray pay dagiti panglakayen, a rebbeng nga awan komat’ pakapilawanda nga ulidan iti arban, nadadaelda gapu kadagitoy a bambanag!—Idiligyo ti 1 Ar-ari 15:4, 5.
8. Ania a pammakdaar nga ulidan ti inted ni apostol Pablo kadatayo, ken kasano a maiyilustrar ti kasta a problema?
8 Usigenyo ni apostol Pablo, a nabendisionan kadagiti supernatural a sirmata ken pannakabalin ken addaan sagut ti nasantuan a pannakapaltiing. Tapno agballigi iti pannakidangadangna kadagiti pagannayasan ti basol, masapul a gubatenna—wen, parigatenna ti husto—ti bagina. Situturedtay aya a makontento lattan iti bassit laeng nga ar-aramidentayo? (Roma 7:15-25; 1 Corinto 9:27) Kaiyarigan nga addatayo iti bassit a bilog nga adda iti nakapegpegges panagayusna a karayan ket maguyguyod nga agturongen iti dissuorna. Tapno maiyadayo iti didigra, masapul a gumaudtay a sipipigsa a maikontra iti agus. Mabalin a kasla saantay a rumangrang-ay unay, ngem la ketdi no pagregreggetantayo a sipipigsa, saantayto a matnag iti dissuor nga agturong iti pakadadaelantayo. Pudno unay, dagiti pannakaiparangarang ti ayat ni Jehova a Dios kadatayo rebbeng a tignayennatayo nga agregget a sipipigsa nga agbalin a nasungdo kenkuana babaen iti pananggura ti kinadakes ken panangayat ti kinalinteg.
Ipamatmat ti Ayat a Nainkakabsatan
9. Ania a balakad ti inted ni apostol Juan maipapan iti panangayat kadagiti kakabsattayo?
9 Dagiti pannakaipamatmat iti ayat ti Dios rebbeng a gutugotennatayo a mangayat kadagiti kakabsattayo kas iti panagayat ni Jesu-Kristo kadagiti adalanna. (Juan 13:1) Maiyanatup unay, kuna ni apostol Juan: “Ket daytoy ti ayat, saan a gapu ta ayatentayo ti Dios, no di ket gapu ta isu inayatnatayo ket imbaonna ti Anakna a daton a subbot kadagiti basbasoltayo. Ay-ayaten, no kasta unay ti pinagayat ti Dios kadatayo, rebbengtay met ti agayan-ayat.” (1 Juan 4:10, 11) Kinapudnona, kuna ni Jesus a ti pakailasinan dagiti pudno a paspasurotna ket babaen iti ayatda iti maysa ken maysa.—Juan 13:34, 35.
10, 11. Aniat’ sumagmamano a wagas a mabalin a maidemostratay ti ayat a nainkakabsatan?
10 Ammotayo a rebbeng a mangipakita dagiti Kristiano ti ayat a nainkakabsatan. Ngem saan a dakes a palagipantay ti bagbagitayo kadagiti nadumaduma a pamay-an a mabalintay a panangipakita iti daytoy kas ken Kristo a panagayat iti maysa ken maysa. Ti kasta nga ayat tulongannatayo a manglipat kadagiti pagdudumaan no maipapan iti rasa, nasionalidad, edukasion, kultura, ken kasasaad ti panagbiag. Mainayon pay, ti ayat a nainkakabsatan tignayennatayo nga aggigimong. No pudno nga inayattay dagiti kakabsattayo, saantay a palubosan ti dakes a panniempo wenno bassit laeng a pisikal a kinakapuy a mangipaidam kadatayo iti rag-o ti pannakilangenlangen kadakuada ken makiraman iti panagpipinnaregta. (Roma 1:11, 12) Mainayon iti dayta, ti ayat a nainkakabsatan pagsaganaennatayo a naimbag kadagiti panaggigimongtayo ket makipaset a siaaktibo kadagitoy tapno makapagpipinnaregtatayo iti maysa ken maysa iti ayat ken naimbag nga ar-aramid.—Hebreo 10:23-25.
