LEKSION 49
Kasano nga Agbalin a Naragsak ti Pamiliam?—Paset 1
Namnamaen dagiti baro nga agassawa a mariknada iti agnanayon ti ragsak a nariknada idi nagkasarda. Posible dayta. Napaneknekan dayta dagiti nabayagen nga agassawa a Kristiano a mangikagkagumaan a mangyaplikar kadagiti balakad ti Biblia.
1. Ania ti balakad ti Biblia para kadagiti assawa a lallaki?
Inted ni Jehova iti asawa a lalaki ti responsabilidad a mangidaulo iti pamiliana. (Basaen ti Efeso 5:23.) Kayat ni Jehova a pagimbagan koma ti pamiliana dagiti desisionna. Ibagbaga ti Biblia kadagiti assawa a lallaki: ‘Itultuloyyo nga ayaten ni baketyo.’ (Efeso 5:25) Ania ti kayat a sawen dayta? Nasayaat koma ti panangtrato ti naayat nga asawa a lalaki ken baketna, adda man makakitkita wenno awan. Protektaranna koma ken aramidenna ti amin a kabaelanna a mangipaay iti pisikal ken emosional a kasapulan ni baketna. (1 Timoteo 5:8) Kapatgan iti amin, tulonganna nga agbalin a nadekket ken Jehova. (Mateo 4:4) Kas pagarigan, mabalinda ti agkadua nga agkararag ken agbasa iti Biblia. No naayat ti panangtrato ti asawa a lalaki ken baketna, agtultuloy ti nasayaat a pannakigayyemna ken Jehova.—Basaen ti 1 Pedro 3:7.
2. Ania ti balakad ti Biblia para kadagiti assawa a babbai?
Ibagbaga ti Sao ti Dios a “masapul nga adda nauneg a respeto ti babai iti asawana a lalaki.” (Efeso 5:33) Kasanona a maaramid dayta? Panunotenna dagiti nagsasayaat a kualidad ni lakayna ken ti panagreggetna a mangipaay iti kasapulanna ken dagiti annakda. Maipakitana met ti respetona no suportaranna dagiti desision ni lakayna, nasingpet ti pannakisaritana kenkuana, ken nasayaat ti iyes-estoriana maipapan kenkuana, uray no saan nga agdaydayaw ken Jehova.
3. Kasano a mapalagda ti agassawa ti relasionda?
Ibaga ti Biblia maipapan iti agassawa: “Ti dua agbalinto a maymaysa a lasag.” (Mateo 19:5) Kayatna a sawen a masapul a liklikanda ti aniaman a posible a mangpabaaw iti ayatda iti maysa ken maysa. Maaramidda dayta no kanayonda nga agkadua ken no napudno ken naayat ti panangyebkasda iti pampanunoten ken rikriknada iti maysa ken maysa. Malaksid ken Jehova, awan koma ti aniaman wenno asinoman a napatpateg kadakuada ngem ti asawada. Masapul nga agannadda tapno saanda nga agbalin a nadekket unay iti saanda nga asawa.
AMMUEM TI AD-ADU PAY
Kitaem dagiti prinsipio ti Biblia a makatulong tapno lumagda ti relasionyo nga agassawa.
4. Assawa a lallaki—ayaten ken ipaayyo ti kasapulan ni baketyo
Ibaga ti Biblia a “masapul nga ayaten ti asawa a lalaki ti asawana a babai kas iti bukodna a bagi.” (Efeso 5:28, 29) Ania ti kayat a sawen dayta? I-play ti VIDEO, sa pagsaritaan ti sumaruno a saludsod.
Kasano a maipakita ti asawa a lalaki nga ay-ayaten ken ipatpategna ni baketna?
Basaen ti Colosas 3:12, sa pagsaritaan daytoy a saludsod:
Kasano a maipakita ti maysa nga asawa a lalaki dagitoy a kababalin?
5. Assawa a babbai—ayaten ken respetuenyo ni lakayyo
Iparparegta ti Biblia a respetuen ti asawa a babai ni lakayna, agserserbi man ken Jehova wenno saan. Basaen ti 1 Pedro 3:1, 2, sa pagsaritaan dagitoy a saludsod:
No saan nga agdaydayaw ken Jehova ni lakaymo, sigurado a kayatmo nga agserbinto met ken Jehova. Panagkunam, ania ngata ti mas epektibo—kanayon a kasabaam wenno agbalinka a nasingpet, naasi, ken narespeto nga asawa? Apay?
Mabalin a makaaramid iti nasayaat a desision ti agassawa no agkaduada. Ngem no dadduma, mabalin a saan a kayat ti asawa a babai ti desision ni lakayna. Mabalin nga iyebkasna ti pampanunotenna iti kalmado ken narespeto a pamay-an. Ngem laglagipenna koma a ni lakayna ti nangtedan ni Jehova iti responsabilidad nga agdesision para iti pagsayaatan ti pamiliada. Aramidenna ti amin a kabaelanna a mangsuporta iti desision ni lakayna. Makatulong dayta tapno agbalin a naragsak ti pamiliada. Basaen ti 1 Pedro 3:3-5, sa pagsaritaan daytoy a saludsod:
Ania ti marikna ni Jehova no resrespetuen ti asawa a babai ni lakayna?
6. Masolusionanyo dagiti problema ti panagasawayo
Awan ti perpekto a panagasawa. Isu a masapul nga agtinnulong dagiti agassawa tapno masolusionan dagiti problemada. I-play ti VIDEO, sa pagsaritaan dagiti sumaruno a saludsod.
Iti video, ania dagiti mangipakita nga umad-adayon ti rikna ti agassawa iti maysa ken maysa?
Ania dagiti inaramidda tapno lumagda ti relasionda?
Basaen ti 1 Corinto 10:24 ken Colosas 3:13. Kalpasan a mabasa ti tunggal teksto, pagsaritaan daytoy a saludsod:
Kasano a makatulong daytoy a balakad tapno lumagda ti panagasawa?
Ibagbaga ti Biblia a padayawantayo ti maysa ken maysa. Padpadayawantayo ti maysa no nasayaat ken narespeto ti panangtratotayo kenkuana. Basaen ti Roma 12:10, sa pagsaritaan dagitoy a saludsod:
Masapul kadi nga urayen ti maysa a ti asawana ti umuna a mangpadayaw kenkuana? Apay?
KUNA TI DADDUMA: “Saanen a kas iti dati ti kinadekketmi nga agassawa.”
Kasanom a mailawlawag a makatulong ti Biblia kadakuada?
SUMARIO
Naragsak ti agassawa no ayaten ken respetuenda ti maysa ken maysa ken surotenda dagiti prinsipio ti Biblia.
Rebiu
Kasano a makatulong ti asawa a lalaki tapno agbalin a naragsak ti panagasawada?
Kasano a makatulong ti asawa a babai tapno agbalin a naragsak ti panagasawada?
No adda asawam, ania a prinsipio ti Biblia ti makatulong tapno lumagda ti panagasawayo?
AGDISKOBREKA PAY
Ammuem dagiti makatulong a suhestion tapno agbalin a naragsak ti pamiliayo.
Buyaem ti maysa a music video a mangipakita kadagiti bendision a maawatyo no surotenyo ti balakad ti Dios iti panagasawayo.
Kitaem no ania ti kayat a sawen ti panagpasakup iti kinaulo ti asawa a lalaki.
“Babbai, Apay a Rumbeng a Managpasakupkayo?” (Ti Pagwanawanan, Mayo 15, 2010)
Kasano a nasolbar ti maysa nga agassawa dagiti nakaro a problemada, agraman ti panagdiborsiodo?