14. Kasano a maliwliwatayo babaen iti sasao dagiti natayan iti ay-ayaten?

¹⁴ Ngarud, maawatantayo no apay a mabalin a marigatantayo a mangpanunot no ania ti ibagatayo iti maysa a nakaro ti ladingitna. Ngem kuna ti Biblia a ti “dila dagidiay masirib ket makapaimbag.” (Prov. 12:18) Nadlaw ti dadduma a nasayaat a pangliwliwa dagiti linaon ti broshur a No Adda Matay nga Ay-ayatenyo.c Ngem kaaduanna a ti kasayaatan a maaramidam ket ti ‘pannakipagsangit kadagiti agsangit.’ (Roma 12:15) Kuna ti sister a ni Gaby, a natayan iti asawa: “Isangsangitko lattan dagiti marikriknak, isu a maliwliwaak no makipagsangit kaniak dagiti gagayyemko. Mariknak no kua a saanak nga agmaymaysa iti panagladingitko.”

20. Apay a makaliwliwa unay dagiti kari ni Jehova?

²⁰ Makaliwliwa a maammuan a ni Jehova, ti Dios ti amin a liwliwa, punasennanto ti amin a ladingit ken mangipaayto iti permanente a liwliwa inton “amin dagidiay adda kadagiti pakalaglagipan a tanem mangngegdanto ti timek [ni Kristo] ket rummuarda.” (Juan 5:28, 29) Ikarkari ti Dios a pukawennanto wenno “alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” (Isa. 25:8) Kalpasanna, imbes a “makipagsangitto” ti amin a tattao ditoy daga kadagiti agsangit, “makipagrag-odanto” kadagiti agrag-o.​—Roma 12:15.