11 Ti met ngay panangtulong kadagiti kakabsattayo iti tay-ak ti ministerio? Mapalpaliiw a dagiti panglakayen ken ministerial nga ad-adipen masansan a makiramramanda iti ministerio a panagbalaybalay nga is-isudat’ agkakadua wenno agsolsoloda laeng idinto a mabalinanda, babaen iti bassit a panangiplano, ti mangawis kadagiti agibumbunannag ti Pagarian nga agkasapulan pay laeng ti tulong iti ministerio a kumuyog kadakuada. Ti panangipakita ti ayat iti daytoy a pamay-an pagbalinenna nga ad-adda a makagunggona ti serbisio iti tay-ak dagiti panglakayen ken ministerial nga ad-adipen. Ken ti met ngay panangikuyog ti kabbaro nga agibumbunannag iti maysa a panangyadal ti Biblia kadagiti pagtaengan?—Roma 15:1, 2.
12. Kasanotay a tarusan ti 1 Juan 3:16-18?
12 Ti ayat tignayennatayo met a bumadang kadagiti kakabsattayo a mabalin adda iti pudpudno a material a pagkasapulan. Insurat ni apostol Juan: “Itoy ti pakaammuantayo iti ayat agsipud ta isu intedna ti biagna a maipaay kadatayo; ket datayo rebbengtay met nga ited dagiti biagtayo a maipaay kadagiti kakabsattayo. Ngem dayta agikut kadagiti sanikua daytoy a lubong ket makitana ni kabsatna nga aglak-am iti pannakasapul ket punitanna kenkuana ti pusona, kasano ti panagnaed ti ayat ti Dios kenkuana? Annakko a dungdungnguen, saantay koma a pagayat ti sao ken saan met ti dila, no di ket buyogen ti aramid ken kinapudno.” (1 Juan 3:16-18) Mabalin a ditay ita makalikaguman a mangipaay kadagiti kararuatayo kadakuada, ngem no maminsan addaantay met kadagiti gundaway a mangiyebkas ti ayat kadakuada iti dadduma a pamay-an, saan laeng nga iti sao wenno iti dila no di ket kadagiti aramid. Awan dakdakes ti panagayattay kadagiti kakabsattayo babaen iti sao, ngem ditay kayat a limitaran ti ayattayo iti daytoy no isudat’ agkasapulan iti material. Ti sao ni Jesus a “naragragsak a banag ti mangted ngem ti umawat” agaplikar met iti panangted iti material a tulong.—Aramid 20:35.
13. (a) Aniat’ sumagmamano kadagiti pamunganayan a kinapudno a naadaltayo babaen iti tulong ti makitkita nga organisasion ni Jehova? (b) Ania a balido a punto ti inaramid ni Charles Taze Russell?
13 Addaantay ti gundaway a mangipakita ti ayattayo kadagiti kakabsat a mangidadaulo iti kongregasion wenno mainaig iti makitkita a sangalubongan nga organisasion ni Jehova. Ramanen daytoy ti panagbalin a nasungdo “iti matalek ken naannad nga adipen.” (Mateo 24:45-47) Sanguentay ti kinapudno a nupay kasanot’ kawadwad ti panagbasbasa ti Biblia a naaramidantayon, ditay koma naadal ti kinapudno a bukbukodtayo. Saantay koma a nadiskobre ti kinapudno maipapan ken Jehova, dagiti pangpanggep ken galadna, ti kaipapanan ken pateg ti naganna, ti Pagarian, ti subbot ni Jesus, ti nagdumaan ti organisasion ti Dios ken ti organisasion ni Satanas, wenno no apay a pinalubosan ti Dios ti kinadakes. Daytat’ kas ti insurat ti umuna a presidente ti Watch Tower Society, a ni Charles Taze Russell idi 1914: “Saantay aya a bendito, naragsak nga ili? Saan aya a matalek ti Diostayo? No adda asinoman a makaammo ti nasaysayaat pay, bay-anyo nga awatenna dayta. No adda asinoman kadakayo a makasarak ti aniaman a nasaysayaat pay, manginanamakami nga ibagayo met koma dayta kadakami. Awanen ammomi a nasaysayaat pay wenno uray kagudua laeng koma ti kinasayaatna kas ti nasarakanmin iti Sao ti Dios. . . . Awan dila wenno pluma a makaibaga ti talna, ti rag-o ken ti bendision nga inyeg ti nalawag a pannakaammo iti pudno a Dios iti puso ken iti biagtayo. Ti Estoria ti Kinasirib, Kinahustia, Pannakabalin ken Ayat ti Dios pennekenna a naan-anay ti tartarigagay agpadpada ti ulo ken pusotayo. Itultuloytay pay ti agsapul. Awanen ti ad-adda pay a matarigagayan ngem ti pannakaawat a nalawlawag pay iti daytoy nakaskasdaaw nga Estoria kadagiti is-isiptayo.” (The Watch Tower, Disiembre 15, 1914, pinanid 377-8) Anian ti kinapudno dagidiay nasayaat-pannakaisuratna a sasao!
