Ti Panangmatmat iti Biblia

Homoseksualidad​—Apay ketdin a Saan?

“Diak patien nga ipatpateg ti Dios ti seksual a pannakaammo ti maysa. Ipatpategna ti panagbiagtayo. Ket saan a ti sekso ti kangrunaan.”​—Miembro iti homoseksual a grupo ti panagadal ti Biblia.

UMAD-ADU a tattao ti manganamong iti homoseksualidad kas sabali nga estilo ti panagbiag. Umanamong kadi ti Dios?

Nupay adut’ mangbalbaliw iti panangmatmatda ken dadduma ti agduadua, nakalawlawag ti panangmatmat ti Biblia: “Dikanto kaidda ti lalaki a kas ibilang a babai. Daytoy ti kinarimon,” kuna ti Biblia. (Levitico 18:22, The New Jerusalem Bible) Awan pammakawan, awan panangamin, nalawag​—ti homoseksualidada makarimon iti imatang ti Dios. Kadagiti Israelitas idi ugma iti sidong ti Linteg ni Moises, ipapatay ti dusa. (Levitico 20:13) Ket idi dimteng ti Kinakristiano, nagtultuloy ti panangkondenar ti Dios iti homoseksualidad.​—1 Corinto 6:9, 10.

Busoren ti Dios​—Apay?

Ngem apay a kasta unay ti panangbusor ti Dios iti dayta? Naibaga ti maysa a rason idiay Isaias 48:17: “Siak ni Jehova a Diosmo, Daydiay mangisuro kenka a maipaay iti gunggonam, Daydiay mangiturong kenka iti dalan a papanam koma.” Dagidiay dagiti sasao ti Autor iti sapasap a linlinteg iti nakaparsuaan. Ammona ti pisikal, mental, emosional ken naespirituan a pannakabukeltayo. Busorenna ti homoseksualidad agsipud ta, malaksid kadagiti dadduma a bambanag, dina gunggonaan ti indibidual. Patalgedan daytoy ti panangrepaso iti surat ni apostol Pablo kadagiti Kristiano nga agnanaed idiay Roma. Isut’ nagsurat:

“Gapu iti daytoy ti Dios binaybay-anna ida kadagiti derderrep a nakababain, ta uray dagiti babbai nga adda kadakuada sinuktanda ti nakaparsuaan a pannakaaramatda iti maisalungasing iti nakaparsuaan; ket kasta met dagiti lallaki, binaybay-anda ti nakaparsuaan dagiti babbai, simgedda iti derrep iti maysa ken maysa kadakuada, nga inaramidda ti nakarugrugit a pamay-an a lallaki ken lallaki, ket inawatda kadagiti bagbagida met laeng ti maikari a gunggona ti pannakaallilawda. Ket agsipud ta dida kinayat nga inammo ti umiso a pannakaammo iti Dios, ti Dios binaybay-anna ida iti maysa a nakem a dakes, tapno aramidenda dagiti bambanag a di maipaay.”​—Roma 1:26-28.

Paliiwenyo, a ti homoseksualidad saan laeng a “nakababain” “nakarugrugit,” ken “di maipaay” no di ket “maisalungasing iti nakaparsuaan.” Maipapan kadagitoy a bersikulo, maysa a report manipud iti Church of England kunaenna: “Ti ibaga ni Pablo a ‘maisalungasing iti nakaparsuaan’ ket ‘maisalungasing iti nakaparsuaan’ sigun iti panggep ti Dios a nangparsuaan iti sangatauan. Amin a kababalin ti homoseksual ket maisupadi iti panggep ti Dios iti panamarsua.” Awagan ni antropologo Weston LaBarre dayta a “pannakapaay ti nasken a biolohikal a nakaparsuaan ti maysa ken dagiti dadduma.” Maitunos daytoy iti kaipapanan ti Griego a sao a nausar iti Biblia ken naipatarus a “gagangay” wenno, “sigun iti nakaparsuaan.”