Panagserbi Kadagidiay Adda iti Ruar
14. Dagiti ebkas ti ayat ti Dios rebbeng a tignayendatayo nga agaramid iti ania kadagidiay adda iti ruar?
14 Dagiti ebkas ti ayat ti Dios a tinagiragsaktayo rebbeng a gutugotendatayo a mangipakita iti ayat ti kaarruba kadagidiay adda iti ruar ti kongregasion. Kasanotay nga aramiden daytoy? Dagiti sirkumstansia ipamatmatna a mabalintay a tulongan dagiti kaarrubatayo iti namaterialan a pamay-an. Ngem, ti napatpateg pay, maipakitatayo ti ayat iti kaarruba babaen iti panangiyeg kadagiti dadduma ti naimbag a damag ti Pagarian ti Dios ken panangtulong kadagiti managayat ti kinalinteg nga agbalin nga ad-adalan ni Jesu-Kristo. Makiramramantayo aya a regular iti daytoy a ministerio ti publiko, wenno liwliwayantay dayta? Nagbalin kadin a gagangay laengen dayta wenno maysa laeng a pabuya a porma ti serbisio? Wenno pudno a gutugotennatayo ti ayat iti kaarruba? Mangipampamatmattay aya ti empatia? Naanustayo aya, nga ur-urayentayo nga agtignay dagiti tattao? Parparegtaentay aya dagiti bumalay a mangiyebkas ti bagida? Wen, imbes nga ar-aramidentay amin ti panagsasao, palubosantay ti ayat iti kaarruba a mangtignay kadatayo a dumngeg ken maaddaan ti makagunggona a pannakisarsarita iti Biblia kadagiti tattao a masarakantayo iti ministeriotayo.
15. (a) Apay a ti “di pormal a panangasaba” nasaysayaat a termino ngem ti “di inggagara a panangasaba”? (b) Apay nga aprobetsaren dagiti gundaway a mangaskasaba a di pormal?
15 Alertotayo aya a kas iti rebbengtay koma a mangaprobetsar kadagiti gundaway a mangaskasaba a di pormal? Panunoten koma a daytoy ket saan laeng a di inggagara a panangasaba, a mangisingsingasing ti trabaho a di naiplano wenno bassit pategna. Ti di pormal a panangasaba napateg unay, ket ti ayat iti pada a tao tignayennatayo a mangaramid kadagiti gundaway tapno makiraman iti dayta. Anian a masansan a nagbunga ti kasta a panangasaba! Kas pangarigan, bayat a tumabtabuno ti kumbension dagiti Saksi ni Jehova idiay umamianan nga Italia, maysa a kabsat a lalaki ti napan iti maysa a talier tapno pasukatanna ti silaw ti kotsena. Bayat nga agur-uray, isut’ nangaskasaba kadagidiay adda iti aglawlawna ket inikkanna ida ti imbitasion para iti palawag publiko manipud Biblia iti Domingo. Iti maysa nga internasional a kumbension idiay Roma makatawen kalpasanna, maysa a kabsat a lalaki a saanna a nailasin ti nangkablaaw a sibabara kenkuana. Asino daytoy a kabsat? Ay ket, isut’ maysa kadagidiay nangtedanna ti imbitasion idiay talier maysa a tawen sakbayna! Daydiay a lalaki napan dimngeg iti palawag publiko ket intednat’ naganna a maipaay iti panagadal ti Biblia. Itan isu ken ni baketna dedikadodan a Saksi ni Jehova. Awan duadua a ti di pormal a panangasaba ket mabalin a makagunggona unay!