Di pakasdaawan nga aniaman a “pannakaisupadi iti panggep ti Dios a panamarsua” agapit ti dakes a resulta (kas impakita ti nakaay-ay-ay a rekord ti tao iti aglawlawna). Dagiti homoseksual ‘umawatda kadagiti bagbagida met laeng ti maikari a gunggona ti pannakaallilawda.’ Kayatna a sawen, maikontra iti seksual a nakaparsuaan ti panagbiagda; gapuna, maysa a panagbiag a di anamongan ti Dios. Mainayon pay, madangranda iti pisikal gapu iti kinadakesda.b

Dakes a Bunga

Kunaen met ni Pablo a dagiti homoseksual “simgedda [literal, a simgedda] iti derrep iti maysa ken maysa kadakuada.” No kasano a ti dakes a panagpampanunot gargarienna ti dakes a tarigagay uray kadagiti relasion ti babai ken lalaki, ti panangsegsegga iti dakes a seksual a relasion, ad-adda pay a gargarienna ti kasta unay a kinaderrep. Ti “A Perilous Double Love Life,” maysa nga artikulo nga impablaak ti magasin a Newsweek, kinunana: “Dagiti lallaki ken babbai a duat’ seksona masansan a saritaenda ti ‘nakaro’ a pannakagargarida, ti ‘naiduma a bileg’ a mapadasanda iti kaseksoda. Malagip ni James dayta a ‘kasla panag-sky diving. Makabartek, makaulaw.’” No magargari, adu a homoseksual ti adut’ parehada (daddumat’ ginasut), ket kadagiti dadduma ti pannakagargarida ti mangiduron kadakuada a makidenna a mamin-adu iti inaldaw, uray pay kadagiti ganggannaet. Daytoy a kinalulok saan laeng a mangipaay iti sakit, kas iti hepatitis, no di ket gargarienna ti panagimon, di kinatalged, ken panagladingit, uray pay kadagiti nalulok a relasion dagiti babbai ken lallaki.

Apaman a ti maysa a tao “agtarigagay iti kinaderrep,” isut’ maadipenen. (1 Tesalonica 4:5) Agtungpal iti ania? No maipapan iti AIDS, inamin ti maysa a homoseksual: “Uray pay no mapasanguan iti nakaay-ay-ay, nakaam-amak nga ipapatay, nakabilbileg ti tarigagay iti sekso.” Ipalagip daytoy ti pakdaar ti Biblia: “Saan koma ngarud nga agari ti basol iti bagitayo a matay tapno tungpalenyo dagiti derrepna.”​—Roma 6:12.

Yantangay ti imoralidad iti sekso naibatay a nangnangruna iti panangpennek iti bagi, masansan nga agturong dayta kadagiti dakes nga aramid. Ket agsipud ta daytat’ kadawyanen ti managbasol a tao, no gagangayen, mapukawen ti ragsak. Gapuna, dadduma a homoseksual agtungpalda pay iti sadomasochism ken dadduma pay a dakes nga ar-aramid.c Kuna ti maysa a komentario a “ti epekto dayta a dakes ken di maitunos iti nakaparsuaan a derrep . . . padaksenna ti isip; pagbalinenna ti tao nga animal; dadaelenna ti nasayaat a panagpampanunot.” Imbilang ti maysa nga eskolar ti Biblia ti homoseksualidad kadagiti “krimen, a maikontra unay iti panagrason, nakaparsuaan, ken iti pagimbaganda ken pagimbagan dagiti dadduma.”

Mangyeg ti Talna dagiti Pagalagadan ti Biblia

Agyamantayo ta saan a balbaliwan ti Dios dagiti pagalagadanna tapno penkenna laeng ti aglabas a pagayatan wenno dakes a tarigagay dagiti tattao. No kasano a dina anamongan ti panangrugit iti daga wenno ti panagulbod gapu laeng ta adut’ agtarigagay iti dayta, kasta met dina palugodan ti homoseksualidad nupay adut’ agregget a mangitandudo iti dayta. Aniaman ti kurso nga itandudo ti tao, kayat ni Jehova nga agdayawtay kenkuana ken gunggonaantay ti bagitay met laeng.

Siyayaman, linaksid dagiti dadduma dagita nga aramid ket makitunosda “iti nasayaat a sursuro” a masarakan iti Sao ti Dios. (1 Timoteo 1:10; 1 Corinto 6:9-11) Kas kinuna ti maysa a dati a homoseksual: “Ti mangparagsak kaniak itan isut’ kaadda ti nadalus a konsiensiak, ken ammok a ti panagbiagko ket makaay-ayo iti Mannakabalin-amin a Dios.”

[Dagiti Footnote]