Itultuloyyo nga Awaten ti Ayat ti Dios
16. Ania a salsaludsod ti nasayaat nga isaludsodtay iti bagitayo?
16 Pudno a ni Jehova aglaplapusanan iti panangiparangarangna ti ayatna kadagiti parsuana. Kas naammuantayon, ti Kasuratan ipaayannatayo ti nasasayaat nga ulidan dagidiay nangawat nga awan-agumna kadagiti pannakaiparangarang ti ayat ti Dios. Maiyanatup unay, indir-i ti napaltiingan a salmista: “O dagiti tattao idaydayawda koma ni Jehova gapu iti kinamanagayatna ken gapu kadagiti nakaskasdaaw nga ar-aramidna kadagiti annak dagiti tattao!” (Salmo 107:8, 15, 21, 31) Situtured aya nga awatentayo ti di kaikarian a kinamanangaasi ti Dios ket santo sayangen ti panggepna? Di koma mapasamak dayta! (2 Corinto 6:1) Gapuna bay-an a tunggal maysa kadatayo saludsodanna a mismo ti bagina: ‘Talaga aya nga ipatpategko dagiti ebkas ti ayat ti Dios a tinagiragsakkon ken simamatalek a manginanama nga ad-adda pay a tagiragsakek iti masanguanan? Tigtignayendak aya a mangayat ken Jehova iti amin a pusok, kararuak, isipko, ken pigsak? Pudno aya a makituntunosak iti Dios? Ay-ayatek aya ti kinalinteg ken gurguraek ti kinadakes? Mangipakpakitaak aya ti ayat a nainkakabsatan? Ken kasano ti kinasingedko a mangpadpadas a magna kadagiti addang ni Jesus no maipapan iti ministeriok?’
17. Aniat’ ibungana no awatentayo nga awan-agumna dagiti panangipamatmat ni Jehova a Dios ti ayatna?
17 Pudno, nakaad-adu dagiti pamay-an a panangipakita ti napasnek a panagyamantayo kadagiti amin a pannakaiparangarang ti ayat ti Dios a linak-amtayon. Babaen ti panangaprobetsar a naan-anay kadagiti gundaway a mangipamatmat ti kasta a panangipateg, maparagsaktayo ti puso ti nailangitan nga Amatayo, agbalintay a bendision kadagiti dadduma, ken umawattay ti rag-o, kinatalna, ken pannakapnek iti bagbagitayo. Sapay koma ta itultuloytayo nga awaten nga awan-agumna dagiti pannakaiparangarang ti ayat ti Dios.
Kasanot’ Panangsungbatyo?
◻ Aniat’ kasapulan tapno maawat nga awan-agumna ti ayat ti Dios?
◻ Kasanotay a maannadan dagiti pannulisog?
◻ Aniada dagiti sumagmamano a wagas a panangipakita ti ayat a nainkakabsatan?
◻ Dagiti pannakaipamatmat ti ayat ni Jehova rebbeng a tignayendatayo nga agaramid iti ania kadagiti kaarrubatayo?
[Ladawan iti panid 17]
Masapul a makidangadangtayo a maibusor kadagiti pagannayasan nga agbasol tapno malisian ti didigra
[Ladawan iti panid 18]
Ipakpakita dagiti panglakayen ti ayat a nainkakabsatan babaen ti panangkuyogda kadagiti dadduma iti ministerio ti Pagarian
[Ladawan iti panid 19]
Ni Charles Taze Russell, ti umuna a presidente ti Watch Tower Society, intampokna ti talna, rag-o, ken bendision a ti Dios laeng ti makaipaay